ພວກຜູ້ຕັດສິນ 7:1-25
7 ຈາກນັ້ນ ເຢຣຸບບາອານຫຼືກີເດໂອນ+ກັບພວກທະຫານຂອງລາວກໍລຸກແຕ່ເຊົ້າໆ ແລະໄປຕັ້ງຄ້າຍຢູ່ໃກ້ໆນ້ຳອອກບໍ່ຫາໂຣດ. ຕອນນັ້ນ ພວກມີດີອານຕັ້ງຄ້າຍຢູ່ໂນນພູໂມເຣໃນທົ່ງພຽງ ເຊິ່ງຢູ່ທາງທິດເໜືອຂອງຄ້າຍກີເດໂອນ.
2 ພະເຢໂຫວາເວົ້າກັບກີເດໂອນວ່າ: “ເຈົ້າມີທະຫານຫຼາຍໂພດ. ຄັນເຮົາມອບພວກມີດີອານໄວ້ໃນມືຂອງພວກເຈົ້າ+ ພວກອິດສະຣາເອນກໍຈະຄິດແລະເວົ້າວ່າເຂົາເຈົ້າເອົາຊະນະພວກສັດຕູດ້ວຍກຳລັງຂອງເຂົາເຈົ້າເອງ.+
3 ຕອນນີ້ ໃຫ້ເຈົ້າປະກາດກັບເຂົາເຈົ້າວ່າ ‘ຖ້າຜູ້ໃດຢ້ານກໍໃຫ້ຜູ້ນັ້ນກັບເມືອໄດ້.’”+ ແລ້ວກີເດໂອນກໍທົດສອບເຂົາເຈົ້າຕາມຄຳເວົ້ານັ້ນ. ມີທະຫານ 22.000 ຄົນກັບເມືອເຮືອນ ຍັງເຫຼືອແຕ່ 10.000 ຄົນ.
4 ພະເຢໂຫວາເວົ້າກັບກີເດໂອນອີກວ່າ: “ເຈົ້າຍັງມີທະຫານຫຼາຍໂພດ. ໃຫ້ເຈົ້າພາເຂົາເຈົ້າລົງໄປຫ້ວຍ ແລ້ວເຮົາຈະທົດສອບເຂົາເຈົ້າຢູ່ຫັ້ນ. ຖ້າເຮົາບອກເຂົາເຈົ້າວ່າ ‘ຜູ້ນີ້ຈະໄປກັບເຈົ້າ’ ລາວກໍຈະໄປ. ແຕ່ຖ້າເຮົາບອກເຈົ້າວ່າ ‘ຜູ້ນີ້ຈະບໍ່ໄດ້ໄປກັບເຈົ້າ’ ລາວກໍຈະບໍ່ໄດ້ໄປ.”
5 ແລ້ວກີເດໂອນກໍພາພວກທະຫານລົງໄປຫ້ວຍ.
ພະເຢໂຫວາເວົ້າກັບລາວວ່າ: “ໃຫ້ເຈົ້າແຍກທຸກຄົນທີ່ກອບນ້ຳຂຶ້ນມາກິນ*ອອກຈາກຄົນທີ່ຄູ້ເຂົ່າແລະກົ້ມກິນນ້ຳ.”
6 ຄົນທີ່ກອບນ້ຳຂຶ້ນມາກິນມີ 300 ຄົນ. ເຫຼືອນັ້ນແມ່ນຄົນທີ່ຄູ້ເຂົ່າແລະກົ້ມກິນນ້ຳ.
7 ພະເຢໂຫວາເວົ້າກັບກີເດໂອນວ່າ: “ເຮົາຈະມອບພວກມີດີອານໄວ້ໃນມືຂອງເຈົ້າດ້ວຍທະຫານ 300 ຄົນທີ່ກອບນ້ຳຂຶ້ນມາກິນນີ້.+ ສ່ວນຄົນອື່ນໆໃຫ້ເຂົາເຈົ້າກັບເມືອເຮືອນ.”
8 ຈາກນັ້ນ ທະຫານ 300 ຄົນນັ້ນກໍເອົາອາຫານກັບແກຈາກທະຫານຄົນອື່ນໆ ແລ້ວກີເດໂອນກໍໃຫ້ທະຫານຄົນອື່ນໆກັບເມືອ ເຫຼືອແຕ່ 300 ຄົນທີ່ຢູ່ນຳລາວ. ຄ້າຍຂອງພວກມີດີອານຢູ່ທົ່ງພຽງ ແລະຢູ່ຕ່ຳກວ່າຄ້າຍຂອງກີເດໂອນ.+
9 ຄືນນັ້ນ ພະເຢໂຫວາເວົ້າກັບກີເດໂອນວ່າ: “ໃຫ້ໄປໂຈມຕີພວກມີດີອານ ເພາະເຮົາໄດ້ມອບພວກເຂົາໄວ້ໃນມືຂອງເຈົ້າແລ້ວ.+
10 ແຕ່ຖ້າເຈົ້າຍັງບໍ່ກ້າໄປໂຈມຕີກໍໃຫ້ເຈົ້າລົງໄປຄ້າຍນັ້ນກັບປູຣາຄົນຮັບໃຊ້ຂອງເຈົ້າ.
11 ໄປຟັງວ່າເຂົາເຈົ້າລົມຫຍັງກັນ ແລ້ວເຈົ້າກໍຈະກ້າໄປໂຈມຕີຄ້າຍນັ້ນ.” ກີເດໂອນກັບປູຣາຄົນຮັບໃຊ້ຂອງລາວຈຶ່ງລົງໄປໃກ້ໆຄ້າຍຂອງພວກສັດຕູ.
12 ພວກມີດີອານ ພວກອາມາເລັກ ແລະພວກທີ່ມາຈາກທາງທິດຕາເວັນອອກ+ໄດ້ຕັ້ງຄ້າຍຢູ່ທົ່ງພຽງຄືກັບຝູງຕັກກະແຕນ. ອູດຂອງພວກເຂົາມີບັກຫຼາຍໆ+ຄືກັບເມັດດິນຊາຍຢູ່ຫາດຊາຍ.
13 ເມື່ອກີເດໂອນໄປຮອດຫັ້ນ ລາວກໍໄດ້ຍິນທະຫານຄົນໜຶ່ງເລົ່າຄວາມຝັນໃຫ້ໝູ່ຟັງວ່າ: “ຂ້ອຍຝັນວ່າມີເຂົ້າຈີ່ກ້ອນໜຶ່ງທີ່ເຮັດຈາກເຂົ້າບາເລກິ້ງມາໃສ່ຄ້າຍຂອງພວກມີດີອານ.+ ມັນກິ້ງມາຖືກເຕັ້ນບັກແຮງໆຈົນວ່າເຕັ້ນປີ້ນແລະພັງລົງ.”
14 ໝູ່ຂອງທະຫານຄົນນັ້ນກໍເວົ້າວ່າ: “ຕ້ອງແມ່ນດາບຂອງກີເດໂອນ+ລູກຊາຍຂອງໂຢອາດຄົນອິດສະຣາເອນແນ່ນອນ. ພະເຈົ້າໄດ້ມອບພວກມີດີອານແລະທະຫານທັງໝົດໄວ້ໃນມືຂອງລາວແລ້ວ.”+
15 ເມື່ອກີເດໂອນໄດ້ຍິນທະຫານເລົ່າຄວາມຝັນແລະຄວາມໝາຍຂອງຄວາມຝັນແລ້ວ+ ລາວກໍກົ້ມລົງນະມັດສະການພະເຈົ້າ. ຫຼັງຈາກນັ້ນ ລາວກັບໄປຄ້າຍຂອງພວກອິດສະຣາເອນແລະເວົ້າວ່າ: “ໄປ໋ພວກເຮົາ ພະເຢໂຫວາໄດ້ມອບທະຫານມີດີອານໄວ້ໃນມືຂອງພວກເຮົາແລ້ວ.”
16 ແລ້ວລາວກໍແບ່ງທະຫານ 300 ຄົນອອກເປັນ 3 ກອງ. ລາວເອົາແກເຂົາສັດ+ກັບໝໍ້ໃຫຍ່ທີ່ມີກະບອງໄຟຢູ່ທາງໃນໃຫ້ເຂົາເຈົ້າຄົນລະຊຸດ.
17 ກີເດໂອນເວົ້າກັບເຂົາເຈົ້າວ່າ: “ເບິ່ງຂ້ອຍເດີ້ ຖ້າຂ້ອຍເຮັດຫຍັງກໍໃຫ້ເຮັດຄືກັບຂ້ອຍ. ເມື່ອຂ້ອຍໄປຮອດໃກ້ໆຄ້າຍ ພວກເຈົ້າເຫັນຂ້ອຍເຮັດຫຍັງກໍໃຫ້ເຮັດຄືກັບຂ້ອຍໂລດ.
18 ເມື່ອຂ້ອຍກັບຄົນທີ່ໄປນຳຂ້ອຍເປົ່າແກ ພວກເຈົ້າກໍຕ້ອງເປົ່າແກຈາກບ່ອນທີ່ພວກເຈົ້າຢືນຢູ່ອ້ອມຮອບຄ້າຍນັ້ນ ແລະໃຫ້ຮ້ອງດັງໆວ່າ ‘ການຕໍ່ສູ້ເປັນຂອງພະເຢໂຫວາແລະຂອງກີເດໂອນ!’”
19 ກີເດໂອນກັບທະຫານ 100 ຄົນໄປຮອດແຄມຄ້າຍຂອງສັດຕູກ່ອນທ່ຽງຄືນ* ເຊິ່ງເປັນເວລາທີ່ທະຫານຂອງສັດຕູປ່ຽນເວນຍາມກັນ. ແລ້ວພວກຂອງກີເດໂອນກໍເປົ່າແກເຂົາສັດ+ແລະທຸບໝໍ້ໃຫຍ່ທີ່ຖືຢູ່.+
20 ທະຫານທັງ 3 ກອງເປົ່າແກແລະທຸບໝໍ້ໃຫຍ່. ມືຊ້າຍຂອງເຂົາເຈົ້າຖືກະບອງໄຟແລະເປົ່າແກທີ່ຢູ່ມືຂວາໄປນຳ. ເຂົາເຈົ້າຮ້ອງສຽງດັງວ່າ: “ການຕໍ່ສູ້ເປັນຂອງພະເຢໂຫວາແລະຂອງກີເດໂອນ!”
21 ພວກທະຫານຂອງກີເດໂອນຢືນຢູ່ຊື່ໆຢູ່ນອກຄ້າຍ ແຕ່ທະຫານທັງໝົດຂອງພວກມີດີອານທີ່ຢູ່ໃນຄ້າຍກໍພາກັນທັງຮ້ອງທັງແລ່ນໜີ.+
22 ພວກທະຫານ 300 ຄົນກໍເປົ່າແກຕໍ່ໄປ ແລ້ວພະເຢໂຫວາກໍເຮັດໃຫ້ທະຫານທີ່ຢູ່ໃນຄ້າຍຂ້າກັນເອງ.+ ທະຫານຂອງພວກສັດຕູແຕກໜີໄປຮອດເມືອງເບັດຊີດຕາ ໄປຮອດເຊເຣຣາ ແລະໄປຈົນຮອດເຂດຂອງອາເບັນເມໂຮລາ+ທີ່ຢູ່ໃກ້ກັບຕັບບັດ.
23 ທະຫານອິດສະຣາເອນຈາກຕະກູນນັບທາລີ ຕະກູນອາເຊ ແລະທະຫານທຸກຄົນຈາກຕະກູນມານາເຊ+ກໍຖືກເອີ້ນໃຫ້ມາລວມໂຕກັນເພື່ອໄລ່ນຳຫຼັງທະຫານຂອງພວກມີດີອານ.
24 ກີເດໂອນໄດ້ສົ່ງຄົນໄປບອກທຸກຄົນທີ່ຢູ່ໃນເຂດພູຂອງເອຟຣາຢິມວ່າ: “ໃຫ້ລົງມາຕໍ່ສູ້ພວກມີດີອານ ແລະຍຶດບ່ອນຂ້າມແມ່ນ້ຳຈໍແດນກັບບ່ອນຂ້າມແມ່ນ້ຳຕ່າງໆທີ່ຢູ່ໃນເຂດເບັດບາຣາເພື່ອບໍ່ໃຫ້ພວກສັດຕູຂ້າມໄດ້.” ທະຫານຈາກຕະກູນເອຟຣາຢິມກໍມາລວມໂຕກັນແລະໄດ້ຍຶດບ່ອນຂ້າມແມ່ນ້ຳຈໍແດນກັບບ່ອນຂ້າມແມ່ນ້ຳຕ່າງໆທີ່ຢູ່ໃນເຂດເບັດບາຣາ.
25 ເຂົາເຈົ້າຈັບເຈົ້ານາຍຂອງພວກມີດີອານໄດ້ 2 ຄົນຄືໂອເຣັບກັບເຊເອບ. ເຂົາເຈົ້າຂ້າໂອເຣັບຢູ່ຫີນໃຫຍ່ກ້ອນໜຶ່ງ ເຊິ່ງຕໍ່ມາເຂົາເຈົ້າເອີ້ນຫີນນັ້ນວ່າໂອເຣັບ+ ແລະຂ້າເຊເອບຢູ່ບ່ອນເຮັດເຫຼົ້າແວງ ເຊິ່ງຕໍ່ມາເຂົາເຈົ້າເອີ້ນບ່ອນນັ້ນວ່າເຊເອບ. ແລ້ວເຂົາເຈົ້າກໍໄລ່ນຳຫຼັງພວກມີດີອານຕໍ່ໄປ.+ ເຂົາເຈົ້າໄດ້ຕັດຫົວຂອງໂອເຣັບກັບເຊເອບໄປໃຫ້ກີເດໂອນຢູ່ເຂດແມ່ນ້ຳຈໍແດນ.
ຂໍ ຄວາມ ໄຂ ເງື່ອນ
^ ແປຕາມໂຕວ່າ “ທຸກຄົນທີ່ໃຊ້ລີ້ນເລຍກິນນ້ຳຄືກັບໂຕໝາກິນນ້ຳ”
^ ແປຕາມໂຕວ່າ “ຕອນເລີ່ມຕົ້ນຂອງການເຝົ້າຍາມໃນຕອນກາງຄືນ.” ເຊິ່ງເລີ່ມຕັ້ງແຕ່ 10 ໂມງແລງຈົນຮອດ 2 ໂມງເຊົ້າ.