ປະຖົມມະການ 18:1-33
18 ຫຼັງຈາກນັ້ນ ພະເຢໂຫວາ+ມາຫາອັບຣາຮາມຢູ່ເຂດຕົ້ນໄມ້ໃຫຍ່ທີ່ມາມເຣ.+ ຕອນນັ້ນເປັນເວລາທີ່ຮ້ອນທີ່ສຸດຂອງມື້ ແລະອັບຣາຮາມນັ່ງຢູ່ທາງເຂົ້າເຕັ້ນ.
2 ເມື່ອເງີຍໜ້າຂຶ້ນ ລາວເຫັນຜູ້ຊາຍ 3 ຄົນຢືນຢູ່ບໍ່ໄກປານໃດ.+ ເມື່ອເຫັນເຂົາເຈົ້າ ລາວກໍແລ່ນໄປຫາແລະໝູບໜ້າລົງພື້ນ.
3 ລາວເວົ້າວ່າ: “ພະເຢໂຫວາ ຖ້າພະອົງພໍໃຈລູກ ຂໍມາແວ່ເຮືອນລູກກ່ອນ.
4 ພວກເຮົາຊິເອົານ້ຳມາລ້າງຕີນໃຫ້ພວກທ່ານ+ ແລ້ວພວກທ່ານຊິໄດ້ພັກຜ່ອນຢູ່ກ້ອງຕົ້ນໄມ້ນີ້ກ່ອນ.
5 ຈັ່ງໃດພວກທ່ານກໍມາຢາມຂ້ອຍແລ້ວ ຂ້ອຍຈະເອົາເຂົ້າຈີ່ມາໃຫ້ພວກທ່ານກິນເພື່ອຊິໄດ້ມີແຮງ ແລ້ວຈຶ່ງຄ່ອຍໄປ.” ເຂົາເຈົ້າເວົ້າວ່າ: “ກໍດີ ເອົາຈັ່ງຊັ້ນກໍໄດ້.”
6 ອັບຣາຮາມຈຶ່ງຟ້າວໄປຫາຊາຣາຢູ່ເຕັ້ນແລະເວົ້າວ່າ: “ໄວໆ! ເອົາແປ້ງລະອຽດ 3 ກະຕ່າ*ມານວດເຮັດເຂົ້າຈີ່.”
7 ແລ້ວອັບຣາຮາມກໍແລ່ນໄປຫາຝູງງົວ ແລະເລືອກເອົາງົວທີ່ດີທີ່ສຸດໂຕໜຶ່ງ ແລ້ວເອົາໃຫ້ຄົນຮັບໃຊ້ໄປເຮັດອາຫານມາໃຫ້.
8 ລາວເອົາເນີຍກັບນົມແລະເອົາຊີ້ນງົວມາໃຫ້ແຂກກິນ. ຕອນທີ່ເຂົາເຈົ້າກຳລັງກິນ ອັບຣາຮາມກໍຢືນຢູ່ກ້ອງຕົ້ນໄມ້ໃກ້ໆເຂົາເຈົ້າ.+
9 ເຂົາເຈົ້າຖາມລາວວ່າ: “ຊາຣາ+ເມຍເຈົ້າຢູ່ໃສ?” ລາວຕອບວ່າ: “ຢູ່ໃນເຕັ້ນ.”
10 ແຂກຄົນໜຶ່ງເວົ້າວ່າ: “ຂ້ອຍຈະກັບມາຫາເຈົ້າໃນຍາມນີ້ປີໜ້າ ແລ້ວຊາຣາເມຍຂອງເຈົ້າຈະໄດ້ລູກຊາຍແລ້ວ.”+ ຕອນນັ້ນ ຊາຣານັ່ງຢູ່ທາງເຂົ້າເຕັ້ນເຊິ່ງຢູ່ທາງຫຼັງຄົນທີ່ເວົ້າກັບອັບຣາຮາມ ລາວກໍເລີຍໄດ້ຍິນ.
11 ອັບຣາຮາມກັບຊາຣາເຖົ້າຫຼາຍແລ້ວ+ ແລະຊາຣາກໍກາຍຍາມທີ່ຈະມີລູກແລ້ວ.*+
12 ຊາຣາກໍເລີຍຫົວແລະຄິດວ່າ: “ຂ້ອຍກັບນາຍຂອງຂ້ອຍກໍເຖົ້າແລ້ວ ຂ້ອຍຊິມີລູກໄດ້ຢູ່ບໍ?”+
13 ພະເຢໂຫວາເວົ້າກັບອັບຣາຮາມວ່າ: “ເປັນຫຍັງຊາຣາຈຶ່ງຫົວແລະເວົ້າວ່າ ‘ຂ້ອຍກໍເຖົ້າປານນີ້ ຊິມີລູກໄດ້ແທ້ໆບໍ?’
14 ມີຫຍັງທີ່ເຮົາເຢໂຫວາເຮັດບໍ່ໄດ້?+ ເຮົາຈະກັບມາຫາເຈົ້າໃນຍາມນີ້ປີໜ້າ ແລະຊາຣາຈະໄດ້ລູກຊາຍແລ້ວ.”
15 ແຕ່ຍ້ອນຊາຣາຢ້ານກໍເລີຍປະຕິເສດວ່າ: “ລູກບໍ່ໄດ້ຫົວ!” ແຕ່ພະເຈົ້າເວົ້າວ່າ: “ບໍ່ ເຈົ້າຫົວແທ້ໆ.”
16 ຕອນທີ່ແຂກກຳລັງຈະອອກໄປຈາກບ່ອນນັ້ນ ອັບຣາຮາມກໍໄປສົ່ງເຂົາເຈົ້າ ຈົນມາຮອດບ່ອນທີ່ແນມເຫັນເມືອງໂຊໂດມ.+
17 ພະເຢໂຫວາເວົ້າວ່າ: “ເຮົາຈະບໍ່ປິດບັງອັບຣາຮາມວ່າເຮົາກຳລັງຈະເຮັດຫຍັງ.+
18 ຍ້ອນອັບຣາຮາມຈະເປັນພໍ່ຂອງຄົນຊາດໃຫຍ່ ແລະຄົນທຸກຊາດທີ່ຢູ່ທົ່ວໂລກຈະໄດ້ພອນຍ້ອນລາວ.+
19 ເຮົາຮູ້ຈັກລາວດີວ່າ ລາວຈະສັ່ງລູກແລະຄົນໃນເຮືອນໃຫ້ໃຊ້ຊີວິດຕາມທີ່ເຮົາເຢໂຫວາຕ້ອງການ ໂດຍເຮັດສິ່ງທີ່ຖືກຕ້ອງແລະຍຸຕິທຳ.+ ແລ້ວເຮົາເຢໂຫວາຈະເຮັດຕາມທີ່ໄດ້ສັນຍາກັບອັບຣາຮາມ.”
20 ແລ້ວພະເຢໂຫວາກໍເວົ້າວ່າ: “ເຮົາໄດ້ຍິນຄົນຈົ່ມກ່ຽວກັບເມືອງໂຊໂດມແລະເມືອງໂກໂມຣາ.+ ຄົນໃນ 2 ເມືອງນັ້ນເຮັດບາບຮ້າຍແຮງຫຼາຍ.+
21 ເຮົາຊິລົງໄປເບິ່ງວ່າຊິແມ່ນຄືກັບທີ່ເຂົາເຈົ້າເວົ້າບໍ? ຖ້າບໍ່ແມ່ນ ເຮົາກໍຈະຮູ້.”+
22 ຈາກນັ້ນ ທັງສອງຄົນກໍອອກຈາກຫັ້ນ ແຕ່ພະເຢໂຫວາ+ຍັງຢູ່ກັບອັບຣາຮາມ.
23 ອັບຣາຮາມເຂົ້າໄປຖາມວ່າ: “ພະອົງຈະທຳລາຍຄົນດີພ້ອມກັບຄົນຊົ່ວແທ້ໆບໍ?
24 ຖ້າໃນເມືອງນັ້ນມີຄົນດີ 50 ຄົນ ພະອົງຈະທຳລາຍບໍ? ພະອົງຈະບໍ່ຍົກໂທດໃຫ້ເມືອງນັ້ນ ຍ້ອນມີຄົນດີ 50 ຄົນຢູ່ຫັ້ນບໍ?
25 ເປັນໄປບໍ່ໄດ້ດອກທີ່ພະອົງຈະທຳລາຍຄົນດີພ້ອມກັບຄົນຊົ່ວ. ພະອົງຈະບໍ່ໃຫ້ຄົນດີໄດ້ຮັບຜົນແບບດຽວກັບຄົນຊົ່ວດອກ.+ ພະອົງຈະບໍ່ເຮັດຈັ່ງຊັ້ນແນ່ນອນ.+ ພະອົງທີ່ເປັນຜູ້ຕັດສິນທົ່ວໂລກຈະບໍ່ເຮັດສິ່ງທີ່ຖືກຕ້ອງບໍ?”+
26 ພະເຢໂຫວາຕອບວ່າ: “ຖ້າເຮົາເຫັນຄົນດີ 50 ຄົນໃນເມືອງໂຊໂດມ ເຮົາຈະຍົກໂທດໃຫ້ໝົດເມືອງນັ້ນຍ້ອນເຂົາເຈົ້າ.”
27 ແຕ່ອັບຣາຮາມເວົ້າຕື່ມອີກວ່າ: “ພະເຢໂຫວາ ລູກເປັນແຕ່ຂີ້ຝຸ່ນກັບຂີ້ເທົ່າ ຂໍອະນຸຍາດໃຫ້ລູກເວົ້າຕື່ມອີກແດ່.
28 ຖ້າໃນ 50 ຄົນນັ້ນ ຂາດໄປ 5 ຄົນເດ້? ພະອົງຈະທຳລາຍໝົດເມືອງນັ້ນຍ້ອນຂາດ 5 ຄົນບໍ?” ເພິ່ນຕອບລາວວ່າ: “ເຮົາຈະບໍ່ທຳລາຍເມືອງນັ້ນດອກ ຖ້າມີຄົນດີ 45 ຄົນ.”+
29 ແຕ່ລາວກໍຍັງເວົ້າກັບພະເຈົ້າອີກວ່າ: “ຖ້າຢູ່ຫັ້ນມີຄົນດີແຕ່ 40 ຄົນເດ້?” ເພິ່ນຕອບວ່າ: “ເຮົາຈະບໍ່ທຳລາຍຍ້ອນມີຄົນດີ 40 ຄົນຢູ່ຫັ້ນ.”
30 ລາວເວົ້າອີກວ່າ: “ພະເຢໂຫວາ ຢ່າຟ້າວໃຈຮ້າຍເດີ້.+ ຂໍໃຫ້ລູກເວົ້າອີກແດ່. ຖ້າຢູ່ຫັ້ນມີຄົນດີແຕ່ 30 ຄົນເດ້?” ເພິ່ນກໍຕອບວ່າ: “ເຮົາຈະບໍ່ທຳລາຍ ຖ້າມີຄົນດີ 30 ຄົນຢູ່ຫັ້ນ.”
31 ລາວຂໍອີກວ່າ: “ພະເຢໂຫວາ ຂໍໃຫ້ລູກເວົ້າຕື່ມອີກແດ່. ຖ້າຢູ່ຫັ້ນມີຄົນດີແຕ່ 20 ຄົນເດ້?” ເພິ່ນຕອບວ່າ: “ເຮົາຈະບໍ່ທຳລາຍເມືອງນັ້ນ ຍ້ອນມີຄົນດີ 20 ຄົນຢູ່ຫັ້ນ.”
32 ສຸດທ້າຍ ລາວກໍເວົ້າວ່າ: “ພະເຢໂຫວາ ຢ່າຟ້າວໃຈຮ້າຍເດີ້ ລູກຂໍເວົ້າອີກເທື່ອດຽວ. ຖ້າຢູ່ຫັ້ນມີຄົນດີແຕ່ 10 ຄົນເດ້?” ເພິ່ນຕອບວ່າ: “ເຮົາຈະບໍ່ທຳລາຍເມືອງນັ້ນ ຍ້ອນມີຄົນດີ 10 ຄົນ.”
33 ຫຼັງຈາກພະເຢໂຫວາເວົ້າກັບອັບຣາຮາມແລ້ວ ເພິ່ນກໍໄປຈາກລາວ.+ ແລ້ວອັບຣາຮາມກໍກັບໄປເຕັ້ນຂອງລາວ.
ຂໍ
^ ແປຕາມໂຕວ່າ “3 ຊີ” ເທົ່າກັບ 21,9 ລິດ. ເບິ່ງພາກຜະໜວກ ຂ14.
^ ໝາຍເຖິງເຊົາເປັນປະຈຳເດືອນແລ້ວ
