ພະບັນຍັດ 34:1-12
34 ຈາກບ່ອນກັນດານໂມອາບ ໂມເຊໄດ້ຂຶ້ນໄປເທິງຈອມພູເນໂບ+ທີ່ມີອີກຊື່ໜຶ່ງວ່າພູປິຊະກາ+ ເຊິ່ງຢູ່ກົງກັນຂ້າມກັບເມືອງເຢຣິໂກ.+ ພະເຢໂຫວາໃຫ້ລາວເຫັນແຜ່ນດິນທັງໝົດຕັ້ງແຕ່ກິລຽດໄປຈົນຮອດດານ.+
2 ເພິ່ນໃຫ້ລາວເຫັນແຜ່ນດິນທັງໝົດຂອງນັບທາລີ ເອຟຣາຢິມ ມານາເຊ ແລະຂອງຢູດາໄປຈົນຮອດທະເລທາງທິດຕາເວັນຕົກ.*+
3 ເພິ່ນຍັງໃຫ້ລາວເຫັນເຂດເນເກັບ*+ ເຂດຈໍແດນ+ ແລະທົ່ງພຽງຂອງເມືອງເຢຣິໂກເຊິ່ງເປັນເມືອງແຫ່ງຕົ້ນປາມໄປຈົນຮອດເມືອງໂຊອາ.+
4 ຈາກນັ້ນ ພະເຢໂຫວາກໍເວົ້າກັບໂມເຊວ່າ: “ນີ້ແມ່ນແຜ່ນດິນທີ່ເຮົາສັນຍາກັບອັບຣາຮາມ ອີຊາກ ແລະຢາໂຄບວ່າ ‘ເຮົາຈະເອົາໃຫ້ລູກຫຼານຂອງເຈົ້າ.’+ ເຮົາຈະໃຫ້ເຈົ້າເບິ່ງຊື່ໆ ແຕ່ເຈົ້າຈະບໍ່ໄດ້ໄປພຸ້ນ.”+
5 ຫຼັງຈາກນັ້ນ ໂມເຊຜູ້ຮັບໃຊ້ຂອງພະເຢໂຫວາກໍໄດ້ຕາຍຢູ່ຫັ້ນໃນແຜ່ນດິນໂມອາບ ຕາມທີ່ພະເຢໂຫວາບອກໄວ້.+
6 ເພິ່ນໄດ້ຝັງລາວຢູ່ຮ່ອມພູໃນແຜ່ນດິນໂມອາບກົງກັນຂ້າມກັບເບັດເປໂອ ແລະຈົນຮອດດຽວນີ້ກໍບໍ່ມີໃຜຮູ້ວ່າບ່ອນຝັງສົບຂອງລາວຢູ່ໃສ.+
7 ໂມເຊຕາຍຕອນອາຍຸ 120 ປີ.+ ຕອນນັ້ນຕາຂອງລາວກໍຍັງດີ ແລະລາວກໍຍັງມີເຫື່ອມີແຮງຢູ່.
8 ພວກອິດສະຣາເອນຮ້ອງໄຫ້ໂສກເສົ້າຍ້ອນໂມເຊເປັນເວລາ 30 ມື້+ ຢູ່ບ່ອນກັນດານໂມອາບ. ແລ້ວເວລາຂອງການຮ້ອງໄຫ້ໄວ້ທຸກກໍຈົບລົງ.
9 ໂຢຊວຍລູກຊາຍຂອງນູນໄດ້ຮັບສະຕິປັນຍາຫຼາຍຈາກພະເຈົ້າ* ຍ້ອນໂມເຊໄດ້ວາງມືເທິງລາວແລະແຕ່ງຕັ້ງລາວ.+ ພວກອິດສະຣາເອນກໍເຊື່ອຟັງລາວ ແລະໄດ້ເຮັດຕາມທີ່ພະເຢໂຫວາເຄີຍສັ່ງໂມເຊໄວ້.+
10 ຫຼັງຈາກທີ່ໂມເຊຕາຍແລ້ວ ໃນອິດສະຣາເອນກໍບໍ່ມີຜູ້ພະຍາກອນຄົນໃດຄືກັບລາວອີກເລີຍ.+ ລາວເປັນຜູ້ທີ່ພະເຢໂຫວາໄດ້ເວົ້ານຳແບບ 2 ຄົນລົມກັນເຊິ່ງໜ້າ.+
11 ພະເຢໂຫວາໄດ້ໃຊ້ລາວໃຫ້ເຮັດການອັດສະຈັນ ແລະສະແດງລິດເດດທີ່ຍິ່ງໃຫຍ່ຂອງເພິ່ນຢູ່ແຜ່ນດິນເອຢິບເພື່ອຈັດການຟາໂຣ* ພວກຜູ້ຮັບໃຊ້ຂອງລາວ ແລະແຜ່ນດິນຂອງລາວ.+
12 ໂມເຊຍັງໄດ້ເຮັດໃຫ້ພວກອິດສະຣາເອນທຸກຄົນເຫັນລິດເດດແລະຄວາມຍິ່ງໃຫຍ່ຂອງເພິ່ນ.+
ຂໍ
^ ໝາຍເຖິງທະເລໃຫຍ່ ຫຼືທະເລເມດີແຕຣາເນ
^ ຫຼື “ທາງທິດໃຕ້.” ໝາຍເຖິງທາງໃຕ້ຂອງແຜ່ນດິນທີ່ພະເຈົ້າສັນຍາ.
^ ຫຼື “ສະຕິປັນຍາໂດຍທາງພະລັງຂອງພະເຈົ້າ”
^ ນີ້ແມ່ນຕຳແໜ່ງກະສັດຂອງເອຢິບ
