ປະຖົມມະການ 33:1-20
33 ເມື່ອຢາໂຄບເງີຍໜ້າຂຶ້ນກໍເຫັນເອຊາວກຳລັງມາກັບຄົນຂອງລາວ 400 ຄົນ.+ ລາວເລີຍຈັດໃຫ້ເລອາ ຣາເຄນ ແລະສາວໃຊ້ 2 ຄົນຢູ່ກັບພວກລູກຂອງໂຕເອງ.+
2 ລາວໃຫ້ສາວໃຊ້ 2 ຄົນກັບລູກຂອງເຂົາເຈົ້າຢູ່ທາງໜ້າ+ ຕໍ່ມາແມ່ນເລອາກັບລູກຂອງລາວ+ ແລະສຸດທ້າຍກໍແມ່ນຣາເຄນ+ກັບໂຢເຊັບ.
3 ແລ້ວຢາໂຄບກໍອອກໜ້າໄປກ່ອນທຸກຄົນ. ໃນລະຫວ່າງທີ່ຍ່າງໄປຫາອ້າຍ ຢາໂຄບໄດ້ໝູບໜ້າລົງພື້ນເປັນໄລຍະໆ ລວມທັງໝົດ 7 ເທື່ອເພື່ອສະແດງຄວາມນັບຖື.
4 ແຕ່ເອຊາວແລ່ນເຂົ້າໄປຫາຢາໂຄບ ທັງກອດແລະຈູບລາວ. ແລ້ວທັງສອງຄົນກໍພາກັນຮ້ອງໄຫ້.
5 ເມື່ອເອຊາວແນມເຫັນພວກຜູ້ຍິງກັບເດັກນ້ອຍ ລາວກໍຖາມວ່າ: “ຄົນທີ່ມານຳນ້ອງແມ່ນໃຜ?” ຢາໂຄບຕອບວ່າ: “ຄົນເຫຼົ່ານີ້ແມ່ນລູກແມ່ນເມຍຂອງນ້ອງທີ່ພະເຈົ້າໃຫ້ມາ.”+
6 ພວກສາວໃຊ້ກັບລູກຂອງເຂົາເຈົ້າຍ່າງມາທາງໜ້າແລ້ວກົ້ມຄຳນັບເອຊາວ.
7 ເລອາກັບພວກລູກຂອງລາວກໍຍ່າງອອກມາທາງໜ້າແລ້ວກົ້ມຄຳນັບ. ຕໍ່ມາ ໂຢເຊັບກັບຣາເຄນກໍຍ່າງອອກມາທາງໜ້າແລ້ວກົ້ມຄຳນັບຄືກັນ.+
8 ເອຊາວຖາມວ່າ: “ນ້ອງສົ່ງຄົນກັບຝູງສັດມາເຮັດຫຍັງ?”+ ຢາໂຄບຕອບວ່າ: “ເພື່ອໃຫ້ອ້າຍພໍໃຈນ້ອງ.”+
9 ເອຊາວຕອບວ່າ: “ນ້ອງເອີ້ຍ ອ້າຍມີຊັບສົມບັດຫຼາຍແລ້ວ+ ນ້ອງບໍ່ຕ້ອງເອົາມາໃຫ້ອ້າຍດອກ.”
10 ແຕ່ຢາໂຄບເວົ້າວ່າ: “ຢ່າເວົ້າຈັ່ງຊັ້ນເລີຍອ້າຍ. ຖ້າອ້າຍພໍໃຈນ້ອງ ກໍຂໍໃຫ້ອ້າຍຮັບເອົາຂອງຂວັນຈາກນ້ອງ. ນ້ອງເອົາຂອງຂວັນທັງໝົດນີ້ມາໃຫ້ຍ້ອນຢາກເຫັນໜ້າອ້າຍ. ເມື່ອນ້ອງເຫັນໜ້າອ້າຍກໍຄືກັບເຫັນໜ້າພະເຈົ້າແລ້ວ ເພາະອ້າຍຕ້ອນຮັບນ້ອງດ້ວຍຄວາມຍິນດີ.+
11 ຂໍໃຫ້ອ້າຍຮັບເອົາຂອງຂວັນຈາກນ້ອງທີ່ຕັ້ງໃຈເອົາມາໃຫ້ອ້າຍ+ ຍ້ອນວ່າພະເຈົ້າພໍໃຈນ້ອງແລະໃຫ້ສິ່ງຈຳເປັນທຸກຢ່າງກັບນ້ອງ.”+ ຢາໂຄບເວົ້າຫຼາຍເທື່ອຈົນເອຊາວຍອມຮັບເອົາຂອງຂວັນນຳລາວ.
12 ແລ້ວເອຊາວກໍເວົ້າວ່າ: “ໄປ໋ ເຮົາອອກເດີນທາງກັນເລີຍ. ອ້າຍຊິອອກໜ້າກ່ອນ.”
13 ແຕ່ຢາໂຄບບອກວ່າ: “ອ້າຍເອີ້ຍ ເຮົາມີເດັກນ້ອຍ+ແລະຕ້ອງເບິ່ງແຍງແກະກັບງົວແມ່ລູກອ່ອນ. ຖ້າພວກເຮົາພາກັນໄປໄວໆພາຍໃນມື້ດຽວ ຢ້ານວ່າສັດຊິຕາຍໝົດຝູງ.
14 ໃຫ້ອ້າຍເດີນທາງອອກກ່ອນນ້ອງໂລດ. ນ້ອງຊິຄ່ອຍໆໄປສ່ຳກັບທີ່ຝູງສັດແລະເດັກນ້ອຍໄປໄດ້ ແລ້ວນ້ອງຈະໄປເຈິອ້າຍຢູ່ເສອີ.”+
15 ເອຊາວເວົ້າວ່າ: “ຄັ້ນຊັ້ນອ້າຍຊິໃຫ້ຄົນຂອງອ້າຍບາງຄົນໄປກັບນ້ອງເດີ້.” ຢາໂຄບຕອບວ່າ: “ອ້າຍບໍ່ຕ້ອງເຮັດແນວນີ້ດອກ. ຂໍພຽງແຕ່ອ້າຍພໍໃຈນ້ອງກໍພໍແລ້ວ.”
16 ໃນມື້ນັ້ນ ເອຊາວໄດ້ອອກເດີນທາງກັບເມືອເສອີ.
17 ຢາໂຄບເດີນທາງໄປຮອດສຸກໂກດ+ ແລ້ວລາວກໍປຸກເຮືອນແລະປຸກຕູບໃຫ້ຝູງສັດຂອງລາວ. ຍ້ອນແນວນັ້ນລາວເລີຍເອີ້ນບ່ອນນັ້ນວ່າສຸກໂກດ.*
18 ຫຼັງຈາກອອກຈາກປາດັນອາລຳ+ ຢາໂຄບກໍມາຮອດເມືອງເຊເຄັມ+ໃນແຜ່ນດິນການາອານ+ຢ່າງປອດໄພ ແລະລາວໄດ້ຕັ້ງຄ້າຍຢູ່ໃກ້ເມືອງນັ້ນ.
19 ລາວຊື້ດິນຕອນໜຶ່ງທີ່ລາວຕັ້ງເຕັ້ນຢູ່ຫັ້ນດ້ວຍເງິນ 100 ແຜ່ນຈາກພວກລູກຊາຍຂອງຮາໂມພໍ່ຂອງເຊເຄັມ.+
20 ຢາໂຄບສ້າງແທ່ນບູຊາຢູ່ຫັ້ນ ແລະເອີ້ນແທ່ນນັ້ນວ່າພະເຈົ້າແມ່ນພະເຈົ້າຂອງອິດສະຣາເອນ.+
ຂໍ
^ ແປວ່າ “ຕູບ”
