ພະບັນຍັດ 25:1-19
25 “ຖ້າມີ 2 ຄົນຜິດຖຽງກັນ ເຂົາເຈົ້າຕ້ອງໄປຫາພວກຜູ້ຕັດສິນ+ ແລ້ວພວກຜູ້ຕັດສິນຈະຕັດສິນໃຫ້ວ່າຜູ້ໃດຖືກຜູ້ໃດຜິດ.+
2 ຖ້າຄົນທີ່ເປັນຝ່າຍຜິດສົມຄວນຕ້ອງຖືກແສ້ຟາດ+ ຜູ້ຕັດສິນຈະໃຫ້ລາວນອນຢຽດຢູ່ພື້ນ ແລະລາວຈະຖືກຟາດຕໍ່ໜ້າຜູ້ຕັດສິນ. ລາວຈະຖືກຟາດຫຼາຍໜ້ອຍສ່ຳໃດກໍຂຶ້ນກັບຄວາມຜິດທີ່ລາວໄດ້ເຮັດ.
3 ໂທດໜັກສຸດໃຫ້ຟາດ 40 ເທື່ອ+ ແຕ່ບໍ່ໃຫ້ກາຍນັ້ນ. ຖ້າຟາດຫຼາຍກວ່ານັ້ນພີ່ນ້ອງຂອງເຈົ້າຜູ້ນັ້ນຈະອັບອາຍ.
4 ຢ່າເອົາແນວສຸບມາສຸບໃສ່ປາກງົວຕອນທີ່ມັນຢຽບເຂົ້າຢູ່.*+
5 ຖ້າອ້າຍຫຼືນ້ອງອາໄສຢູ່ໃກ້ໆກັນ ແລະມີຜູ້ໃດຜູ້ໜຶ່ງຕາຍໂດຍທີ່ຍັງບໍ່ມີລູກເທື່ອ ເມຍຂອງຜູ້ທີ່ຕາຍບໍ່ຄວນໄປແຕ່ງດອງກັບຄົນອື່ນ.* ອ້າຍຫຼືນ້ອງຂອງຜູ້ທີ່ຕາຍຄວນເອົາລາວມາເປັນເມຍ.+
6 ລູກຊາຍຜູ້ທຳອິດທີ່ໄດ້ນຳກັນຈະຕ້ອງສືບເຊື້ອສາຍຂອງຜູ້ທີ່ຕາຍໄປ+ ເພື່ອຊື່ຂອງຜູ້ທີ່ຕາຍໄປນັ້ນຈະບໍ່ຖືກລຶບໄປຈາກພວກອິດສະຣາເອນ.+
7 ຖ້າຜູ້ໃດບໍ່ຢາກແຕ່ງດອງກັບເມຍຂອງອ້າຍ*ທີ່ຕາຍໄປ ເມຍຂອງຜູ້ທີ່ຕາຍໄປຕ້ອງໄປຫາພວກຜູ້ນຳຢູ່ປະຕູເມືອງ ແລະເວົ້າວ່າ ‘ນ້ອງຂອງຜົວຂ້ອຍບໍ່ຢາກຊ່ວຍສືບເຊື້ອສາຍຂອງອ້າຍ. ລາວບໍ່ຍອມເຮັດຕາມໜ້າທີ່ແລະບໍ່ຢາກແຕ່ງດອງກັບຂ້ອຍ.’
8 ພວກຜູ້ນຳຂອງເມືອງກໍຕ້ອງເອີ້ນຜູ້ຊາຍຄົນນັ້ນມາຖາມ. ຖ້າລາວຍັງຢືນຢັນແລະເວົ້າວ່າ ‘ຈັ່ງໃດຂ້ອຍກໍຊິບໍ່ແຕ່ງດອງກັບລາວ’
9 ເມຍຂອງຜູ້ຕາຍຈະຫຍັບເຂົ້າໄປຫາລາວຕໍ່ໜ້າພວກຜູ້ນຳ ປົດເກີບຂອງລາວອອກ+ ຖົ່ມນ້ຳລາຍໃສ່ໜ້າລາວ ແລະເວົ້າວ່າ ‘ຄົນທີ່ບໍ່ຢາກໃຫ້ອ້າຍມີລູກໄວ້ສືບເຊື້ອສາຍຕ້ອງເຈິແບບນີ້ແຫຼະ.’
10 ຫຼັງຈາກນັ້ນ ພວກອິດສະຣາເອນຈະເອີ້ນຄອບຄົວຂອງຜູ້ຊາຍຄົນນັ້ນວ່າ ‘ຄອບຄົວຂອງຜູ້ທີ່ຖືກປົດເກີບອອກ.’
11 ຖ້າມີຜູ້ຊາຍ 2 ຄົນຕີກັນ ແລະເມຍຂອງຜູ້ຊາຍຄົນໜຶ່ງເຂົ້າໄປຊ່ວຍຜົວລາວ ແລະໄດ້ບີບອະໄວຍະວະເພດຂອງຄົນທີ່ມາຕີຜົວລາວ
12 ເຈົ້າຕ້ອງຕັດມືຂອງຜູ້ຍິງຄົນນັ້ນ. ຢ່າອີ່ຕົນລາວ.
13 ຫ້າມເຈົ້າມີຫີນທີ່ໃຊ້ຊັ່ງນ້ຳໜັກ 2 ແບບ+ ແບບໜຶ່ງໜັກແລະແບບໜຶ່ງເບົາ.
14 ຫ້າມເຈົ້າມີແນວຜອງ 2 ອັນຢູ່ໃນເຮືອນ+ ອັນໜຶ່ງຜອງໄດ້ຫຼາຍແລະອັນໜຶ່ງຜອງໄດ້ໜ້ອຍ.
15 ໃຫ້ໃຊ້ແນວຜອງແລະຊິງທີ່ມັນທ່ຽງ ເພື່ອເຈົ້າຈະມີອາຍຸຍືນຍາວໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້+
16 ເພາະພະເຢໂຫວາພະເຈົ້າຊັງຄົນບໍ່ສັດຊື່ທີ່ໂກງຕາຊິງ.+
17 ຢ່າລືມວ່າພວກອາມາເລັກເຮັດແນວໃດກັບພວກເຈົ້າຫຼັງຈາກທີ່ພວກເຈົ້າອອກມາຈາກເອຢິບ.+
18 ຕອນທີ່ພວກເຈົ້າເດີນທາງແລະເມື່ອຍຫຼາຍ ພວກເຂົາກໍອອກມາໂຈມຕີຄົນຂອງພວກເຈົ້າທີ່ໝົດແຮງແລະຍ່າງນຳຫຼັງໝູ່. ພວກເຂົາບໍ່ໄດ້ຢ້ານພະເຈົ້າເລີຍ.
19 ເມື່ອພະເຢໂຫວາພະເຈົ້າໄດ້ໃຫ້ພວກເຈົ້າເຂົ້າໄປຢູ່ໃນແຜ່ນດິນທີ່ເພິ່ນຈະເອົາໃຫ້ພວກເຈົ້າເປັນມໍລະດົກແລ້ວ+ ແລະພະເຢໂຫວາພະເຈົ້າຂອງພວກເຈົ້າໄດ້ເບິ່ງແຍງບໍ່ໃຫ້ມີສັດຕູມາໂຈມຕີພວກເຈົ້າ ພວກເຈົ້າຕ້ອງກຳຈັດພວກອາມາເລັກໃຫ້ໝົດໄປຈາກໂລກນີ້.+ ຢ່າລືມເດັດຂາດ.”
ຂໍ
^ ໝາຍເຖິງການໃຊ້ງົວລາກໄມ້ແປ້ນເພື່ອເຮັດໃຫ້ເມັດເຂົ້າຫຼົ່ນອອກຈາກຮວງ
^ ແປຕາມໂຕວ່າ “ຄົນນອກຄອບຄົວຂອງຜົວ”
^ ອາດຈະເປັນອ້າຍຫຼືນ້ອງກໍໄດ້
