ພະບັນຍັດ 17:1-20
17 “ຫ້າມເອົາງົວຫຼືແກະທີ່ມີສ່ວນບໍ່ດີບ່ອນໃດບ່ອນໜຶ່ງມາເປັນເຄື່ອງບູຊາໃຫ້ພະເຢໂຫວາພະເຈົ້າຂອງເຈົ້າ ເພາະພະເຢໂຫວາພະເຈົ້າຂອງເຈົ້າຂີ້ດຽດມັນ.+
2 ຖ້າມີຜູ້ຊາຍຫຼືຜູ້ຍິງຢູ່ເມືອງໃດເມືອງໜຶ່ງທີ່ພະເຢໂຫວາພະເຈົ້າຂອງເຈົ້າເອົາໃຫ້ ໄດ້ເຮັດສິ່ງທີ່ພະເຢໂຫວາພະເຈົ້າຂອງເຈົ້າເຫັນວ່າຊົ່ວ ແລະບໍ່ໄດ້ເຮັດຕາມທີ່ສັນຍາໄວ້ກັບເພິ່ນ+
3 ໂດຍໄປນະມັດສະການພະເຈົ້າອື່ນໆ ໄປຂາບໄຫວ້ຕາເວັນ ເດືອນ ແລະດາວ+ ເຊິ່ງເປັນສິ່ງທີ່ຂ້ອຍບໍ່ໄດ້ສັ່ງໃຫ້ເຮັດ+
4 ຖ້າມີຄົນມາບອກຫຼືຖ້າເຈົ້າໄດ້ຍິນເລື່ອງນີ້ ໃຫ້ເຈົ້າຖາມກ່ຽວກັບເລື່ອງນີ້ຢ່າງຄັກແນ່.+ ຖ້າເຫັນວ່າມີເລື່ອງຊົ່ວໆແບບນີ້ເກີດຂຶ້ນແທ້ໃນອິດສະຣາເອນ
5 ເຈົ້າຕ້ອງເອົາຜູ້ຊາຍຫຼືຜູ້ຍິງທີ່ເຮັດສິ່ງຊົ່ວໄປທີ່ປະຕູເມືອງແລະດຶກກ້ອນຫີນໃສ່ລາວໃຫ້ຕາຍ.+
6 ແຕ່ຕ້ອງມີພະຍານ 2 ຫຼື 3 ຄົນ+ຈຶ່ງຈະຂ້າລາວໄດ້. ຖ້າມີພະຍານພຽງຄົນດຽວ ຈະຂ້າລາວບໍ່ໄດ້.+
7 ໃຫ້ຄົນທີ່ເປັນພະຍານດຶກກ້ອນຫີນໃສ່ລາວກ່ອນ ຫຼັງຈາກນັ້ນ ຄົນອື່ນໆກໍຈະດຶກນຳ. ເຈົ້າຕ້ອງກຳຈັດຄວາມຊົ່ວໃຫ້ໝົດໄປຈາກແຜ່ນດິນຂອງເຈົ້າ.+
8 ຖ້າໃນເມືອງໃດມີຄະດີທີ່ຕັດສິນຍາກ ບໍ່ວ່າຈະເປັນຄະດີຂ້າຄົນ+ ຄະດີຟ້ອງຮ້ອງກັນ ຄະດີທີ່ກ່ຽວກັບຄວາມຮຸນແຮງ ຫຼືການຜິດຖຽງກັນ ໃຫ້ເຈົ້າເອົາຄະດີນັ້ນໄປບ່ອນທີ່ພະເຢໂຫວາພະເຈົ້າຂອງເຈົ້າໄດ້ເລືອກໄວ້.+
9 ເຈົ້າຕ້ອງໄປຫາປະໂລຫິດຄົນເລວີກັບຜູ້ຕັດສິນ+ທີ່ເຮັດວຽກຢູ່ໃນຕອນນັ້ນ ແລະເອົາຄະດີນັ້ນໃຫ້ເຂົາເຈົ້າຕັດສິນ.+
10 ເຈົ້າຕ້ອງເຮັດຕາມການຕັດສິນຂອງເຂົາເຈົ້າເຊິ່ງເຮັດຢູ່ບ່ອນທີ່ພະເຢໂຫວາໄດ້ເລືອກໄວ້. ເຈົ້າຕ້ອງເຮັດຕາມທຸກຢ່າງທີ່ເຂົາເຈົ້າສັ່ງຢ່າງຄັກແນ່.
11 ເຂົາເຈົ້າຈະເອົາກົດໝາຍມາໃຫ້ເຈົ້າເບິ່ງແລະຕັດສິນຄະດີໃຫ້ ແລ້ວເຈົ້າກໍຕ້ອງເຮັດຕາມນັ້ນ.+ ເຈົ້າຕ້ອງເຮັດຕາມການຕັດສິນຂອງເຂົາເຈົ້າຢ່າງເຄັ່ງຄັດ.+
12 ຖ້າຜູ້ໃດບໍ່ເຮັດຕາມການຕັດສິນຂອງຜູ້ຕັດສິນຫຼືປະໂລຫິດທີ່ຮັບໃຊ້ພະເຢໂຫວາພະເຈົ້າຂອງເຈົ້າ ຜູ້ນັ້ນຈະຕ້ອງຕາຍ.+ ເຈົ້າຕ້ອງກຳຈັດຄວາມຊົ່ວໃຫ້ໝົດໄປຈາກອິດສະຣາເອນ.+
13 ເມື່ອເຮັດແນວນີ້ ປະຊາຊົນທີ່ໄດ້ຍິນກໍຈະຢ້ານ ແລ້ວເຂົາເຈົ້າຈະບໍ່ກ້າຝ່າຝືນຄຳຕັດສິນ.+
14 ເມື່ອເຈົ້າເຂົ້າໄປຍຶດເອົາແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ແລະໄດ້ຢູ່ຫັ້ນແລ້ວ ແລະເຈົ້າເວົ້າວ່າ ‘ພວກເຮົາຢາກມີກະສັດຄືກັບຊາດອື່ນໆທີ່ຢູ່ອ້ອມຂ້າງພວກເຮົາ.’+
15 ຖ້າເປັນແນວນັ້ນ ເຈົ້າຕ້ອງແຕ່ງຕັ້ງຄົນທີ່ພະເຢໂຫວາພະເຈົ້າຂອງເຈົ້າໄດ້ເລືອກໃຫ້ເປັນກະສັດ.+ ເຈົ້າຕ້ອງເລືອກຄົນຈາກພີ່ນ້ອງຂອງເຈົ້າ. ຫ້າມເລືອກຄົນຕ່າງຊາດທີ່ບໍ່ແມ່ນພີ່ນ້ອງຂອງເຈົ້າ.
16 ລາວບໍ່ຄວນມີມ້າຫຼາຍໆ+ ຫຼືບໍ່ຄວນສົ່ງຄົນກັບໄປເອຢິບເພື່ອຫາມ້າມາຕື່ມ+ ເພາະພະເຢໂຫວາບອກເຈົ້າວ່າ ‘ຢ່າກັບໄປເອຢິບເດັດຂາດ.’
17 ລາວບໍ່ຄວນມີເມຍຫຼາຍຄົນ ເພື່ອລາວຈະບໍ່ໄດ້ປ່ຽນໃຈໄປຈາກເພິ່ນ+ ລາວບໍ່ຄວນຫາເງິນຫາຄຳໄວ້ໃຫ້ໂຕເອງຫຼາຍໆ.+
18 ເມື່ອລາວໄດ້ເປັນກະສັດແລ້ວ ລາວຕ້ອງກ່າຍຄືນກົດໝາຍນີ້ທີ່ປະໂລຫິດຄົນເລວີໄດ້ມ້ຽນໄວ້+ໃສ່ໃນປຶ້ມຂອງໂຕເອງ.
19 ລາວຕ້ອງຮັກສາປຶ້ມນັ້ນໄວ້ດີໆ ແລະອ່ານກົດໝາຍນັ້ນຕະຫຼອດຊີວິດຂອງລາວ+ ເພື່ອລາວຈະໄດ້ຮຽນຮູ້ທີ່ຈະຢ້ານຢຳພະເຢໂຫວາພະເຈົ້າຂອງລາວ ແລະເຮັດຕາມຂໍ້ກຳນົດກົດໝາຍທັງໝົດນີ້ຢ່າງເຄັ່ງຄັດ.+
20 ເມື່ອລາວເຮັດແນວນີ້ ລາວກໍຈະບໍ່ໄດ້ຄິດວ່າໂຕເອງດີກວ່າຄົນອິດສະຣາເອນຄົນອື່ນໆ ແລະລາວຈະບໍ່ເຈີດຊ້າຍເຈີດຂວາຈາກຄຳສັ່ງນີ້ ແລ້ວລາວກັບລູກຫຼານຂອງລາວຈະໄດ້ປົກຄອງພວກອິດສະຣາເອນໄປດົນໆ.”