ພະບັນຍັດ 27:1-26
27 ຈາກນັ້ນ ໂມເຊກັບພວກຜູ້ນຳຂອງອິດສະຣາເອນກໍສັ່ງປະຊາຊົນວ່າ: “ໃຫ້ພວກເຈົ້າເຮັດຕາມກົດໝາຍທຸກຂໍ້ທີ່ຂ້ອຍບອກພວກເຈົ້າໃນມື້ນີ້.
2 ເມື່ອພວກເຈົ້າຂ້າມແມ່ນ້ຳຈໍແດນເຂົ້າໄປໃນແຜ່ນດິນທີ່ພະເຢໂຫວາພະເຈົ້າຂອງພວກເຈົ້າຈະເອົາໃຫ້ພວກເຈົ້າ ໃຫ້ພວກເຈົ້າຕັ້ງຫີນໃຫຍ່ຈຳນວນໜຶ່ງຂຶ້ນ ແລ້ວເອົາປູນໂອບ.+
3 ຈາກນັ້ນ ໃຫ້ຂຽນກົດໝາຍທັງໝົດນີ້ໃສ່ໃນຫີນເຫຼົ່ານັ້ນ ເພື່ອພວກເຈົ້າຈະໄດ້ເຂົ້າໄປຢູ່ໃນແຜ່ນດິນທີ່ພະເຢໂຫວາພະເຈົ້າຂອງພວກເຈົ້າຈະຍົກໃຫ້ພວກເຈົ້າ ເຊິ່ງເປັນແຜ່ນດິນທີ່ມີນ້ຳນົມກັບນ້ຳເຜີ້ງຫຼາຍ ທີ່ພະເຢໂຫວາພະເຈົ້າຂອງປູ່ຍ່າຕານາຍຂອງພວກເຈົ້າໄດ້ສັນຍາໄວ້ກັບພວກເຈົ້າ.+
4 ເມື່ອພວກເຈົ້າຂ້າມແມ່ນ້ຳຈໍແດນແລ້ວ ໃຫ້ພວກເຈົ້າຕັ້ງຫີນເຫຼົ່ານັ້ນຢູ່ພູເອບານ+ ແລ້ວເອົາປູນໂອບຕາມທີ່ຂ້ອຍສັ່ງພວກເຈົ້າໃນມື້ນີ້.
5 ໃຫ້ພວກເຈົ້າເອົາຫີນມາສ້າງແທ່ນບູຊາແທ່ນໜຶ່ງໃຫ້ພະເຢໂຫວາພະເຈົ້າຂອງພວກເຈົ້າຢູ່ຫັ້ນ. ຫ້າມພວກເຈົ້າໃຊ້ເຄື່ອງມືທີ່ເປັນເຫຼັກຕັດຫີນເຫຼົ່ານັ້ນ.+
6 ໃຫ້ພວກເຈົ້າສ້າງແທ່ນບູຊາໃຫ້ພະເຢໂຫວາພະເຈົ້າຂອງພວກເຈົ້າດ້ວຍຫີນທີ່ບໍ່ໄດ້ຕັດແຕ່ງຫຍັງເລີຍ ແລະໃຫ້ໃຊ້ແທ່ນນີ້ເປັນບ່ອນເຜົາເຄື່ອງບູຊາໃຫ້ພະເຢໂຫວາພະເຈົ້າຂອງພວກເຈົ້າ.
7 ພວກເຈົ້າຕ້ອງເອົາເຄື່ອງບູຊາສ້າງຄວາມສະຫງົບສຸກ+ມາໃຫ້ພະເຈົ້າ ແລະກິນສ່ວນຈາກເຄື່ອງບູຊາຢູ່ຫັ້ນ.+ ພວກເຈົ້າຈະກິນຢ່າງມີຄວາມສຸກຕໍ່ໜ້າພະເຢໂຫວາພະເຈົ້າຂອງພວກເຈົ້າ.+
8 ແລ້ວໃຫ້ພວກເຈົ້າຂຽນກົດໝາຍທັງໝົດໃສ່ຫີນເຫຼົ່ານັ້ນຢ່າງຈະແຈ້ງ.”+
9 ໂມເຊກັບພວກປະໂລຫິດຄົນເລວີກໍເວົ້າກັບພວກອິດສະຣາເອນວ່າ: “ພວກອິດສະຣາເອນເອີ້ຍ ມິດໆແດ່ແລະຕັ້ງໃຈຟັງໃຫ້ດີ. ຕອນນີ້ ພວກເຈົ້າໄດ້ເປັນປະຊາຊົນຂອງພະເຢໂຫວາພະເຈົ້າຂອງພວກເຈົ້າແລ້ວ.+
10 ພວກເຈົ້າຕ້ອງຟັງພະເຢໂຫວາພະເຈົ້າຂອງພວກເຈົ້າ ແລະເຮັດຕາມຂໍ້ກຳນົດກົດໝາຍຂອງເພິ່ນ+ທີ່ຂ້ອຍບອກພວກເຈົ້າໃນມື້ນີ້.”
11 ໃນມື້ນັ້ນ ໂມເຊໄດ້ສັ່ງປະຊາຊົນວ່າ:
12 “ເມື່ອພວກເຈົ້າຂ້າມແມ່ນ້ຳຈໍແດນໄປແລ້ວ ໃຫ້ຕະກູນຊີເມໂອນ ຕະກູນເລວີ ຕະກູນຢູດາ ຕະກູນອິດຊາຄາ ຕະກູນໂຢເຊັບ ແລະຕະກູນເບັນຢາມິນໄປຢືນຢູ່ພູເກຣີຊີມ+ເພື່ອຕອບຮັບຄຳອວຍພອນ
13 ແລະໃຫ້ຕະກູນຣູເບັນ ຕະກູນຄາດ ຕະກູນອາເຊ ຕະກູນເຊບູລູນ ຕະກູນດານ ແລະຕະກູນນັບທາລີໄປຢືນຢູ່ພູເອບານ+ເພື່ອຕອບຮັບຄຳສາບແຊ່ງ.
14 ແລ້ວໃຫ້ພວກເລວີ*ເວົ້າກັບພວກອິດສະຣາເອນດ້ວຍສຽງດັງໆວ່າ+
15 ‘ຜູ້ໃດທີ່ແກະສະຫຼັກ+ຫຼືຫຼໍ່ຮູບບູຊາ+ຂຶ້ນມາ ແລະຜູ້ໃດທີ່ລັກນະມັດສະການຮູບບູຊາເຫຼົ່ານັ້ນ ເຊິ່ງເປັນສິ່ງທີ່ມະນຸດເຮັດຂຶ້ນແລະເປັນສິ່ງທີ່ພະເຢໂຫວາຂີ້ດຽດ+ ຜູ້ນັ້ນຈະຖືກສາບແຊ່ງ.’ (ປະຊາຊົນທຸກຄົນຈະເວົ້າວ່າ ‘ອາແມນ!’*)
16 ‘ຜູ້ໃດທີ່ບໍ່ນັບຖືພໍ່ແມ່ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
17 ‘ຜູ້ໃດທີ່ຍ້າຍຫຼັກແດນຂອງເພື່ອນບ້ານ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
18 ‘ຜູ້ໃດທີ່ເຮັດໃຫ້ຄົນຕາບອດຫຼົງທາງ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
19 ‘ຜູ້ໃດທີ່ຕັດສິນ+ຄະດີຂອງຄົນຕ່າງຊາດ ລູກກຳພ້າ ຫຼືແມ່ໝ້າຍແບບບໍ່ຍຸຕິທຳ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
20 ‘ຜູ້ໃດທີ່ມີເພດສຳພັນກັບເມຍຂອງພໍ່ ລາວກໍເຮັດໃຫ້ພໍ່ຂອງໂຕເອງອັບອາຍ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
21 ‘ຜູ້ໃດທີ່ມີເພດສຳພັນກັບສັດ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
22 ‘ຜູ້ໃດທີ່ມີເພດສຳພັນກັບເອື້ອຍນ້ອງຂອງໂຕເອງ ບໍ່ວ່າຈະເປັນລູກສາວຂອງພໍ່ຫຼືລູກສາວຂອງແມ່ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
23 ‘ຜູ້ໃດທີ່ມີເພດສຳພັນກັບແມ່ຂອງເມຍ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
24 ‘ຜູ້ໃດທີ່ລັດຂ້າເພື່ອນບ້ານ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
25 ‘ຜູ້ໃດທີ່ຮັບເງິນເພື່ອໄປຂ້າຄົນທີ່ບໍ່ມີຄວາມຜິດ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)
26 ‘ຜູ້ໃດທີ່ຕໍ່ຕ້ານແລະບໍ່ເຮັດຕາມກົດໝາຍທັງໝົດນີ້ ຜູ້ນັ້ນຈະຖືກສາບແຊ່ງ.’+ (ປະຊາຊົນທຸກຄົນຈະເວົ້າວ່າ ‘ອາແມນ!’)”