ພະນິມິດທີ່ເປີດເຜີຍໃຫ້ໂຢຮັນ 10:1-11
10 ຂ້ອຍເຫັນທູດສະຫວັນທີ່ມີກຳລັງຫຼາຍອີກອົງໜຶ່ງລົງມາຈາກສະຫວັນ. ມີຂີ້ເຝື້ອຢູ່ອ້ອມ*ໂຕເພິ່ນ ມີຮຸ້ງຢູ່ເທິງຫົວເພິ່ນ ໜ້າຂອງເພິ່ນຄືກັບດວງຕາເວັນ+ ແລະຂາຄືກັບເສົາໄຟ.
2 ທູດສະຫວັນອົງນັ້ນຖືມ້ວນໜັງສືນ້ອຍໆມ້ວນໜຶ່ງທີ່ມາຍຢູ່. ຕີນເບື້ອງຂວາຂອງເພິ່ນຢຽບຢູ່ເທິງທະເລ ແຕ່ຕີນເບື້ອງຊ້າຍຢຽບແຜ່ນດິນ.
3 ເພິ່ນຮ້ອງສຽງດັງຄືກັບໂຕສິງແຜດສຽງຮ້ອງ.+ ຕອນທີ່ເພິ່ນຮ້ອງສຽງດັງ ຂ້ອຍກໍໄດ້ຍິນສຽງຟ້າຮ້ອງທັງເຈັດ+ເວົ້າ.
4 ເມື່ອຟ້າຮ້ອງທັງເຈັດເວົ້າ ຂ້ອຍກຳລັງຈະຂຽນໄວ້ ແຕ່ກໍໄດ້ຍິນສຽງເວົ້າຈາກສະຫວັນ+ວ່າ: “ສິ່ງທີ່ຟ້າຮ້ອງທັງເຈັດເວົ້າ ໃຫ້ເກັບໄວ້ເປັນຄວາມລັບ ບໍ່ຕ້ອງຂຽນເລື່ອງເຫຼົ່ານັ້ນ.”
5 ທູດສະຫວັນທີ່ຂ້ອຍເຫັນຢືນກວມລະຫວ່າງທະເລກັບແຜ່ນດິນນັ້ນໄດ້ຍົກມືເບື້ອງຂວາຂຶ້ນຟ້າ.
6 ເພິ່ນສາບານໂດຍອ້າງພະເຈົ້າຜູ້ມີຊີວິດຢູ່ຕະຫຼອດໄປ+ ຜູ້ສ້າງຟ້າກັບສິ່ງທີ່ຢູ່ເທິງຟ້າ ໂລກກັບສິ່ງທີ່ຢູ່ໃນໂລກ ແລະທະເລກັບສິ່ງທີ່ຢູ່ໃນທະເລ. ເພິ່ນສາບານວ່າ:+ “ພະເຈົ້າຈະບໍ່ຊ້າອີກຕໍ່ໄປ.
7 ເມື່ອຮອດມື້ທີ່ທູດສະຫວັນອົງທີ 7+ ເປົ່າແກ+ ເລື່ອງທີ່ເປັນຄວາມລັບສັກສິດ+ກໍຈະເກີດຂຶ້ນທຸກຢ່າງ. ຄວາມລັບນີ້ເປັນຂ່າວດີທີ່ພະເຈົ້າບອກທາດຂອງເພິ່ນເຊິ່ງກໍແມ່ນພວກຜູ້ພະຍາກອນ.”+
8 ສຽງທີ່ຂ້ອຍໄດ້ຍິນຈາກສະຫວັນ+ເວົ້າກັບຂ້ອຍອີກວ່າ: “ໄປເອົາມ້ວນໜັງສືທີ່ມາຍຢູ່ໃນມືຂອງທູດສະຫວັນອົງນັ້ນທີ່ຢືນກວມລະຫວ່າງທະເລກັບແຜ່ນດິນ.”+
9 ຂ້ອຍຈຶ່ງໄປຫາທູດສະຫວັນອົງນັ້ນແລະຂໍມ້ວນໜັງສືນ້ອຍໆມ້ວນນັ້ນຈາກເພິ່ນ. ເພິ່ນບອກຂ້ອຍວ່າ: “ເອົາໄປແມ້ ແລ້ວກິນໃຫ້ໝົດ.+ ມັນຈະເຮັດໃຫ້ທ້ອງຂອງເຈົ້າເຈັບ* ແຕ່ມັນຈະຫວານຄືນ້ຳເຜີ້ງຢູ່ໃນປາກຂອງເຈົ້າ.”
10 ຂ້ອຍຈັບເອົາມ້ວນໜັງສືນ້ອຍໆທີ່ຢູ່ມືຂອງທູດສະຫວັນມາກິນ+ ແລ້ວມັນກໍຫວານຄືນ້ຳເຜີ້ງຢູ່ໃນປາກຂ້ອຍ+ ແຕ່ເມື່ອກິນໝົດ ທ້ອງຂອງຂ້ອຍກໍເຈັບ.
11 ແລ້ວຂ້ອຍກໍໄດ້ຍິນສຽງບອກວ່າ: “ເຈົ້າຈະຕ້ອງພະຍາກອນອີກກ່ຽວກັບຊົນຊາດ ປະເທດ ແລະພາສາຕ່າງໆ ລວມທັງກະສັດຫຼາຍອົງນຳ.”
