ລະບຽບພວກເລວີ 21:1-24
21 ພະເຢໂຫວາເວົ້າກັບໂມເຊອີກວ່າ: “ໃຫ້ບອກພວກລູກຊາຍຂອງອາໂຣນທີ່ເປັນປະໂລຫິດວ່າ ‘ຢ່າເຮັດໃຫ້ໂຕເອງບໍ່ສະອາດ*ຍ້ອນຄົນຂອງລາວທີ່ຕາຍໄປ.+
2 ແຕ່ລາວຈະເຮັດແນວນັ້ນໄດ້ສຳລັບພີ່ນ້ອງໃກ້ຊິດທີ່ເປັນສາຍເລືອດດຽວກັນຄື: ພໍ່ ແມ່ ລູກຊາຍ ລູກສາວ ອ້າຍ ແລະນ້ອງ.
3 ລາວຈະເຮັດໃຫ້ໂຕເອງບໍ່ສະອາດຍ້ອນເອື້ອຍຫຼືນ້ອງຂອງລາວໄດ້ ຖ້າເອື້ອຍຫຼືນ້ອງຍັງເປັນສາວບໍລິສຸດທີ່ອາໄສຢູ່ນຳລາວແລະຍັງບໍ່ໄດ້ແຕ່ງດອງເທື່ອ.
4 ແຕ່ຢ່າໃຫ້ລາວເຮັດໃຫ້ໂຕເອງບໍ່ສະອາດແລະບໍ່ບໍລິສຸດ ຍ້ອນສົບຂອງເອື້ອຍຫຼືນ້ອງທີ່ມີຜົວແລ້ວໃນພວກຄົນຂອງລາວ.
5 ຢ່າໃຫ້ເຂົາເຈົ້າແຖຫົວ+ ແຖໜວດເຄົາ ຫຼືປາດໂຕເອງ.+
6 ເຂົາເຈົ້າຕ້ອງເປັນຄົນບໍລິສຸດສຳລັບພະເຈົ້າ+ ແລະເຂົາເຈົ້າຕ້ອງບໍ່ເຮັດໃຫ້ຊື່ຂອງພະເຈົ້າຖືກດູໝິ່ນ+ ເພາະເຂົາເຈົ້າເປັນຄົນເອົາເຄື່ອງບູຊາດ້ວຍໄຟໃຫ້ພະເຢໂຫວາ ແລະເອົາເຄື່ອງບູຊາທີ່ເປັນຄືກັບອາຫານໃຫ້ພະເຈົ້າ ເຂົາເຈົ້າຈຶ່ງຕ້ອງເປັນຄົນບໍລິສຸດ.+
7 ຫ້າມເຂົາເຈົ້າແຕ່ງດອງກັບຜູ້ຍິງທີ່ເປັນໂສເພນີ+ ຜູ້ຍິງທີ່ບໍ່ບໍລິສຸດ ຫຼືຜູ້ຍິງທີ່ເປັນແມ່ຮ້າງ+ ເພາະປະໂລຫິດຕ້ອງເປັນຄົນບໍລິສຸດສຳລັບພະເຈົ້າ.
8 ພວກອິດສະຣາເອນຕ້ອງຖືວ່າປະໂລຫິດເປັນຄົນບໍລິສຸດ+ ເພາະເຂົາເຈົ້າເອົາເຄື່ອງບູຊາທີ່ເປັນຄືກັບອາຫານໃຫ້ພະເຈົ້າ. ປະໂລຫິດຕ້ອງເປັນຄົນບໍລິສຸດສຳລັບພວກເຈົ້າ ເພາະເຮົາເຢໂຫວາເປັນພະເຈົ້າທີ່ບໍລິສຸດທີ່ແຍກພວກເຈົ້າໄວ້ຕ່າງຫາກໃຫ້ເປັນຄົນບໍລິສຸດ.+
9 ຖ້າລູກສາວຂອງປະໂລຫິດເຮັດໃຫ້ໂຕເອງເສຍກຽດໂດຍເປັນໂສເພນີ ລາວກໍເຮັດໃຫ້ພໍ່ຂອງໂຕເອງຖືກດູໝິ່ນ. ລາວຈະຕ້ອງຖືກຂ້າແລະເອົາໄປເຜົາ.+
10 ຄົນທີ່ເປັນປະໂລຫິດໃຫຍ່ໃນພວກປະໂລຫິດເຊິ່ງເປັນຜູ້ທີ່ຖືກເທນ້ຳມັນໃສ່ຫົວ+ ແລະຖືກເລືອກ*ໃຫ້ໃສ່ເຄື່ອງນຸ່ງຂອງປະໂລຫິດ+ ຕ້ອງບໍ່ປ່ອຍໃຫ້ຜົມຫຍຸ້ງ ຫຼືຈີກເຄື່ອງນຸ່ງຂອງໂຕເອງ.+
11 ລາວຕ້ອງບໍ່ເຮັດໃຫ້ໂຕເອງບໍ່ສະອາດໂດຍໄປໃກ້ສົບ+ ເຖິງວ່າຈະເປັນສົບຂອງພໍ່ຫຼືແມ່ກໍຕາມ.
12 ລາວບໍ່ຄວນອອກຈາກບ່ອນບໍລິສຸດ ແລະບໍ່ຄວນເຮັດໃຫ້ບ່ອນບໍລິສຸດຂອງພະເຈົ້າຖືກດູໝິ່ນ+ ເພາະນ້ຳມັນທີ່ພະເຈົ້າໃຊ້ແຕ່ງຕັ້ງ+ລາວເຊິ່ງເປັນເຄື່ອງໝາຍຂອງການອຸທິດໂຕຖືກເທໃສ່ຫົວຂອງລາວແລ້ວ. ເຮົາແມ່ນເຢໂຫວາ.
13 ລາວຕ້ອງເອົາຜູ້ຍິງບໍລິສຸດມາເປັນເມຍ.+
14 ຫ້າມລາວແຕ່ງດອງກັບແມ່ໝ້າຍ ແມ່ຮ້າງ ຜູ້ຍິງທີ່ບໍ່ບໍລິສຸດ ຫຼືໂສເພນີ ແຕ່ລາວຕ້ອງເອົາຜູ້ຍິງບໍລິສຸດໃນພວກຄົນຂອງລາວມາເປັນເມຍ.
15 ລາວບໍ່ຄວນເຮັດໃຫ້ລູກຫຼານໃນພວກຄົນຂອງລາວຖືກດູໝິ່ນ+ ເພາະເຮົາແມ່ນເຢໂຫວາຜູ້ທີ່ແຍກລາວໄວ້ຕ່າງຫາກ.’”
16 ພະເຢໂຫວາເວົ້າກັບໂມເຊອີກວ່າ:
17 “ໃຫ້ບອກອາໂຣນວ່າ ‘ຖ້າລູກຫຼານຂອງເຈົ້າຄົນໃດເປັນຄົນພິການ ຫ້າມຜູ້ນັ້ນເອົາເຄື່ອງບູຊາທີ່ເປັນຄືກັບອາຫານໃຫ້ພະເຈົ້າ.
18 ຄົນພິການທີ່ບໍ່ສາມາດເຮັດວຽກນັ້ນໄດ້ ມີດັ່ງຕໍ່ໄປນີ້: ຄົນຕາບອດ ຄົນຂາລີບ* ຄົນດັງແວ່ງ ຄົນແຂນຂາຍາວບໍ່ເທົ່າກັນ
19 ຄົນທີ່ກະດູກຕີນຫຼືກະດູກມືຫັກ
20 ຄົນຫຼັງກ່ອມ ຄົນຄອດ* ຄົນຕາບໍ່ດີ ຄົນທີ່ເປັນໂລກຜິວໜັງ ຄົນທີ່ເປັນຂີ້ກາກ ແລະຄົນທີ່ມີໝາກອັນທະບໍ່ສົມບູນ.+
21 ຖ້າລູກຫຼານຂອງປະໂລຫິດອາໂຣນຄົນໃດເປັນຄົນພິການ ຜູ້ນັ້ນຈະເອົາເຄື່ອງບູຊາດ້ວຍໄຟໃຫ້ພະເຢໂຫວາບໍ່ໄດ້. ຍ້ອນລາວພິການ ລາວຈະເອົາເຄື່ອງບູຊາທີ່ເປັນຄືກັບອາຫານໃຫ້ພະເຈົ້າບໍ່ໄດ້.
22 ລາວຈະກິນເຄື່ອງບູຊາທີ່ເປັນຄືກັບອາຫານຂອງພະເຈົ້າຈາກສິ່ງທີ່ບໍລິສຸດແທ້ໆ+ແລະສິ່ງບໍລິສຸດໄດ້.+
23 ແຕ່ຍ້ອນລາວພິການ ລາວຈະເຂົ້າໄປໃກ້ຜ້າກັ້ງ+ແລະແທ່ນບູຊາບໍ່ໄດ້.+ ລາວຕ້ອງບໍ່ເຮັດໃຫ້ບ່ອນບໍລິສຸດຂອງເຮົາຖືກດູໝິ່ນ+ ເພາະເຮົາແມ່ນເຢໂຫວາຜູ້ທີ່ແຍກເຂົາເຈົ້າໄວ້ຕ່າງຫາກ.’”+
24 ແລ້ວໂມເຊກໍໄປບອກອາໂຣນກັບພວກລູກຊາຍຂອງລາວ ແລະພວກອິດສະຣາເອນທັງໝົດ.
ຂໍ
^ ປະໂລຫິດຈະເຮັດໃຫ້ໂຕເອງບໍ່ສະອາດຖ້າລາວໄປຖືກຫຼືໄປບາຍສົບຫຼືໄວ້ທຸກໃຫ້ຄົນຕາຍ
^ ແປຕາມໂຕວ່າ “ຜູ້ທີ່ຖືກເທໃສ່ມື”
^ ຫຼືອາດແປວ່າ “ຄົນທີ່ຍ່າງບໍ່ໄດ້”
^ ຫຼືອາດແປວ່າ “ຄົນຂາດສານອາຫານ”
