ພວກຜູ້ຕັດສິນ 17:1-13
-
ຮູບບູຊາແລະປະໂລຫິດຂອງມີກາ (1-13)
17 ມີຜູ້ຊາຍຄົນໜຶ່ງຊື່ມີກາ. ລາວຢູ່ເຂດພູຂອງເອຟຣາຢິມ.+
2 ລາວເວົ້າກັບແມ່ວ່າ: “ເງິນໜັກ 1.100 ເຊເກນ*ທີ່ແມ່ບອກວ່າມີຄົນລັກເອົາໄປ ແລະລູກກໍໄດ້ຍິນແມ່ສາບແຊ່ງຄົນທີ່ເອົາໄປ. ແທ້ໆແລ້ວ ເງິນນັ້ນຢູ່ນຳລູກ. ລູກເປັນຄົນເອົາໄປເອງ.” ແມ່ກໍເລີຍເວົ້າວ່າ: “ຂໍພະເຢໂຫວາອວຍພອນໃຫ້ລູກຊາຍຂອງຂ້ອຍເດີ້.”
3 ແລ້ວລາວກໍເອົາເງິນໜັກ 1.100 ເຊເກນຄືນໃຫ້ແມ່. ແຕ່ແມ່ເວົ້າວ່າ: “ແມ່ຈະແຍກເງິນນີ້ໄວ້ໃຫ້ພະເຢໂຫວາ ເພື່ອລູກຊິໄດ້ເຮັດຮູບແກະສະຫຼັກແລະຮູບທີ່ຫຼໍ່ຂຶ້ນມາສຳລັບໂຕເອງ.+ ແມ່ຈະເອົາເງິນນີ້ໃຫ້ລູກເດີ້.”
4 ເມື່ອລາວສົ່ງເງິນຄືນໃຫ້ແມ່ແລ້ວ ແມ່ກໍເອົາເງິນໜັກ 200 ເຊເກນ*ໄປໃຫ້ຊ່າງທີ່ເຮັດຮູບແກະສະຫຼັກແລະຮູບຫຼໍ່ ແລ້ວກໍເອົາມາໄວ້ຢູ່ເຮືອນຂອງມີກາ.
5 ມີກາມີເຮືອນຫຼັງໜຶ່ງທີ່ລາວໃຊ້ເປັນບ່ອນນະມັດສະການຮູບບູຊາຂອງພະເຈົ້າຕ່າງໆຂອງລາວ. ລາວເຮັດເອໂຟດ*+ຜືນໜຶ່ງກັບຮູບພະເທຣາຟີມ*+ຂຶ້ນມາ ແລະແຕ່ງຕັ້ງລູກຊາຍຄົນໜຶ່ງເປັນປະໂລຫິດໃຫ້ລາວ.+
6 ໃນສະໄໝນັ້ນ ພວກອິດສະຣາເອນຍັງບໍ່ມີກະສັດເທື່ອ+ ແຕ່ລະຄົນຈຶ່ງເຮັດໃນສິ່ງທີ່ໂຕເອງຄິດວ່າຖືກຕ້ອງ.+
7 ມີຊາຍໜຸ່ມຄົນໜຶ່ງອາໄສຢູ່ເມືອງເບັດເລເຮັມ+ໃນເຂດຂອງຢູດາ. ລາວເປັນຄົນເລວີ+ ແຕ່ລາວຢູ່ນຳຄອບຄົວຂອງຄົນຢູດາມາໄລຍະໜຶ່ງ.
8 ຕໍ່ມາ ລາວໄດ້ອອກຈາກບ່ອນນັ້ນເພື່ອໄປຊອກບ່ອນຢູ່ໃໝ່. ເມື່ອລາວເດີນທາງມາຮອດເຮືອນຂອງມີກາ+ໃນເຂດພູຂອງເອຟຣາຢິມ
9 ມີກາກໍຖາມລາວວ່າ: “ເຈົ້າມາແຕ່ໃສ?” ລາວຕອບວ່າ: “ຂ້ອຍເປັນຄົນເລວີມາຈາກເມືອງເບັດເລເຮັມໃນເຂດຢູດາ. ຂ້ອຍກຳລັງຊອກຫາບ່ອນຢູ່ໃໝ່ຢູ່.”
10 ມີກາເວົ້າກັບລາວວ່າ: “ມາຢູ່ນຳຂ້ອຍບໍ່? ມາເປັນທີ່ປຶກສາແລະເຮັດວຽກປະໂລຫິດໃຫ້ຂ້ອຍ. ແຕ່ລະປີຂ້ອຍຈະຈ້າງເຈົ້າເປັນເງິນໜັກ 10 ເຊເກນ* ມີອາຫານແລະເຄື່ອງນຸ່ງໃຫ້ນຳ.” ແລ້ວຄົນເລວີກໍເຂົ້າໄປໃນເຮືອນຂອງມີກາ.
11 ຄົນເລວີຈຶ່ງຕົກລົງຈະຢູ່ນຳມີກາ ແລະມີກາກໍຖືວ່າລາວເປັນຄືກັບລູກຄົນໜຶ່ງ.
12 ມີກາໄດ້ແຕ່ງຕັ້ງຄົນເລວີຄົນນັ້ນໃຫ້ເປັນປະໂລຫິດ+ແລະໃຫ້ຢູ່ເຮືອນນຳລາວ.
13 ແລ້ວມີກາກໍເວົ້າວ່າ: “ຕອນນີ້ ຂ້ອຍຮູ້ແລ້ວວ່າພະເຢໂຫວາຈະອວຍພອນຂ້ອຍ ຍ້ອນຂ້ອຍໄດ້ຄົນເລວີມາເປັນປະໂລຫິດ.”
ຂໍ ຄວາມ ໄຂ ເງື່ອນ
^ 12,5 ກິໂລກຣາມ. ເບິ່ງພາກຜະໜວກ ຂ14.
^ 2,3 ກິໂລກຣາມ
^ ເບິ່ງສ່ວນອະທິບາຍຄຳສັບ
^ ຫຼື “ຮູບພະປະຈຳເຮືອນ; ຮູບປັ້ນ”
^ 114 ກຣາມ