ພະບັນຍັດ 21:1-23
21 “ຖ້າມີຄົນຖືກຂ້າໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້າ ແຕ່ບໍ່ຮູ້ວ່າຜູ້ໃດຂ້າ
2 ພວກຜູ້ນຳກັບພວກຜູ້ຕັດສິນ+ຕ້ອງອອກໄປແທກໄລຍະຫ່າງຈາກສົບໄປຫາເມືອງຕ່າງໆທີ່ຢູ່ອ້ອມຮອບ.
3 ພວກຜູ້ນຳຂອງເມືອງທີ່ຢູ່ໃກ້ສົບນັ້ນຕ້ອງເອົາງົວໂຕແມ່ຍັງບໍ່ເຄີຍໃຊ້ວຽກຫຼືບໍ່ເຄີຍໃສ່ແອກມາໂຕໜຶ່ງ.
4 ເຂົາເຈົ້າຈະຕ້ອງພາມັນໄປຮ່ອມພູ*ທີ່ມີນ້ຳໄຫຼ ເຊິ່ງເປັນບ່ອນທີ່ບໍ່ເຄີຍເຮັດໄຮ່ເຮັດນາມາກ່ອນ ແລ້ວທຸບຄໍມັນໃຫ້ຕາຍຢູ່ຫັ້ນ.+
5 ພວກປະໂລຫິດຄົນເລວີກໍຈະໄປບ່ອນນັ້ນ ເພາະພະເຢໂຫວາພະເຈົ້າຂອງເຈົ້າໄດ້ເລືອກເຂົາເຈົ້າໃຫ້ຮັບໃຊ້ເພິ່ນ+ ໃຫ້ອວຍພອນໂດຍໃຊ້ຊື່ພະເຢໂຫວາ+ ແລະໃຫ້ບອກວ່າຄວນເຮັດແນວໃດເມື່ອມີຄົນຖືກທຳຮ້າຍ.+
6 ສ່ວນພວກຜູ້ນຳທີ່ຢູ່ໃນເມືອງທີ່ໃກ້ສົບທີ່ສຸດຈະຕ້ອງເອົານ້ຳລ້າງມື+ຢູ່ເທິງງົວໂຕທີ່ຕາຍນັ້ນ
7 ແລ້ວເຂົາເຈົ້າຕ້ອງເວົ້າວ່າ ‘ພວກເຮົາບໍ່ໄດ້ຂ້າ*ຄົນຜູ້ນີ້ ແລະບໍ່ເຫັນຕອນທີ່ລາວຖືກຂ້າ.
8 ຂໍພະເຢໂຫວາຢ່າລົງໂທດຄົນອິດສະຣາເອນເຊິ່ງເປັນຄົນທີ່ພະອົງໄຖ່ໄວ້+ ແລະຂໍຢ່າໃຫ້ຄວາມຜິດກ່ຽວກັບການຂ້າຄົນທີ່ບໍ່ມີຄວາມຜິດຜູ້ນີ້ມີຢູ່ໃນອິດສະຣາເອນ.’+ ແລ້ວຄົນອິດສະຣາເອນຈະບໍ່ຖືກລົງໂທດ ຍ້ອນຂ້າຄົນທີ່ບໍ່ມີຄວາມຜິດ.
9 ເມື່ອເຮັດແນວນີ້ ພວກເຈົ້າກໍເຮັດສິ່ງທີ່ພະເຢໂຫວາເຫັນວ່າຖືກຕ້ອງ ແລະຊິບໍ່ຖືກລົງໂທດຍ້ອນຂ້າຄົນທີ່ບໍ່ມີຄວາມຜິດ.
10 ເມື່ອເຈົ້າອອກໄປສູ້ຮົບກັບພວກສັດຕູ ແລ້ວພະເຢໂຫວາພະເຈົ້າຂອງເຈົ້າຊ່ວຍເຈົ້າໃຫ້ເອົາຊະນະພວກສັດຕູແລະຈັບພວກເຂົາມາເປັນຊະເລີຍ+
11 ຖ້າໃນພວກຊະເລີຍນັ້ນມີຜູ້ຍິງງາມໆທີ່ເຈົ້າມັກແລະຢາກເອົາມາເປັນເມຍ
12 ໃຫ້ເຈົ້າພາລາວໄປຢູ່ເຮືອນຂອງເຈົ້າ. ລາວຕ້ອງແຖຫົວ ຕັດເລັບ
13 ປ່ຽນເຄື່ອງນຸ່ງ ແລະຢູ່ໃນເຮືອນຂອງເຈົ້າ. ລາວຈະໄວ້ທຸກໃຫ້ພໍ່ແມ່ຂອງລາວ 1 ເດືອນ.+ ຫຼັງຈາກນັ້ນ ເຈົ້າກັບລາວຈະເປັນຜົວເມຍກັນ ແລະເຈົ້າຈະນອນນຳລາວໄດ້.
14 ແຕ່ຖ້າເຈົ້າບໍ່ມັກລາວແລ້ວ ກໍໃຫ້ປ່ອຍລາວໄປ+ຕາມທີ່ລາວຢາກໄປ. ຢ່າຂາຍລາວຫຼືເຮັດຮຸນແຮງຕໍ່ລາວ ເພາະເຈົ້າໄດ້ບັງຄັບລາວໃຫ້ມາເປັນເມຍຂອງເຈົ້າ.
15 ຖ້າຜູ້ຊາຍຄົນໃດມີເມຍ 2 ຄົນ ແລະລາວຮັກເມຍບໍ່ເທົ່າກັນ ແລ້ວເມຍທັງສອງຄົນມີລູກຊາຍໃຫ້ລາວ ແຕ່ລູກຊາຍກົກເກີດຈາກເມຍທີ່ລາວຮັກໜ້ອຍກວ່າ+
16 ໃນມື້ທີ່ລາວຈະປັນມູນໃຫ້ລູກຊາຍ ຢ່າໃຫ້ລາວຖືວ່າລູກຊາຍຂອງເມຍທີ່ລາວຮັກຫຼາຍເປັນລູກກົກ ແທນລູກຊາຍຂອງເມຍທີ່ລາວຮັກໜ້ອຍກວ່າ.
17 ລາວຕ້ອງເອົາມູນ 2 ເທົ່າໃຫ້ລູກຊາຍຂອງເມຍທີ່ລາວຮັກໜ້ອຍກວ່າ ຍ້ອນຜູ້ນັ້ນເປັນລູກກົກແລະມີສິດທີ່ຈະໄດ້. ລາວເປັນຜົນງານທຳອິດຈາກພະລັງຂອງພໍ່.+
18 ຖ້າຜູ້ໃດມີລູກຊາຍທີ່ຫົວແຂງ ບໍ່ຟັງຄວາມ ແລະທ້າທາຍອຳນາດພໍ່ແມ່+ ເຖິງວ່າພໍ່ແມ່ພະຍາຍາມຕັກເຕືອນແລ້ວ ແຕ່ລາວກໍບໍ່ຟັງ+
19 ພໍ່ແມ່ຕ້ອງຈັບລາວໄປຫາພວກຜູ້ນຳທີ່ຢູ່ປະຕູເມືອງ
20 ແລ້ວບອກເຂົາເຈົ້າວ່າ ‘ລູກຊາຍຂອງພວກເຮົາຜູ້ນີ້ມັນເປັນຄົນຫົວແຂງ ບໍ່ຟັງຄວາມ ແລະທ້າທາຍອຳນາດຂອງພວກເຮົາ. ມັນມີແຕ່ກິນ+ແລະມີແຕ່ເມົາ+ເທົ່ານັ້ນ.’
21 ຈາກນັ້ນ ໃຫ້ຜູ້ຊາຍທຸກຄົນໃນເມືອງດຶກກ້ອນຫີນໃສ່ລູກຜູ້ນັ້ນຈົນຕາຍ. ເຈົ້າຕ້ອງກຳຈັດຄວາມຊົ່ວຮ້າຍໃຫ້ໝົດໄປຈາກພວກເຈົ້າ. ພວກອິດສະຣາເອນຈະໄດ້ຮູ້ເລື່ອງນີ້ແລ້ວກໍຈະຢ້ານ.+
22 ຖ້າຜູ້ໃດເຮັດຜິດແລະມີໂທດເຖິງຕາຍ ຫຼັງຈາກທີ່ລາວຖືກຂ້າແລ້ວ+ ພວກເຈົ້າເອົາສົບຂອງລາວໄປແຂວນຢູ່ເທິງເສົາໄດ້+
23 ແຕ່ບໍ່ໃຫ້ປະໄວ້ຢູ່ຫັ້ນຄ້າງຄືນ.+ ໃຫ້ເອົາສົບລົງມາຝັງພາຍໃນມື້ນັ້ນເລີຍ ຍ້ອນວ່າສົບທີ່ຖືກແຂວນໄວ້ເທິງເສົາເປັນສິ່ງທີ່ພະເຈົ້າສາບແຊ່ງ.+ ຢ່າເຮັດໃຫ້ແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້ານັ້ນບໍ່ສະອາດ.”+
ຂໍ
^ ຫຼື “ວາດີ.” ເບິ່ງສ່ວນອະທິບາຍຄຳສັບ.
^ ແປຕາມໂຕວ່າ “ມືເຮົາບໍ່ໄດ້ເຮັດໃຫ້ເລືອດໄຫຼ”
