ພະນິມິດທີ່ເປີດເຜີຍໃຫ້ໂຢຮັນ 19:1-21
19 ຫຼັງຈາກນັ້ນ ຂ້ອຍໄດ້ຍິນສຽງດັງຄືກັບສຽງຄົນບັກຫຼາຍໆຢູ່ໃນສະຫວັນເວົ້າວ່າ: “ໃຫ້ສັນລະເສີນເຢໂຫວາ!*+ ຄວາມລອດມາຈາກເພິ່ນ ສະຫງ່າລາສີ ແລະລິດເດດເປັນຂອງພະເຈົ້າຂອງພວກເຮົາ.
2 ເພິ່ນຕັດສິນຢ່າງຖືກຕ້ອງແລະຍຸຕິທຳ.+ ເພິ່ນໄດ້ລົງໂທດແມ່ຈ້າງທີ່ເຮັດໃຫ້ໂລກເສື່ອມເສຍດ້ວຍການເຮັດຜິດສິນລະທຳທາງເພດ*ຂອງລາວ ແລະເພິ່ນໄດ້ແກ້ແຄ້ນແທນທາດຂອງເພິ່ນທີ່ຖືກລາວຂ້າ.”+
3 ທັນໃດນັ້ນ ເຂົາເຈົ້າກໍເວົ້າອີກເທື່ອໜຶ່ງວ່າ: “ໃຫ້ສັນລະເສີນເຢໂຫວາ!*+ ໃຫ້ຄວັນຈາກເມືອງນັ້ນລອຍຂຶ້ນຕະຫຼອດໄປ.”+
4 ແລ້ວຜູ້ປົກຄອງ 24 ຄົນ+ກັບສິ່ງທີ່ມີຊີວິດ 4 ໂຕນັ້ນ+ກໍໝູບລົງນະມັດສະການພະເຈົ້າຜູ້ທີ່ນັ່ງຢູ່ເທິງບັນລັງແລະເວົ້າວ່າ: “ອາແມນ!* ໃຫ້ສັນລະເສີນເຢໂຫວາ!”*+
5 ແລ້ວກໍມີສຽງເວົ້າມາຈາກບັນລັງນັ້ນວ່າ: “ທຸກຄົນທີ່ເປັນທາດຂອງເພິ່ນ ທີ່ຢ້ານຢຳເພິ່ນ ທັງຄົນທຳມະດາແລະຄົນທີ່ມີອຳນາດ+ ໃຫ້ທຸກຄົນສັນລະເສີນພະເຈົ້າຂອງພວກເຮົາ.”+
6 ແລ້ວຂ້ອຍກໍໄດ້ຍິນສຽງທີ່ຄືກັບສຽງຄົນບັກຫຼາຍໆ ຄືກັບສຽງນ້ຳໄຫຼແຮງໆ ແລະຄືກັບສຽງຟ້າຮ້ອງດັງສະໜັ່ນ. ສຽງນັ້ນເວົ້າວ່າ: “ໃຫ້ສັນລະເສີນເຢໂຫວາ!*+ ຍ້ອນພະເຢໂຫວາພະເຈົ້າຂອງພວກເຮົາຜູ້ມີລິດເດດສູງສຸດ+ເລີ່ມປົກຄອງເປັນກະສັດແລ້ວ!+
7 ໃຫ້ພວກເຮົາມີຄວາມສຸກຄວາມຍິນດີແລະຍ້ອງຍໍສັນລະເສີນເພິ່ນ ຍ້ອນຮອດເວລາແລ້ວທີ່ແກະນ້ອຍຂອງພະເຈົ້າຈະແຕ່ງດອງ ແລະເຈົ້າສາວຂອງລາວກໍກຽມໂຕພ້ອມແລ້ວ.
8 ເຈົ້າສາວໄດ້ຮັບເອົາຊຸດຜ້າລີນິນເນື້ອດີທີ່ສະອາດສົດໃສມານຸ່ງ. ຜ້າລີນິນເນື້ອດີນັ້ນໝາຍເຖິງການກະທຳທີ່ຖືກຕ້ອງຂອງພວກຜູ້ບໍລິສຸດ.”+
9 ແລ້ວທູດສະຫວັນອົງນັ້ນບອກຂ້ອຍວ່າ: “ໃຫ້ຂຽນວ່າ ແຂກທີ່ຖືກເຊີນມາງານແຕ່ງດອງຂອງແກະນ້ອຍຂອງພະເຈົ້າກໍມີຄວາມສຸກ.”+ ລາວຍັງບອກຂ້ອຍວ່າ: “ທັງໝົດນີ້ເປັນຄຳເວົ້າທີ່ເຊື່ອຖືໄດ້ຂອງພະເຈົ້າ.”
10 ແລ້ວຂ້ອຍກໍໝູບລົງຢູ່ຕີນຂອງທູດສະຫວັນເພື່ອຈະນະມັດສະການລາວ ແຕ່ລາວຫ້າມຂ້ອຍໄວ້ແລະເວົ້າວ່າ: “ຢ່າ! ຢ່າເຮັດແນວນີ້!+ ໃຫ້ນະມັດສະການພະເຈົ້າເດີ້!+ ຂ້ອຍກໍເປັນທາດຄືກັບເຈົ້າແລະຄືກັບພີ່ນ້ອງຂອງເຈົ້າທີ່ເຮັດວຽກປະກາດເລື່ອງພະເຢຊູ.+ ເຫດຜົນທີ່ມີຄຳພະຍາກອນຕ່າງໆກໍເພື່ອປະກາດຄວາມຈິງເລື່ອງພະເຢຊູຫັ້ນແຫຼະ.”+
11 ຂ້ອຍເຫັນສະຫວັນເປີດອອກແລະມີມ້າສີຂາວໂຕໜຶ່ງ.+ ຜູ້ທີ່ນັ່ງເທິງມ້ານັ້ນມີຊື່ວ່າສັດຊື່+ແລະເຊື່ອຖືໄດ້.+ ເພິ່ນຕັດສິນແລະເຮັດສົງຄາມຢ່າງຍຸຕິທຳ.+
12 ຕາຂອງເພິ່ນເປັນຄືກັບແປວໄຟ+ແລະເພິ່ນໃສ່ມົງກຸດຫຼາຍອັນ. ເພິ່ນມີຊື່ຂຽນໄວ້ຢູ່ຕົນໂຕເຊິ່ງເປັນຊື່ທີ່ບໍ່ມີຜູ້ໃດຮູ້ຈັກນອກຈາກເພິ່ນເອງ.
13 ເພິ່ນໃສ່ເຄື່ອງນຸ່ງທີ່ມີຮອຍເລືອດແລະເພິ່ນມີຊື່ວ່າໂຄສົກ*+ຂອງພະເຈົ້າ.
14 ກອງທັບໃນສະຫວັນກໍຂີ່ມ້າຂາວນຳຫຼັງເພິ່ນໄປ ແລະເຂົາເຈົ້ານຸ່ງເຄື່ອງທີ່ເປັນຜ້າລີນິນເນື້ອດີສີຂາວສະອາດ.
15 ມີດາບຍາວທີ່ຄົມຫຼາຍອອກມາຈາກປາກຂອງເພິ່ນ.+ ເພິ່ນຈະໃຊ້ດາບນັ້ນຟັນປະເທດຕ່າງໆ ແລະຈະປົກຄອງ*ເຂົາເຈົ້າດ້ວຍຄ້ອນເຫຼັກຂອງກະສັດ.+ ນອກຈາກນັ້ນ ເພິ່ນຈະຢຽບໃນອ່າງຢຽບໝາກລະແຊັງທີ່ໝາຍເຖິງຄວາມໃຈຮ້າຍຫຼາຍຂອງພະເຈົ້າຜູ້ມີລິດເດດສູງສຸດ.+
16 ເພິ່ນມີຊື່ຂຽນຢູ່ເຄື່ອງນຸ່ງທີ່ຢູ່ແຖວກົກຂາວ່າ ກະສັດເໜືອກະສັດທຸກອົງແລະເຈົ້ານາຍເໜືອເຈົ້ານາຍທັງໝົດ.+
17 ຂ້ອຍເຫັນທູດສະຫວັນອົງໜຶ່ງຢືນຢູ່ກາງແສງຕາເວັນ ແລະລາວຮ້ອງສຽງດັງບອກນົກທຸກໂຕທີ່ບິນຢູ່ເທິງຟ້າວ່າ: “ມານີ້ ມາລວມກັນໃນງານລ້ຽງໃຫຍ່ຂອງພະເຈົ້າ.+
18 ມາກິນຊີ້ນຂອງພວກກະສັດ ຊີ້ນຂອງພວກນາຍພັນ ຊີ້ນຂອງຄົນທີ່ມີອຳນາດ+ ຊີ້ນຂອງມ້າກັບຄົນຂີ່ມ້າ+ ແລະຊີ້ນຂອງທຸກຄົນ ທັງຄົນທີ່ເປັນອິດສະຫຼະແລະຄົນທີ່ເປັນທາດ ທັງຄົນທຳມະດາແລະຄົນທີ່ສຳຄັນ.”
19 ແລ້ວຂ້ອຍກໍເຫັນສັດຮ້າຍນັ້ນກັບພວກກະສັດໃນໂລກແລະກອງທັບຂອງເຂົາເຈົ້າມາລວມກັນ ເພື່ອເຮັດສົງຄາມກັບຜູ້ທີ່ຂີ່ມ້ານັ້ນແລະກອງທັບຂອງເພິ່ນ.+
20 ແລ້ວສັດຮ້າຍນັ້ນກໍຖືກຈັບພ້ອມກັບຜູ້ພະຍາກອນປອມ+ ເຊິ່ງແມ່ນຜູ້ທີ່ເຮັດສິ່ງມະຫັດສະຈັນຕ່າງໆຕໍ່ໜ້າສັດຮ້າຍເພື່ອຫຼອກລວງຄົນທີ່ໄດ້ຮັບເຄື່ອງໝາຍຂອງສັດຮ້າຍ+ແລະຄົນທີ່ຂາບໄຫວ້ຮູບປັ້ນຂອງມັນ.+ ສັດຮ້າຍແລະຜູ້ພະຍາກອນປອມຖືກໂຍນລົງໄປໃນບຶງໄຟທີ່ລຸກໄໝ້ດ້ວຍມາດທັງໆທີ່ຍັງມີຊີວິດຢູ່.+
21 ສ່ວນຄົນທີ່ເຫຼືອກໍຖືກຂ້າດ້ວຍດາບຍາວທີ່ອອກມາຈາກປາກຂອງຜູ້ທີ່ນັ່ງເທິງມ້ານັ້ນ+ ແລະນົກທຸກໂຕກໍມາກິນຊີ້ນຂອງເຂົາເຈົ້າຈົນອີ່ມ.+
ຂໍ
^ ແປຕາມໂຕວ່າ “ໃຫ້ສັນລະເສີນຢາ.” ຫຼື “ອາເລລູຢາ!” ຄຳວ່າ ຢາ ແມ່ນຊື່ຫຍໍ້ຂອງພະເຢໂຫວາ.
^ ຄຳພາສາກຣີກແມ່ນພໍເນຍ. ເບິ່ງຄຳວ່າ “ພໍເນຍ” ໃນສ່ວນອະທິບາຍຄຳສັບ.
^ ແປຕາມໂຕວ່າ “ໃຫ້ສັນລະເສີນຢາ.” ຫຼື “ອາເລລູຢາ!” ຄຳວ່າ ຢາ ແມ່ນຊື່ຫຍໍ້ຂອງພະເຢໂຫວາ.
^ ແປຕາມໂຕວ່າ “ໃຫ້ສັນລະເສີນຢາ.” ຫຼື “ອາເລລູຢາ!” ຄຳວ່າ ຢາ ແມ່ນຊື່ຫຍໍ້ຂອງພະເຢໂຫວາ.
^ ຫຼື “ຂໍໃຫ້ເປັນແນວນັ້ນ”
^ ແປຕາມໂຕວ່າ “ໃຫ້ສັນລະເສີນຢາ.” ຫຼື “ອາເລລູຢາ!” ຄຳວ່າ ຢາ ແມ່ນຊື່ຫຍໍ້ຂອງພະເຢໂຫວາ.
^ ຫຼື “ຄຳເວົ້າ”
^ ແປຕາມໂຕວ່າ “ລ້ຽງ”
