ລະບຽບພວກເລວີ 5:1-19
5 “‘ຖ້າຜູ້ໃດຮູ້ຫຼືເຫັນວ່າຜູ້ໜຶ່ງເຮັດຜິດ ແລະໄດ້ຍິນຄຳປະກາດ*ໃຫ້ໄປລາຍງານເລື່ອງທີ່ຮູ້ເຫັນ+ ແຕ່ລາວບໍ່ໄປ ລາວຈະມີຄວາມຜິດແລະຖືກລົງໂທດ.
2 ຖ້າຜູ້ໃດໄປຖືກຫຼືໄປບາຍສິ່ງທີ່ພະເຈົ້າຖືວ່າບໍ່ສະອາດ ບໍ່ວ່າຈະເປັນຊາກສັດປ່າ ຊາກສັດບ້ານ ຫຼືຊາກສັດໂຕນ້ອຍໆ*ຊະນິດອື່ນໆ+ ພະເຈົ້າຈະຖືວ່າລາວບໍ່ສະອາດແລະມີຄວາມຜິດ ເຖິງວ່າລາວຈະບໍ່ຮູ້ໂຕກໍຕາມ.
3 ຖ້າຜູ້ໃດໄປຖືກຫຼືໄປບາຍສິ່ງທີ່ເຮັດໃຫ້ລາວບໍ່ສະອາດ+ ແລະລາວມາຮູ້ນຳຫຼັງ ລາວຈະມີຄວາມຜິດ.
4 ຖ້າຜູ້ໃດສັນຍາໂດຍບໍ່ໄດ້ຄິດຄັກໆ ແລະລາວບໍ່ຮູ້ໂຕ ບໍ່ວ່າຈະເປັນສັນຍາເຮັດແນວດີຫຼືແນວຊົ່ວ ເມື່ອລາວມາຮູ້ນຳຫຼັງວ່າລາວບໍ່ໄດ້ຄິດຄັກໆ ລາວຈະມີຄວາມຜິດ.*+
5 ຖ້າຜູ້ໃດເຮັດຜິດເລື່ອງໃດເລື່ອງໜຶ່ງທີ່ເວົ້າມານັ້ນ ລາວຕ້ອງສາລະພາບ+ຄວາມຜິດຂອງລາວ.
6 ລາວຕ້ອງເອົາເຄື່ອງບູຊາໄຖ່ຄວາມຜິດມາໃຫ້ພະເຢໂຫວາສຳລັບຄວາມຜິດຂອງລາວ+ຄື ແກະໂຕແມ່ໂຕໜຶ່ງຈາກຝູງ ຫຼືຈະເປັນແບ້ໂຕແມ່ໂຕໜຶ່ງກໍໄດ້. ນີ້ຈະເປັນເຄື່ອງບູຊາໄຖ່ບາບຂອງລາວ ແລ້ວປະໂລຫິດຈະໄຖ່ຄວາມຜິດໃຫ້ລາວ ແລ້ວລາວຈະໄດ້ຮັບການຍົກໂທດ.
7 ແຕ່ຖ້າລາວບໍ່ມີເງິນຈະຊື້ແກະ ລາວຕ້ອງເອົານົກເຂົາ 2 ໂຕຫຼືນົກກາງແກ 2 ໂຕ+ມາໃຫ້ພະເຢໂຫວາ ເພື່ອເປັນເຄື່ອງບູຊາໄຖ່ຄວາມຜິດຂອງລາວ. ນົກໂຕໜຶ່ງຈະເປັນເຄື່ອງບູຊາໄຖ່ບາບ ແລະອີກໂຕໜຶ່ງຈະເປັນເຄື່ອງບູຊາເຜົາ.+
8 ລາວຕ້ອງເອົານົກ 2 ໂຕນັ້ນມາໃຫ້ປະໂລຫິດ. ປະໂລຫິດຈະເອົານົກໂຕທຳອິດມາເປັນເຄື່ອງບູຊາໄຖ່ບາບ ແລະປາດຄໍມັນ.
9 ລາວຈະເອົາເລືອດສ່ວນໜຶ່ງຂອງເຄື່ອງບູຊາໄຖ່ບາບໄປຊິດໃສ່ທາງຂ້າງຂອງແທ່ນ ແຕ່ເລືອດສ່ວນທີ່ເຫຼືອທັງໝົດ ລາວຈະເອົາໄປເທໃສ່ທາງລຸ່ມຂອງແທ່ນບູຊາ.+ ນີ້ແມ່ນເຄື່ອງບູຊາໄຖ່ບາບ.
10 ສ່ວນນົກອີກໂຕໜຶ່ງ ລາວຈະເອົາມາເປັນເຄື່ອງບູຊາເຜົາ ແລະເຮັດຕາມຂັ້ນຕອນປົກກະຕິ.+ ປະໂລຫິດຈະໄຖ່ຄວາມຜິດໃຫ້ຄົນທີ່ເຮັດຜິດ ແລ້ວລາວຈະໄດ້ຮັບການຍົກໂທດ.+
11 ແຕ່ຖ້າລາວບໍ່ມີເງິນຊື້ນົກເຂົາ 2 ໂຕ ຫຼືນົກກາງແກ 2 ໂຕ ໃຫ້ລາວເອົາແປ້ງລະອຽດ 1 ສ່ວນ 10 ເອຟາ*+ ມາເປັນເຄື່ອງບູຊາໄຖ່ຄວາມຜິດຂອງລາວ. ແຕ່ລາວບໍ່ຄວນເອົານ້ຳມັນຫຼືກຳຍານ*ໃສ່ແປ້ງນັ້ນ ເພາະນີ້ແມ່ນເຄື່ອງບູຊາໄຖ່ບາບ.
12 ລາວຕ້ອງເອົາແປ້ງໃຫ້ປະໂລຫິດ. ປະໂລຫິດຈະເອົາແປ້ງນັ້ນ 1 ກຳມືໄປເປັນເຄື່ອງບູຊາເພື່ອລະນຶກເຖິງ* ແລະເອົາໄປເຜົາຢູ່ແທ່ນເທິງເຄື່ອງບູຊາດ້ວຍໄຟໃຫ້ພະເຢໂຫວາ. ນີ້ແມ່ນເຄື່ອງບູຊາໄຖ່ບາບ.
13 ຖ້າຜູ້ໃດເຮັດຜິດອັນໃດອັນໜຶ່ງຕາມທີ່ເວົ້າມານັ້ນ ປະໂລຫິດກໍຈະໄຖ່ຄວາມຜິດໃຫ້ຜູ້ນັ້ນ ແລ້ວລາວຈະໄດ້ຮັບການຍົກໂທດ.+ ສ່ວນທີ່ເຫຼືອຂອງເຄື່ອງບູຊານັ້ນຈະເປັນຂອງປະໂລຫິດ+ ຄືກັບສ່ວນທີ່ເຫຼືອຂອງເຄື່ອງບູຊາທີ່ເຮັດຈາກເມັດເຂົ້າ.’”+
14 ພະເຢໂຫວາເວົ້າກັບໂມເຊອີກວ່າ:
15 “ຖ້າຜູ້ໃດບໍ່ສັດຊື່ຕໍ່ພະເຢໂຫວາແບບບໍ່ໄດ້ຕັ້ງໃຈ ໂດຍເຮັດຜິດກົດໝາຍກ່ຽວກັບສິ່ງບໍລິສຸດຂອງເພິ່ນ*+ ລາວຕ້ອງເອົາແກະໂຕຜູ້ທີ່ຕຸ້ຍພີດີງາມມາໃຫ້ພະເຢໂຫວາເພື່ອເປັນເຄື່ອງບູຊາໄຖ່ຄວາມຜິດຂອງລາວ.+ ປະໂລຫິດຈະເປັນຄົນບອກວ່າແກະໂຕນັ້ນມີລາຄາເທົ່າໃດເຊເກນ ຕາມມາດຕະຖານຂອງເຊເກນທີ່ໃຊ້ໃນບ່ອນບໍລິສຸດ.*+
16 ຍ້ອນລາວເຮັດຜິດຕໍ່ສິ່ງບໍລິສຸດ ລາວຕ້ອງໄດ້ຈ່າຍຄ່າຊົດໄຊ້ສຳລັບຄວາມຜິດຂອງລາວ ແລະລາວຕ້ອງເອົາ 1 ສ່ວນ 5 ຂອງມູນຄ່າເຄື່ອງບູຊາມາຕື່ມໃຫ້ອີກ.+ ລາວຕ້ອງເອົາທັງໝົດນີ້ພ້ອມກັບແກະໂຕຜູ້ທີ່ເປັນເຄື່ອງບູຊາໄຖ່ຄວາມຜິດມາໃຫ້ປະໂລຫິດ. ປະໂລຫິດຈະໄຖ່ຄວາມຜິດ+ໃຫ້ລາວ ແລ້ວລາວຈະໄດ້ຮັບການຍົກໂທດ.+
17 ຖ້າຜູ້ໃດເຮັດຜິດໂດຍເຮັດສິ່ງທີ່ພະເຢໂຫວາຫ້າມ ເຖິງວ່າຈະບໍ່ຮູ້ໂຕ ແຕ່ລາວກໍມີຄວາມຜິດແລະຈະຖືກລົງໂທດ.+
18 ລາວຕ້ອງເອົາແກະໂຕຜູ້ທີ່ຕຸ້ຍພີດີງາມຈາກຝູງມາໃຫ້ປະໂລຫິດ ເພື່ອເປັນເຄື່ອງບູຊາໄຖ່ຄວາມຜິດ.+ ແກະໂຕນັ້ນຕ້ອງເໝາະສົມກັບລາຄາມາດຕະຖານທີ່ກຳນົດໄວ້. ຫຼັງຈາກນັ້ນ ປະໂລຫິດຈະໄຖ່ຄວາມຜິດໃຫ້ຜູ້ນັ້ນທີ່ເຮັດຜິດໂດຍບໍ່ໄດ້ຕັ້ງໃຈແລະບໍ່ຮູ້ໂຕ ແລ້ວລາວຈະໄດ້ຮັບການຍົກໂທດ.
19 ຍ້ອນລາວໄດ້ເຮັດຜິດຕໍ່ພະເຢໂຫວາ ລາວຈຶ່ງຕ້ອງເອົາເຄື່ອງບູຊາໄຖ່ຄວາມຜິດມາໃຫ້.”
ຂໍ
^ ຫຼື “ໄດ້ຍິນຄຳສາບແຊ່ງ.” ຄຳສາບແຊ່ງນີ້ອາດໝາຍເຖິງຄຳສາບແຊ່ງຕໍ່ຜູ້ເຮັດຜິດ ຫຼືຜູ້ຮູ້ເຫັນເຫດການແຕ່ບໍ່ໄດ້ໄປລາຍງານ.
^ ອາດໝາຍເຖິງສັດໂຕນ້ອຍໆທີ່ຢູ່ນຳກັນເປັນຝູງ
^ ໝາຍເຖິງກໍລະນີທີ່ລາວບໍ່ເຮັດຕາມສັນຍາ
^ ເບິ່ງສ່ວນອະທິບາຍຄຳສັບ
^ 2,2 ລິດ. ເບິ່ງພາກຜະໜວກ ຂ14.
^ ຫຼື “ເປັນສ່ວນທີ່ເຮັດໃຫ້ຈື່ເຄື່ອງບູຊານັ້ນ”
^ ໝາຍເຖິງສິ່ງທີ່ໄດ້ບູຊາຫຼືແຍກໄວ້ໃຫ້ພະເຢໂຫວາແລ້ວ
^ ຫຼື “ຕາມເຊເກນບໍລິສຸດ”
