ປະຖົມມະການ 39:1-23
39 ພວກອິດຊະມາເອນ+ທີ່ຊື້ໂຢເຊັບໄດ້ພາລາວໄປເອຢິບ.+ ແລ້ວຄົນເອຢິບຄົນໜຶ່ງທີ່ຊື່ໂປຕີຟາ+ກໍຊື້ໂຢເຊັບຕໍ່ຈາກພວກນັ້ນ. ລາວເປັນຂ້າລາຊະການຂອງຟາໂຣ* ແລະເປັນຫົວໜ້າທະຫານປ້ອງກັນໂຕກະສັດ.
2 ແຕ່ພະເຢໂຫວາຢູ່ນຳໂຢເຊັບ+ ລາວເລີຍປະສົບຜົນສຳເລັດໃນວຽກງານ ແລະໄດ້ເຮັດໜ້າທີ່ເບິ່ງແຍງເຮືອນຂອງເຈົ້ານາຍຄົນເອຢິບ.
3 ນາຍເຫັນວ່າພະເຢໂຫວາຢູ່ກັບໂຢເຊັບ ແລະເຫັນວ່າພະເຢໂຫວາໄດ້ຊ່ວຍລາວໃຫ້ເຮັດວຽກທຸກຢ່າງປະສົບຜົນສຳເລັດ.
4 ນາຍມັກໂຢເຊັບຫຼາຍ ແລະໃຫ້ໂຢເຊັບເປັນຄົນຮັບໃຊ້ທີ່ໃກ້ຊິດທີ່ສຸດຂອງລາວ. ລາວແຕ່ງຕັ້ງໂຢເຊັບໃຫ້ເບິ່ງແຍງເຮືອນແລະຊັບສົມບັດທັງໝົດຂອງລາວ.
5 ຕັ້ງແຕ່ນາຍແຕ່ງຕັ້ງໂຢເຊັບໃຫ້ເບິ່ງແຍງເຮືອນແລະຊັບສົມບັດທັງໝົດຂອງລາວ ພະເຢໂຫວາໄດ້ອວຍພອນທຸກສິ່ງໃນເຮືອນຂອງນາຍຄົນເອຢິບຍ້ອນໂຢເຊັບ. ພະເຢໂຫວາໄດ້ອວຍພອນທຸກສິ່ງ ທັງທີ່ຢູ່ໃນເຮືອນແລະທົ່ງນາຂອງລາວ.+
6 ໃນທີ່ສຸດ ນາຍໃຫ້ໂຢເຊັບເບິ່ງແຍງທຸກຢ່າງໃນເຮືອນ ແລະນາຍບໍ່ຕ້ອງຫ່ວງເລື່ອງຫຍັງເລີຍ ມີແຕ່ຄິດວ່າແຕ່ລະມື້ຢາກຊິກິນຫຍັງ. ສ່ວນໂຢເຊັບກໍໃຫຍ່ຂຶ້ນແລະໜ້າຕາດີ.
7 ຕໍ່ມາ ເມຍຂອງນາຍເລີ່ມສົນໃຈໂຢເຊັບແລະຊວນລາວວ່າ: “ມາແມ້ ມານອນນຳຂ້ອຍ.”
8 ໂຢເຊັບປະຕິເສດເມຍຂອງນາຍແລະເວົ້າວ່າ: “ນາຍໄວ້ວາງໃຈຂ້ອຍ ແລະໃຫ້ຂ້ອຍເບິ່ງແຍງທຸກສິ່ງທຸກຢ່າງໃນເຮືອນ.
9 ນາຍມອບອຳນາດໃຫ້ຂ້ອຍເໜືອທຸກຢ່າງໃນເຮືອນນີ້ ມີແຕ່ທ່ານເທົ່ານັ້ນທີ່ນາຍບໍ່ໄດ້ມອບໃຫ້ ເພາະທ່ານເປັນເມຍຂອງນາຍ. ຂ້ອຍຈະເຮັດຊົ່ວແບບນີ້ແລະເຮັດບາບຕໍ່ພະເຈົ້າບໍ່ໄດ້.”+
10 ເມຍຂອງໂປຕີຟາຊວນໂຢເຊັບທຸກມື້ໆໃຫ້ມານອນນຳ. ແຕ່ໂຢເຊັບກໍບໍ່ຍອມນອນນຳລາວຫຼືຢູ່ກັບລາວແຕ່ສອງຄົນ.
11 ມີມື້ໜຶ່ງ ໂຢເຊັບເຂົ້າໄປເຮັດວຽກຢູ່ໃນເຮືອນ ແຕ່ຕອນນັ້ນບໍ່ມີຄົນຮັບໃຊ້ຈັກຄົນຢູ່ຫັ້ນ.
12 ເມຍຂອງນາຍດຶງເສື້ອຂອງໂຢເຊັບແລະເວົ້າວ່າ: “ມາແມ້! ມານອນນຳຂ້ອຍ.” ໂຢເຊັບກໍແກ້ເສື້ອຖິ້ມໄວ້ຄາມືຂອງເມຍນາຍແລ້ວໜີໄປ.
13 ເມື່ອເມຍຂອງນາຍເຫັນວ່າໂຢເຊັບຖິ້ມເສື້ອໄວ້ແລະແລ່ນໜີ
14 ລາວກໍຮ້ອງສຽງດັງໃຫ້ຄົນໃນເຮືອນໄດ້ຍິນວ່າ: “ຊ່ວຍແດ່! ຄົນເຮັບເຣີທີ່ຜົວຂ້ອຍຊື້ມາ ມັນຢາກເຮັດໃຫ້ຂ້ອຍອັບອາຍ. ມັນຊິເຂົ້າມານອນນຳຂ້ອຍ ຂ້ອຍເລີຍຮ້ອງຂຶ້ນສຸດສຽງ.
15 ເມື່ອໄດ້ຍິນຂ້ອຍຮ້ອງ ມັນກໍປະເສື້ອໄວ້ແລ້ວແລ່ນໜີໄປ.”
16 ລາວເອົາເສື້ອຂອງໂຢເຊັບໄວ້ທາງຂ້າງລາວ ຈົນໂປຕີຟານາຍຂອງໂຢເຊັບກັບມາຮອດເຮືອນ.
17 ລາວເລົ່າຄືນແບບເກົ່າໃຫ້ຜົວຟັງວ່າ: “ຄົນຮັບໃຊ້ເຮັບເຣີທີ່ອ້າຍຊື້ມາ ມັນເຂົ້າມາຫານ້ອງ. ມັນຢາກເຮັດໃຫ້ນ້ອງອັບອາຍ.
18 ແຕ່ນ້ອງຮ້ອງຂຶ້ນດັງໆ ມັນເລີຍຖິ້ມເສື້ອໄວ້ແລ້ວໜີໄປ.”
19 ເມື່ອນາຍຂອງໂຢເຊັບໄດ້ຍິນເມຍເລົ່າໃຫ້ຟັງວ່າ: “ຄົນຮັບໃຊ້ຂອງອ້າຍເຮັດແນວນີ້ໃຫ້ນ້ອງ” ນາຍຂອງໂຢເຊັບກໍໃຈຮ້າຍຫຼາຍ.
20 ລາວຈັບໂຢເຊັບເຂົ້າຄຸກທີ່ຂັງນັກໂທດຂອງກະສັດ. ແລ້ວໂຢເຊັບກໍຖືກຂັງໄວ້ຢູ່ຫັ້ນ.+
21 ພະເຢໂຫວາຍັງຊ່ວຍໂຢເຊັບສະເໝີແລະສະແດງຄວາມຮັກທີ່ໝັ້ນຄົງຕໍ່ລາວ. ເພິ່ນເຮັດໃຫ້ຫົວໜ້າຜູ້ຄຸມຄຸກຮັກແພງໂຢເຊັບ.+
22 ຫົວໜ້າຜູ້ຄຸມຄຸກຈຶ່ງແຕ່ງຕັ້ງໂຢເຊັບໃຫ້ເບິ່ງແຍງນັກໂທດທຸກຄົນໃນຄຸກ. ໂຢເຊັບເປັນຜູ້ເບິ່ງແຍງໃຫ້ນັກໂທດເຮັດວຽກທຸກຢ່າງໃຫ້ແລ້ວ.+
23 ເມື່ອມອບວຽກໃຫ້ໂຢເຊັບເຮັດ ຫົວໜ້າຜູ້ຄຸມຄຸກກໍບໍ່ຕ້ອງກັງວົນເລື່ອງຫຍັງເລີຍ ເພາະພະເຢໂຫວາຢູ່ນຳໂຢເຊັບ ແລະພະເຢໂຫວາໄດ້ຊ່ວຍໂຢເຊັບໃຫ້ເຮັດວຽກທຸກສິ່ງທຸກຢ່າງສຳເລັດ.+
ຂໍ
^ ນີ້ແມ່ນຕຳແໜ່ງກະສັດຂອງເອຢິບ
