ພະບັນຍັດ 29:1-29
29 ຕໍ່ໄປນີ້ແມ່ນສັນຍາທີ່ພະເຢໂຫວາສັ່ງໂມເຊໃຫ້ເຮັດກັບພວກອິດສະຣາເອນຢູ່ແຜ່ນດິນໂມອາບ ນອກເໜືອຈາກຄຳສັນຍາທີ່ໄດ້ເຮັດໄປແລ້ວຕອນຢູ່ໂຮເຣັບ.+
2 ໂມເຊເອີ້ນພວກອິດສະຣາເອນທຸກຄົນມາ ແລ້ວເວົ້າວ່າ: “ພວກເຈົ້າກໍໄດ້ເຫັນກັບຕາແລ້ວວ່າ ຕອນທີ່ພວກເຈົ້າຢູ່ເອຢິບ ພະເຢໂຫວາໄດ້ຈັດການກັບຟາໂຣ* ພວກຜູ້ຮັບໃຊ້ຂອງລາວ ແລະແຜ່ນດິນຂອງລາວແນວໃດ+
3 ແລະຍັງໄດ້ເຫັນການຕັດສິນລົງໂທດ ການອັດສະຈັນກັບລິດເດດທີ່ຍິ່ງໃຫຍ່ຂອງເພິ່ນ.+
4 ແຕ່ຈົນຮອດຕອນນີ້ ພະເຢໂຫວາຍັງບໍ່ໄດ້ໃຫ້ພວກເຈົ້າເຂົ້າໃຈວ່າສິ່ງທີ່ພວກເຈົ້າໄດ້ເຫັນແລະໄດ້ຍິນນັ້ນໝາຍຄວາມວ່າແນວໃດ.+
5 ເພິ່ນເວົ້າວ່າ ‘ຕະຫຼອດ 40 ປີທີ່ເຮົານຳພາພວກເຈົ້າເດີນທາງໃນບ່ອນກັນດານ+ ເຄື່ອງນຸ່ງຂອງພວກເຈົ້າກໍບໍ່ເກົ່າ ເກີບຂອງພວກເຈົ້າກໍບໍ່ຂາດ.+
6 ເຖິງວ່າພວກເຈົ້າຈະບໍ່ໄດ້ກິນເຂົ້າຈີ່ ບໍ່ໄດ້ກິນເຫຼົ້າແວງ ຫຼືເຫຼົ້າອື່ນໆ ແຕ່ເຮົາກໍເບິ່ງແຍງພວກເຈົ້າຢ່າງດີ ເພື່ອພວກເຈົ້າຈະໄດ້ຮູ້ວ່າເຮົາແມ່ນເຢໂຫວາພະເຈົ້າຂອງພວກເຈົ້າ.’
7 ໃນທີ່ສຸດ ເມື່ອພວກເຮົາມາຮອດບ່ອນນີ້ ສີໂຮນກະສັດຂອງເມືອງເຮັດຊະໂບນ+ແລະໂອກກະສັດຂອງບາຊານ+ໄດ້ອອກມາຕໍ່ສູ້ພວກເຮົາ ແຕ່ພວກເຮົາກໍເອົາຊະນະພວກເຂົາໄດ້.+
8 ຈາກນັ້ນ ພວກເຮົາກໍເອົາແຜ່ນດິນຂອງພວກເຂົາໃຫ້ຕະກູນຣູເບັນ ຕະກູນຄາດ ແລະເຄິ່ງໜຶ່ງຂອງຕະກູນມານາເຊ.+
9 ຍ້ອນພະເຈົ້າໄດ້ເຮັດສິ່ງທັງໝົດນີ້ໃຫ້ພວກເຈົ້າ ພວກເຈົ້າກໍຕ້ອງເຊື່ອຟັງແລະເຮັດຕາມສັນຍານີ້ ເພື່ອທຸກສິ່ງທີ່ພວກເຈົ້າເຮັດຈະສຳເລັດ.+
10 ມື້ນີ້ພວກເຈົ້າໄດ້ມາຢືນຢູ່ຕໍ່ໜ້າພະເຢໂຫວາພະເຈົ້າຂອງພວກເຈົ້າ ມີທັງພວກຫົວໜ້າຕະກູນ ພວກຜູ້ນຳກັບພວກຫົວໜ້າອື່ນໆ ພວກຜູ້ຊາຍອິດສະຣາເອນທຸກຄົນ
11 ລູກເມຍຂອງພວກເຈົ້າ+ ແລະຄົນຕ່າງຊາດທີ່ຢູ່ນຳພວກເຈົ້າ+ ບໍ່ວ່າຈະເປັນຄົນເກັບຟືນຫຼືຄົນຕັກນ້ຳ.
12 ພວກເຈົ້າມາຢູ່ນີ້ເພື່ອພະເຢໂຫວາພະເຈົ້າຂອງພວກເຈົ້າຈະໄດ້ເຮັດສັນຍາກັບພວກເຈົ້າ+ ແລະເພື່ອພວກເຈົ້າຈະໄດ້ສາບານຕໍ່ເພິ່ນ. ພະເຢໂຫວາພະເຈົ້າຂອງພວກເຈົ້າຈະເຮັດແນວນີ້
13 ເພື່ອເຮັດໃຫ້ແນ່ໃຈວ່າພວກເຈົ້າເປັນປະຊາຊົນຂອງເພິ່ນ+ ແລະເພິ່ນເປັນພະເຈົ້າຂອງພວກເຈົ້າ+ຕາມທີ່ເພິ່ນເຄີຍສັນຍາກັບພວກເຈົ້າ ແລະສັນຍາກັບອັບຣາຮາມ+ ອີຊາກ+ ແລະຢາໂຄບ+ທີ່ເປັນປູ່ຍ່າຕານາຍຂອງພວກເຈົ້າ.
14 ບໍ່ແມ່ນແຕ່ພວກເຈົ້າເທົ່ານັ້ນທີ່ຂ້ອຍຊ່ວຍໃຫ້ເຮັດສັນຍານີ້ກັບພະເຈົ້າໂດຍການສາບານ.
15 ພະເຢໂຫວາພະເຈົ້າຂອງພວກເຈົ້າຈະເຮັດສັນຍາກັບພວກເຈົ້າ ແລະກັບຄົນລຸ້ນຕໍ່ໆໄປທີ່ບໍ່ໄດ້ຢູ່ນຳພວກເຮົາຕອນນີ້.
16 ເພາະພວກເຈົ້າຮູ້ດີວ່າຕອນທີ່ພວກເຮົາຢູ່ເອຢິບພວກເຮົາມີຊີວິດແນວໃດ ແລະພວກເຮົາໄດ້ເດີນທາງຜ່ານຊາດຕ່າງໆແນວໃດ.+
17 ພວກເຈົ້າໄດ້ເຫັນພະເຈົ້າຕ່າງໆ*+ຂອງພວກເຂົາທີ່ເປັນໄມ້ ເປັນຫີນ ເປັນເງິນ ແລະເປັນຄຳທີ່ເປັນຕາຂີ້ດຽດ.
18 ລະວັງ ຢ່າໃຫ້ຜູ້ຊາຍຫຼືຜູ້ຍິງຄົນໃດ ຄອບຄົວໃດຫຼືຕະກູນໃດຖິ້ມພະເຢໂຫວາພະເຈົ້າຂອງພວກເຈົ້າ ແລ້ວໄປນະມັດສະການພະເຈົ້າຂອງຊາດເຫຼົ່ານັ້ນ.+ ຢ່າໃຫ້ຜູ້ໃດໃນພວກເຈົ້າເປັນຄືກັບຮາກໄມ້ທີ່ຂົມແລະມີພິດ.+
19 ແຕ່ຖ້າຜູ້ໃດໄດ້ຍິນຄຳສາບານນີ້ແລະຄິດອວດອົ່ງໃນໃຈວ່າ ‘ຂ້ອຍຢາກເຮັດຫຍັງຂ້ອຍກໍຊິເຮັດ ມັນຊິບໍ່ມີບັນຫາດອກ’ ແລະເຮັດໃຫ້ໂຕເອງກັບຄົນອື່ນຈິບຫາຍ
20 ພະເຢໂຫວາຈະບໍ່ຍົກໂທດໃຫ້ລາວ.+ ພະເຢໂຫວາຈະໃຈຮ້າຍໃຫ້ຜູ້ນັ້ນຫຼາຍແລະລາວຈະຖືກສາບແຊ່ງຕາມສິ່ງທີ່ຂຽນໄວ້ໃນປຶ້ມນີ້.+ ພະເຢໂຫວາຈະລຶບຊື່ລາວໄປຈາກໂລກນີ້.
21 ພະເຢໂຫວາຈະແຍກລາວອອກຈາກຕະກູນຕ່າງໆຂອງພວກອິດສະຣາເອນ ແລະຄຳສາບແຊ່ງທັງໝົດຕາມຄຳສັນຍາທີ່ຂຽນໄວ້ໃນປຶ້ມກົດໝາຍນີ້ຈະເກີດຂຶ້ນກັບລາວແທ້.
22 ໃນອະນາຄົດ ລູກຫຼານຂອງເຈົ້າແລະຄົນຕ່າງຊາດທີ່ຢູ່ປະເທດໄກໆຈະໄດ້ເຫັນໄພພິບັດທີ່ພະເຢໂຫວາເຮັດໃຫ້ເກີດຂຶ້ນໃນແຜ່ນດິນນີ້.
23 ເພິ່ນຈະໃຊ້ມາດ ເກືອແລະໄຟ ເພື່ອເຮັດໃຫ້ທົ່ວແຜ່ນດິນນີ້ບໍ່ມີພືດຜັກແລະຜົນລະປູກ ຄືກັບຕອນທີ່ພະເຢໂຫວາໃຈຮ້າຍແລະທຳລາຍເມືອງໂຊໂດມກັບເມືອງໂກໂມຣາ+ ເມືອງອັດມາກັບເມືອງເຊໂບຢິມ.+
24 ລູກຫຼານຂອງພວກເຈົ້າແລະຄົນຕ່າງຊາດກໍຈະເວົ້າວ່າ ‘ເປັນຫຍັງພະເຢໂຫວາຈຶ່ງເຮັດກັບແຜ່ນດິນນີ້ແນວນີ້?+ ເປັນຫຍັງເພິ່ນຄືໃຈຮ້າຍແນວນີ້?’
25 ແລ້ວພວກເຂົາກໍຈະເວົ້າວ່າ ‘ຍ້ອນເຂົາເຈົ້າບໍ່ໄດ້ເຮັດຕາມຄຳສັນຍາທີ່ພະເຢໂຫວາ+ໄດ້ເຮັດກັບປູ່ຍ່າຕານາຍຂອງເຂົາເຈົ້າ ຕອນທີ່ພາເຂົາເຈົ້າອອກມາຈາກເອຢິບ.+
26 ແຕ່ເຂົາເຈົ້າໄດ້ໄປນະມັດສະການພະເຈົ້າອື່ນ ແລະໄດ້ຂາບໄຫວ້ພະເຈົ້າທີ່ເຂົາເຈົ້າບໍ່ເຄີຍຮູ້ຈັກ ເຊິ່ງເພິ່ນຫ້າມບໍ່ໃຫ້ເຂົາເຈົ້ານະມັດສະການ.+
27 ແລ້ວພະເຢໂຫວາກໍໃຈຮ້າຍ ແລະເຮັດໃຫ້ຄຳສາບແຊ່ງທີ່ຂຽນໄວ້ໃນປຶ້ມນີ້ເກີດຂຶ້ນກັບແຜ່ນດິນຂອງເຂົາເຈົ້າ.+
28 ຍ້ອນພະເຢໂຫວາໃຈຮ້າຍແຮງ+ ເພິ່ນຈຶ່ງໄດ້ຂັບໄລ່ເຂົາເຈົ້າອອກຈາກແຜ່ນດິນນັ້ນໃຫ້ໄປຢູ່ໃນບ່ອນທີ່ເຂົາເຈົ້າຢູ່ຕອນນີ້.’+
29 ພະເຢໂຫວາພະເຈົ້າຂອງພວກເຮົາຮູ້ຄວາມລັບໝົດທຸກຢ່າງ+ ແລະສິ່ງທີ່ເພິ່ນຢາກໃຫ້ພວກເຮົາກັບລູກຫຼານຂອງພວກເຮົາຮູ້ ເພິ່ນກໍເປີດເຜີຍຕະຫຼອດໄປ ເພື່ອພວກເຮົາຈະເຮັດຕາມທຸກຢ່າງໃນກົດໝາຍນີ້ໄດ້.”+
ຂໍ ຄວາມ ໄຂ ເງື່ອນ
^ ນີ້ແມ່ນຕຳແໜ່ງກະສັດຂອງເອຢິບ
^ ຄຳນີ້ໃນພາສາເຮັບເຣີອາດກ່ຽວຂ້ອງກັບຄຳວ່າ “ຂີ້ສັດ” ແລະໃຊ້ໃນລັກສະນະດູຖູກ