ພະບັນຍັດ 26:1-19
26 “ເມື່ອເຈົ້າເຂົ້າໄປຍຶດເອົາແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້າເປັນມໍລະດົກ ແລະເຈົ້າໄດ້ຢູ່ຫັ້ນແລ້ວ
2 ເຈົ້າຕ້ອງເອົາຜົນລະປູກຊຸດທຳອິດທີ່ໄດ້ຈາກໄຮ່ຈາກນາຂອງເຈົ້າໃນແຜ່ນດິນທີ່ພະເຢໂຫວາພະເຈົ້າຂອງເຈົ້າເອົາໃຫ້ເຈົ້າໃສ່ໃນກະຕ່າ ແລ້ວເອົາໄປບ່ອນທີ່ພະເຢໂຫວາພະເຈົ້າໄດ້ເລືອກໄວ້ສຳລັບຊື່ຂອງເພິ່ນ.+
3 ເຈົ້າຕ້ອງໄປຫາປະໂລຫິດທີ່ເຮັດໜ້າທີ່ໃນຕອນນັ້ນແລະບອກລາວວ່າ ‘ພະເຢໂຫວາໄດ້ສັນຍາກັບປູ່ຍ່າຕານາຍຂອງພວກເຮົາວ່າຈະເອົາແຜ່ນດິນນີ້ໃຫ້ພວກເຮົາ ແລະຕອນນີ້ຂ້ອຍໄດ້ມາຢູ່ໃນແຜ່ນດິນນີ້ແລ້ວ. ມື້ນີ້ຂ້ອຍຈຶ່ງມາຂອບໃຈພະເຢໂຫວາພະເຈົ້າຂອງພວກເຮົາ.’+
4 ປະໂລຫິດຈະຮັບເອົາກະຕ່ານຳເຈົ້າ ແລະເອົາໄປວາງໄວ້ຢູ່ຕໍ່ໜ້າແທ່ນບູຊາຂອງພະເຢໂຫວາພະເຈົ້າຂອງເຈົ້າ.
5 ຈາກນັ້ນ ເຈົ້າຕ້ອງເວົ້າຕໍ່ໜ້າພະເຢໂຫວາພະເຈົ້າຂອງເຈົ້າວ່າ ‘ປູ່ຍ່າຕານາຍຂອງຂ້ອຍເປັນຄົນອາຣາມ+ທີ່ຍ້າຍບ່ອນຢູ່ໄປເລື້ອຍໆ. ເຂົາເຈົ້າໄດ້ລົງໄປເອຢິບ+ແລະໄດ້ຢູ່ຫັ້ນຄືກັບຄົນຕ່າງຊາດ. ຕອນທີ່ໄປ ເຂົາເຈົ້າມີບໍ່ເທົ່າໃດຄົນ+ ແຕ່ຕໍ່ມາເຂົາເຈົ້າກາຍເປັນຊາດໃຫຍ່ທີ່ມີກຳລັງແລະມີຄົນຫຼາຍ.+
6 ພວກເອຢິບກໍເລີຍຂົ່ມເຫງພວກເຮົາ ແລະບັງຄັບພວກເຮົາໃຫ້ເປັນທາດ.+
7 ພວກເຮົາຈຶ່ງຮ້ອງຂໍໃຫ້ພະເຢໂຫວາພະເຈົ້າຂອງປູ່ຍ່າຕານາຍຂອງພວກເຮົາຊ່ວຍ. ພະເຢໂຫວາໄດ້ຍິນສຽງຮ້ອງຂອງພວກເຮົາ ແລະເພິ່ນເຫັນວ່າພວກເຮົາຖືກກົດຂີ່ແລະລຳບາກຫຼາຍ.+
8 ໃນທີ່ສຸດ ພະເຢໂຫວາໄດ້ຊ່ວຍພວກເຮົາໃຫ້ອອກຈາກເອຢິບດ້ວຍລິດເດດທີ່ຍິ່ງໃຫຍ່ຂອງເພິ່ນ.+ ເພິ່ນໄດ້ເຮັດການອັດສະຈັນແລະສິ່ງທີ່ເປັນຕາຢ້ານຫຼາຍຢ່າງ.+
9 ແລ້ວເພິ່ນກໍພາພວກເຮົາມາຢູ່ໃນແຜ່ນດິນນີ້ເຊິ່ງເປັນແຜ່ນດິນທີ່ມີນ້ຳນົມກັບນ້ຳເຜີ້ງຫຼາຍ.+
10 ຕອນນີ້ ຂ້ອຍຈຶ່ງເອົາຜົນລະປູກຊຸດທຳອິດຈາກໄຮ່ຈາກນາທີ່ພະເຢໂຫວາເອົາໃຫ້ຂ້ອຍມາໃຫ້ເພິ່ນ.’+
ເຈົ້າຕ້ອງວາງກະຕ່າໄວ້ຕໍ່ໜ້າພະເຢໂຫວາພະເຈົ້າຂອງເຈົ້າ ແລະໝູບໜ້າລົງຕໍ່ໜ້າພະເຢໂຫວາພະເຈົ້າ.
11 ແລ້ວເຈົ້າຈະມີຄວາມສຸກຍ້ອນພະເຢໂຫວາພະເຈົ້າຂອງເຈົ້າຈະໃຫ້ສິ່ງດີໆກັບເຈົ້າ ຄົນໃນຄອບຄົວຂອງເຈົ້າ ຄົນເລວີ ແລະຄົນຕ່າງຊາດທີ່ອາໄສຢູ່ນຳເຈົ້າ.+
12 ໃນທຸກໆປີ ເຈົ້າຕ້ອງແບ່ງ 1 ສ່ວນ 10 ຂອງຜົນລະປູກຂອງປີນັ້ນໄວ້. ແຕ່ໃນປີທີ 3 ເມື່ອເຈົ້າແບ່ງ 1 ສ່ວນ 10+ ຂອງຜົນລະປູກໄວ້ແລ້ວ ເຈົ້າຕ້ອງເອົາສ່ວນນັ້ນໄປໃຫ້ຄົນເລວີ ຄົນຕ່າງຊາດ ລູກກຳພ້າ ແລະແມ່ໝ້າຍ. ເຂົາເຈົ້າຈະໄດ້ກິນຜົນລະປູກນັ້ນຈົນໜຳໃຈຢູ່ໃນເມືອງຂອງເຈົ້າ.+
13 ຈາກນັ້ນ ເຈົ້າຕ້ອງເວົ້າຕໍ່ໜ້າພະເຢໂຫວາພະເຈົ້າຂອງເຈົ້າວ່າ ‘ຂ້ອຍໄດ້ແບ່ງເອົາສ່ວນທີ່ຖືວ່າບໍລິສຸດຈາກເຮືອນຂອງຂ້ອຍໃຫ້ຄົນເລວີ ຄົນຕ່າງຊາດ ລູກກຳພ້າ ແລະແມ່ໝ້າຍ+ແລ້ວ ຕາມທີ່ພະອົງສັ່ງຂ້ອຍ. ຂ້ອຍບໍ່ໄດ້ເຮັດຜິດຫຼືບໍ່ໄດ້ເບິ່ງຂ້າມກົດໝາຍຂອງພະອົງ.
14 ຂ້ອຍບໍ່ໄດ້ກິນສິ່ງເຫຼົ່ານີ້ຕອນທີ່ໄວ້ທຸກ ຫຼືຈັບສິ່ງເຫຼົ່ານີ້ຕອນທີ່ຂ້ອຍບໍ່ສະອາດ ຫຼືເອົາສິ່ງເຫຼົ່ານີ້ໃຫ້ຄົນຕາຍ. ຂ້ອຍເຊື່ອຟັງພະເຢໂຫວາພະເຈົ້າຂອງຂ້ອຍ ແລະໄດ້ເຮັດທຸກຢ່າງຕາມທີ່ພະອົງສັ່ງຂ້ອຍ.
15 ຕອນນີ້ ຂໍໃຫ້ພະອົງແນມລົງມາຈາກສະຫວັນເຊິ່ງເປັນບ່ອນບໍລິສຸດທີ່ພະອົງຢູ່ ແລະອວຍພອນໃຫ້ພວກອິດສະຣາເອນຄົນຂອງພະອົງ ແລະອວຍພອນໃຫ້ແຜ່ນດິນທີ່ມີນ້ຳນົມກັບນ້ຳເຜີ້ງຫຼາຍ+ເຊິ່ງພະອົງໄດ້ເອົາໃຫ້ພວກເຮົາ+ ຕາມທີ່ພະອົງໄດ້ສັນຍາໄວ້ກັບປູ່ຍ່າຕານາຍຂອງພວກເຮົາ.’+
16 ມື້ນີ້ພະເຢໂຫວາພະເຈົ້າຂອງເຈົ້າສັ່ງໃຫ້ເຈົ້າເຮັດຕາມຂໍ້ກຳນົດແລະຄຳສັ່ງຂອງເພິ່ນ. ເຈົ້າຕ້ອງເຮັດຕາມທັງໝົດນີ້ຢ່າງສຸດຫົວໃຈ+ ແລະສຸດຊີວິດຂອງເຈົ້າ.
17 ມື້ນີ້ພະເຢໂຫວາຢືນຢັນວ່າເພິ່ນຈະເປັນພະເຈົ້າຂອງເຈົ້າ ຖ້າເຈົ້າໃຊ້ຊີວິດຕາມແນວທາງຂອງເພິ່ນ+ ເຊື່ອຟັງແລະເຮັດຕາມຂໍ້ກຳນົດກົດໝາຍແລະຄຳສັ່ງຂອງເພິ່ນ.+
18 ມື້ນີ້ພະເຢໂຫວາໄດ້ຮັບຄຳຢືນຢັນຈາກພວກເຈົ້າວ່າພວກເຈົ້າຈະເປັນປະຊາຊົນຂອງເພິ່ນ ເປັນຊັບສົມບັດພິເສດ*+ຂອງເພິ່ນຕາມທີ່ເພິ່ນໄດ້ສັນຍາໄວ້ກັບພວກເຈົ້າ ແລະພວກເຈົ້າຈະເຮັດຕາມກົດໝາຍທັງໝົດຂອງເພິ່ນ.
19 ແລ້ວເພິ່ນຈະຍົກພວກເຈົ້າໃຫ້ສູງຂຶ້ນກວ່າຊາດອື່ນໆຕາມທີ່ເພິ່ນໄດ້ສັນຍາໄວ້.+ ເພິ່ນຈະເຮັດໃຫ້ພວກເຈົ້າໄດ້ຮັບກຽດ ຄຳຍົກຍ້ອງ ແລະຊື່ສຽງ ຖ້າພວກເຈົ້າເຮັດໃຫ້ເຫັນວ່າພວກເຈົ້າເປັນຄົນບໍລິສຸດສຳລັບພະເຢໂຫວາພະເຈົ້າຂອງພວກເຈົ້າ.”+
ຂໍ ຄວາມ ໄຂ ເງື່ອນ
^ ຫຼື “ຊັບສົມບັດທີ່ມີຄ່າ”