ນາງຣຸດ 2:1-23
2 ນາໂອມີມີພີ່ນ້ອງທາງຜົວຄົນໜຶ່ງຊື່ໂບອາດ.+ ລາວເປັນຄົນຮັ່ງຫຼາຍ.
2 ຣຸດຖາມນາໂອມີວ່າ: “ລູກຂໍໄປເກັບເຂົ້າເຮ່ຍຢູ່ທົ່ງນາ+ນຳຫຼັງຄົນກ່ຽວເຂົ້າທີ່ອີ່ຕົນລູກໄດ້ບໍ່?” ນາໂອມີຕອບວ່າ: “ໄປໂລດລູກ.”
3 ລາວກໍອອກໄປທົ່ງນາ ແລ້ວເລີ່ມເກັບເຂົ້າເຮ່ຍນຳຫຼັງຄົນທີ່ກ່ຽວເຂົ້າ ແລະບັງເອີນນາທີ່ລາວໄປເກັບເຂົ້ານັ້ນເປັນນາຂອງໂບອາດ+ ເຊິ່ງເປັນພີ່ນ້ອງຂອງເອລີເມເລັກ.+
4 ຕອນນັ້ນໂບອາດອອກໄປທົ່ງນາທີ່ຢູ່ນອກເມືອງເບັດເລເຮັມ. ເມື່ອໄປຮອດ ລາວກໍເວົ້າກັບຄົນທີ່ກ່ຽວເຂົ້າວ່າ: “ຂໍໃຫ້ພະເຢໂຫວາອວຍພອນພວກເຈົ້າ.” ເຂົາເຈົ້າກໍຕອບລາວວ່າ: “ຂໍໃຫ້ພະເຢໂຫວາອວຍພອນເຈົ້າຄືກັນ.”
5 ໂບອາດຖາມຜູ້ທີ່ເບິ່ງແຍງຄົນກ່ຽວເຂົ້າວ່າ: “ຜູ້ຍິງຄົນນັ້ນແມ່ນໃຜ?”
6 ລາວຕອບວ່າ: “ຜູ້ຍິງຄົນນັ້ນເປັນຄົນໂມອາບ+ທີ່ມານຳນາໂອມີ.
7 ລາວເຂົ້າມາຖາມວ່າ ‘ຂ້ອຍຂໍເກັບເຂົ້າເຮ່ຍ*+ໄດ້ບໍ່?’ ລາວເກັບຕັ້ງແຕ່ເຊົ້າແລະຫາກໍນັ່ງເຊົາເມື່ອຍມື້ກີ້ນີ້.”
8 ໂບອາດຈຶ່ງເວົ້າກັບຣຸດວ່າ: “ລູກເອີ້ຍ ບໍ່ຕ້ອງໄປເກັບຢູ່ບ່ອນອື່ນເດີ້. ໃຫ້ໄປເກັບໃກ້ໆບ່ອນທີ່ພວກຜູ້ຍິງເຮັດວຽກ.+
9 ໃຫ້ເບິ່ງວ່າເຂົາເຈົ້າກ່ຽວເຂົ້າຢູ່ໃສ ແລ້ວກໍນຳໄປ. ຂ້ອຍສັ່ງພວກຜູ້ຊາຍແລ້ວວ່າບໍ່ໃຫ້ມາກວນ*ເຈົ້າ. ຖ້າຫິວນ້ຳກໍໃຫ້ໄປກິນຢູ່ໃນໄຫທີ່ພວກຜູ້ຊາຍຕັກມາໄວ້.”
10 ຣຸດໝູບໜ້າລົງພື້ນແລະເວົ້າວ່າ: “ເປັນຫຍັງທ່ານຈຶ່ງເຮັດດີຕໍ່ຂ້ອຍແລະເປັນຫ່ວງຂ້ອຍທັງໆທີ່ຂ້ອຍເປັນຄົນຕ່າງຊາດ?”+
11 ໂບອາດຕອບວ່າ: “ຂ້ອຍໄດ້ຍິນເລື່ອງຂອງເຈົ້າໝົດແລ້ວທີ່ເຈົ້າເຮັດຕໍ່ແມ່ຍ່າຫຼັງຈາກທີ່ຜົວຂອງເຈົ້າຕາຍ ແລະເຈົ້າກໍໄດ້ຈາກພໍ່ຈາກແມ່ແລະຈາກຍາດຕິພີ່ນ້ອງມາຢູ່ບ່ອນທີ່ເຈົ້າບໍ່ຮູ້ຈັກ.+
12 ຂໍໃຫ້ພະເຢໂຫວາຕອບແທນໃນສິ່ງທີ່ເຈົ້າໄດ້ເຮັດ+ ແລະຂໍໃຫ້ພະເຢໂຫວາພະເຈົ້າຂອງອິດສະຣາເອນໃຫ້ລາງວັນທີ່ຍິ່ງໃຫຍ່ກັບເຈົ້າ ເພາະເຈົ້າໄດ້ເຂົ້າມາຢູ່ພາຍໃຕ້ການປົກປ້ອງເບິ່ງແຍງ*ຂອງເພິ່ນ.”+
13 ຣຸດຈຶ່ງເວົ້າວ່າ: “ຂອບໃຈທີ່ທ່ານເຮັດດີຕໍ່ຂ້ອຍຫຼາຍແທ້ໆ. ທ່ານເຮັດໃຫ້ຂ້ອຍຮູ້ສຶກອຸ່ນໃຈແລະເວົ້າໃຫ້ກຳລັງໃຈຂ້ອຍທັງໆທີ່ຂ້ອຍບໍ່ແມ່ນຄົນຮັບໃຊ້ຂອງທ່ານຊ້ຳ.”
14 ເມື່ອຮອດຍາມກິນເຂົ້າ ໂບອາດເວົ້າກັບຣຸດວ່າ: “ມາກິນເຂົ້າແມ້ລູກ. ເອົາເຂົ້າຈີ່ຈ້ຳກັບເຫຼົ້າແວງສົ້ມ.” ຣຸດຈຶ່ງນັ່ງທາງຂ້າງຄົນກ່ຽວເຂົ້າ. ໂບອາດຍື່ນເຂົ້າຂົ້ວໃຫ້ຣຸດ ລາວກິນຈົນອີ່ມແຕ່ກໍຍັງເຫຼືອຢູ່.
15 ເມື່ອກິນເຂົ້າແລ້ວ ຣຸດກໍໄປເກັບເຂົ້າຕໍ່.+ ໂບອາດສັ່ງພວກຜູ້ຊາຍວ່າ: “ໃຫ້ລາວເກັບເຂົ້າທີ່ເຮ່ຍໂລດ ບໍ່ຕ້ອງຫ້າມລາວ.+
16 ໃຫ້ພວກເຈົ້າດຶງຮວງເຂົ້າອອກຈາກມັດປະໄວ້ໃຫ້ລາວເກັບແດ່ເດີ້ແລະບໍ່ຕ້ອງຫ້າມລາວ.”
17 ຣຸດເກັບເຂົ້າຈົນຮອດຕອນແລງ+ແລ້ວລາວກໍເອົາເຂົ້າໄປຟາດ. ລາວໄດ້ເຂົ້າບາເລປະມານ 1 ເອຟາ.*
18 ຈາກນັ້ນ ລາວກໍເອົາເຂົ້າກັບເມືອເຮືອນທີ່ຢູ່ໃນເມືອງແລະໃຫ້ແມ່ຍ່າເບິ່ງວ່າໄດ້ເຂົ້າຫຼາຍສ່ຳໃດ. ຣຸດຍັງໄດ້ເອົາຂອງກິນທີ່ລາວເກັບໄວ້+ຫຼັງຈາກທີ່ກິນອີ່ມແລ້ວອອກມາໃຫ້ແມ່ຍ່ານຳ.
19 ນາໂອມີຖາມຣຸດວ່າ: “ມື້ນີ້ລູກໄປເກັບເຂົ້າຢູ່ໃສ? ຢູ່ນາຂອງໃຜ? ຂໍໃຫ້ພະເຈົ້າອວຍພອນຄົນທີ່ເຮັດດີຕໍ່ລູກ.”+ ແລ້ວຣຸດກໍເລົ່າໃຫ້ນາໂອມີຟັງວ່າລາວໄປເກັບເຂົ້າຢູ່ໃນນາຂອງໃຜ. ຣຸດບອກວ່າ: “ມື້ນີ້ລູກໄປເກັບເຂົ້າຢູ່ນາຂອງຜູ້ຊາຍຄົນໜຶ່ງທີ່ຊື່ໂບອາດ.”
20 ນາໂອມີຈຶ່ງເວົ້າກັບຣຸດວ່າ: “ຂໍໃຫ້ພະເຢໂຫວາອວຍພອນລາວ ເພິ່ນເປັນພະເຈົ້າທີ່ສະແດງຄວາມຮັກທີ່ໝັ້ນຄົງສະເໝີຕໍ່ຄົນເປັນແລະຄົນຕາຍ.”+ ນາໂອມີເວົ້າຕໍ່ວ່າ: “ລາວເປັນພີ່ນ້ອງຂອງເຮົາ.+ ລາວເປັນຜູ້ໜຶ່ງທີ່ມີສິດໄຖ່ເຮົາໄດ້.”+
21 ຣຸດບອກວ່າ: “ລາວຍັງບອກລູກອີກວ່າ ‘ໃຫ້ເກັບເຂົ້າຢູ່ໃກ້ໆຄົນທີ່ເຮັດວຽກໃຫ້ຂ້ອຍຈົນເຂົາເຈົ້າກ່ຽວເຂົ້າແລ້ວ.’”+
22 ນາໂອມີຈຶ່ງເວົ້າກັບຣຸດວ່າ: “ດີແລ້ວລູກ ລູກຄວນຢູ່ກັບຜູ້ຍິງເຫຼົ່ານັ້ນແທນທີ່ຈະໄປເກັບເຂົ້າຢູ່ນາຂອງຜູ້ອື່ນແລ້ວຖືກກວນ.”
23 ດັ່ງນັ້ນ ຣຸດຈຶ່ງຢູ່ໃກ້ໆພວກຜູ້ຍິງທີ່ເຮັດວຽກໃຫ້ໂບອາດແລະເກັບເຂົ້າເຮ່ຍຈົນໝົດລະດູກ່ຽວເຂົ້າວີດ*+ ແລະຣຸດກໍຍັງຢູ່ກັບນາໂອມີຕໍ່ໄປ.+
ຂໍ
^ ຫຼືອາດແປວ່າ “ເກັບເຂົ້າທີ່ເຮ່ຍຢູ່ກອງມັດເຂົ້າ”
^ ຫຼື “ຈັບບາຍ”
^ ແປຕາມໂຕວ່າ “ກ້ອງປີກ”
^ 22 ລິດ. ເບິ່ງພາກຜະໜວກ ຂ14.
^ ເຂົ້າຊະນິດໜຶ່ງທີ່ໃຊ້ເຮັດເຂົ້າຈີ່ໄດ້
