ລະບຽບພວກເລວີ 18:1-30
18 ພະເຢໂຫວາເວົ້າກັບໂມເຊອີກວ່າ:
2 “ໃຫ້ບອກພວກອິດສະຣາເອນວ່າ ‘ເຮົາແມ່ນເຢໂຫວາພະເຈົ້າຂອງພວກເຈົ້າ.+
3 ຫ້າມພວກເຈົ້າເຮັດຕາມສິ່ງທີ່ຄົນເອຢິບເຮັດໃນແຜ່ນດິນທີ່ພວກເຈົ້າເຄີຍຢູ່ ແລະຫ້າມພວກເຈົ້າເຮັດຕາມສິ່ງທີ່ຄົນການາອານເຮັດໃນແຜ່ນດິນທີ່ເຮົາຈະໃຫ້ພວກເຈົ້າໄປຢູ່.+ ຫ້າມພວກເຈົ້າເຮັດຕາມທຳນຽມຂອງຄົນເຫຼົ່ານັ້ນ.
4 ພວກເຈົ້າຕ້ອງເຊື່ອຟັງຄຳສັ່ງຂອງເຮົາ ແລະໃຊ້ຊີວິດຕາມກົດໝາຍຂອງເຮົາ.+ ເຮົາແມ່ນເຢໂຫວາພະເຈົ້າຂອງພວກເຈົ້າ.
5 ພວກເຈົ້າຕ້ອງເຮັດຕາມກົດໝາຍແລະຄຳສັ່ງຂອງເຮົາ. ທຸກຄົນທີ່ເຮັດແນວນີ້ຈະມີຊີວິດຢູ່ຕໍ່ໄປ.+ ເຮົາແມ່ນເຢໂຫວາ.
6 ຫ້າມຜູ້ໃດມີເພດສຳພັນ*+ກັບພີ່ນ້ອງໃກ້ຊິດ. ເຮົາແມ່ນເຢໂຫວາ.
7 ຫ້າມມີເພດສຳພັນກັບພໍ່ຂອງເຈົ້າ ແລະຫ້າມມີເພດສຳພັນກັບແມ່ຂອງເຈົ້າ. ລາວເປັນແມ່ຂອງເຈົ້າ. ຫ້າມເຈົ້າມີເພດສຳພັນກັບລາວ.
8 ຫ້າມມີເພດສຳພັນກັບເມຍຂອງພໍ່ເຈົ້າ.+ ການເຮັດແນວນີ້ຈະເຮັດໃຫ້ພໍ່ຂອງເຈົ້າອັບອາຍ.*
9 ຫ້າມມີເພດສຳພັນກັບເອື້ອຍນ້ອງຂອງເຈົ້າ ບໍ່ວ່າຈະເປັນລູກສາວຂອງພໍ່ເຈົ້າ ຫຼືລູກສາວຂອງແມ່ເຈົ້າ. ບໍ່ວ່າລາວຈະເກີດໃນຄອບຄົວດຽວກັນກັບເຈົ້າ ຫຼືເກີດຈາກຄອບຄົວອື່ນກໍຕາມ.+
10 ຫ້າມມີເພດສຳພັນກັບລູກສາວຂອງລູກຊາຍເຈົ້າ ຫຼືລູກສາວຂອງລູກສາວເຈົ້າ ເພາະເຈົ້າຈະເສຍກຽດ.*
11 ຫ້າມມີເພດສຳພັນກັບລູກສາວຂອງເມຍພໍ່ເຈົ້າ ຫຼືລູກສາວຂອງພໍ່ເຈົ້າ ເພາະລາວເປັນເອື້ອຍນ້ອງຂອງເຈົ້າ.
12 ຫ້າມມີເພດສຳພັນກັບເອື້ອຍນ້ອງຂອງພໍ່ເຈົ້າ ເພາະລາວເປັນສາຍເລືອດດຽວກັນກັບພໍ່ເຈົ້າ.+
13 ຫ້າມມີເພດສຳພັນກັບເອື້ອຍນ້ອງຂອງແມ່ເຈົ້າ ເພາະລາວເປັນສາຍເລືອດດຽວກັນກັບແມ່ເຈົ້າ.
14 ຫ້າມເຮັດໃຫ້ອ້າຍນ້ອງຂອງພໍ່ເຈົ້າອັບອາຍ* ໂດຍການມີເພດສຳພັນກັບເມຍຂອງລາວ ເພາະເມຍຂອງລາວເປັນປ້າຫຼືອາຂອງເຈົ້າ.+
15 ຫ້າມມີເພດສຳພັນກັບລູກໃພ້ຂອງເຈົ້າ+ ເພາະລາວເປັນເມຍຂອງລູກຊາຍເຈົ້າ. ຫ້າມເຈົ້າມີເພດສຳພັນກັບລາວ.
16 ຫ້າມມີເພດສຳພັນກັບເມຍຂອງອ້າຍນ້ອງເຈົ້າ+ ເພາະການເຮັດແນວນີ້ຈະເຮັດໃຫ້ອ້າຍນ້ອງຂອງເຈົ້າອັບອາຍ.*
17 ຖ້າເຈົ້າມີເພດສຳພັນກັບຜູ້ຍິງຄົນໃດຄົນໜຶ່ງ ຫ້າມເຈົ້າມີເພດສຳພັນກັບລູກສາວຂອງລາວ+ ແລະຫ້າມເຈົ້າມີເພດສຳພັນກັບລູກສາວຂອງລູກຊາຍ ຫຼືລູກສາວຂອງລູກສາວຂອງຜູ້ຍິງຄົນນັ້ນ. ເຂົາເຈົ້າເປັນພີ່ນ້ອງໃກ້ຊິດຂອງຜູ້ຍິງຄົນນັ້ນ. ການເຮັດແນວນີ້ເປັນຕາໜ້າລັງກຽດ.*
18 ຫ້າມເອົາເອື້ອຍນ້ອງຂອງເມຍເຈົ້າມາເປັນເມຍຜູ້ທີ 2+ ແລະຕອນທີ່ເມຍຂອງເຈົ້າຍັງມີຊີວິດຢູ່ ຫ້າມເຈົ້າມີເພດສຳພັນກັບເອື້ອຍນ້ອງຂອງລາວ.
19 ຫ້າມມີເພດສຳພັນກັບຜູ້ຍິງໃນໄລຍະທີ່ຖືວ່າລາວບໍ່ສະອາດຍ້ອນເປັນປະຈຳເດືອນ.+
20 ຫ້າມມີເພດສຳພັນກັບເມຍຂອງເພື່ອນບ້ານເຈົ້າ ເພາະການເຮັດແນວນີ້ຈະເຮັດໃຫ້ເຈົ້າບໍ່ສະອາດ.+
21 ຫ້າມເຜົາລູກຫຼານຂອງເຈົ້າເພື່ອບູຊາພະໂມເລັກ+ ເພາະການເຮັດແນວນີ້ຈະເຮັດໃຫ້ຊື່ພະເຈົ້າຂອງເຈົ້າຖືກດູໝິ່ນ.+ ເຮົາແມ່ນເຢໂຫວາ.
22 ຫ້າມຜູ້ຊາຍກັບຜູ້ຊາຍມີເພດສຳພັນກັນ.+ ການເຮັດແນວນີ້ເປັນຕາໜ້າລັງກຽດ.
23 ຫ້າມຜູ້ຊາຍມີເພດສຳພັນກັບສັດ ເພາະການເຮັດແນວນີ້ຈະເຮັດໃຫ້ລາວບໍ່ສະອາດ ແລະຜູ້ຍິງກໍຫ້າມມີເພດສຳພັນກັບສັດຄືກັນ.+ ການເຮັດແນວນີ້ເປັນເລື່ອງຜິດທຳມະຊາດ.
24 ຢ່າເຮັດໃຫ້ໂຕພວກເຈົ້າບໍ່ສະອາດຍ້ອນສິ່ງເຫຼົ່ານີ້. ຄົນຊາດອື່ນໆທີ່ເຮົາຈະຂັບໄລ່ໄປຈາກແຜ່ນດິນຂອງພວກເຈົ້າໄດ້ເຮັດສິ່ງເຫຼົ່ານີ້ ແລະເຮັດໃຫ້ໂຕຂອງເຂົາເຈົ້າບໍ່ສະອາດ.+
25 ຍ້ອນແນວນີ້ ແຜ່ນດິນຈຶ່ງບໍ່ສະອາດ. ເຮົາຈະລົງໂທດແຜ່ນດິນຍ້ອນຄວາມຜິດນີ້ ແລະຄົນທີ່ຢູ່ຫັ້ນຈະຖືກຂັບໄລ່ອອກຈາກແຜ່ນດິນ.+
26 ແຕ່ພວກເຈົ້າຕ້ອງເຮັດຕາມກົດໝາຍແລະຄຳສັ່ງຂອງເຮົາ+ ບໍ່ວ່າຈະເປັນຄົນອິດສະຣາເອນ ຫຼືຄົນຕ່າງຊາດທີ່ຢູ່ນຳພວກເຈົ້າ+ກໍຫ້າມເຮັດສິ່ງທີ່ເປັນຕາໜ້າລັງກຽດເຫຼົ່ານີ້.
27 ຄົນທີ່ຢູ່ໃນແຜ່ນດິນນັ້ນກ່ອນພວກເຈົ້າ+ໄດ້ເຮັດສິ່ງທີ່ເປັນຕາໜ້າລັງກຽດເຫຼົ່ານີ້ ແລະຕອນນີ້ແຜ່ນດິນກໍບໍ່ສະອາດ.
28 ຖ້າພວກເຈົ້າບໍ່ໄດ້ເຮັດໃຫ້ແຜ່ນດິນບໍ່ສະອາດ ແຜ່ນດິນກໍຈະບໍ່ຂັບໄລ່ພວກເຈົ້າອອກໄປຄືກັບທີ່ຂັບໄລ່ຄົນຊາດຕ່າງໆທີ່ຢູ່ກ່ອນພວກເຈົ້າ.
29 ທຸກຄົນທີ່ເຮັດສິ່ງທີ່ເປັນຕາໜ້າລັງກຽດເຫຼົ່ານີ້ຈະຕ້ອງຕາຍ.
30 ພວກເຈົ້າຈະຕ້ອງເຊື່ອຟັງເຮົາ ແລະບໍ່ເຮັດຕາມທຳນຽມທີ່ເປັນຕາໜ້າລັງກຽດເຫຼົ່ານີ້ ເຊິ່ງຄົນຊາດຕ່າງໆທີ່ຢູ່ກ່ອນພວກເຈົ້າໄດ້ເຮັດ.+ ຢ່າເຮັດໃຫ້ໂຕພວກເຈົ້າບໍ່ສະອາດຍ້ອນສິ່ງເຫຼົ່ານີ້. ເຮົາແມ່ນເຢໂຫວາພະເຈົ້າຂອງພວກເຈົ້າ.’”
ຂໍ ຄວາມ ໄຂ ເງື່ອນ
^ ແປຕາມໂຕວ່າ “ເຮັດໂຕປະເປືອຍ”
^ ແປຕາມໂຕວ່າ “ນີ້ແມ່ນຄວາມປະເປືອຍຂອງພໍ່ເຈົ້າ”
^ ແປຕາມໂຕວ່າ “ເພາະເຂົາເຈົ້າແມ່ນຄວາມປະເປືອຍຂອງເຈົ້າເອງ”
^ ແປຕາມໂຕວ່າ “ເຮັດໃຫ້ອ້າຍນ້ອງຂອງພໍ່ເຈົ້າປະເປືອຍ”
^ ແປຕາມໂຕວ່າ “ນີ້ແມ່ນຄວາມປະເປືອຍຂອງອ້າຍນ້ອງເຈົ້າ”
^ ຫຼື “ເປັນຕາໜ້າອາຍ”