ພະນິມິດທີ່ເປີດເຜີຍໃຫ້ໂຢຮັນ 21:1-27
21 ຈາກນັ້ນ ຂ້ອຍເຫັນຟ້າໃໝ່ກັບໂລກໃໝ່.+ ຟ້າເກົ່າກັບໂລກເກົ່ານັ້ນຫາຍສາບສູນໄປແລ້ວ+ແລະບໍ່ມີທະເລ+ອີກຕໍ່ໄປ.
2 ຂ້ອຍໄດ້ເຫັນເມືອງບໍລິສຸດນຳ ເຊິ່ງແມ່ນເຢຣູຊາເລັມໃໝ່ທີ່ກຳລັງລົງມາຈາກສະຫວັນ. ເມືອງນັ້ນມາຈາກພະເຈົ້າ+ແລະກຽມໄວ້ພ້ອມຄືກັບເຈົ້າສາວທີ່ແຕ່ງໂຕງາມໆສຳລັບເຈົ້າບ່າວ.+
3 ແລ້ວຂ້ອຍໄດ້ຍິນສຽງດັງມາຈາກບັນລັງນັ້ນວ່າ: “ເບິ່ງແມ້! ເຕັ້ນຂອງພະເຈົ້າຢູ່ກັບມະນຸດແລ້ວ. ເພິ່ນຈະຢູ່ກັບເຂົາເຈົ້າ ແລະເຂົາເຈົ້າຈະເປັນປະຊາຊົນຂອງເພິ່ນ. ພະເຈົ້າຈະຢູ່ກັບເຂົາເຈົ້າ.+
4 ພະເຈົ້າຈະເຊັດນ້ຳຕາທຸກຢົດຈາກຕາຂອງເຂົາເຈົ້າ.+ ຄວາມຕາຍຈະບໍ່ມີອີກຕໍ່ໄປ.+ ຄວາມໂສກເສົ້າ ຫຼືສຽງຮ້ອງໄຫ້ເສຍໃຈ ຫຼືຄວາມເຈັບປວດຈະບໍ່ມີອີກເລີຍ.+ ສິ່ງຕ່າງໆເຫຼົ່ານີ້ທີ່ເຄີຍເຮັດໃຫ້ພວກເຮົາເຈັບປວດໄດ້ຜ່ານພົ້ນໄປແລ້ວ.”
5 ຜູ້ທີ່ນັ່ງຢູ່ເທິງບັນລັງນັ້ນ+ເວົ້າວ່າ: “ເຮົາກຳລັງສ້າງທຸກສິ່ງຂຶ້ນໃໝ່.”+ ເພິ່ນເວົ້າອີກວ່າ: “ຂຽນໄວ້ເດີ້! ຍ້ອນຄຳເວົ້າທັງໝົດນີ້ເຊື່ອຖືໄດ້ແລະເປັນຄວາມຈິງ.”
6 ແລ້ວເພິ່ນກໍເວົ້າກັບຂ້ອຍວ່າ: “ເລື່ອງທັງໝົດນີ້ສຳເລັດແລ້ວ! ເຮົາເປັນອັນຟາແລະໂອເມກາ* ເປັນຈຸດເລີ່ມຕົ້ນແລະຈຸດຈົບ.+ ຜູ້ໃດທີ່ຫິວນ້ຳ ເຮົາຈະໃຫ້ລາວກິນນ້ຳຈາກນ້ຳພຸທີ່ໃຫ້ຊີວິດໂດຍບໍ່ຕ້ອງຈ່າຍຄ່າຫຍັງເລີຍ.+
7 ຄົນທີ່ໄດ້ໄຊຊະນະຈະໄດ້ຮັບສິ່ງເຫຼົ່ານີ້ເປັນມໍລະດົກ. ເຮົາຈະເປັນພະເຈົ້າຂອງລາວ ແລະລາວຈະເປັນລູກຂອງເຮົາ.
8 ສ່ວນຄົນຂີ້ຢ້ານ ຄົນບໍ່ມີຄວາມເຊື່ອ+ ຄົນບໍ່ສະອາດ ຄົນເຮັດສິ່ງທີ່ເປັນຕາຂີ້ດຽດ ຄົນຂ້າຄົນ+ ຄົນເຮັດຜິດສິນລະທຳທາງເພດ*+ ຄົນຫຼິ້ນໄສຍະສາດ ຄົນຂາບໄຫວ້ຮູບບູຊາ ແລະທຸກຄົນທີ່ເວົ້າຕົວະ+ ເຂົາເຈົ້າຈະຕ້ອງຢູ່ໃນບຶງໄຟທີ່ລຸກໄໝ້ດ້ວຍມາດ.+ ບຶງໄຟນີ້ໝາຍເຖິງຄວາມຕາຍປະເພດທີ 2.”*+
9 ແລ້ວທູດສະຫວັນອົງໜຶ່ງໃນທູດສະຫວັນ 7 ອົງເຊິ່ງມີຂັນ 7 ໜ່ວຍທີ່ມີໄພພິບັດ 7 ຢ່າງສຸດທ້າຍ+ກໍມາເວົ້າກັບຂ້ອຍວ່າ: “ມານີ້ ຂ້ອຍຈະໃຫ້ເຈົ້າເບິ່ງເຈົ້າສາວທີ່ຈະເປັນເມຍຂອງແກະນ້ອຍຂອງພະເຈົ້າ.”+
10 ດັ່ງນັ້ນ ດ້ວຍພະລັງຂອງພະເຈົ້າ ລາວໄດ້ພາຂ້ອຍໄປພູໜ່ວຍໜຶ່ງທີ່ທັງໃຫຍ່ທັງສູງ ແລະໃຫ້ຂ້ອຍເຫັນເຢຣູຊາເລັມເມືອງບໍລິສຸດທີ່ກຳລັງລົງມາຈາກສະຫວັນ. ເມືອງນັ້ນລົງມາຈາກພະເຈົ້າ+
11 ແລະສະຫງ່າງາມດ້ວຍແສງລັດສະໝີຂອງພະເຈົ້າ.+ ເມືອງນັ້ນເຫຼື້ອມຍິບຍັບຄືກັບເພັດພອຍທີ່ມີຄ່າຫຼາຍ ແລະຄືກັບຫີນແຈສະເປີທີ່ເປັ່ງປະກາຍໃສໆ.+
12 ເມືອງນັ້ນມີກຳແພງທີ່ທັງໃຫຍ່ທັງສູງແລະມີປະຕູ 12 ປ່ອງ. ມີທູດສະຫວັນ 12 ອົງເຝົ້າຢູ່ປະຕູລະອົງ. ຢູ່ປະຕູເຫຼົ່ານັ້ນມີຊື່ຂອງລູກຫຼານອິດສະຣາເອນ 12 ຕະກູນຂຽນໄວ້ປະຕູລະຊື່.
13 ຢູ່ທາງທິດຕາເວັນອອກມີ 3 ປະຕູ ທາງທິດເໜືອມີ 3 ປະຕູ ທາງທິດໃຕ້ມີ 3 ປະຕູ ແລະທາງທິດຕາເວັນຕົກມີ 3 ປະຕູ.+
14 ກຳແພງເມືອງນັ້ນມີຫີນຮາກຖານ 12 ກ້ອນ. ເທິງຫີນເຫຼົ່ານັ້ນມີຊື່ຂອງອັກຄະສາວົກ* 12 ຄົນ+ຂອງແກະນ້ອຍຂອງພະເຈົ້າຂຽນໄວ້ກ້ອນລະຊື່.
15 ຜູ້ທີ່ກຳລັງເວົ້າກັບຂ້ອຍຖືໄມ້ອໍ້ຄຳເພື່ອຈະໃຊ້ແທກເມືອງ ປະຕູເມືອງ ແລະກຳແພງເມືອງນັ້ນ.+
16 ເມືອງນັ້ນເປັນຮູບສີ່ລ່ຽມທີ່ມີລວງຍາວເທົ່າກັບລວງກວ້າງ. ລາວເອົາໄມ້ອໍ້ແທກເມືອງນັ້ນໄດ້ 12.000 ຊະທາດິອອນ.* ເມືອງນັ້ນມີລວງຍາວ ລວງກວ້າງ ແລະລວງສູງເທົ່າກັນໝົດ.
17 ລາວແທກກຳແພງເມືອງນັ້ນໄດ້ 144 ສອກ*ຕາມມາດຕາວັດແທກຂອງມະນຸດເຊິ່ງກໍເປັນມາດຕາວັດແທກຂອງທູດສະຫວັນຄືກັນ.
18 ກຳແພງເມືອງສ້າງດ້ວຍຫີນແຈສະເປີ+ ແລະເມືອງນັ້ນເປັນຄຳແທ້ຄືກັບແກ້ວໃສໆ.
19 ຮາກຖານກຳແພງເມືອງນັ້ນຕົກແຕ່ງດ້ວຍເພັດພອຍທຸກຊະນິດ. ຮາກຖານທີ 1 ເປັນຫີນແຈສະເປີ ຮາກຖານທີ 2 ເປັນແກ້ວໄພລິນ ຮາກຖານທີ 3 ເປັນຫີນໂມຣາ ຮາກຖານທີ 4 ເປັນມໍລະກົດ
20 ຮາກຖານທີ 5 ເປັນຫີນຊາໂດນິກ ຮາກຖານທີ 6 ເປັນພອຍສີແດງ ຮາກຖານທີ 7 ເປັນແກ້ວຄຣິດໂຊໄລທ໌ ຮາກຖານທີ 8 ເປັນແກ້ວເບຣລິນ ຮາກຖານທີ 9 ເປັນແກ້ວໂທພັດສ໌ ຮາກຖານທີ 10 ເປັນຫີນຄຣີດໂຊເພຣດ ຮາກຖານທີ 11 ເປັນແກ້ວໄຮຢາຊິນ ແລະຮາກຖານທີ 12 ເປັນແກ້ວອາເມທິດທ໌.
21 ປະຕູ 12 ປ່ອງເປັນໄຂ່ມຸກ 12 ເມັດ. ແຕ່ລະປະຕູເຮັດຈາກໄຂ່ມຸກ 1 ເມັດ. ທາງໃຫຍ່ຂອງເມືອງນັ້ນເປັນຄຳແທ້ຄືກັບແກ້ວໃສໆ.
22 ຂ້ອຍບໍ່ເຫັນວ່າມີວິຫານໃນເມືອງນັ້ນ ຍ້ອນພະເຢໂຫວາ*ພະເຈົ້າຜູ້ມີລິດເດດສູງສຸດ+ເປັນວິຫານຂອງເມືອງນັ້ນ ແລະແກະນ້ອຍຂອງເພິ່ນກໍເປັນຄືກັນ.
23 ເມືອງນັ້ນບໍ່ຕ້ອງໃຊ້ແສງຈາກຕາເວັນຫຼືເດືອນ ຍ້ອນແສງລັດສະໝີຂອງພະເຈົ້າເຮັດໃຫ້ເມືອງນັ້ນແຈ້ງສະຫວ່າງ+ ແລະແກະນ້ອຍຂອງພະເຈົ້າເປັນຕະກຽງຂອງເມືອງນັ້ນ.+
24 ເມືອງນັ້ນຈະສ່ອງແສງສະຫວ່າງໃສ່ທາງຍ່າງເພື່ອຊາດຕ່າງໆຈະຍ່າງໄດ້+ ແລະພວກກະສັດຂອງໂລກຈະເອົາສະຫງ່າລາສີຂອງໂຕເອງເຂົ້າມາໃນເມືອງນັ້ນ.
25 ປະຕູຂອງເມືອງນັ້ນຈະເປີດໄວ້ຕະຫຼອດຍ້ອນມີແຕ່ກາງເວັນ ແລະຢູ່ເມືອງນັ້ນຈະບໍ່ມີກາງຄືນເລີຍ.+
26 ເຂົາເຈົ້າຈະເອົາສະຫງ່າລາສີແລະກຽດຕິຍົດຂອງຊາດຕ່າງໆເຂົ້າມາໃນເມືອງນັ້ນນຳ.+
27 ແຕ່ສິ່ງທີ່ບໍ່ສະອາດ ແລະຄົນທີ່ເຮັດສິ່ງເປັນຕາຂີ້ດຽດແລະມັກເວົ້າຕົວະຈະເຂົ້າໄປໃນເມືອງນັ້ນບໍ່ໄດ້ເລີຍ.+ ຄົນທີ່ຈະເຂົ້າໄປໄດ້ຈະຕ້ອງເປັນຄົນທີ່ມີຊື່ຢູ່ໃນມ້ວນໜັງສືລາຍຊື່ຄົນທີ່ຈະໄດ້ຊີວິດ ເຊິ່ງເປັນມ້ວນໜັງສືຂອງແກະນ້ອຍຂອງພະເຈົ້າ.+
ຂໍ
^ ໃນພາສາກຣີກ ອັນຟາເປັນໂຕອັກສອນທຳອິດແລະໂອເມກາເປັນໂຕອັກສອນສຸດທ້າຍ ຄືກັບໂຕອັກສອນ ກ ແລະ ຮ ໃນພາສາລາວ
^ ໝາຍເຖິງຄວາມຕາຍຕະຫຼອດໄປ
^ ເບິ່ງສ່ວນອະທິບາຍຄຳສັບ
^ ໃນພາສາກຣີກຄຳນີ້ແປວ່າ “ຜູ້ທີ່ຖືກສົ່ງອອກໄປ”
^ ປະມານ 2.220 ກິໂລແມັດ. 1 ຊະທາດິອອນເທົ່າກັບ 185 ແມັດ. ເບິ່ງພາກຜະໜວກ ຂ14.
^ 64 ແມັດ
^ ເບິ່ງພາກຜະໜວກ ກ5
