ລະບຽບພວກເລວີ 26:1-46
26 “‘ຫ້າມໄປນະມັດສະການພະເຈົ້າອື່ນໆທີ່ບໍ່ມີຄ່າ.+ ຫ້າມຕັ້ງຮູບພະ+ຫຼືເສົາຫີນສັກສິດ. ຫ້າມເອົາຮູບພະທີ່ເປັນຫີນ+ຕັ້ງໄວ້ໃນແຜ່ນດິນເພື່ອຂາບໄຫວ້.+ ເຮົາແມ່ນເຢໂຫວາພະເຈົ້າຂອງເຈົ້າ.
2 ໃຫ້ຖືວັນຊະບາໂຕ*ຂອງເຮົາແລະນັບຖືບ່ອນບໍລິສຸດຂອງເຮົາ. ເຮົາແມ່ນເຢໂຫວາ.
3 ຖ້າເຈົ້າເຮັດຕາມກົດໝາຍແລະເຊື່ອຟັງຄຳສັ່ງຂອງເຮົາຕໍ່ໆໄປ+
4 ເຮົາຈະໃຫ້ຝົນຕົກຕາມລະດູ+ ໃຫ້ແຜ່ນດິນເກີດຜົນລະປູກ+ ແລະໃຫ້ຕົ້ນໄມ້ຕ່າງໆເກີດໝາກ.
5 ເຈົ້າຈະໄດ້ເຂົ້າຫຼາຍໆ ແລະຈະຟາດເຂົ້າໄປຈົນຮອດຍາມເກັບໝາກລະແຊັງ. ເຈົ້າຈະໄດ້ໝາກລະແຊັງຫຼາຍໆ ແລະຈະເກັບໝາກລະແຊັງໄປຈົນຮອດຍາມຫວ່ານແນວປູກ. ເຈົ້າຈະມີກິນຈົນໜຳໃຈ ແລະຈະຢູ່ໃນແຜ່ນດິນຂອງເຈົ້າໂດຍບໍ່ຕ້ອງກັງວົນຫຍັງ.+
6 ເຮົາຈະເຮັດໃຫ້ແຜ່ນດິນຂອງເຈົ້າມີຄວາມສະຫງົບ.+ ຕອນທີ່ເຈົ້ານອນກໍຈະບໍ່ມີໃຜເຮັດໃຫ້ເຈົ້າຢ້ານ.+ ເຮົາຈະບໍ່ປ່ອຍໃຫ້ມີສັດປ່າທີ່ເປັນອັນຕະລາຍຢູ່ໃນແຜ່ນດິນຂອງເຈົ້າ ແລະຈະບໍ່ໃຫ້ມີຜູ້ໃດຈັບດາບມາຕໍ່ສູ້ພວກເຈົ້າ.
7 ພວກເຈົ້າຈະໄລ່ພວກສັດຕູໜີ ແລະຈະໃຊ້ດາບຂ້າພວກເຂົາ.
8 ພວກເຈົ້າ 5 ຄົນຈະໄລ່ສັດຕູ 100 ຄົນ ແລະພວກເຈົ້າ 100 ຄົນຈະໄລ່ສັດຕູ 10.000 ຄົນ. ພວກເຈົ້າຈະໃຊ້ດາບຂ້າສັດຕູໄດ້ແນ່ນອນ.+
9 ເຮົາຊິອວຍພອນເຈົ້າ*ແລະໃຫ້ເຈົ້າມີລູກມີຫຼານຫຼາຍໆ.+ ເຮົາຈະເຮັດຕາມສັນຍາທີ່ເຮັດນຳເຈົ້າ.+
10 ຕອນທີ່ເຈົ້າຍັງກິນຜົນລະປູກຂອງປີທີ່ຜ່ານມາຢູ່ ເຈົ້າຈະຕ້ອງຖິ້ມຜົນລະປູກເກົ່າເພື່ອຈະມີບ່ອນໃສ່ຜົນລະປູກໃໝ່.
11 ເຮົາຈະໃຫ້ເຕັ້ນສັກສິດຂອງເຮົາຢູ່ນຳເຈົ້າ+ ແລະເຮົາຈະບໍ່ປະຖິ້ມເຈົ້າ.
12 ເຮົາຈະຢູ່ນຳເຈົ້າແລະເປັນພະເຈົ້າຂອງເຈົ້າ+ ແລະພວກເຈົ້າຈະເປັນປະຊາຊົນຂອງເຮົາ.+
13 ເຮົາແມ່ນເຢໂຫວາພະເຈົ້າຂອງເຈົ້າ. ເຮົາພາເຈົ້າອອກມາຈາກເອຢິບແລະປົດປ່ອຍເຈົ້າອອກຈາກການເປັນທາດ. ເຮົາໄດ້ຫັກແອກທີ່ເຈົ້າແບກຢູ່ແລະເຮັດໃຫ້ເຈົ້າຍ່າງໄປຄືກັບຄົນທີ່ໄດ້ຮັບອິດສະຫຼະ.
14 ແຕ່ຖ້າເຈົ້າບໍ່ເຊື່ອຟັງເຮົາ ບໍ່ເຮັດຕາມຄຳສັ່ງທັງໝົດຂອງເຮົາ+
15 ບໍ່ຍອມຮັບກົດໝາຍຂອງເຮົາ+ ກຽດຊັງແລະບໍ່ເຮັດຕາມສິ່ງທີ່ເຮົາບອກ ແລະບໍ່ເຮັດຕາມຄຳສັນຍາທີ່ເຮັດກັບເຮົາ+
16 ເຮົາຈະເຮັດແນວນີ້ໃຫ້ເຈົ້າ. ເຮົາຈະລົງໂທດໃຫ້ເຈົ້າທຸກລຳບາກ ໃຫ້ເຈົ້າເປັນວັນນະໂລກແລະເປັນໄຂ້ແຮງ ແລ້ວຕາຂອງເຈົ້າກໍຈະມົວແລະເຈົ້າກໍຈະບໍ່ມີເຫື່ອບໍ່ມີແຮງ. ເຈົ້າຈະຫວ່ານແນວປູກແຕ່ບໍ່ໄດ້ກິນ ເພາະສັດຕູຂອງເຈົ້າຈະກິນແທນ.+
17 ເຮົາຈະບໍ່ຍອມຮັບເຈົ້າແລະຈະໃຫ້ພວກສັດຕູຊະນະເຈົ້າ.+ ຄົນທີ່ກຽດຊັງເຈົ້າຈະກົດຂີ່ເຈົ້າ.+ ເຖິງວ່າຈະບໍ່ມີຄົນມາໄລ່ເຈົ້າ ແຕ່ເຈົ້າກໍຍັງຕ້ອງໜີ.+
18 ຫຼັງຈາກນັ້ນ ຖ້າເຈົ້າຍັງບໍ່ຍອມຟັງເຮົາ ເຮົາຈະລົງໂທດເຈົ້າຕື່ມອີກ 7 ເທົ່າຍ້ອນຄວາມຜິດທີ່ເຈົ້າໄດ້ເຮັດ.
19 ເຮົາຈະບໍ່ປ່ອຍໃຫ້ເຈົ້າເປັນຄົນຫົວແຂງຫຼືຈອງຫອງອີກຕໍ່ໄປ. ເຮົາຈະໃຫ້ຟ້າເປັນຄືກັບເຫຼັກ*+ ແລະໃຫ້ແຜ່ນດິນເປັນຄືກັບທອງແດງ*ສຳລັບເຈົ້າ.
20 ເຈົ້າຈະເຮັດວຽກໜັກ ແຕ່ຈະເສຍແຮງໄປລ້າໆ. ດິນຈະບໍ່ເກີດຜົນລະປູກ+ ແລະຕົ້ນໄມ້ຈະບໍ່ເກີດໝາກ.
21 ແຕ່ຖ້າເຈົ້າຍັງຕໍ່ຕ້ານແລະບໍ່ຟັງຄວາມເຮົາ ເຮົາຈະລົງໂທດເຈົ້າຕື່ມອີກ 7 ເທົ່າຍ້ອນຄວາມຜິດທີ່ເຈົ້າໄດ້ເຮັດ.
22 ເຮົາຈະປ່ອຍສັດປ່າທີ່ເປັນອັນຕະລາຍໄປຫາພວກເຈົ້າ.+ ມັນຈະກັດສັດລ້ຽງແລະລູກຂອງພວກເຈົ້າໃຫ້ຕາຍ.+ ພວກເຈົ້າຈະເຫຼືອຄົນໜ້ອຍລົງ ແລະທາງຂອງພວກເຈົ້າກໍຈະບໍ່ມີຄົນທຽວ.+
23 ຖ້າພວກເຈົ້າບໍ່ຍອມຮັບການຕັກເຕືອນຂອງເຮົາ+ ແລະຍັງຕໍ່ຕ້ານເຮົາຢູ່
24 ເຮົາກໍຈະຕໍ່ຕ້ານພວກເຈົ້າຄືກັນ. ເຮົາຈະລົງໂທດພວກເຈົ້າຕື່ມອີກ 7 ເທົ່າຍ້ອນຄວາມຜິດທີ່ພວກເຈົ້າໄດ້ເຮັດ.
25 ເຮົາຈະໃຫ້ສັດຕູມາໂຈມຕີເພື່ອລົງໂທດພວກເຈົ້າ ຍ້ອນພວກເຈົ້າບໍ່ໄດ້ເຮັດຕາມສັນຍາທີ່ໄດ້ເຮັດກັບເຮົາ.+ ຖ້າພວກເຈົ້າໜີເຂົ້າໄປໃນເມືອງ+ ເຮົາຈະລົງໂທດພວກພວກເຈົ້າດ້ວຍພະຍາດ ແລະຈະໃຫ້ສັດຕູຊະນະພວກເຈົ້າໄດ້.+
26 ເມື່ອເຮົາທຳລາຍສາງມ້ຽນອາຫານ*ຂອງພວກເຈົ້າ+ ເຖິງວ່າຈະມີຜູ້ຍິງ 10 ຄົນເຮັດເຂົ້າຈີ່ ແຕ່ຈະມີແປ້ງໜ້ອຍດຽວທີ່ເຮັດພໍສຳລັບອົບເຕົາດຽວເທົ່ານັ້ນ.+ ພວກເຈົ້າຈະເອົາເຂົ້າຈີ່ນັ້ນມາແບ່ງກັນ ແຕ່ຈະກິນບໍ່ອີ່ມ.+
27 ແຕ່ຖ້າພວກເຈົ້າຍັງບໍ່ຟັງຄວາມແລະຕໍ່ຕ້ານເຮົາ
28 ເຮົາຈະຕໍ່ຕ້ານພວກເຈົ້າແຮງຂຶ້ນ+ ແລະເຮົາຈະລົງໂທດພວກເຈົ້າຕື່ມອີກ 7 ເທົ່າຍ້ອນຄວາມຜິດທີ່ພວກເຈົ້າໄດ້ເຮັດ.
29 ພວກເຈົ້າຈະຕ້ອງກິນຊີ້ນລູກຊາຍແລະລູກສາວຂອງໂຕເອງ.+
30 ເຮົາຈະທຳລາຍບ່ອນນະມັດສະການ+ ແລະບ່ອນເຜົາເຄື່ອງຫອມສຳລັບພະເຈົ້າປອມທີ່ພວກເຈົ້າເຮັດຂຶ້ນມາ. ເຮົາຈະກອງສົບຂອງພວກເຈົ້າໄວ້ເທິງຮູບບູຊາທີ່ເປັນຕາຂີ້ດຽດ*ທີ່ເຮົາໄດ້ທຳລາຍ.+ ເຮົາຈະປິ່ນໜ້າໜີຍ້ອນເຮົາຂີ້ດຽດພວກເຈົ້າ.+
31 ເຮົາຈະປ່ອຍໃຫ້ເມືອງຂອງພວກເຈົ້າຖືກທຳລາຍ+ ແລະບ່ອນນະມັດສະການທີ່ພວກເຈົ້າເຮັດຂຶ້ນມາເຮົາຈະເຮັດໃຫ້ມັນຮ້າງ. ເຮົາຈະບໍ່ພໍໃຈ*ກິ່ນຫອມທີ່ພວກເຈົ້າເຜົາ.
32 ເຮົາຈະເຮັດໃຫ້ແຜ່ນດິນຂອງພວກເຈົ້າຮ້າງ+ ແລະສັດຕູຂອງພວກເຈົ້າທີ່ຈະມາຢູ່ຫັ້ນຈະຕົກສະເງີ້.+
33 ເຮົາຈະເຮັດໃຫ້ພວກເຈົ້າກະຈັດກະຈາຍໄປຢູ່ນຳຊາດຕ່າງໆ+ ແລະເຮົາຈະເຮັດໃຫ້ສັດຕູໃຊ້ດາບຕໍ່ສູ້ພວກເຈົ້າ.+ ແຜ່ນດິນຂອງພວກເຈົ້າຈະຮ້າງເປົ່າ+ ແລະເມືອງຕ່າງໆຂອງພວກເຈົ້າກໍຈະຖືກທຳລາຍ.
34 ໃນໄລຍະທີ່ພວກເຈົ້າຕ້ອງໄປຢູ່ນຳສັດຕູແລະແຜ່ນດິນຂອງພວກເຈົ້າຮ້າງເປົ່າຢູ່ນັ້ນ ແຜ່ນດິນກໍຈະໄດ້ພັກ. ແຜ່ນດິນຈະໄດ້ຊົດເຊີຍຊະບາໂຕທີ່ພວກເຈົ້າບໍ່ໄດ້ຖືກ່ອນໜ້ານັ້ນ.+
35 ຍ້ອນພວກເຈົ້າບໍ່ໄດ້ເຮັດຕາມກົດໝາຍຊະບາໂຕໂຕຕອນທີ່ພວກເຈົ້າຢູ່ໃນແຜ່ນດິນນັ້ນ ເຮົາຈະເຮັດໃຫ້ແຜ່ນດິນຮ້າງເປົ່າເພື່ອດິນຈະໄດ້ພັກ.
36 ເຮົາຈະເຮັດໃຫ້ຄົນທີ່ຖືກພາໄປ+ຢູ່ແຜ່ນດິນຂອງສັດຕູຢ້ານຫຼາຍ ແມ່ນແຕ່ໃບໄມ້ຫຼົ່ນເຂົາເຈົ້າກໍຈະແລ່ນໜີ. ເຂົາເຈົ້າຈະແລ່ນໜີຄືກັບມີຄົນຈັບດາບໄລ່ຂ້າເຂົາເຈົ້າ ເຖິງວ່າຈະບໍ່ມີໃຜໄລ່ກໍຕາມ.+
37 ເຂົາເຈົ້າຈະແລ່ນໜີແລະຕຳກັນລົ້ມ ຄືກັບແລ່ນໜີຄົນທີ່ຈັບດາບໄລ່ຂ້າເຂົາເຈົ້າ ທັງໆທີ່ບໍ່ມີໃຜໄລ່. ພວກເຈົ້າຈະສູ້ສັດຕູບໍ່ໄດ້ເລີຍ.+
38 ພວກເຈົ້າຫຼາຍຄົນຈະຕາຍໃນແຜ່ນດິນຂອງຄົນຕ່າງຊາດ+ ແລະຈະຕາຍໃນແຜ່ນດິນຂອງສັດຕູພວກເຈົ້າ.
39 ສ່ວນຄົນທີ່ຍັງມີຊີວິດຢູ່ກໍຈະຢູ່ຢ່າງທໍລະມານໃນແຜ່ນດິນຂອງສັດຕູ+ ຍ້ອນຄວາມຜິດທີ່ເຂົາເຈົ້າໄດ້ເຮັດ ແລະຍ້ອນຄວາມຜິດທີ່ປູ່ຍ່າຕານາຍຂອງເຂົາເຈົ້າໄດ້ເຮັດ.+
40 ຈາກນັ້ນ ເຂົາເຈົ້າຈະສາລະພາບຄວາມຜິດຂອງເຂົາເຈົ້າ+ ແລະສາລະພາບຄວາມຜິດກັບຄວາມບໍ່ສັດຊື່ຂອງປູ່ຍ່າຕານາຍຂອງເຂົາເຈົ້າ. ເຂົາເຈົ້າຈະຍອມຮັບວ່າໂຕເອງບໍ່ສັດຊື່ ແລະໄດ້ຕໍ່ຕ້ານເຮົາ.+
41 ຍ້ອນແນວນັ້ນ ເຮົາຈຶ່ງຕໍ່ຕ້ານເຂົາເຈົ້າຄືນ+ ແລະພາເຂົາເຈົ້າໄປຢູ່ໃນແຜ່ນດິນຂອງສັດຕູ.+
ເມື່ອຮອດຕອນນັ້ນ ໃຈທີ່ດື້ດ້ານຂອງເຂົາເຈົ້າອາດຈະຖ່ອມລົງ+ ແລະເຂົາເຈົ້າຈະຍອມຮັບໂທດສຳລັບຄວາມຜິດທີ່ໄດ້ເຮັດ.
42 ແລ້ວເຮົາຈະຄິດເຖິງຄຳສັນຍາທີ່ເຮົາໄດ້ເຮັດກັບຢາໂຄບ+ ຄຳສັນຍາທີ່ເຮົາໄດ້ເຮັດກັບອີຊາກ+ ຄຳສັນຍາທີ່ເຮົາໄດ້ເຮັດກັບອັບຣາຮາມ+ ແລະເຮົາຈະຄິດເຖິງແຜ່ນດິນທີ່ເຮົາສັນຍາວ່າຈະເອົາໃຫ້ເຂົາເຈົ້າ.
43 ໃນໄລຍະທີ່ເຂົາເຈົ້າບໍ່ໄດ້ຢູ່ໃນແຜ່ນດິນນັ້ນ ແຜ່ນດິນຈະຮ້າງເປົ່າແລະໄດ້ຊົດເຊີຍຊະບາໂຕ.+ ເຂົາເຈົ້າຈະຮັບໂທດໃນຄວາມຜິດທີ່ໄດ້ເຮັດ ຍ້ອນເຂົາເຈົ້າບໍ່ຍອມຮັບຄຳສັ່ງແລະກຽດຊັງກົດໝາຍຂອງເຮົາ.+
44 ແຕ່ເຖິງວ່າເຮົາຈະເຮັດແນວນີ້ທັງໝົດ ຕອນທີ່ເຂົາເຈົ້າຢູ່ໃນແຜ່ນດິນຂອງສັດຕູ ເຮົາກໍຈະບໍ່ປະຖິ້ມເຂົາເຈົ້າແທ້ໆ+ ແລະເຮົາຈະບໍ່ປ່ອຍໃຫ້ເຂົາເຈົ້າຕາຍຈົນໝົດ. ຖ້າເຮັດແນວນັ້ນ ເຮົາກໍເຮັດຜິດສັນຍາທີ່ໄດ້ເຮັດກັບເຂົາເຈົ້າ.+ ເຮົາແມ່ນເຢໂຫວາພະເຈົ້າຂອງເຂົາເຈົ້າ.
45 ເພື່ອປະໂຫຍດຂອງເຂົາເຈົ້າ ເຮົາຈະຄິດເຖິງຄຳສັນຍາທີ່ເຮົາໄດ້ເຮັດກັບປູ່ຍ່າຕານາຍຂອງເຂົາເຈົ້າ+ທີ່ເຮົາພາອອກມາຈາກແຜ່ນດິນເອຢິບຕອນທີ່ຊາດອື່ນໆແນມເບິ່ງຢູ່+ ເພື່ອສະແດງວ່າເຮົາເປັນພະເຈົ້າຂອງເຂົາເຈົ້າ. ເຮົາແມ່ນເຢໂຫວາ.’”
46 ນີ້ແມ່ນຂໍ້ກຳນົດ ຄຳສັ່ງ ແລະກົດໝາຍທີ່ພະເຢໂຫວາໃຫ້ພວກອິດສະຣາເອນຜ່ານທາງໂມເຊຢູ່ພູຊີນາຍ.+
ຂໍ
^ ເບິ່ງສ່ວນອະທິບາຍຄຳສັບ
^ ແປຕາມໂຕວ່າ “ປິ່ນໜ້າໄປຫາເຈົ້າ”
^ ໝາຍເຖິງຈະບໍ່ໃຫ້ຝົນຕົກຈາກຟ້າ
^ ໝາຍເຖິງແຜ່ນດິນຈະແຫ້ງແລ້ງຍ້ອນບໍ່ມີຝົນຕົກ
^ ແປຕາມໂຕວ່າ “ຫັກທ່ອນໄມ້.” ອາດໝາຍເຖິງທ່ອນໄມ້ທີ່ເອົາໄວ້ສອດເຂົ້າຈີ່ເພື່ອຫ້ອຍມ້ຽນໄວ້.
^ ຄຳນີ້ໃນພາສາເຮັບເຣີອາດກ່ຽວຂ້ອງກັບຄຳວ່າ “ຂີ້ສັດ” ແລະໃຊ້ໃນລັກສະນະດູຖູກ
^ ແປຕາມໂຕວ່າ “ຜ່ອນຄາຍ”
