ພວກຜູ້ຕັດສິນ 12:1-15
12 ຫຼັງຈາກນັ້ນ ຄົນໃນຕະກູນເອຟຣາຢິມກໍຖືກເອີ້ນໃຫ້ມາລວມໂຕກັນ ແລ້ວເຂົາເຈົ້າກໍຂ້າມແມ່ນ້ຳໄປເມືອງຊາໂຟນ* ແລະເວົ້າກັບເຢັບທາວ່າ: “ຕອນທີ່ໄປສູ້ກັບພວກອຳໂມນ ເປັນຫຍັງເຈົ້າບໍ່ເອີ້ນພວກເຮົາ?+ ພວກເຮົາຊິເຜົາເຈົ້າພ້ອມກັບເຮືອນຂອງເຈົ້າດຽວນີ້ເລີຍ.”
2 ແຕ່ເຢັບທາເວົ້າກັບເຂົາເຈົ້າວ່າ: “ຂ້ອຍກັບຄົນຂອງຂ້ອຍເຮັດສົງຄາມໃຫຍ່ກັບພວກອຳໂມນ. ຂ້ອຍໄດ້ຂໍໃຫ້ພວກເຈົ້າມາຊ່ວຍແລ້ວ ແຕ່ພວກເຈົ້າກໍບໍ່ມາ.
3 ເມື່ອເຫັນວ່າພວກເຈົ້າບໍ່ມາຊ່ວຍ ຂ້ອຍກໍເລີຍຍອມສ່ຽງຊີວິດໄປຕໍ່ສູ້ກັບພວກອຳໂມນ+ ແລະພະເຢໂຫວາກໍມອບພວກເຂົາໄວ້ໃນມືຂ້ອຍ. ແຕ່ເປັນຫຍັງມື້ນີ້ພວກເຈົ້າຄືຊິມາຕໍ່ສູ້ກັບຂ້ອຍ?”
4 ເຢັບທາລວບລວມຜູ້ຊາຍທັງໝົດໃນເຂດກິລຽດ+ມາຕໍ່ສູ້ກັບຄົນໃນເອຟຣາຢິມ. ພວກກິລຽດກໍເອົາຊະນະພວກເອຟຣາຢິມທີ່ເຄີຍເວົ້າໃຫ້ເຂົາເຈົ້າວ່າ: “ເຖິງພວກເຈົ້າຈະຢູ່ໃນເຂດແດນຂອງເອຟຣາຢິມແລະມານາເຊ ແຕ່ພວກເຈົ້າກໍເປັນພຽງກຸ່ມຄົນລີ້ໄພຂອງເອຟຣາຢິມ.”
5 ພວກກິລຽດໄປລັດຢູ່ບ່ອນຂ້າມແມ່ນ້ຳຈໍແດນ+ບ່ອນຕ່າງໆທີ່ຢູ່ກົງກັນຂ້າມກັບເຂດຂອງເອຟຣາຢິມ. ເມື່ອພວກເອຟຣາຢິມຈະໜີ ເຂົາເຈົ້າຈະເວົ້າວ່າ: “ຂໍຂ້າມໄປແດ່.” ພວກກິລຽດກໍຈະຖາມແຕ່ລະຄົນວ່າ: “ເຈົ້າເປັນຄົນເອຟຣາຢິມບໍ?” ເມື່ອຄົນນັ້ນຕອບວ່າ: “ບໍ່ແມ່ນ.”
6 ພວກກິລຽດຈະບອກລາວວ່າ: “ຄັນຊັ້ນ ລອງເວົ້າຄຳວ່າຊີບໂບເລັດເບິ່ງ” ແຕ່ລາວກໍຈະເວົ້າວ່າ: “ສີບໂບເລັດ” ເພາະຄົນເອຟຣາຢິມອອກສຽງຄຳນີ້ບໍ່ຖືກ. ແລ້ວພວກກິລຽດກໍຈະຈັບຄົນນັ້ນໄປຂ້າຢູ່ບ່ອນຂ້າມແມ່ນ້ຳຈໍແດນ. ຕອນນັ້ນ ມີຄົນເອຟຣາຢິມຖືກຂ້າ 42.000 ຄົນ.
7 ເຢັບທາເປັນຜູ້ຕັດສິນຂອງພວກອິດສະຣາເອນ 6 ປີ. ແລ້ວເຢັບທາຄົນກິລຽດກໍຕາຍແລະຖືກຝັງໄວ້ຢູ່ເມືອງຂອງລາວໃນກິລຽດ.
8 ແລ້ວອິບຊານຈາກເມືອງເບັດເລເຮັມກໍໄດ້ເປັນຜູ້ຕັດສິນຂອງພວກອິດສະຣາເອນແທນ.+
9 ອິບຊານມີລູກຊາຍ 30 ຄົນແລະມີລູກສາວ 30 ຄົນ. ລາວໃຫ້ລູກສາວໄປແຕ່ງດອງກັບຜູ້ຊາຍໃນຕະກູນອື່ນ ແລະຊອກຜູ້ຍິງ 30 ຄົນຈາກຕະກູນອື່ນມາແຕ່ງດອງກັບລູກຊາຍຂອງໂຕເອງ. ລາວເປັນຜູ້ຕັດສິນຂອງພວກອິດສະຣາເອນ 7 ປີ.
10 ແລ້ວອິບຊານກໍຕາຍແລະຖືກຝັງໄວ້ຢູ່ເມືອງເບັດເລເຮັມ.
11 ແລ້ວເອໂລນຄົນເຊບູລູນກໍເປັນຜູ້ຕັດສິນຂອງພວກອິດສະຣາເອນແທນ. ລາວເປັນຜູ້ຕັດສິນຂອງພວກອິດສະຣາເອນ 10 ປີ.
12 ແລ້ວເອໂລນຄົນເຊບູໂລນກໍຕາຍແລະຖືກຝັງໄວ້ຢູ່ເມືອງອາຢາໂລນໃນແຜ່ນດິນຂອງເຊບູລູນ.
13 ແລ້ວອັບໂດນລູກຊາຍຂອງຮິນເລນຄົນປີຣາໂທນກໍເປັນຜູ້ຕັດສິນຂອງພວກອິດສະຣາເອນແທນ.
14 ລາວມີລູກຊາຍ 40 ຄົນແລະມີຫຼານຊາຍ 30 ຄົນ. ແຕ່ລະຄົນມີລາຄົນລະໂຕເອົາໄວ້ຂີ່. ລາວເປັນຜູ້ຕັດສິນຂອງພວກອິດສະຣາເອນ 8 ປີ.
15 ແລ້ວອັບໂດນລູກຊາຍຂອງຮິນເລນຄົນປີຣາໂທນກໍຕາຍ ແລະຖືກຝັງໄວ້ໃນເມືອງປີຣາໂທນຢູ່ພູຂອງພວກອາມາເລັກ+ໃນແຜ່ນດິນຂອງເອຟຣາຢິມ.
ຂໍ ຄວາມ ໄຂ ເງື່ອນ
^ ຫຼືອາດແປວ່າ “ຂ້າມແມ່ນ້ຳໄປທາງເໜືອ”