ພະນິມິດທີ່ເປີດເຜີຍໃຫ້ໂຢຮັນ 20:1-15
20 ແລ້ວຂ້ອຍກໍເຫັນທູດສະຫວັນອົງໜຶ່ງລົງມາຈາກສະຫວັນ ເພິ່ນຖືລູກກະແຈຂອງເຫວເລິກ+ກັບໂສ້ໃຫຍ່ເສັ້ນໜຶ່ງ.
2 ເພິ່ນຈັບພະຍານາກ+ທີ່ເປັນງູໂຕທຳອິດນັ້ນ+ເຊິ່ງແມ່ນມານຮ້າຍ+ແລະຊາຕານ+ ແລ້ວມັດມັນໄວ້ 1.000 ປີ.
3 ເພິ່ນຖິ້ມມັນລົງໃນເຫວເລິກ+ ຂັງມັນໄວ້ ແລະຈ້ຳກາໃສ່ເຫວເລິກນັ້ນ ເພື່ອບໍ່ໃຫ້ມັນອອກມາຫຼອກລວງປະເທດຕ່າງໆອີກຈົນກວ່າຈະຄົບ 1.000 ປີ. ຫຼັງຈາກນັ້ນ ມັນຈະຖືກປ່ອຍອອກມາໄລຍະໜຶ່ງ.+
4 ແລ້ວຂ້ອຍເຫັນບັນລັງຫຼາຍບັນລັງ ແລະຜູ້ທີ່ນັ່ງຢູ່ເທິງບັນລັງເຫຼົ່ານັ້ນໄດ້ຮັບອຳນາດທີ່ຈະຕັດສິນ. ແລ້ວຂ້ອຍກໍເຫັນຄົນທີ່ຖືກຂ້າຍ້ອນປະກາດເລື່ອງພະເຢຊູແລະເວົ້າເລື່ອງພະເຈົ້າ. ເຂົາເຈົ້າແມ່ນຄົນທີ່ບໍ່ໄດ້ຂາບໄຫວ້ສັດຮ້າຍແລະຮູບປັ້ນຂອງມັນ ແລະບໍ່ໄດ້ຮັບເຄື່ອງໝາຍຂອງສັດຮ້າຍນັ້ນຢູ່ໜ້າຜາກແລະຢູ່ມື.+ ເຂົາເຈົ້າກັບມາມີຊີວິດອີກແລະໄດ້ປົກຄອງເປັນກະສັດຮ່ວມກັບພະຄລິດ+ເປັນເວລາ 1.000 ປີ.
5 ນີ້ແມ່ນການຄືນມາຈາກຕາຍລຳດັບທຳອິດ.+ ຄົນຕາຍທີ່ເຫຼືອຈາກນັ້ນ+ຍັງບໍ່ໄດ້ຊີວິດຈົນກວ່າຈະຄົບ 1.000 ປີ.
6 ຄົນທີ່ຢູ່ໃນກຸ່ມຄົນທີ່ຄືນມາຈາກຕາຍລຳດັບທຳອິດກໍບໍລິສຸດແລະມີຄວາມສຸກ.+ ຄວາມຕາຍປະເພດທີ 2*+ບໍ່ມີອຳນາດເໜືອເຂົາເຈົ້າເລີຍ.+ ເຂົາເຈົ້າຈະເປັນປະໂລຫິດ+ຂອງພະເຈົ້າແລະຂອງພະຄລິດ ແລະຈະປົກຄອງເປັນກະສັດຮ່ວມກັບພະຄລິດເປັນເວລາ 1.000 ປີ.+
7 ຫຼັງຈາກ 1.000 ປີນັ້ນຈົບລົງແລ້ວ ຊາຕານຈະຖືກປ່ອຍອອກຈາກບ່ອນທີ່ມັນຖືກຂັງ.
8 ມັນຈະອອກໄປຫຼອກລວງປະເທດຕ່າງໆທັງສີ່ແຈຂອງໂລກເຊິ່ງແມ່ນໂຄກແລະມາໂຄກ ເພື່ອຈະລວບລວມເຂົາເຈົ້າໄປເຮັດສົງຄາມ. ຄົນເຫຼົ່ານີ້ມີຫຼາຍຄືກັບເມັດດິນຊາຍໃນທະເລ.
9 ເຂົາເຈົ້າບຸກໄປທົ່ວໂລກແລະລ້ອມຄ້າຍຂອງພວກຜູ້ບໍລິສຸດແລະເມືອງທີ່ພະເຈົ້າຮັກ ແຕ່ມີໄຟຕົກຈາກສະຫວັນລົງມາເຜົາທຳລາຍເຂົາເຈົ້າ.+
10 ມານຮ້າຍທີ່ຫຼອກລວງເຂົາເຈົ້າກໍຖືກຖິ້ມລົງໃນບຶງໄຟທີ່ມີມາດ ເຊິ່ງສັດຮ້າຍ+ກັບຜູ້ພະຍາກອນປອມຢູ່ຫັ້ນແລ້ວ.+ ພວກມັນຈະຖືກທໍລະມານ*ທັງເວັນທັງຄືນຕະຫຼອດໄປ.
11 ແລ້ວຂ້ອຍກໍເຫັນບັນລັງໃຫຍ່ສີຂາວກັບຜູ້ທີ່ນັ່ງເທິງບັນລັງນັ້ນ+ ໂລກກັບຟ້າຫາຍໄປຈາກສາຍຕາເພິ່ນ+ ແລະກໍບໍ່ມີໂລກກັບຟ້າອີກເລີຍ.
12 ຈາກນັ້ນ ຂ້ອຍກໍເຫັນຄົນຕາຍທັງຄົນທຳມະດາແລະຄົນທີ່ມີອຳນາດຢືນຢູ່ຕໍ່ໜ້າບັນລັງນັ້ນ ແລະມ້ວນໜັງສືຕ່າງໆຖືກມາຍອອກ. ມ້ວນໜັງສືອີກມ້ວນໜຶ່ງກໍຖືກມາຍອອກຄືກັນ. ນັ້ນແມ່ນມ້ວນໜັງສືລາຍຊື່ຄົນທີ່ຈະໄດ້ຊີວິດ.+ ແລ້ວຄົນຕາຍກໍຖືກຕັດສິນຕາມການກະທຳຂອງໂຕເອງໂດຍອາໄສສິ່ງທີ່ຂຽນໄວ້ໃນມ້ວນໜັງສືຕ່າງໆນັ້ນ.+
13 ທະເລໄດ້ປ່ອຍຄົນທີ່ຕາຍໃນທະເລ. ຄວາມຕາຍແລະບ່ອນຝັງສົບ*ກໍປ່ອຍຄົນຕາຍທີ່ຢູ່ໃນນັ້ນ. ຈາກນັ້ນແຕ່ລະຄົນກໍຖືກຕັດສິນຕາມການກະທຳຂອງໂຕເອງ.+
14 ແລ້ວຄວາມຕາຍແລະບ່ອນຝັງສົບກໍຖືກໂຍນລົງໃນບຶງໄຟ.+ ບຶງໄຟ+ໝາຍເຖິງຄວາມຕາຍປະເພດທີ 2.+
15 ຜູ້ໃດທີ່ບໍ່ມີຊື່ຢູ່ໃນປຶ້ມລາຍຊື່ຄົນທີ່ຈະໄດ້ຊີວິດ+ກໍຖືກໂຍນລົງໃນບຶງໄຟ.+
