ພະບັນຍັດ 24:1-22
24 “ຖ້າຜູ້ຊາຍຄົນໃດແຕ່ງດອງກັບຜູ້ຍິງ ແລະຕໍ່ມາກໍບໍ່ພໍໃຈລາວ ຍ້ອນເຫັນວ່າລາວເຮັດສິ່ງທີ່ເປັນຕາໜ້າອາຍ ຜົວຕ້ອງເຮັດໃບຢ່າຮ້າງໃຫ້ຜູ້ຍິງຄົນນັ້ນ+ ແລະໃຫ້ລາວອອກຈາກເຮືອນໄປ.+
2 ຫຼັງຈາກທີ່ຜູ້ຍິງຄົນນັ້ນອອກຈາກເຮືອນຜູ້ຊາຍໄປແລ້ວ ລາວຈະແຕ່ງດອງໃໝ່ກໍໄດ້.+
3 ຖ້າຜົວຄົນທີ 2 ຂອງຜູ້ຍິງຄົນນັ້ນຊັງລາວ ເຮັດໃບຢ່າຮ້າງໃຫ້ລາວ ແລະໃຫ້ລາວອອກຈາກເຮືອນໄປ ຫຼືຖ້າຜົວຄົນທີ 2 ຕາຍໄປ
4 ຜົວຄົນທຳອິດຈະເອົາລາວກັບມາເປັນເມຍອີກບໍ່ໄດ້ ຍ້ອນວ່າຜູ້ຍິງຄົນນັ້ນຖືວ່າບໍ່ສະອາດສຳລັບລາວແລ້ວ. ການເຮັດແນວນີ້ເປັນສິ່ງທີ່ເປັນຕາຂີ້ດຽດສຳລັບພະເຢໂຫວາ. ຫ້າມເຈົ້າເຮັດຜິດໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້າເປັນມໍລະດົກ.
5 ເມື່ອຜູ້ຊາຍແຕ່ງດອງ ລາວຈະໄດ້ຮັບການຍົກເວັ້ນ 1 ປີ. ຢ່າໃຫ້ລາວໄປເປັນທະຫານ ແລະຢ່າໃຫ້ລາວໄປເຮັດໜ້າທີ່ອື່ນໆ. ລາວຄວນຈະຢູ່ເຮືອນແລະເຮັດໃຫ້ເມຍມີຄວາມສຸກ.+
6 ຢ່າໃຫ້ຜູ້ໃດເອົາຫີນໂມ້ຫຼືຫີນໂມ້ໂຕທາງເທິງໄປເປັນເຄື່ອງຄ້ຳປະກັນເອົາເງິນກູ້+ ເພາະມັນເປັນສິ່ງທີ່ຈະໃຊ້ເຮັດຢູ່ເຮັດກິນ.
7 ຖ້າຜູ້ໃດລັກພາໂຕຄົນອິດສະຣາເອນໄປ ແລະໄດ້ຂົ່ມເຫງລາວແລະຂາຍລາວ+ ຄົນທີ່ລັກພາໂຕຄົນອື່ນໄປຈະຕ້ອງຕາຍ.+ ພວກເຈົ້າຕ້ອງກຳຈັດຄວາມຊົ່ວຮ້າຍໃຫ້ໝົດໄປຈາກພວກເຈົ້າ.+
8 ຖ້າຜູ້ໃດເປັນພະຍາດຂີ້ທູດ* ໃຫ້ເຈົ້າເຮັດທຸກຢ່າງຕາມທີ່ປະໂລຫິດຄົນເລວີຈະບອກໃຫ້ເຈົ້າເຮັດ.+ ເຈົ້າຕ້ອງເຮັດຕາມທີ່ຂ້ອຍສັ່ງເຂົາເຈົ້າຢ່າງຄັກແນ່.
9 ໃຫ້ຈື່ວ່າພະເຢໂຫວາໄດ້ເຮັດແນວໃດກັບມີຣີອາມຫຼັງຈາກທີ່ເຈົ້າອອກມາຈາກເອຢິບ.+
10 ຖ້າເຈົ້າເອົາເງິນໃຫ້ຄົນອື່ນຢືມ+ ຫ້າມເຈົ້າເຂົ້າໄປໃນເຮືອນຂອງລາວ ເພື່ອເອົາສິ່ງທີ່ລາວຈະໃຊ້ເປັນເຄື່ອງຄ້ຳປະກັນ.
11 ເຈົ້າຕ້ອງຢືນຖ້າລາວຢູ່ນອກເຮືອນ ແລະໃຫ້ຄົນທີ່ຢືມເງິນເຈົ້າເອົາສິ່ງທີ່ລາວໃຊ້ເປັນເຄື່ອງຄ້ຳປະກັນອອກມາໃຫ້ເຈົ້າ.
12 ຖ້າລາວເປັນຄົນທຸກ ຫ້າມເຈົ້າເອົາເຄື່ອງທີ່ລາວໃຊ້ເປັນເຄື່ອງຄ້ຳປະກັນໄວ້ຢູ່ນຳເຈົ້າຂ້າມຄືນ.+
13 ເຈົ້າຕ້ອງສົ່ງສິ່ງທີ່ລາວໃຊ້ເປັນເຄື່ອງຄ້ຳປະກັນຄືນໃຫ້ລາວກ່ອນຕາເວັນຕົກດິນ ເພື່ອລາວຈະມີເຄື່ອງນຸ່ງຫົ່ມຕອນເຂົ້ານອນ+ ແລ້ວລາວຈະອວຍພອນເຈົ້າ. ເມື່ອເຈົ້າເຮັດແນວນີ້ ພະເຢໂຫວາພະເຈົ້າຂອງເຈົ້າຈະຖືວ່າເຈົ້າເຮັດສິ່ງທີ່ຖືກຕ້ອງ.
14 ຫ້າມເຈົ້າໂກງຄ່າຈ້າງຂອງຄົນທຸກຍາກ ບໍ່ວ່າລາວຈະເປັນຄົນຊາດດຽວກັນ ຫຼືເປັນຄົນຕ່າງຊາດທີ່ອາໄສຢູ່ໃນເມືອງຂອງເຈົ້າ.+
15 ເຈົ້າຕ້ອງຈ່າຍຄ່າຈ້າງໃຫ້ລາວໃນມື້ນັ້ນ+ກ່ອນຕາເວັນຕົກດິນ ຍ້ອນວ່າລາວເປັນຄົນຫາເຊົ້າກິນຄ່ຳ. ຄັນບໍ່ຊັ້ນ ລາວຈະເອົາເລື່ອງນີ້ໄປຈົ່ມກັບພະເຢໂຫວາ ແລ້ວເຈົ້າກໍຈະມີຄວາມຜິດ.+
16 ຢ່າໃຫ້ພໍ່ຕ້ອງຕາຍຍ້ອນຄວາມຜິດຂອງລູກ ແລະຢ່າໃຫ້ລູກຕ້ອງຕາຍຍ້ອນຄວາມຜິດຂອງພໍ່.+ ແຕ່ລະຄົນຈະຕ້ອງຕາຍຍ້ອນຄວາມຜິດຂອງໂຕເອງ.+
17 ເຈົ້າຕ້ອງຍຸຕິທຳກັບຄົນຕ່າງຊາດຫຼືລູກກຳພ້າ.+ ຫ້າມຮັບເອົາເຄື່ອງນຸ່ງຂອງແມ່ໝ້າຍ ເພື່ອໃຊ້ເປັນເຄື່ອງຄ້ຳປະກັນ.+
18 ຢ່າລືມວ່າເຈົ້າກໍເຄີຍເປັນທາດຢູ່ໃນເອຢິບ ແລະພະເຢໂຫວາພະເຈົ້າຂອງເຈົ້າໄດ້ໄຖ່ເຈົ້າອອກຈາກຫັ້ນ.+ ດັ່ງນັ້ນ ຂ້ອຍຈຶ່ງສັ່ງເຈົ້າໃຫ້ເຮັດແນວນີ້.
19 ເມື່ອເຈົ້າໄປກ່ຽວເຂົ້າຢູ່ທົ່ງນາແລະລືມຟ່ອນເຂົ້າໄວ້ ຫ້າມເຈົ້າກັບຄືນໄປເອົາ. ໃຫ້ປະໄວ້ໃຫ້ຄົນຕ່າງຊາດ ລູກກຳພ້າ ແລະແມ່ໝ້າຍ.+ ຖ້າເຈົ້າເຮັດແນວນີ້ ພະເຢໂຫວາພະເຈົ້າຂອງເຈົ້າກໍຈະອວຍພອນທຸກສິ່ງທີ່ເຈົ້າເຮັດ.+
20 ຕອນທີ່ເຈົ້າເອົາໄມ້ມາຟາດຕົ້ນໝາກກອກເພື່ອເອົາໜ່ວຍຂອງມັນ ເຈົ້າຟາດຕົ້ນຂອງມັນໄດ້ ແຕ່ຢ່າຟາດງ່າມັນ. ໃຫ້ຈົ່ງໜ່ວຍທີ່ເຫຼືອໄວ້ໃຫ້ຄົນຕ່າງຊາດ ລູກກຳພ້າ ແລະແມ່ໝ້າຍໄດ້ກິນແດ່.+
21 ເມື່ອເຈົ້າໄປເກັບໝາກລະແຊັງຢູ່ສວນ ຫ້າມກັບໄປເກັບເອົາໜ່ວຍທີ່ເຫຼືອຢູ່ຕົ້ນ. ໃຫ້ຈົ່ງມັນໄວ້ໃຫ້ຄົນຕ່າງຊາດ ລູກກຳພ້າ ແລະແມ່ໝ້າຍ.
22 ຢ່າລືມວ່າເຈົ້າກໍເຄີຍເປັນທາດຢູ່ໃນເອຢິບ. ດັ່ງນັ້ນ ຂ້ອຍຈຶ່ງສັ່ງເຈົ້າໃຫ້ເຮັດແນວນີ້.”
ຂໍ
^ ໃນພາສາເຮັບເຣີຄຳທີ່ແປວ່າ “ພະຍາດຂີ້ທູດ” ມີຄວາມໝາຍກວ້າງ ອາດລວມເຖິງພະຍາດຕິດຕໍ່ທາງຜິວໜັງຊະນິດອື່ນໆ ແລະອາດໝາຍເຖິງການຕິດເຊື້ອທີ່ເຫັນໄດ້ຢູ່ເຄື່ອງນຸ່ງກັບເຮືອນ
