ພະບັນຍັດ 20:1-20
20 “ຖ້າພວກເຈົ້າອອກໄປສູ້ຮົບກັບພວກສັດຕູ ແລະເຫັນວ່າພວກເຂົາມີມ້າ ລົດຮົບ ແລະທະຫານຫຼາຍກວ່າພວກເຈົ້າ ຢ່າຊູ່ຢ້ານພວກເຂົາ ເພາະພະເຢໂຫວາພະເຈົ້າຜູ້ທີ່ພາພວກເຈົ້າອອກມາຈາກເອຢິບຢູ່ນຳພວກເຈົ້າ.+
2 ກ່ອນຊິອອກໄປສູ້ຮົບ ໃຫ້ປະໂລຫິດມາເວົ້າກັບພວກທະຫານກ່ອນ.+
3 ປະໂລຫິດຕ້ອງບອກເຂົາເຈົ້າວ່າ ‘ພວກອິດສະຣາເອນເອີ້ຍ! ພວກເຈົ້າກຳລັງຊິອອກໄປສູ້ຮົບກັບພວກສັດຕູ. ໃຫ້ກ້າຫານ ຢ່າຊູ່ຢ້ານພວກເຂົາ
4 ເພາະພະເຢໂຫວາພະເຈົ້າຂອງພວກເຈົ້າຊິຢູ່ນຳພວກເຈົ້າ. ເພິ່ນຊິຕໍ່ສູ້ກັບສັດຕູເພື່ອພວກເຈົ້າ ແລະຊ່ວຍພວກເຈົ້າໃຫ້ລອດ.’+
5 ພວກຫົວໜ້າທະຫານຕ້ອງບອກທະຫານວ່າ ‘ຖ້າຜູ້ໃດປຸກເຮືອນໃໝ່ແລະຍັງບໍ່ໄດ້ຢູ່ເຮືອນນັ້ນເທື່ອ ກໍໃຫ້ລາວກັບເມືອກ່ອນ. ຢ້ານວ່າຖ້າລາວຕາຍຢູ່ສະໜາມຮົບ ຄົນອື່ນຊິໄປຢູ່ເຮືອນຂອງລາວ.
6 ຖ້າຜູ້ໃດປູກໝາກລະແຊັງແລະຍັງບໍ່ໄດ້ກິນເທື່ອ ກໍໃຫ້ລາວກັບເມືອກ່ອນ. ຢ້ານວ່າຖ້າລາວຕາຍຢູ່ສະໜາມຮົບ ຄົນອື່ນຊິໄປເກັບໝາກລະແຊັງຂອງລາວ.
7 ຖ້າຜູ້ໃດໝັ້ນກັບຜູ້ຍິງແລະຍັງບໍ່ໄດ້ແຕ່ງດອງເທື່ອ ກໍໃຫ້ລາວກັບເມືອກ່ອນ.+ ຢ້ານວ່າຖ້າລາວຕາຍຢູ່ສະໜາມຮົບ ຄົນອື່ນຊິໄປແຕ່ງດອງກັບຄູ່ໝັ້ນຂອງລາວ.’
8 ພວກຫົວໜ້າທະຫານຕ້ອງເວົ້າກັບທະຫານອີກວ່າ ‘ມີຜູ້ໃດຮູ້ສຶກຢ້ານບໍ?+ ຖ້າຜູ້ໃດຢ້ານກໍໃຫ້ລາວກັບເມືອກ່ອນ ເພາະລາວຊິເຮັດໃຫ້ຄົນອື່ນຢ້ານນຳ.’+
9 ເມື່ອພວກຫົວໜ້າທະຫານເວົ້າກັບທະຫານແລ້ວໆ ໃຫ້ເຂົາເຈົ້າແຕ່ງຕັ້ງບາງຄົນເພື່ອຈະນຳໜ້າທະຫານໄປຕໍ່ສູ້.
10 ເມື່ອພວກເຈົ້າຈະໄປຕໍ່ສູ້ເມືອງໃດເມືອງໜຶ່ງ ພວກເຈົ້າຕ້ອງບອກຄົນໃນເມືອງນັ້ນວ່າພວກເຂົາຕ້ອງເຮັດແນວໃດຈຶ່ງຈະບໍ່ຖືກໂຈມຕີ.+
11 ຖ້າພວກເຂົາຍອມເຮັດຕາມແລະເປີດປະຕູໃຫ້ພວກເຈົ້າ ຄົນທັງໝົດໃນເມືອງນັ້ນກໍຈະມາຮັບໃຊ້ແລະເຮັດວຽກໃຫ້ພວກເຈົ້າ.+
12 ແຕ່ຖ້າພວກເຂົາບໍ່ຍອມເຮັດຕາມແລະຢາກຈະຕໍ່ສູ້ກັບພວກເຈົ້າ ພວກເຈົ້າຕ້ອງລ້ອມເມືອງນັ້ນໄວ້.
13 ພະເຢໂຫວາພະເຈົ້າຂອງພວກເຈົ້າຈະຊ່ວຍໃຫ້ພວກເຈົ້າຊະນະພວກເຂົາໄດ້. ພວກເຈົ້າຕ້ອງເອົາດາບຂ້າຜູ້ຊາຍທຸກຄົນໃນເມືອງນັ້ນ.
14 ແຕ່ພວກຜູ້ຍິງ ເດັກນ້ອຍ ຝູງສັດແລະທຸກຢ່າງໃນເມືອງນັ້ນ ພວກເຈົ້າເອົາມາເປັນຂອງໂຕເອງໄດ້+ ແລະພວກເຈົ້າຈະໄດ້ກິນສິ່ງທີ່ຍຶດມາຈາກພວກສັດຕູ ເຊິ່ງພະເຢໂຫວາພະເຈົ້າຂອງພວກເຈົ້າໄດ້ເອົາໃຫ້ພວກເຈົ້າ.+
15 ສຳລັບເມືອງທີ່ຢູ່ໄກໆ ໃຫ້ພວກເຈົ້າເຮັດຕາມທີ່ໄດ້ເວົ້າໄປແລ້ວນັ້ນ.
16 ແຕ່ກັບເມືອງທີ່ຢູ່ໃກ້ໆ ໃຫ້ພວກເຈົ້າເຮັດອີກແບບໜຶ່ງ. ສຳລັບເມືອງເຫຼົ່ານີ້ທີ່ຢູ່ໃນແຜ່ນດິນທີ່ພະເຢໂຫວາພະເຈົ້າຂອງພວກເຈົ້າຈະເອົາໃຫ້ພວກເຈົ້າເປັນມໍລະດົກ ຢ່າໃຫ້ມີຜູ້ໃດລອດຈັກຄົນ.+
17 ພວກເຈົ້າຕ້ອງຂ້າພວກເຮດ ພວກອາໂມ ພວກການາອານ ພວກເປຣິຊີ ພວກຮີວີ ແລະພວກເຢບຸດໃຫ້ໝົດ+ ຕາມທີ່ພະເຢໂຫວາພະເຈົ້າຂອງພວກເຈົ້າໄດ້ສັ່ງໄວ້.
18 ຖ້າບໍ່ເຮັດແນວນັ້ນ ພວກເຂົາອາດຈະສອນພວກເຈົ້າໃຫ້ເຮັດຕາມວິທີທີ່ເປັນຕາຂີ້ດຽດທີ່ພວກເຂົານະມັດສະການພະເຈົ້າຂອງພວກເຂົາ ແລະຈະເຮັດໃຫ້ພວກເຈົ້າເຮັດຜິດຕໍ່ພະເຢໂຫວາພະເຈົ້າຂອງພວກເຈົ້າ.+
19 ຖ້າພວກເຈົ້າລ້ອມເມືອງໃດແລະຍຶດເມືອງນັ້ນໄດ້ຫຼັງຈາກທີ່ຕໍ່ສູ້ກັນມາຫຼາຍມື້ ພວກເຈົ້າກິນໝາກໄມ້ຈາກຕົ້ນໄມ້ຕ່າງໆໄດ້ ແຕ່ບໍ່ຄວນປ້ຳມັນ.+ ພວກເຈົ້າບໍ່ຄວນທຳລາຍຕົ້ນໄມ້ຄືກັບທີ່ພວກເຈົ້າຂ້າຄົນ.
20 ພວກເຈົ້າຈະຕັດຕົ້ນໄມ້ທີ່ບໍ່ແມ່ນຕົ້ນໄມ້ກິນໝາກກໍໄດ້ ແລ້ວເອົາໄມ້ນັ້ນມາເຮັດເປັນຮົ້ວລ້ອມເມືອງທີ່ພວກເຈົ້າກຳລັງຕໍ່ສູ້ຈົນກວ່າຈະຍຶດເມືອງນັ້ນໄດ້.”