ພະນິມິດທີ່ເປີດເຜີຍໃຫ້ໂຢຮັນ 9:1-21
9 ເມື່ອທູດສະຫວັນອົງທີ 5 ເປົ່າແກ+ ຂ້ອຍເຫັນດາວດວງໜຶ່ງທີ່ເຄີຍຕົກຈາກຟ້າລົງມາໃສ່ໂລກ. ແລ້ວພະເຈົ້າກໍເອົາລູກກະແຈຂອງເຫວເລິກ+ໃຫ້ດາວດວງນັ້ນ.
2 ເມື່ອດາວດວງນັ້ນເປີດເຫວເລິກ ກໍມີຄວັນລອຍຂຶ້ນມາຈາກເຫວນັ້ນຄືກັບຄວັນຈາກເຕົາໄຟໃຫຍ່. ດວງຕາເວັນແລະທ້ອງຟ້າກໍມືດ+ຍ້ອນຄວັນນັ້ນ.
3 ແລ້ວຝູງຕັກກະແຕນກໍອອກຈາກຄວັນນັ້ນມາໃນໂລກ.+ ພວກມັນໄດ້ຮັບອຳນາດຄືກັບແມງງອດທີ່ຢູ່ໃນໂລກໄດ້ຮັບອຳນາດ.
4 ພວກມັນໄດ້ຮັບຄຳສັ່ງບໍ່ໃຫ້ສ້າງຄວາມເສຍຫາຍຕໍ່ພືດຜັກໃນໂລກ ຫຼືຕົ້ນໄມ້ໃບຫຍ້າ ແຕ່ໃຫ້ທຳຮ້າຍສະເພາະຄົນທີ່ບໍ່ມີກາຈ້ຳຂອງພະເຈົ້າຢູ່ໜ້າຜາກ.+
5 ຝູງຕັກກະແຕນນັ້ນບໍ່ໄດ້ຮັບອະນຸຍາດໃຫ້ຂ້າຄົນເຫຼົ່ານັ້ນ ແຕ່ໃຫ້ທໍລະມານເຂົາເຈົ້າ 5 ເດືອນ ແລະຄວາມທຸກທໍລະມານຂອງເຂົາເຈົ້າຈະເປັນຄືກັບຄວາມທຸກທໍລະມານຂອງຄົນທີ່ຖືກແມງງອດຕອດ.+
6 ໃນຕອນນັ້ນ ຄົນຈະຊອກຫາວິທີຕາຍ ແຕ່ກໍຊອກບໍ່ໄດ້. ເຂົາເຈົ້າຢາກຕາຍ ແຕ່ກໍບໍ່ຕາຍຈັກເທື່ອ.
7 ຮູບຮ່າງຂອງຕັກກະແຕນຄືກັບມ້າທີ່ພ້ອມຈະອອກໄປສູ້ຮົບ.+ ເທິງຫົວຂອງພວກມັນມີສິ່ງທີ່ເບິ່ງຄືກັບມົງກຸດຄຳແລະໜ້າຂອງພວກມັນຄືກັບໜ້າຄົນ.
8 ພວກມັນມີຜົມຄືກັບຜົມຂອງຜູ້ຍິງ ມີແຂ້ວຄືກັບແຂ້ວສິງ+
9 ແລະໃສ່ເສື້ອເກາະທີ່ເປັນເຫຼັກ. ສຽງປີກຂອງພວກມັນຄືກັບສຽງລົດມ້າທີ່ຟ້າວອອກໄປສູ້ຮົບ.+
10 ຫາງຂອງພວກມັນມີໄລຄືກັບຫາງຂອງແມງງອດ ແລະມີອຳນາດທຳຮ້າຍຄົນດົນຮອດ 5 ເດືອນ.+
11 ພວກມັນມີກະສັດອົງໜຶ່ງທີ່ເປັນທູດຂອງເຫວເລິກ.+ ເພິ່ນມີຊື່ໃນພາສາເຮັບເຣີວ່າອາບັດໂດນ* ແຕ່ຊື່ໃນພາສາກຣີກແມ່ນອາໂປລິໂອນ.*
12 ຄວາມເດືອດຮ້ອນຢ່າງໜຶ່ງຜ່ານໄປແລ້ວ. ຖ້າເບິ່ງເດີ້! ຄວາມເດືອດຮ້ອນອີກ 2 ຢ່າງ+ກຳລັງຈະມາ.
13 ເມື່ອທູດສະຫວັນອົງທີ 6+ ເປົ່າແກ+ ຂ້ອຍໄດ້ຍິນສຽງໜຶ່ງດັງມາຈາກແຈ*ແທ່ນບູຊາຄຳ+ທີ່ຢູ່ຕໍ່ໜ້າພະເຈົ້າ.
14 ສຽງນັ້ນບອກທູດສະຫວັນອົງທີ 6 ທີ່ມີແກວ່າ: “ແກ້ມັດທູດສະຫວັນ 4 ອົງທີ່ຖືກມັດໄວ້ຢູ່ແມ່ນ້ຳໃຫຍ່ເອິຟາຣາດ.”+
15 ທູດສະຫວັນ 4 ອົງນັ້ນກໍຖືກແກ້ມັດ. ເຂົາເຈົ້າຖືກກຽມໄວ້ພ້ອມສຳລັບຊົ່ວໂມງນີ້ ມື້ນີ້ ເດືອນນີ້ ແລະປີນີ້ເພື່ອຈະຂ້າຄົນ 1 ໃນ 3 ສ່ວນ.
16 ຂ້ອຍໄດ້ຍິນວ່າກອງທະຫານມ້າມີຈຳນວນ 20.000 ຄູນ 10.000.*
17 ໃນນິມິດນັ້ນຂ້ອຍເຫັນມ້າກັບຄົນທີ່ຂີ່ມ້າເປັນຈັ່ງຊີ້. ຄົນຂີ່ມ້າໃສ່ເສື້ອເກາະທີ່ມີສີແດງສົດ ສີຟ້າ ແລະສີເຫຼືອງ. ຫົວຂອງມ້າຄືກັບຫົວສິງ+ ແລະມີໄຟ ມີຄວັນກັບມາດອອກມາຈາກປາກຂອງພວກມັນ.
18 ຄົນ 1 ໃນ 3 ສ່ວນຖືກຂ້າຍ້ອນໄພພິບັດ 3 ຢ່າງນີ້: ໄຟ ຄວັນ ແລະມາດທີ່ອອກມາຈາກປາກຂອງມ້າເຫຼົ່ານັ້ນ.
19 ມ້າເຫຼົ່ານັ້ນມີອຳນາດຢູ່ປາກແລະຫາງ. ຫາງຂອງພວກມັນຄືກັບງູທີ່ມີຫົວ ແລະພວກມັນໃຊ້ຫາງເພື່ອທຳຮ້າຍຄົນ.
20 ແຕ່ຄົນອື່ນໆທີ່ລອດຈາກໄພພິບັດເຫຼົ່ານັ້ນບໍ່ໄດ້ກັບໃຈຈາກສິ່ງທີ່ເຂົາເຈົ້າເຮັດ. ເຂົາເຈົ້າບໍ່ເຊົາຂາບໄຫວ້ພວກປີສາດແລະຮູບບູຊາທີ່ເຮັດດ້ວຍຄຳ ເງິນ ທອງແດງ ຫີນ ແລະໄມ້ ເຊິ່ງເບິ່ງບໍ່ເຫັນ ບໍ່ໄດ້ຍິນ ແລະຍ່າງກໍບໍ່ໄດ້.+
21 ເຂົາເຈົ້າບໍ່ໄດ້ກັບໃຈຈາກການຂ້າຄົນ ການຫຼິ້ນໄສຍະສາດ ການເຮັດຜິດສິນລະທຳທາງເພດ* ແລະການລັກ.
ຂໍ
^ ແປວ່າ “ການທຳລາຍ”
^ ແປວ່າ “ຜູ້ທຳລາຍ”
^ ທັງສີ່ແຈຂອງແທ່ນບູຊາມີລັກສະນະຄືກັບເຂົາສັດ
^ 200 ລ້ານ
^ ຄຳພາສາກຣີກແມ່ນພໍເນຍ. ເບິ່ງຄຳວ່າ “ພໍເນຍ” ໃນສ່ວນອະທິບາຍຄຳສັບ.
