ລະບຽບພວກເລວີ 19:1-37
19 ພະເຢໂຫວາເວົ້າກັບໂມເຊຕື່ມອີກວ່າ:
2 “ໃຫ້ບອກພວກອິດສະຣາເອນທັງໝົດວ່າ ‘ເຈົ້າຕ້ອງເປັນຄົນບໍລິສຸດ ເພາະເຮົາເຢໂຫວາພະເຈົ້າຂອງເຈົ້າເປັນພະເຈົ້າທີ່ບໍລິສຸດ.+
3 ໃຫ້ນັບຖື*ພໍ່ແມ່ຂອງເຈົ້າ+ ແລະໃຫ້ຖືວັນຊະບາໂຕ*ຂອງເຮົາ.+ ເຮົາແມ່ນເຢໂຫວາພະເຈົ້າຂອງເຈົ້າ.
4 ຢ່າໄປນະມັດສະການພະເຈົ້າອື່ນໆທີ່ບໍ່ມີຄ່າ+ ຫຼືຢ່າຫຼໍ່ຮູບພະຕ່າງໆເພື່ອຂາບໄຫວ້.+ ເຮົາແມ່ນເຢໂຫວາພະເຈົ້າຂອງເຈົ້າ.
5 ຖ້າເຈົ້າເອົາເຄື່ອງບູຊາສ້າງຄວາມສະຫງົບສຸກມາໃຫ້ພະເຢໂຫວາ+ ເຈົ້າຕ້ອງເຮັດໃນແບບທີ່ເພິ່ນຈະຍອມຮັບ.+
6 ເຈົ້າກິນຊີ້ນຈາກເຄື່ອງບູຊາໃນມື້ນັ້ນແລະມື້ຕໍ່ໄປໄດ້ ແຕ່ຊີ້ນທີ່ເຫຼືອຈົນຮອດມື້ທີ 3 ໃຫ້ເອົາໄປເຜົາຖິ້ມ.+
7 ຖ້າມີຄົນກິນຊີ້ນທີ່ເຫຼືອຈົນຮອດມື້ທີ 3 ເຄື່ອງບູຊານັ້ນກໍຈະໃຊ້ບໍ່ໄດ້ ເພາະພະເຈົ້າຈະບໍ່ຍອມຮັບຊີ້ນນັ້ນ.
8 ຄົນທີ່ກິນຊີ້ນນັ້ນຈະຖືກລົງໂທດຍ້ອນລາວບໍ່ໄດ້ນັບຖືສິ່ງບໍລິສຸດຂອງພະເຢໂຫວາ ແລະລາວຈະຕ້ອງຕາຍ.
9 ເມື່ອກ່ຽວເຂົ້າໃນນາຂອງເຈົ້າ ຢ່າກ່ຽວເຂົ້າຢູ່ແຄມຄັນນາຈົນໝົດ ແລະຮວງເຂົ້າທີ່ເຮ່ຍຢູ່ໃນນາກໍໃຫ້ປະໄວ້.+
10 ຢ່າຕັດເອົາໝາກລະແຊັງຢູ່ສວນຂອງເຈົ້າຈົນໝົດ ຫຼືຢ່າເກັບເອົາໝາກລະແຊັງທີ່ເຮ່ຍໃນສວນຂອງເຈົ້າ. ເຈົ້າຕ້ອງຈົ່ງໄວ້ໃຫ້ຄົນທຸກຍາກ+ແລະຄົນຕ່າງຊາດທີ່ຢູ່ນຳເຈົ້າ. ເຮົາແມ່ນເຢໂຫວາພະເຈົ້າຂອງເຈົ້າ.
11 ຫ້າມລັກ+ ຫ້າມລໍ້ລວງ+ ແລະຫ້າມຕົວະຄົນອື່ນ.
12 ຫ້າມສາບານຕົວະໂດຍໃຊ້ຊື່ຂອງເຮົາ+ ເພາະການເຮັດແນວນີ້ຈະເຮັດໃຫ້ຊື່ພະເຈົ້າຂອງເຈົ້າຖືກດູໝິ່ນ. ເຮົາແມ່ນເຢໂຫວາ.
13 ຫ້າມສໍ້ໂກງ+ ແລະຫ້າມປຸ້ນເອົາເຄື່ອງຂອງຂອງເພື່ອນບ້ານ.+ ຖ້າເຈົ້າຈ້າງຄົນມາເຮັດວຽກ ເຈົ້າຕ້ອງຈ່າຍຄ່າຈ້າງໃຫ້ລາວໃນມື້ນັ້ນເລີຍ ຫ້າມເລື່ອນໄປຈົນຮອດເຊົ້າມື້ຕໍ່ໄປ.+
14 ຫ້າມປ້ອຍດ່າຄົນຫູໜວກ ຫຼືເອົາເຄື່ອງຂອງໄປຂວາງທາງຄົນຕາບອດ.+ ເຈົ້າຕ້ອງຢ້ານຢຳພະເຈົ້າຂອງເຈົ້າ.+ ເຮົາແມ່ນເຢໂຫວາ.
15 ຕອນທີ່ຕັດສິນຄະດີ ຢ່າຕັດສິນແບບບໍ່ຍຸຕິທຳ. ຢ່າອີ່ຕົນຄົນທຸກແລະເຂົ້າຂ້າງລາວ ຫຼືຢ່າມັກຄົນລວຍແລະເຂົ້າຂ້າງລາວ.+ ເຈົ້າຕ້ອງຕັດສິນເລື່ອງຂອງເພື່ອນບ້ານຢ່າງຍຸຕິທຳ.
16 ຫ້າມທຽວໄປບ່ອນນັ້ນບ່ອນນີ້ເພື່ອແພ່ຄຳໃສ່ຮ້າຍ.+ ຫ້າມເຮັດສິ່ງທີ່ຈະເຮັດໃຫ້ຊີວິດ*ຂອງຄົນອື່ນເປັນອັນຕະລາຍ.*+ ເຮົາແມ່ນເຢໂຫວາ.
17 ຢ່າກຽດຊັງອ້າຍເອື້ອຍນ້ອງໃນໃຈຂອງເຈົ້າ.+ ຢ່າລັງເລທີ່ຈະຕັກເຕືອນເພື່ອນບ້ານຂອງເຈົ້າ+ ເພື່ອເຈົ້າຈະບໍ່ມີຄວາມຜິດນຳກັນກັບລາວ.
18 ຢ່າແກ້ແຄ້ນ+ຫຼືຄຽດແຄ້ນເພື່ອນບ້ານຂອງເຈົ້າ. ເຈົ້າຕ້ອງຮັກເພື່ອນບ້ານຄືກັບຮັກໂຕເອງ.+ ເຮົາແມ່ນເຢໂຫວາ.
19 ເຈົ້າຕ້ອງເຮັດຕາມກົດໝາຍຕໍ່ໄປນີ້ຂອງເຮົາ. ຫ້າມເອົາສັດ 2 ຊະນິດມາປະສົມພັນກັນ. ຫ້າມຫວ່ານແນວປູກ 2 ຊະນິດປົນກັນໃນນາຂອງເຈົ້າ.+ ຫ້າມນຸ່ງເຄື່ອງທີ່ເຮັດຈາກດ້າຍ 2 ຊະນິດທີ່ຝັ້ນເຂົ້າກັນ.+
20 ຖ້າຜູ້ຊາຍຄົນໃດມີເພດສຳພັນກັບຜູ້ຍິງຄົນໜຶ່ງ ແຕ່ຜູ້ຍິງຄົນນັ້ນເປັນຄົນຮັບໃຊ້ ແລະເຈົ້ານາຍຂອງລາວສັນຍາກັບລາວໄວ້ແລ້ວວ່າຈະໃຫ້ແຕ່ງດອງກັບຜູ້ຊາຍອີກຄົນໜຶ່ງ ຖ້າຜູ້ຍິງຄົນນັ້ນຍັງບໍ່ມີໃຜມາໄຖ່ຫຼືຍັງບໍ່ມີອິດສະຫຼະເທື່ອ ເຂົາເຈົ້າຈະຖືກລົງໂທດ ແຕ່ບໍ່ເຖິງຕາຍຍ້ອນຜູ້ຍິງຄົນນັ້ນຍັງບໍ່ມີອິດສະຫຼະເທື່ອ.
21 ຜູ້ຊາຍຄົນນັ້ນຕ້ອງເອົາແກະໂຕຜູ້ໂຕໜຶ່ງມາໃຫ້ພະເຢໂຫວາຢູ່ທາງເຂົ້າເຕັ້ນສັກສິດ* ເພື່ອເປັນເຄື່ອງບູຊາໄຖ່ຄວາມຜິດຂອງໂຕເອງ.+
22 ປະໂລຫິດຈະເອົາແກະໂຕຜູ້ທີ່ເປັນເຄື່ອງບູຊາໄຖ່ຄວາມຜິດມາຕໍ່ໜ້າພະເຢໂຫວາ ເພື່ອໄຖ່ຄວາມຜິດໃຫ້ຜູ້ຊາຍຄົນນັ້ນ ແລະລາວຈະໄດ້ຮັບການຍົກໂທດຈາກຄວາມຜິດທີ່ລາວໄດ້ເຮັດ.
23 ເມື່ອເຈົ້າເຂົ້າໄປໃນແຜ່ນດິນທີ່ເຮົາຈະໃຫ້ເຈົ້າໄປຢູ່ ຖ້າເຈົ້າປູກຕົ້ນໝາກໄມ້ຊະນິດໃດກໍຕາມ ເຈົ້າຕ້ອງຖືວ່າໝາກຂອງມັນບໍ່ສະອາດ ແລະຍັງບໍ່ໄດ້ຮັບອະນຸຍາດໃຫ້ກິນເທື່ອ. ມັນຈະເປັນແບບນັ້ນໄປ 3 ປີ. ຫ້າມເຈົ້າກິນໝາກໄມ້ເຫຼົ່ານັ້ນ.
24 ແຕ່ໃນປີທີ 4 ຈະຖືວ່າໝາກໄມ້ທັງໝົດບໍລິສຸດ. ເຈົ້າເອົາໃຫ້ພະເຢໂຫວາດ້ວຍຄວາມຍິນດີໄດ້.+
25 ຫຼັງຈາກນັ້ນ ໃນປີທີ 5 ເຈົ້າຈະກິນໝາກໄມ້ເຫຼົ່ານັ້ນໄດ້. ໝາກໄມ້ເຫຼົ່ານັ້ນຈະເຮັດໃຫ້ເຈົ້າໄດ້ຮັບຜົນລະປູກຫຼາຍຂຶ້ນອີກ. ເຮົາແມ່ນເຢໂຫວາພະເຈົ້າຂອງເຈົ້າ.
26 ຫ້າມກິນຊີ້ນທຸກຊະນິດທີ່ຍັງມີເລືອດຢູ່.+
ຫ້າມທຳນາຍອະນາຄົດຫຼືໃຊ້ຄາຖາອາຄົມ.+
27 ຫ້າມແຖເຄົາຫຼືຫ້າມຕັດໜວດເຄົາເປັນຮູບຊົງແປກໆ.*+
28 ຫ້າມປາດໂຕເອງເພື່ອໄວ້ທຸກໃຫ້ຄົນຕາຍ+ ແລະຫ້າມສັກລາຍ. ເຮົາແມ່ນເຢໂຫວາ.
29 ຢ່າເຮັດໃຫ້ລູກສາວຂອງເຈົ້າເສຍກຽດໂດຍໃຫ້ລາວເປັນໂສເພນີ.+ ຖ້າເຮັດແນວນັ້ນ ແຜ່ນດິນຂອງພວກເຈົ້າຈະບໍ່ສະອາດຍ້ອນມີໂສເພນີແລະຈະເຕັມແຕ່ແນວຊົ່ວໆ.+
30 ໃຫ້ຖືວັນຊະບາໂຕຂອງເຮົາ+ ແລະໃຫ້ນັບຖືບ່ອນບໍລິສຸດຂອງເຮົາ. ເຮົາແມ່ນເຢໂຫວາ.
31 ຢ່າໄປຫາໝໍຜີ+ ແລະຢ່າໄປປຶກສາໝໍດູ.+ ການເຮັດແນວນີ້ຈະເຮັດໃຫ້ພວກເຈົ້າບໍ່ສະອາດ. ເຮົາແມ່ນເຢໂຫວາພະເຈົ້າຂອງເຈົ້າ.
32 ເຈົ້າຕ້ອງສະແດງຄວາມນັບຖືຄົນຫົວຫງອກ+ ແລະໃຫ້ກຽດຜູ້ເຖົ້າ.+ ເຈົ້າຕ້ອງຢ້ານຢຳພະເຈົ້າຂອງເຈົ້າ.+ ເຮົາແມ່ນເຢໂຫວາ.
33 ຖ້າຄົນຕ່າງຊາດມາຢູ່ໃນແຜ່ນດິນນຳເຈົ້າ ເຈົ້າຕ້ອງເຮັດດີຕໍ່ລາວ.+
34 ໃຫ້ຖືວ່າຄົນຕ່າງຊາດທີ່ຢູ່ນຳເຈົ້າເປັນຄືກັບຄົນອິດສະຣາເອນຄົນໜຶ່ງ.+ ເຈົ້າຕ້ອງຮັກລາວຄືກັບຮັກໂຕເອງ ເພາະເຈົ້າກໍເຄີຍເປັນຄົນຕ່າງຊາດທີ່ອາໄສຢູ່ແຜ່ນດິນເອຢິບ.+ ເຮົາແມ່ນເຢໂຫວາພະເຈົ້າຂອງເຈົ້າ.
35 ເມື່ອແທກລວງກວ້າງລວງຍາວ ຊັ່ງນ້ຳໜັກ ຫຼືຜອງປະລິມານ ເຈົ້າຕ້ອງໃຊ້ແນວແທກ ແນວຊັ່ງ ແລະແນວຜອງທີ່ຖືກຕ້ອງຕາມມາດຕະຖານ.+
36 ເຈົ້າຕ້ອງໃຊ້ຊິງຫຼືແນວຜອງທີ່ຖືກຕ້ອງຕາມມາດຕະຖານສຳລັບເຄື່ອງທີ່ເປັນແນວແຫ້ງ*ແລະແນວທີ່ເປັນນ້ຳ.*+ ເຮົາແມ່ນເຢໂຫວາພະເຈົ້າຂອງເຈົ້າຜູ້ພາເຈົ້າອອກມາຈາກແຜ່ນດິນເອຢິບ.
37 ເຈົ້າຕ້ອງເຊື່ອຟັງ ແລະເຮັດຕາມກົດໝາຍກັບຄຳສັ່ງທັງໝົດຂອງເຮົາ.+ ເຮົາແມ່ນເຢໂຫວາ.’”
ຂໍ
^ ແປຕາມໂຕວ່າ “ຢ້ານຢຳ”
^ ເບິ່ງສ່ວນອະທິບາຍຄຳສັບ
^ ແປຕາມໂຕວ່າ “ເລືອດ”
^ ຫຼືອາດແປວ່າ “ຖ້າຊີວິດຂອງຄົນອື່ນຕົກຢູ່ໃນອັນຕະລາຍ ຢ່າຢູ່ຊື່ໆ”
^ ຫຼື “ເຕັ້ນຂໍການຊີ້ນຳ.” ເບິ່ງສ່ວນອະທິບາຍຄຳສັບ.
^ ໝາຍເຖິງການຕັດໜວດເຄົາຕາມພິທີກຳທາງສາສະໜາອື່ນ ແຕ່ບໍ່ໄດ້ໝາຍເຖິງການແຕ່ງຫຼືແຖໜວດເຄົາຕາມທຳມະດາ
^ ແປຕາມໂຕວ່າ “ເອຟາທີ່ຖືກຕ້ອງ.” ເບິ່ງພາກຜະໜວກ ຂ14.
^ ແປຕາມໂຕວ່າ “ຮິນທີ່ຖືກຕ້ອງ.” ເບິ່ງພາກຜະໜວກ ຂ14.
