ປະຖົມມະການ 4:1-26
4 ອາດາມນອນນຳເອວາເມຍຂອງລາວ ແລ້ວເອວາກໍຖືພາ.+ ຕໍ່ມາ ລາວກໍເກີດລູກຊາຍແລະຕັ້ງຊື່ວ່າກາອິນ.+ ເອວາເວົ້າວ່າ: “ຂ້ອຍໄດ້ລູກຊາຍຄົນນີ້ຍ້ອນພະເຢໂຫວາຊ່ວຍ.”
2 ຕໍ່ມາ ລາວກໍເກີດລູກຊາຍອີກຄົນໜຶ່ງຊື່ອາເບັນ.+
ອາເບັນເປັນຄົນລ້ຽງແກະ ສ່ວນກາອິນເປັນຄົນເຮັດໄຮ່ເຮັດສວນ.
3 ມີມື້ໜຶ່ງ ກາອິນໄດ້ເອົາຜົນລະປູກຈາກສວນມາເປັນເຄື່ອງບູຊາໃຫ້ພະເຢໂຫວາ
4 ແຕ່ອາເບັນໄດ້ເອົາແກະນ້ອຍໂຕທຳອິດຈຳນວນໜຶ່ງ+ລວມທັງນ້ຳມັນຂອງພວກມັນມາເປັນເຄື່ອງບູຊາ. ພະເຢໂຫວາພໍໃຈອາເບັນແລະເຄື່ອງບູຊາຂອງລາວ+
5 ແຕ່ເພິ່ນບໍ່ພໍໃຈກາອິນແລະເຄື່ອງບູຊາຂອງລາວ. ເມື່ອເປັນແນວນັ້ນກາອິນກໍໃຈຮ້າຍແລະຄຽດແຮງ.
6 ພະເຢໂຫວາເລີຍຖາມກາອິນວ່າ: “ເປັນຫຍັງເຈົ້າຈຶ່ງໃຈຮ້າຍແລະຄຽດຫຼາຍແທ້?
7 ຖ້າເຈົ້າປ່ຽນແປງໂຕເອງແລະເຮັດດີ ເຮົາຈະພໍໃຈເຈົ້າຄືກັນ. ແຕ່ຖ້າເຈົ້າບໍ່ປ່ຽນແປງໂຕເອງແລະຍັງເຮັດຊົ່ວຢູ່ ບາບກໍຈອບຊິຄຸບເຈົ້າຢູ່ປະຕູ ແລະມັນຈະຄວບຄຸມເຈົ້າ. ເຈົ້າຄວນເອົາຊະນະມັນໃຫ້ໄດ້ບໍ່ແມ່ນບໍ?”
8 ຫຼັງຈາກນັ້ນ ກາອິນກໍຊວນອາເບັນວ່າ: “ເຮົາໄປຫຼິ້ນຢູ່ທົ່ງນຳກັນເນາະ.” ເມື່ອເຂົາເຈົ້າຢູ່ນຳກັນ 2 ຄົນ ກາອິນກໍຕີແລະຂ້າອາເບັນ.+
9 ຕໍ່ມາພະເຢໂຫວາຖາມກາອິນວ່າ: “ນ້ອງເຈົ້າຢູ່ໃສ?” ກາອິນກໍຕອບວ່າ: “ລູກບໍ່ຮູ້. ລູກເປັນຜູ້ເບິ່ງແຍງນ້ອງບໍ?”
10 ພະເຈົ້າເລີຍຖາມວ່າ: “ເຈົ້າເຮັດຫຍັງລົງໄປ? ຟັງແມ້! ເບິ່ງຄືວ່າເລືອດຂອງນ້ອງຊາຍເຈົ້າທີ່ໄຫຼລົງດິນກຳລັງຮ້ອງຫາຄວາມຍຸຕິທຳຈາກເຮົາ.+
11 ເຈົ້າຈະຖືກສາບແຊ່ງແລະຖືກໄລ່ໜີຈາກບ່ອນທີ່ເຈົ້າຂ້ານ້ອງ. ຍ້ອນເຈົ້າເຮັດໃຫ້ເລືອດຂອງນ້ອງໄຫຼລົງບ່ອນນັ້ນ.+
12 ເມື່ອເຮັດໄຮ່ເຮັດສວນ ເຈົ້າຈະບໍ່ໄດ້ຮັບຜົນດີ. ເຈົ້າຈະບໍ່ມີບ່ອນຢູ່ແລະຕ້ອງຫຼົບໜີໄປເລື້ອຍໆ.”
13 ກາອິນບອກພະເຢໂຫວາວ່າ: “ໂທດຂອງລູກມັນໜັກຫຼາຍ. ລູກແບກບໍ່ໄຫວ.
14 ມື້ນີ້ລູກຖືກໄລ່ອອກຈາກບ່ອນນີ້ແລ້ວ ລູກຕ້ອງໜີໃຫ້ພົ້ນຈາກພະອົງ. ລູກຕ້ອງເປັນຄົນບໍ່ມີບ່ອນຢູ່ແລະຕ້ອງໜີໄປເລື້ອຍໆ. ຖ້າມີຄົນເຫັນລູກ ລູກກໍຈະຖືກຂ້າແທ້ໆ.”
15 ແລ້ວພະເຢໂຫວາກໍເວົ້າກັບລາວວ່າ: “ຖ້າເປັນຈັ່ງຊັ້ນ ຄັນຜູ້ໃດຂ້າກາອິນ ຜູ້ນັ້ນຈະມີໂທດ 7 ເທົ່າ.”
ພະເຢໂຫວາຈຶ່ງເຮັດເຄື່ອງໝາຍໃຫ້ກາອິນ ຖ້າໃຜເຫັນລາວກໍຈະບໍ່ໄດ້ຂ້າລາວ.
16 ກາອິນຈຶ່ງໄປຈາກພະເຢໂຫວາ ແລ້ວໄປຢູ່ໃນແຜ່ນດິນໂນດ*ເຊິ່ງຢູ່ທາງທິດຕາເວັນອອກຂອງສວນເອເດັນ.+
17 ຕໍ່ມາ ກາອິນໄດ້ນອນນຳເມຍຂອງລາວ+ ແລ້ວເມຍຂອງລາວກໍຖືພາ ແລະເກີດລູກຊາຍຊື່ເອໂນກ. ກາອິນໄດ້ສ້າງເມືອງໜຶ່ງຂຶ້ນແລະຕັ້ງຊື່ໃຫ້ເມືອງນັ້ນຕາມຊື່ລູກວ່າເອໂນກ.
18 ເອໂນກມີລູກຊາຍຊື່ອີຣາດ ອີຣາດມີລູກຊາຍຊື່ເມຮູຢາເອນ ເມຮູຢາເອນມີລູກຊາຍຊື່ເມທູຊາເອນ ແລະເມທູຊາເອນມີລູກຊາຍຊື່ລາເມັກ.
19 ລາເມັກມີເມຍ 2 ຄົນ. ເມຍຜູ້ທຳອິດຊື່ອາດາ ແລະເມຍຜູ້ທີ 2 ຊື່ຊິນລາ.
20 ອາດາມີລູກຊາຍຊື່ຢາບານ. ຢາບານເປັນຜູ້ທຳອິດທີ່ອາໄສຢູ່ໃນເຕັ້ນແລະລ້ຽງສັດ.
21 ຢາບານມີນ້ອງຊາຍຊື່ຢູບານ. ຢູບານເປັນຜູ້ທຳອິດທີ່ຫຼິ້ນພິນແລະເປົ່າຂຸ່ຍ.
22 ສ່ວນຊິນລາກໍມີລູກຊາຍຊື່ຕູບານກາອິນ. ຕູບານກາອິນເປັນຊ່າງທີ່ເຮັດເຄື່ອງມືຈາກທອງແດງແລະເຫຼັກ. ລາວມີເອື້ອຍຊື່ນາອາມາ.*
23 ລາເມັກເວົ້າກັບອາດາແລະຊິນລາເມຍຂອງລາວ ອອກມາເປັນກອນວ່າ:
“ເມຍຂອງລາເມັກເອີ້ຍ ຟັງຂ້ອຍເດີ້ຂ້ອຍຈະເວົ້າໃຫ້ພວກເຈົ້າຟັງ
ຂ້ອຍໄດ້ຂ້າຜູ້ຊາຍຄົນໜຶ່ງທີ່ໄດ້ທຳຮ້າຍຂ້ອຍຜູ້ຊາຍຄົນນັ້ນໄດ້ຕີຂ້ອຍ
24 ຖ້າຄົນທີ່ຂ້າກາອິນໄດ້ຮັບໂທດ 7 ເທົ່າ+ຄົນທີ່ຂ້າລາເມັກຈະໄດ້ຮັບໂທດເຖິງ 77 ເທົ່າ.”
25 ອາດາມນອນນຳເມຍອີກແລະກໍໄດ້ລູກຊາຍ. ເມຍຕັ້ງຊື່ໃຫ້ລູກຊາຍວ່າເຊດ+ ເພາະລາວໄດ້ເວົ້າວ່າ: “ພະເຈົ້າໄດ້ໃຫ້ລູກຊາຍຄົນນີ້ກັບຂ້ອຍມາແທນອາເບັນ ຍ້ອນກາອິນຂ້າລາວ.”+
26 ເຊດມີລູກຊາຍຄົນໜຶ່ງເຊິ່ງລາວໄດ້ຕັ້ງຊື່ໃຫ້ວ່າເອໂນດ.+ ຕັ້ງແຕ່ນັ້ນມາຜູ້ຄົນກໍຮ້ອງຊື່ພະເຢໂຫວາ.
ຂໍ
^ ແປວ່າ “ແຜ່ນດິນຂອງຄົນທີ່ຫຼົບໜີ”
^ ບໍ່ຮູ້ແນ່ນອນວ່ານາອາມາເປັນເອື້ອຍຫຼືນ້ອງຂອງຕູບານກາອິນ
