ລະບຽບພວກເລວີ 24:1-23
24 ພະເຢໂຫວາເວົ້າກັບໂມເຊອີກວ່າ:
2 “ໃຫ້ເຈົ້າບອກພວກອິດສະຣາເອນວ່າໃຫ້ເອົານ້ຳມັນໝາກກອກບໍລິສຸດທີ່ໄດ້ຈາກການຕຳມາໃສ່ຕະກຽງເພື່ອຈະໃຫ້ຕະກຽງມີໄຟລຸກຢູ່ຕະຫຼອດ.+
3 ຢູ່ຫ້ອງບໍລິສຸດບ່ອນທີ່ໃກ້ກັບຫີບສັນຍາ*ໃນເຕັ້ນສັກສິດ* ອາໂຣນຕ້ອງຈັດໃຫ້ມີຄົນເບິ່ງແຍງໃຫ້ຕະກຽງມີໄຟລຸກຢູ່ຕໍ່ໜ້າພະເຢໂຫວາຕະຫຼອດ ຕັ້ງແຕ່ຄ່ຳຈົນຮອດຕອນເຊົ້າ. ນີ້ແມ່ນຄຳສັ່ງທີ່ພວກເຈົ້າຕ້ອງເຮັດຕາມໄປຈົນຮອດລຸ້ນລູກລຸ້ນຫຼານຕໍ່ໆໄປ.
4 ລາວຕ້ອງເບິ່ງແຍງຕະກຽງທີ່ຢູ່ເທິງຂາຕະກຽງ+ທີ່ເຮັດດ້ວຍຄຳແທ້ຕໍ່ໜ້າພະເຢໂຫວາສະເໝີ.
5 ໃຫ້ເຈົ້າເອົາແປ້ງລະອຽດມາເຮັດເຂົ້າຈີ່ຮູບວົງມົນ* 12 ອັນ. ເຂົ້າຈີ່ແຕ່ລະອັນຕ້ອງໃຊ້ແປ້ງລະອຽດ 2 ສ່ວນ 10 ເອຟາ.*
6 ໃຫ້ເຈົ້າເອົາເຂົ້າຈີ່ເຫຼົ່ານັ້ນໄປວາງໄວ້ຕໍ່ໜ້າພະເຢໂຫວາຢູ່ເທິງໂຕະທີ່ເຮັດດ້ວຍຄຳແທ້.+ ໃຫ້ວາງເປັນ 2 ແຖວຢອງກັນຂຶ້ນ ແຖວລະ 6 ອັນ.+
7 ເຈົ້າຕ້ອງເອົາກຳຍານ*ບໍລິສຸດໄປວາງໄວ້ຢູ່ເທິງເຂົ້າຈີ່ແຕ່ລະແຖວ. ກຳຍານຈະຖືກເຜົາເປັນເຄື່ອງບູຊາ*ເພື່ອລະນຶກເຖິງແທນເຂົ້າຈີ່ເຫຼົ່ານັ້ນ+ ແລະຈະເປັນເຄື່ອງບູຊາດ້ວຍໄຟໃຫ້ພະເຢໂຫວາ.
8 ທຸກໆວັນຊະບາໂຕ* ປະໂລຫິດຈະຕ້ອງເອົາເຂົ້າຈີ່ມາວາງໄວ້ແບບນີ້ຕໍ່ໜ້າພະເຢໂຫວາ.+ ນີ້ແມ່ນຄຳສັນຍາລະຫວ່າງເຮົາກັບພວກອິດສະຣາເອນຕະຫຼອດໄປ.
9 ເຂົ້າຈີ່ເຫຼົ່ານັ້ນຈະເປັນສ່ວນແບ່ງຂອງອາໂຣນກັບລູກຊາຍ+ ແລະເຂົາເຈົ້າຈະຕ້ອງກິນເຂົ້າຈີ່ຢູ່ບ່ອນບໍລິສຸດ+ ເພາະເຂົ້າຈີ່ເຫຼົ່ານັ້ນແມ່ນສິ່ງທີ່ບໍລິສຸດແທ້ໆສຳລັບປະໂລຫິດຈາກເຄື່ອງບູຊາດ້ວຍໄຟໃຫ້ພະເຢໂຫວາ. ນີ້ແມ່ນຄຳສັ່ງທີ່ຕ້ອງເຮັດຕາມຕະຫຼອດໄປ.”
10 ມີຜູ້ຊາຍຄົນໜຶ່ງທີ່ມີແມ່ເປັນຄົນອິດສະຣາເອນ ແລະມີພໍ່ເປັນຄົນເອຢິບ.+ ລາວໄດ້ໄປຕີກັບຄົນອິດສະຣາເອນຄົນໜຶ່ງໃນຄ້າຍພັກ.
11 ຜູ້ຊາຍທີ່ມີແມ່ເປັນຄົນອິດສະຣາເອນຄົນນັ້ນເລີ່ມດູໝິ່ນຊື່ຂອງພະເຈົ້າ*ແລະສາບແຊ່ງ+ຊື່ຂອງພະເຈົ້າ. ເຂົາເຈົ້າກໍເລີຍພາລາວໄປຫາໂມເຊ.+ ແມ່ຂອງຜູ້ຊາຍຄົນນັ້ນຊື່ເຊໂລມິດເປັນລູກສາວຂອງດິບຣີຈາກຕະກູນດານ.
12 ເຂົາເຈົ້າກັກໂຕຜູ້ຊາຍຄົນນັ້ນໄວ້ເພື່ອຊິລໍຖ້າເບິ່ງວ່າພະເຢໂຫວາຊິໃຫ້ເຮັດແນວໃດກັບລາວ.+
13 ແລ້ວພະເຢໂຫວາກໍເວົ້າກັບໂມເຊວ່າ:
14 “ໃຫ້ເອົາໂຕຄົນທີ່ສາບແຊ່ງຊື່ຂອງເຮົາອອກໄປນອກຄ້າຍ ແລະໃຫ້ທຸກຄົນທີ່ໄດ້ຍິນລາວເວົ້າແນວນັ້ນເອົາມືວາງເທິງຫົວຂອງລາວ. ຫຼັງຈາກນັ້ນ ໃຫ້ພວກອິດສະຣາເອນທຸກຄົນດຶກຫີນໃສ່ລາວຈົນຕາຍ.+
15 ເຈົ້າຕ້ອງບອກພວກອິດສະຣາເອນຕື່ມວ່າ ‘ຖ້າຜູ້ໃດສາບແຊ່ງຊື່ຂອງພະເຈົ້າ ຜູ້ນັ້ນຈະຕ້ອງຖືກລົງໂທດ.
16 ດັ່ງນັ້ນ ຜູ້ທີ່ດູໝິ່ນຊື່ຂອງພະເຢໂຫວາຈະຕ້ອງຕາຍແນ່ນອນ.+ ພວກອິດສະຣາເອນທຸກຄົນຕ້ອງດຶກຫີນໃສ່ລາວຈົນຕາຍ. ຖ້າຜູ້ໃດດູໝິ່ນຊື່ຂອງພະເຈົ້າ ບໍ່ວ່າຈະເປັນຄົນອິດສະຣາເອນຫຼືຄົນຕ່າງຊາດທີ່ຢູ່ໃນແຜ່ນດິນ ຜູ້ນັ້ນຕ້ອງຖືກລົງໂທດເຖິງຕາຍ.
17 ຖ້າຜູ້ໃດຂ້າຄົນ* ຜູ້ນັ້ນຈະຕ້ອງຕາຍແນ່ນອນ.+
18 ຖ້າຜູ້ໃດໄປຕີແລະຂ້າສັດຂອງຜູ້ອື່ນ ຜູ້ນັ້ນຈະຕ້ອງຊົດໄຊ້ຄືນ. ຊີວິດແທນຊີວິດ.
19 ຖ້າຜູ້ໃດເຮັດໃຫ້ຄົນອື່ນບາດເຈັບແນວໃດ ລາວກໍຕ້ອງຖືກເຮັດໃຫ້ບາດເຈັບແນວນັ້ນຄືກັນ.+
20 ກະດູກແທນກະດູກ ຕາແທນຕາ ແຂ້ວແທນແຂ້ວ. ລາວເຮັດໃຫ້ຄົນອື່ນບາດເຈັບແນວໃດ ລາວກໍຕ້ອງຖືກເຮັດໃຫ້ບາດເຈັບແນວນັ້ນຄືກັນ.+
21 ຖ້າຜູ້ໃດໄປຕີແລະຂ້າສັດ ຜູ້ນັ້ນຈະຕ້ອງຊົດໄຊ້ຄືນ+ ແຕ່ຖ້າຜູ້ໃດຕີແລະຂ້າຄົນ ຜູ້ນັ້ນຈະຕ້ອງຖືກຂ້າ.+
22 ກົດໝາຍນີ້ໃຊ້ກັບຄົນອິດສະຣາເອນທຸກຄົນ ລວມທັງຄົນຕ່າງຊາດທີ່ຢູ່ນຳພວກເຈົ້າ+ ເພາະເຮົາແມ່ນເຢໂຫວາພະເຈົ້າຂອງພວກເຈົ້າ.’”
23 ແລ້ວໂມເຊກໍໄປບອກພວກອິດສະຣາເອນ ເຂົາເຈົ້າກໍເລີຍພາຄົນທີ່ສາບແຊ່ງຊື່ຂອງພະເຈົ້າອອກໄປນອກຄ້າຍ ແລະດຶກກ້ອນຫີນໃສ່ລາວຈົນຕາຍ.+ ພວກອິດສະຣາເອນເຮັດຕາມທີ່ພະເຢໂຫວາໄດ້ສັ່ງໂມເຊ.
ຂໍ
^ ແປຕາມໂຕວ່າ “ທາງນອກຜ້າກັ້ງ”
^ ຫຼື “ເຕັ້ນຂໍການຊີ້ນຳ.” ເບິ່ງສ່ວນອະທິບາຍຄຳສັບ.
^ ເຂົ້າຈີ່ຮູບວົງມົນທີ່ມີຮູທາງກາງ
^ 4,4 ລິດ. ເບິ່ງພາກຜະໜວກ ຂ14.
^ ເບິ່ງສ່ວນອະທິບາຍຄຳສັບ
^ ຫຼື “ເປັນສ່ວນທີ່ເຮັດໃຫ້ຈື່ເຄື່ອງບູຊານັ້ນ”
^ ເບິ່ງສ່ວນອະທິບາຍຄຳສັບ
^ ໝາຍເຖິງຊື່ຂອງພະເຢໂຫວາຕາມທີ່ບອກໄວ້ໃນຂໍ້ 15 ແລະ 16
^ ຫຼື “ຖ້າຜູ້ໃດຕີຜູ້ອື່ນຈົນເຖິງຕາຍ”
