ດານີເອນ 5:1-31
5 ໃນຕອນທີ່ເບນຊັດຊາເຣເປັນກະສັດ+ ລາວໄດ້ຈັດງານລ້ຽງໃຫຍ່ໃຫ້ພວກຜູ້ປົກຄອງຂອງລາວ 1.000 ຄົນ. ລາວນັ່ງຢູ່ຕໍ່ໜ້າເຂົາເຈົ້າແລະກິນເຫຼົ້າແວງນຳກັນກັບເຂົາເຈົ້າ.+
2 ຕອນທີ່ເບນຊັດຊາເຣເມົາ ລາວໄດ້ສັ່ງໃຫ້ເອົາຈອກເງິນກັບຈອກຄຳທີ່ເນບູກາດເນັດຊາພໍ່*ຂອງລາວເອົາມາຈາກວິຫານໃນເມືອງເຢຣູຊາເລັມອອກມາ+ ເພື່ອໃຫ້ລາວກັບພວກຜູ້ປົກຄອງ ແລະໃຫ້ພວກເມຍກັບພວກເມຍນ້ອຍ*ຂອງລາວໃສ່ເຫຼົ້າແວງກິນ.
3 ແລ້ວເຂົາເຈົ້າກໍເອົາຈອກຄຳທີ່ເອົາມາຈາກວິຫານຂອງພະເຈົ້າຢູ່ເມືອງເຢຣູຊາເລັມອອກມາ. ກະສັດກັບພວກຜູ້ປົກຄອງແລະພວກເມຍກັບພວກເມຍນ້ອຍຂອງລາວກໍເອົາຈອກເຫຼົ່ານັ້ນມາໃສ່ເຫຼົ້າແວງກິນ.
4 ເຂົາເຈົ້າກິນເຫຼົ້າແວງແລ້ວພາກັນສັນລະເສີນພະເຈົ້າຂອງເຂົາເຈົ້າທີ່ເຮັດຈາກເງິນ ຄຳ ເຫຼັກ ທອງແດງ ໄມ້ ແລະຫີນ.
5 ທັນໃດນັ້ນກໍມີມືຄົນປາກົດຂຶ້ນມາ ແລ້ວມືນັ້ນກໍເລີ່ມຂຽນໂຕໜັງສືໃສ່ຝາໃນວັງຂອງກະສັດທີ່ມີຕະກຽງຕັ້ງຢູ່ໃກ້ໆ. ກະສັດເຫັນມືທີ່ກຳລັງຂຽນຢູ່ນັ້ນ
6 ແລ້ວກະສັດກໍຢ້ານຈົນໜ້າຈືດ* ແລະຂາກໍສັ່ນຈົນຢືນເກືອບບໍ່ໄດ້.+
7 ກະສັດໄດ້ຮ້ອງດັງໆສັ່ງພວກໝໍມໍກັບພວກການເດອາທີ່ທຳນາຍໂດຍເບິ່ງດວງດາວໃຫ້ມາຫາ.+ ກະສັດເວົ້າກັບພວກທີ່ປຶກສາຂອງບາບີໂລນວ່າ: “ຖ້າໃຜອ່ານແລະແປຄວາມໝາຍຂອງໂຕໜັງສືເຫຼົ່ານີ້ໄດ້ ຂ້ອຍຈະເອົາຊຸດສີມ່ວງ*ກັບສາຍຄໍຄຳໃຫ້ລາວໃສ່+ ແລະຈະໃຫ້ລາວເປັນຜູ້ປົກຄອງອັນດັບທີ 3 ຂອງອານາຈັກນີ້.”+
8 ພວກທີ່ປຶກສາທຸກຄົນກໍເຂົ້າມາເບິ່ງໂຕໜັງສືທີ່ຂຽນຢູ່ຝາ ແຕ່ເຂົາເຈົ້າກໍອ່ານແລະແປຄວາມໝາຍບໍ່ໄດ້.+
9 ກະສັດເບນຊັດຊາເຣຢ້ານຫຼາຍຈົນໜ້າຈືດ ແລະພວກຜູ້ປົກຄອງກໍພາກັນສັບສົນວຸ່ນວາຍ.+
10 ເມື່ອລາຊີນີ*ຮູ້ວ່າກະສັດແລະພວກຜູ້ປົກຄອງກຳລັງເວົ້າເລື່ອງຫຍັງກັນ. ລາວກໍເຂົ້າມາໃນຫ້ອງທີ່ເຂົາເຈົ້າກິນລ້ຽງແລະເວົ້າວ່າ: “ຂໍໃຫ້ກະສັດມີອາຍຸຍືນຍາວ. ທ່ານບໍ່ຕ້ອງຢ້ານຈົນໜ້າຈືດ.
11 ໃນອານາຈັກຂອງທ່ານມີຜູ້ຊາຍ*ຄົນໜຶ່ງທີ່ມີພະລັງອຳນາດຂອງພວກພະເຈົ້າທີ່ສັກສິດ. ໃນສະໄໝທີ່ພໍ່ຂອງທ່ານປົກຄອງ ຫຼາຍຄົນຍອມຮັບວ່າຜູ້ຊາຍຄົນນີ້ມີຄວາມຮູ້ ຄວາມເຂົ້າໃຈ ແລະມີສະຕິປັນຍາຄືກັບພະເຈົ້າ.+ ກະສັດເນບູກາດເນັດຊາພໍ່ຂອງທ່ານໄດ້ແຕ່ງຕັ້ງລາວໃຫ້ເປັນຫົວໜ້າຂອງພວກໝໍຄາຖາອາຄົມ ພວກໝໍມໍ ແລະພວກການເດອາທີ່ທຳນາຍໂດຍເບິ່ງດວງດາວ.+ ພໍ່ຂອງທ່ານໄດ້ເຮັດແນວນັ້ນແທ້ໆ.
12 ຜູ້ນັ້ນແມ່ນດານີເອນທີ່ກະສັດເນບູກາດເນັດຊາໄດ້ຕັ້ງຊື່ໃຫ້ວ່າເບນເຕຊັດຊາເຣ.+ ລາວມີສະຕິປັນຍາແລະຄວາມສາມາດພິເສດ ມີຄວາມຮູ້ແລະຄວາມເຂົ້າໃຈທີ່ຈະແປຄວາມຝັນ ແກ້ຄຳປິດສະໜາ ແລະແກ້ຄຳທີ່ເປັນບັນຫາຍາກໆໄດ້.*+ ຕອນນີ້ ຂໍໃຫ້ທ່ານເອີ້ນດານີເອນມາ ແລ້ວລາວຈະແປຄວາມໝາຍຂອງໂຕໜັງສືເຫຼົ່ານີ້ໃຫ້ທ່ານ.”
13 ຈາກນັ້ນ ດານີເອນກໍຖືກພາມາຫາກະສັດ. ກະສັດຖາມລາວວ່າ: “ເຈົ້າແມ່ນດານີເອນຜູ້ທີ່ພໍ່ຂ້ອຍເຄີຍຈັບມາເປັນຊະເລີຍຈາກຢູດາແມ່ນບໍ?+
14 ຂ້ອຍໄດ້ຍິນວ່າເຈົ້າມີພະລັງອຳນາດຂອງພວກພະເຈົ້າຕ່າງໆ+ ມີຄວາມຮູ້ ຄວາມເຂົ້າໃຈ ແລະມີສະຕິປັນຍາຫຼາຍ.+
15 ພວກທີ່ປຶກສາກັບພວກໝໍມໍຖືກພາມາຫາຂ້ອຍ ເພື່ອຈະອ່ານແລະແປຄວາມໝາຍຂອງໂຕໜັງສືເຫຼົ່ານີ້ ແຕ່ເຂົາເຈົ້າເຮັດບໍ່ໄດ້.+
16 ແຕ່ຂ້ອຍໄດ້ຍິນວ່າເຈົ້າສາມາດແປຄວາມໝາຍເລື່ອງທີ່ເປັນຄວາມລັບ+ແລະແກ້ຄຳທີ່ເປັນບັນຫາຍາກໆໄດ້. ຖ້າເຈົ້າອ່ານແລະແປຄວາມໝາຍຂອງໂຕໜັງສືເຫຼົ່ານີ້ໃຫ້ຂ້ອຍໄດ້ ຂ້ອຍຊິເອົາຊຸດສີມ່ວງກັບສາຍຄໍຄຳໃຫ້ເຈົ້າໃສ່ ແລະຈະໃຫ້ເຈົ້າເປັນຜູ້ປົກຄອງອັນດັບທີ 3 ຂອງອານາຈັກນີ້.+
17 ດານີເອນຕອບກະສັດວ່າ: “ຂໍໃຫ້ທ່ານເອົາຂອງຂວັນນັ້ນໄວ້ແລະເອົາໃຫ້ຄົນອື່ນ ແຕ່ຂ້ອຍຈະອ່ານແລະແປຄວາມໝາຍຂອງໂຕໜັງສືເຫຼົ່ານີ້ໃຫ້ທ່ານ.
18 ພະເຈົ້າສູງສຸດໄດ້ເອົາອານາຈັກນີ້ ຄວາມຍິ່ງໃຫຍ່ ກຽດຕິຍົດ ແລະຄວາມນັບຖືໃຫ້ກະສັດເນບູກາດເນັດຊາພໍ່ຂອງທ່ານ.+
19 ເພິ່ນເຮັດໃຫ້ກະສັດເນບູກາດເນັດຊາຍິ່ງໃຫຍ່ ຄົນໃນທຸກຊາດແລະທຸກພາສາຈຶ່ງຢ້ານລາວຈົນໂຕສັ່ນ.+ ລາວຢາກຂ້າຜູ້ໃດລາວກໍຂ້າໂລດ ແລະຢາກໃຫ້ຜູ້ໃດມີຊີວິດຢູ່ ລາວກໍປ່ອຍໃຫ້ຜູ້ນັ້ນມີຊີວິດຕໍ່ໄປ. ລາວຢາກຍົກຍ້ອງຫຼືເຮັດໃຫ້ຜູ້ໃດຂາຍໜ້າ ລາວກໍເຮັດຕາມໃຈໂລດ.+
20 ແຕ່ເມື່ອລາວຍິ່ງຈອງຫອງແລະບໍ່ຍອມຟັງໃຜຈົນເຮັດເກີນສິດ+ ບັນລັງແລະກຽດຕິຍົດຂອງກະສັດກໍຖືກຍຶດໄປຈາກລາວ.
21 ລາວຖືກໄລ່ໜີບໍ່ໃຫ້ຢູ່ນຳຄົນ. ໃຈຂອງລາວຖືກປ່ຽນໃຫ້ເປັນຄືກັບໃຈຂອງສັດປ່າ ແລະລາວຕ້ອງຢູ່ກັບຝູງລາປ່າ. ລາວກິນຫຍ້າຄືກັບງົວ ແລະຕົນໂຕລາວປຽກແຕ່ນ້ຳໝອກຈົນກວ່າລາວຈະສຳນຶກວ່າພະເຈົ້າສູງສຸດເປັນຜູ້ປົກຄອງອານາຈັກຂອງມະນຸດ ແລະເພິ່ນຢາກເອົາອຳນາດການປົກຄອງໃຫ້ຜູ້ໃດ ເພິ່ນກໍໃຫ້ໄດ້ຕາມທີ່ເພິ່ນຕ້ອງການ.+
22 ສ່ວນທ່ານເບນຊັດຊາເຣລູກຊາຍ*ຂອງເນບູກາດເນັດຊາ ເຖິງວ່າທ່ານຮູ້ເລື່ອງທັງໝົດນີ້ແລ້ວ ແຕ່ທ່ານກໍບໍ່ໄດ້ຖ່ອມໃຈ.
23 ທ່ານບໍ່ໃຫ້ກຽດພະເຈົ້າທີ່ຢູ່ໃນສະຫວັນ+ ແລະສັ່ງໃຫ້ເອົາຈອກຂອງເພິ່ນທີ່ຢູ່ໃນວິຫານອອກມາໃຊ້.+ ທ່ານກັບພວກຜູ້ປົກຄອງແລະພວກເມຍກັບພວກເມຍນ້ອຍຂອງທ່ານໄດ້ເອົາຈອກເຫຼົ່ານັ້ນມາໃສ່ເຫຼົ້າແວງກິນ ແລ້ວພາກັນສັນລະເສີນພະເຈົ້າທີ່ເຮັດຈາກເງິນ ຄຳ ເຫຼັກ ທອງແດງ ໄມ້ ແລະຫີນ. ພະເຈົ້າເຫຼົ່ານັ້ນບໍ່ເຫັນຫຍັງ ບໍ່ໄດ້ຍິນຫຍັງ ແລະບໍ່ຮູ້ຈັກຫຍັງ.+ ທ່ານບໍ່ໄດ້ໃຫ້ກຽດພະເຈົ້າຜູ້ທີ່ໃຫ້ຊີວິດທ່ານ+ ເຊິ່ງເປັນຜູ້ທີ່ມີອຳນາດຄວບຄຸມທຸກສິ່ງທີ່ທ່ານເຮັດ.
24 ພະເຈົ້າຈຶ່ງໃຫ້ມີມືມາຂຽນໂຕໜັງສືທີ່ທ່ານເຫັນຢູ່ຝາ.+
25 ໂຕໜັງສືເຫຼົ່ານີ້ອ່ານວ່າ ເມເນ ເມເນ ເທເຄນ ແລະປາສິນ.
26 ຕໍ່ໄປນີ້ແມ່ນຄວາມໝາຍຂອງຄຳເຫຼົ່ານີ້. ຄຳວ່າ “ເມເນ” ໝາຍຄວາມວ່າພະເຈົ້າໄດ້ນັບມື້ທີ່ທ່ານຈະປົກຄອງແລະເພິ່ນໄດ້ເຮັດໃຫ້ມັນສິ້ນສຸດລົງແລ້ວ.+
27 ຄຳວ່າ “ເທເຄນ” ໝາຍຄວາມວ່າພະເຈົ້າໄດ້ຊັ່ງທ່ານຢູ່ເທິງຊິງແລ້ວ ແຕ່ນ້ຳໜັກຂອງທ່ານບໍ່ຮອດ.
28 ຄຳວ່າ “ເປເຣັດ”* ໝາຍຄວາມວ່າພະເຈົ້າໄດ້ແບ່ງແຍກອານາຈັກຂອງທ່ານ ແລະເອົາໃຫ້ຄົນເມເດຍແລະເປີເຊຍແລ້ວ.+
29 ຈາກນັ້ນ ເບນຊັດຊາເຣກໍສັ່ງໃຫ້ເອົາຊຸດສີມ່ວງກັບສາຍຄໍຄຳມາໃສ່ໃຫ້ດານີເອນ. ແລ້ວເຂົາເຈົ້າກໍປະກາດວ່າດານີເອນເປັນຜູ້ປົກຄອງອັນດັບທີ 3 ຂອງອານາຈັກນີ້.+
30 ໃນຄືນນັ້ນ ເບນຊັດຊາເຣກະສັດຂອງພວກການເດອາກໍຖືກຂ້າ.+
31 ແລ້ວດາຣິອຸດ+ຄົນເມເດຍກໍຖືກແຕ່ງຕັ້ງໃຫ້ປົກຄອງອານາຈັກນີ້. ຕອນນັ້ນ ລາວອາຍຸປະມານ 62 ປີ.
ຂໍ ຄວາມ ໄຂ ເງື່ອນ
^ ອາດແປວ່າ “ພໍ່ຕູ້; ຜູ້ທີ່ປົກຄອງກ່ອນໜ້າ”
^ ເບິ່ງສ່ວນອະທິບາຍຄຳສັບ
^ ຫຼື “ສີໜ້າຂອງກະສັດກໍປ່ຽນໄປ”
^ ສີມ່ວງເປັນສີຂອງກະສັດແລະຍັງສະແດງເຖິງຄວາມຮັ່ງມີແລະກຽດຕິຍົດ
^ ອາດໝາຍເຖິງແມ່ຂອງກະສັດ
^ ຫຼື “ຄົນທີ່ມີຄວາມສາມາດ”
^ ແປຕາມໂຕວ່າ “ແກ້ຂອດໄດ້”
^ ອາດແປວ່າ “ຫຼານຊາຍ; ຜູ້ສືບທອດບັນລັງ”
^ ໃນພາສາອາຣາເມອິກຄຳວ່າ “ເປເຣັດ” ເປັນຮູບແບບຄຳທີ່ມີຈຳນວນໜ້ອຍຂອງຄຳວ່າ “ປາສິນ” ໃນຂໍ້ 25