ພວກຜູ້ຕັດສິນ 10:1-18
10 ຫຼັງຈາກອາບີເມເລັກຕາຍ ພະເຈົ້າກໍເລືອກໂຕລາລູກຊາຍຂອງປູອາຫຼານຂອງໂດໂດຈາກຕະກູນອິດຊາຄາໃຫ້ມາຊ່ວຍພວກອິດສະຣາເອນ.+ ລາວອາໄສຢູ່ເມືອງຊາມີເຊິ່ງຢູ່ໃນເຂດພູຂອງເອຟຣາຢິມ.
2 ລາວເປັນຜູ້ຕັດສິນຂອງພວກອິດສະຣາເອນ 23 ປີ ແລ້ວລາວກໍຕາຍແລະຖືກຝັງໄວ້ຢູ່ເມືອງຊາມີ.
3 ຫຼັງຈາກຜູ້ຕັດສິນໂຕລາຕາຍ ພະເຈົ້າກໍເລືອກຢາອີຄົນກິລຽດໃຫ້ເປັນຜູ້ຕັດສິນຂອງພວກອິດສະຣາເອນ. ລາວເຮັດໜ້າທີ່ນີ້ 22 ປີ.
4 ຢາອີມີລູກຊາຍ 30 ຄົນ ເຊິ່ງຂີ່ລາ 30 ໂຕ. ພວກລູກຊາຍຂອງລາວມີເມືອງ 30 ເມືອງເຊິ່ງຖືກເອີ້ນວ່າຮາໂວດຢາອີ+ຈົນຮອດທຸກມື້ນີ້. ເມືອງເຫຼົ່ານີ້ຢູ່ໃນເຂດກິລຽດ.
5 ແລ້ວຢາອີກໍຕາຍ ແລະຖືກຝັງໄວ້ຢູ່ເມືອງກາໂມນ.
6 ຫຼັງຈາກນັ້ນ ພວກອິດສະຣາເອນກໍເຮັດສິ່ງທີ່ພະເຢໂຫວາເຫັນວ່າຊົ່ວອີກ.+ ເຂົາເຈົ້ານະມັດສະການພະບາອານ+ ຮູບພະອັດຊະໂຕເຣດ* ແລະພະເຈົ້າຕ່າງໆຂອງພວກຊີເຣຍ* ພວກຊີໂດນ ພວກໂມອາບ+ ພວກອຳໂມນ+ ແລະພວກຟີລິດສະຕີນ.+ ເຂົາເຈົ້າປະຖິ້ມພະເຢໂຫວາແລະເຊົານະມັດສະການເພິ່ນ.
7 ພະເຢໂຫວາຈຶ່ງໃຈຮ້າຍຫຼາຍໃຫ້ພວກອິດສະຣາເອນ ແລະເພິ່ນໄດ້ຂາຍເຂົາເຈົ້າໄວ້ໃນມືຂອງພວກຟີລິດສະຕີນກັບພວກອຳໂມນ.+
8 ຕັ້ງແຕ່ປີນັ້ນ ພວກເຂົາເລີ່ມກົດຂີ່ພວກອິດສະຣາເອນຢ່າງໜັກ. ຕະຫຼອດໄລຍະ 18 ປີ ພວກເຂົາກົດຂີ່ພວກອິດສະຣາເອນທີ່ຢູ່ທາງທິດຕາເວັນອອກຂອງແມ່ນ້ຳຈໍແດນໃນເຂດກິລຽດທີ່ເຄີຍເປັນແຜ່ນດິນຂອງພວກອຳໂມນ.
9 ພວກອຳໂມນຍັງຂ້າມແມ່ນ້ຳຈໍແດນໄປຕໍ່ສູ້ກັບຕະກູນຢູດາ ຕະກູນເບັນຢາມິນ ແລະຕະກູນເອຟຣາຢິມນຳ. ພວກອິດສະຣາເອນທຸກລຳບາກຫຼາຍ.
10 ແລ້ວພວກອິດສະຣາເອນກໍຮ້ອງຂໍໃຫ້ພະເຢໂຫວາຊ່ວຍ+ ໂດຍເວົ້າວ່າ: “ພວກເຮົາເຮັດຜິດຕໍ່ພະອົງແລ້ວ. ພວກເຮົາປະຖິ້ມພະອົງທີ່ເປັນພະເຈົ້າຂອງພວກເຮົາແລະໄປນະມັດສະການພະບາອານ.”+
11 ແຕ່ພະເຢໂຫວາເວົ້າກັບພວກອິດສະຣາເອນວ່າ: “ເຮົາເຄີຍຊ່ວຍພວກເຈົ້າອອກຈາກເອຢິບ+ ແລະຊ່ວຍພວກເຈົ້າໃຫ້ລອດຈາກພວກອາໂມ+ ພວກອຳໂມນ ພວກຟີລິດສະຕີນ+
12 ພວກຊີໂດນ ພວກອາມາເລັກ ແລະພວກມີດີອານຕອນທີ່ພວກເຂົາກົດຂີ່ພວກເຈົ້າບໍ່ແມ່ນບໍ? ເມື່ອພວກເຈົ້າຮ້ອງຂໍໃຫ້ເຮົາຊ່ວຍ ເຮົາກໍຊ່ວຍພວກເຈົ້າໃຫ້ລອດຈາກມືຂອງພວກເຂົາ.
13 ແຕ່ພວກເຈົ້າພັດປະຖິ້ມເຮົາແລະໄປນະມັດສະການພະເຈົ້າອື່ນ.+ ຍ້ອນແນວນີ້ ເຮົາຈະບໍ່ຊ່ວຍພວກເຈົ້າອີກ.+
14 ໃຫ້ພວກເຈົ້າໄປຂໍກັບພະເຈົ້າທີ່ພວກເຈົ້ານະມັດສະການແມ້.+ ເທື່ອນີ້ ໃຫ້ພະເຈົ້າພວກນັ້ນຊ່ວຍພວກເຈົ້າສະເດີ້.”+
15 ແຕ່ພວກອິດສະຣາເອນກໍເວົ້າກັບພະເຢໂຫວາວ່າ: “ພວກເຮົາເຮັດຜິດແລ້ວ. ພະອົງຈະເຮັດແນວໃດກັບພວກເຮົາກໍໄດ້ຕາມທີ່ພະອົງຕ້ອງການ ແຕ່ເທື່ອນີ້ຂໍພະອົງຊ່ວຍພວກເຮົາກ່ອນ.”
16 ເຂົາເຈົ້າຈຶ່ງກຳຈັດຮູບພະຕ່າງໆໃຫ້ໝົດໄປແລະເລີ່ມນະມັດສະການພະເຢໂຫວາອີກ+ ເພື່ອເພິ່ນຈະທົນບໍ່ໄດ້ທີ່ເຫັນພວກອິດສະຣາເອນທຸກລຳບາກ.+
17 ຕໍ່ມາ ພວກອຳໂມນ+ຖືກເອີ້ນໃຫ້ມາລວມໂຕກັນ ແລະພວກເຂົາກໍຕັ້ງຄ້າຍທະຫານຢູ່ກິລຽດ. ສ່ວນພວກອິດສະຣາເອນກໍລວມໂຕກັນແລະຕັ້ງຄ້າຍຢູ່ເມືອງມິດຊະປາ.
18 ປະຊາຊົນກັບພວກຜູ້ນຳໃນກິລຽດໄດ້ລົມກັນວ່າ: “ຜູ້ໃດຊິນຳໜ້າພວກເຮົາໄປຕໍ່ສູ້ກັບພວກອຳໂມນ?+ ຖ້າຜູ້ໃດໄປ ພວກເຮົາຊິຕັ້ງລາວໃຫ້ເປັນຫົວໜ້າຂອງທຸກຄົນທີ່ຢູ່ໃນກິລຽດ.”
