ລະບຽບພວກເລວີ 1:1-17
-
ເຄື່ອງບູຊາເຜົາ (1-17)
1 ພະເຢໂຫວາເອີ້ນໂມເຊມາ ແລະເວົ້າກັບລາວຈາກເຕັ້ນສັກສິດ*+ວ່າ:
2 “ໃຫ້ເວົ້າກັບພວກອິດສະຣາເອນແລະບອກເຂົາເຈົ້າວ່າ ‘ຖ້າຜູ້ໃດຢາກເອົາສັດມາເປັນເຄື່ອງບູຊາໃຫ້ພະເຢໂຫວາ ໃຫ້ເອົາຈາກຝູງງົວ ຝູງແກະ ຫຼືຝູງແບ້.+
3 ຖ້າຜູ້ໃດຈະເອົາງົວມາເປັນເຄື່ອງບູຊາເຜົາ ງົວນັ້ນຕ້ອງເປັນໂຕຜູ້ທີ່ຕຸ້ຍພີດີງາມ.+ ລາວຕ້ອງເອົາມາໃຫ້ຕໍ່ໜ້າພະເຢໂຫວາດ້ວຍຄວາມເຕັມໃຈ+ ຢູ່ທາງເຂົ້າເຕັ້ນສັກສິດ.
4 ໃຫ້ລາວເອົາມືວາງເທິງຫົວຂອງສັດທີ່ຈະໃຊ້ເປັນເຄື່ອງບູຊາເຜົາ ແລ້ວພະເຈົ້າກໍຈະຍອມຮັບເຄື່ອງບູຊານັ້ນ ແລະລາວຈະໄດ້ຮັບການຍົກໂທດ.
5 ຈາກນັ້ນ ໃຫ້ເອົາງົວໂຕນັ້ນມາຂ້າຕໍ່ໜ້າພະເຢໂຫວາ. ພວກລູກຊາຍຂອງອາໂຣນທີ່ເປັນປະໂລຫິດ+ຈະເອົາເລືອດມາຕໍ່ໜ້າພະເຈົ້າ ແລະຊິດໃສ່ແຕ່ລະຂ້າງຂອງແທ່ນບູຊາ+ ເຊິ່ງຢູ່ຕໍ່ໜ້າທາງເຂົ້າເຕັ້ນສັກສິດ.
6 ໃຫ້ລອກໜັງສັດທີ່ຈະໃຊ້ເປັນເຄື່ອງບູຊາເຜົາ ແລະຕັດເປັນຕ່ອນໆ.+
7 ໃຫ້ພວກລູກຊາຍຂອງອາໂຣນທີ່ເປັນປະໂລຫິດເອົາຖ່ານໄຟມາໃສ່ເທິງແທ່ນ+ ແລະເອົາຟືນມາລຽນຢອງເທິງຖ່ານນັ້ນ.
8 ພວກລູກຊາຍຂອງອາໂຣນທີ່ເປັນປະໂລຫິດຈະເອົາຕ່ອນທີ່ຕັດແລ້ວ ຫົວຂອງສັດໂຕນັ້ນ ແລະນ້ຳມັນທີ່ຕິດຢູ່ໝາກໄຂ່ຫຼັງມາລຽນໄວ້+ຢູ່ເທິງຟືນທີ່ໄໝ້ຢູ່ເທິງແທ່ນບູຊາ.
9 ໃຫ້ເອົານ້ຳລ້າງໄສ້ກັບຂາ*ຂອງມັນ ແລ້ວປະໂລຫິດຈະເອົາສ່ວນຕ່າງໆໄປເຜົາເທິງແທ່ນບູຊາ*ເພື່ອເປັນເຄື່ອງບູຊາເຜົາ. ນີ້ແມ່ນເຄື່ອງບູຊາດ້ວຍໄຟທີ່ມີກິ່ນຫອມທີ່ເຮັດໃຫ້ພະເຢໂຫວາພໍໃຈ.*+
10 ຖ້າຜູ້ໃດຈະເອົາແກະຫຼືແບ້ມາເປັນເຄື່ອງບູຊາເຜົາ+ ແກະຫຼືແບ້ນັ້ນຕ້ອງເປັນໂຕຜູ້ທີ່ຕຸ້ຍພີດີງາມ.+
11 ໃຫ້ຂ້າແກະຫຼືແບ້ຢູ່ທາງທິດເໜືອຂອງແທ່ນບູຊາຕໍ່ໜ້າພະເຢໂຫວາ ແລະພວກລູກຊາຍຂອງອາໂຣນທີ່ເປັນປະໂລຫິດຈະເອົາເລືອດຂອງສັດນັ້ນໄປຊິດໃສ່ແຕ່ລະຂ້າງຂອງແທ່ນບູຊາ.+
12 ປະໂລຫິດຈະຕັດສັດໂຕນັ້ນເປັນຕ່ອນໆ ແລ້ວລາວຈະເອົາຕ່ອນເຫຼົ່ານັ້ນກັບຫົວ ແລະນ້ຳມັນທີ່ຕິດຢູ່ໝາກໄຂ່ຫຼັງໄປລຽນໄວ້ຢູ່ເທິງຟືນທີ່ໄໝ້ຢູ່ເທິງແທ່ນບູຊາ.
13 ລາວຈະເອົານ້ຳລ້າງໄສ້ກັບຂາຂອງມັນ ແລ້ວປະໂລຫິດຈະເອົາສ່ວນຕ່າງໆໄປເຜົາເທິງແທ່ນບູຊາເພື່ອເປັນເຄື່ອງບູຊາເຜົາ. ນີ້ແມ່ນເຄື່ອງບູຊາດ້ວຍໄຟທີ່ມີກິ່ນຫອມທີ່ເຮັດໃຫ້ພະເຢໂຫວາພໍໃຈ.
14 ແຕ່ຖ້າຜູ້ໃດຈະເອົານົກມາເປັນເຄື່ອງບູຊາເຜົາໃຫ້ພະເຢໂຫວາ ໃຫ້ລາວເອົານົກເຂົາຫຼືນົກກາງແກມາກະໄດ້.+
15 ປະໂລຫິດຈະເອົານົກໂຕນັ້ນມາວາງຢູ່ແທ່ນບູຊາ ປາດຄໍມັນ ແລະເຜົາເປັນເຄື່ອງບູຊາ. ແຕ່ກ່ອນຈະເຜົາຕ້ອງໃຫ້ເລືອດຂອງມັນໄຫຼລົງທາງຂ້າງແທ່ນບູຊາຈົນໝົດ.
16 ລາວຕ້ອງເອົາໜຽງອອກແລະຫຼົກຂົນຂອງມັນ ແລ້ວຖິ້ມລົງໃສ່ບ່ອນທີ່ມີຂີ້ເທົ່າ*+ທີ່ຢູ່ທາງຂ້າງທາງທິດຕາເວັນອອກຂອງແທ່ນບູຊາ.
17 ລາວຈະຈີກເອິກນົກຢູ່ໃກ້ປີກຂອງມັນ ແຕ່ບໍ່ໃຫ້ຂາດອອກຈາກກັນເປັນ 2 ຕ່ອນ ແລ້ວປະໂລຫິດຈະເອົານົກໂຕນັ້ນໄປເຜົາເທິງແທ່ນບູຊາໂດຍວາງໄວ້ຢູ່ເທິງຟືນທີ່ໄໝ້ຢູ່ເທິງແທ່ນນັ້ນ. ນີ້ແມ່ນເຄື່ອງບູຊາດ້ວຍໄຟທີ່ມີກິ່ນຫອມທີ່ເຮັດໃຫ້ພະເຢໂຫວາພໍໃຈ.’”
ຂໍ
^ ຫຼື “ເຕັ້ນຂໍການຊີ້ນຳ.” ເບິ່ງສ່ວນອະທິບາຍຄຳສັບ.
^ ໝາຍເຖິງຕັ້ງແຕ່ຫົວເຂົ່າໄປຈົນຮອດຂໍ້ຕີນ
^ ແປຕາມໂຕວ່າ “ໄປເຜົາໃຫ້ມີຄວັນເທິງແທ່ນບູຊາ”
^ ແປຕາມໂຕວ່າ “ຜ່ອນຄາຍ”
^ ໝາຍເຖິງຂີ້ເທົ່າທີ່ປົນກັບນ້ຳມັນສັດທີ່ເຜົາເປັນເຄື່ອງບູຊາ
