ລະບຽບພວກເລວີ 7:1-38
7 “‘ກົດໝາຍເລື່ອງເຄື່ອງບູຊາໄຖ່ຄວາມຜິດເປັນແນວນີ້.+ ເຄື່ອງບູຊານີ້ເປັນສິ່ງທີ່ບໍລິສຸດແທ້ໆ.
2 ເຂົາເຈົ້າຕ້ອງຂ້າສັດທີ່ໃຊ້ເປັນເຄື່ອງບູຊາໄຖ່ຄວາມຜິດ ຢູ່ບ່ອນດຽວກັນກັບບ່ອນທີ່ຂ້າສັດທີ່ໃຊ້ເປັນເຄື່ອງບູຊາເຜົາ ແລະເອົາເລືອດ+ໄປຊິດໃສ່ແຕ່ລະຂ້າງຂອງແທ່ນບູຊາ.+
3 ປະໂລຫິດຕ້ອງເອົານ້ຳມັນ+ຂອງສັດທີ່ໃຊ້ເປັນເຄື່ອງບູຊາອອກໃຫ້ໝົດຄື: ຫາງທີ່ມີນ້ຳມັນ* ນ້ຳມັນທີ່ປົກໄສ້
4 ແລະໝາກໄຂ່ຫຼັງ 2 ໜ່ວຍກັບນ້ຳມັນທີ່ຕິດໝາກໄຂ່ຫຼັງທີ່ຢູ່ໃກ້ໆແອວ. ລາວຕ້ອງລອກນ້ຳມັນທີ່ຕິດຢູ່ຕັບອອກໄປຈົນຮອດໝາກໄຂ່ຫຼັງ.+
5 ປະໂລຫິດຈະເອົານ້ຳມັນເຫຼົ່ານີ້ທີ່ລອກອອກມາແລ້ວໄປເຜົາເທິງແທ່ນບູຊາ ເປັນເຄື່ອງບູຊາດ້ວຍໄຟໃຫ້ພະເຢໂຫວາ.+ ນີ້ແມ່ນເຄື່ອງບູຊາໄຖ່ຄວາມຜິດ.
6 ຜູ້ຊາຍທຸກຄົນທີ່ເປັນປະໂລຫິດຈະກິນຊີ້ນສັດນັ້ນໄດ້.+ ເຂົາເຈົ້າຕ້ອງກິນຢູ່ບ່ອນບໍລິສຸດ. ນີ້ແມ່ນສິ່ງທີ່ບໍລິສຸດແທ້ໆ.+
7 ກົດໝາຍເລື່ອງເຄື່ອງບູຊາໄຖ່ຄວາມຜິດກໍຄືກັບກົດໝາຍເລື່ອງເຄື່ອງບູຊາໄຖ່ບາບ. ປະໂລຫິດຜູ້ທີ່ເຮັດໜ້າທີ່ໄຖ່ຄວາມຜິດຈະໄດ້ຊີ້ນທີ່ເປັນເຄື່ອງບູຊານັ້ນ.+
8 ປະໂລຫິດຜູ້ທີ່ເຮັດໜ້າທີ່ເຜົາເຄື່ອງບູຊາເຜົາຈະໄດ້ໜັງ+ຂອງສັດທີ່ເປັນເຄື່ອງບູຊາເຜົານັ້ນນຳ.
9 ເຄື່ອງບູຊາທີ່ເຮັດຈາກເມັດເຂົ້າ ບໍ່ວ່າຈະເປັນເຂົ້າຈີ່ທີ່ເຮັດຢູ່ເຕົາຫຼືຢູ່ໝໍ້+ ກໍຈະເປັນຂອງປະໂລຫິດ+ຜູ້ທີ່ເຮັດໜ້າທີ່ນັ້ນ.
10 ແຕ່ເຄື່ອງບູຊາທີ່ເຮັດຈາກເມັດເຂົ້າທີ່ຍັງເປັນແປ້ງ ບໍ່ວ່າຈະປະສົມນ້ຳມັນ+ຫຼືບໍ່ໄດ້ປະສົມ+ ທັງໝົດຈະເປັນຂອງພວກລູກຊາຍອາໂຣນ. ແຕ່ລະຄົນຈະໄດ້ສ່ວນແບ່ງເທົ່າໆກັນ.
11 ກົດໝາຍເລື່ອງເຄື່ອງບູຊາສ້າງຄວາມສະຫງົບສຸກ+ທີ່ຜູ້ໃດຜູ້ໜຶ່ງຈະເອົາມາໃຫ້ພະເຢໂຫວາເປັນແນວນີ້.
12 ຖ້າລາວຈະເອົາເຄື່ອງບູຊາສ້າງຄວາມສະຫງົບສຸກມາເພື່ອສະແດງຄວາມຂອບໃຈ+ ລາວຕ້ອງເອົາເຄື່ອງບູຊາສະແດງຄວາມຂອບໃຈມາພ້ອມກັບເຂົ້າຈີ່ຕໍ່ໄປນີ້ຄື: ເຂົ້າຈີ່ບໍ່ມີເຊື້ອທີ່ນວດໃສ່ນ້ຳມັນເຮັດເປັນຮູບວົງມົນ* ເຂົ້າຈີ່ບໍ່ມີເຊື້ອແຜ່ນບາງໆທີ່ທານ້ຳມັນ ແລະເຂົ້າຈີ່ຮູບວົງມົນທີ່ເຮັດຈາກແປ້ງລະອຽດປະສົມກັບນ້ຳມັນແລະແຊ່ໃນນ້ຳມັນ.
13 ນອກຈາກນັ້ນ ລາວຍັງຕ້ອງເອົາເຂົ້າຈີ່ທີ່ມີເຊື້ອຮູບວົງມົນມາໃຫ້ພ້ອມກັບເຄື່ອງບູຊາສ້າງຄວາມສະຫງົບສຸກຂອງລາວ ເຊິ່ງເປັນເຄື່ອງບູຊາສະແດງຄວາມຂອບໃຈ.
14 ລາວຕ້ອງເອົາເຂົ້າຈີ່ແຕ່ລະຢ່າງ*ມາແນວລະ 1 ອັນ ເພື່ອເປັນສ່ວນແບ່ງສັກສິດໃຫ້ພະເຢໂຫວາ. ສ່ວນແບ່ງນັ້ນຈະເປັນຂອງປະໂລຫິດຜູ້ທີ່ຊິດເລືອດຂອງສັດທີ່ໃຊ້ເປັນເຄື່ອງບູຊາສ້າງຄວາມສະຫງົບສຸກ.+
15 ຊີ້ນສັດທີ່ໃຊ້ເປັນເຄື່ອງບູຊາສ້າງຄວາມສະຫງົບສຸກ ເຊິ່ງກໍຄືເຄື່ອງບູຊາສະແດງຄວາມຂອບໃຈຈະຕ້ອງກິນໃນມື້ນັ້ນເລີຍ. ບໍ່ໃຫ້ເອົາໄວ້ຈົນຮອດເຊົ້າມື້ຕໍ່ໄປ.+
16 ຖ້າລາວເອົາເຄື່ອງບູຊາສ້າງຄວາມສະຫງົບສຸກມາຍ້ອນລາວໄດ້ສາບານໄວ້+ ຫຼືເອົາມາໃຫ້ດ້ວຍຄວາມສະໝັກໃຈ+ ກໍຕ້ອງກິນຊີ້ນໃນມື້ທີ່ໃຫ້ເຄື່ອງບູຊານັ້ນເລີຍ. ສ່ວນທີ່ເຫຼືອຈະເອົາໄວ້ກິນໃນມື້ຕໍ່ໄປໄດ້.
17 ແຕ່ຖ້າຊີ້ນສັດທີ່ໃຊ້ເປັນເຄື່ອງບູຊາເຫຼືອຈົນຮອດມື້ທີ 3 ກໍຕ້ອງເອົາໄປເຜົາຖິ້ມ.+
18 ຖ້າມີຄົນໄປກິນຊີ້ນສັດທີ່ໃຊ້ເປັນເຄື່ອງບູຊາສ້າງຄວາມສະຫງົບສຸກທີ່ເຫຼືອຈົນຮອດມື້ທີ 3 ພະເຈົ້າຈະບໍ່ພໍໃຈຄົນທີ່ເອົາເຄື່ອງບູຊານັ້ນມາໃຫ້. ເຄື່ອງບູຊານັ້ນຈະໃຊ້ບໍ່ໄດ້ເລີຍ. ການເຮັດແນວນັ້ນເປັນສິ່ງທີ່ໜ້າລັງກຽດ ແລະຄົນທີ່ກິນຊີ້ນນັ້ນຈະຕ້ອງຖືກລົງໂທດ.+
19 ຊີ້ນສັດທີ່ໄປຖືກສິ່ງຂອງທີ່ບໍ່ສະອາດຈະກິນບໍ່ໄດ້ ຕ້ອງເອົາຊີ້ນນັ້ນໄປເຜົາຖິ້ມ. ສ່ວນຊີ້ນທີ່ສະອາດ ທຸກຄົນທີ່ສະອາດກໍກິນໄດ້.
20 ຖ້າຄົນທີ່ບໍ່ສະອາດກິນຊີ້ນທີ່ໃຊ້ເປັນເຄື່ອງບູຊາສ້າງຄວາມສະຫງົບສຸກ ເຊິ່ງເປັນຂອງພະເຢໂຫວາ ລາວຈະຕ້ອງຕາຍ.+
21 ຖ້າຜູ້ໃດໄປຖືກຫຼືໄປບາຍສິ່ງທີ່ບໍ່ສະອາດ ບໍ່ວ່າຈະເປັນຄົນທີ່ບໍ່ສະອາດ+ ສັດທີ່ບໍ່ສະອາດ+ ຫຼືສິ່ງອື່ນໆທີ່ບໍ່ສະອາດແລະເປັນຕາໜ້າລັງກຽດ+ ແລ້ວລາວໄປກິນຊີ້ນທີ່ເປັນສ່ວນໜຶ່ງຂອງເຄື່ອງບູຊາສ້າງຄວາມສະຫງົບສຸກ ເຊິ່ງເປັນຂອງພະເຢໂຫວາ ຜູ້ນັ້ນຈະຕ້ອງຕາຍ.’”
22 ພະເຢໂຫວາເວົ້າກັບໂມເຊອີກວ່າ:
23 “ໃຫ້ບອກພວກອິດສະຣາເອນວ່າ ‘ຫ້າມພວກເຈົ້າກິນນ້ຳມັນ+ຂອງງົວໂຕຜູ້ ນ້ຳມັນຂອງແກະໂຕຜູ້ ຫຼືນ້ຳມັນຂອງແບ້.
24 ແຕ່ນ້ຳມັນຂອງສັດທີ່ຕາຍເອງ ແລະນ້ຳມັນຂອງສັດທີ່ຖືກສັດໂຕອື່ນຂ້າຈະເອົາມາໃຊ້ເຮັດແນວອື່ນໄດ້ ແຕ່ຫ້າມກິນເດັດຂາດ.+
25 ຜູ້ໃດກິນນ້ຳມັນຂອງສັດທີ່ໃຊ້ເປັນເຄື່ອງບູຊາດ້ວຍໄຟໃຫ້ພະເຢໂຫວາ ຜູ້ນັ້ນຈະຕ້ອງຕາຍ.
26 ບໍ່ວ່າພວກເຈົ້າຈະຢູ່ໃສກໍຕາມ ຫ້າມກິນເລືອດ+ທຸກຢ່າງ ຊິເປັນເລືອດນົກ ຫຼືເລືອດສັດກໍບໍ່ໄດ້.
27 ຜູ້ໃດກິນເລືອດ ຜູ້ນັ້ນຈະຕ້ອງຕາຍ.’”+
28 ພະເຢໂຫວາເວົ້າກັບໂມເຊອີກວ່າ:
29 “ໃຫ້ບອກພວກອິດສະຣາເອນວ່າ ‘ຜູ້ໃດທີ່ເອົາເຄື່ອງບູຊາສ້າງຄວາມສະຫງົບສຸກມາໃຫ້ພະເຢໂຫວາ ຜູ້ນັ້ນຈະຕ້ອງເອົາສ່ວນໜຶ່ງຂອງເຄື່ອງບູຊານັ້ນໃຫ້ພະເຢໂຫວາ.+
30 ລາວຕ້ອງເອົານ້ຳມັນ+ກັບຊີ້ນສ່ວນເອິກໄປໃຫ້ປະໂລຫິດເຜົາເປັນເຄື່ອງບູຊາໃຫ້ພະເຢໂຫວາ. ແລ້ວຜູ້ທີ່ເອົາເຄື່ອງບູຊາມາໃຫ້ຈະເອົານ້ຳມັນກັບຊີ້ນສ່ວນເອິກນັ້ນຊູໄປຊູມາເພື່ອເປັນເຄື່ອງບູຊາຊູໄປມາ+ຕໍ່ໜ້າພະເຢໂຫວາ.
31 ປະໂລຫິດຈະເອົານ້ຳມັນໄປເຜົາຢູ່ເທິງແທ່ນບູຊາ+ ແຕ່ຊີ້ນສ່ວນເອິກຈະເປັນຂອງອາໂຣນກັບພວກລູກຊາຍຂອງລາວ.+
32 ພວກເຈົ້າຕ້ອງເອົາຂາຫຼັງເບື້ອງຂວາຂອງສັດທີ່ໃຊ້ເປັນເຄື່ອງບູຊາສ້າງຄວາມສະຫງົບສຸກ+ ໃຫ້ເປັນສ່ວນແບ່ງສັກສິດສຳລັບປະໂລຫິດ.
33 ລູກຊາຍຂອງອາໂຣນ ຜູ້ທີ່ເປັນຄົນເອົາເລືອດແລະນ້ຳມັນຂອງສັດທີ່ໃຊ້ເປັນເຄື່ອງບູຊາສ້າງຄວາມສະຫງົບສຸກໃຫ້ພະເຈົ້າ ຈະໄດ້ຂາຫຼັງເບື້ອງຂວາເປັນສ່ວນແບ່ງ.+
34 ເມື່ອຄົນອິດສະຣາເອນເອົາເຄື່ອງບູຊາສ້າງຄວາມສະຫງົບສຸກມາໃຫ້ເຮົາ ເຮົາຈະຮັບເອົາຊີ້ນສ່ວນເອິກຂອງເຄື່ອງບູຊາຊູໄປມາກັບຂາຫຼັງເບື້ອງຂວາທີ່ເປັນສ່ວນແບ່ງສັກສິດ. ແລ້ວເຮົາຈະເອົາສ່ວນເຫຼົ່ານີ້ໃຫ້ປະໂລຫິດອາໂຣນກັບພວກລູກຊາຍຂອງລາວ. ນີ້ແມ່ນກົດໝາຍທີ່ພວກອິດສະຣາເອນຈະຕ້ອງເຮັດຕາມຕໍ່ໆໄປ.+
35 ສ່ວນແບ່ງນີ້ມາຈາກເຄື່ອງບູຊາດ້ວຍໄຟໃຫ້ພະເຢໂຫວາທີ່ຕ້ອງແບ່ງໄວ້ຕ່າງຫາກໃຫ້ພວກປະໂລຫິດ ເຊິ່ງກໍຄືອາໂຣນກັບພວກລູກຊາຍຂອງລາວ ໃນມື້ທີ່ເຂົາເຈົ້າຖືກແຕ່ງຕັ້ງໃຫ້ເປັນປະໂລຫິດຂອງພະເຢໂຫວາ.+
36 ພະເຢໂຫວາສັ່ງໃຫ້ພວກອິດສະຣາເອນເອົາສ່ວນແບ່ງນີ້ໃຫ້ອາໂຣນກັບພວກລູກຊາຍຂອງລາວ ໃນມື້ທີ່ເຂົາເຈົ້າຖືກແຕ່ງຕັ້ງ.+ ນີ້ແມ່ນຄຳສັ່ງທີ່ເຂົາເຈົ້າຕ້ອງເຮັດຕາມໄປຈົນຮອດລຸ້ນລູກລຸ້ນຫຼານຕໍ່ໆໄປ.’”
37 ສິ່ງທີ່ເວົ້າມາແມ່ນກົດໝາຍເລື່ອງເຄື່ອງບູຊາເຜົາ+ ເຄື່ອງບູຊາທີ່ເຮັດຈາກເມັດເຂົ້າ+ ເຄື່ອງບູຊາໄຖ່ບາບ+ ເຄື່ອງບູຊາໄຖ່ຄວາມຜິດ+ ເຄື່ອງບູຊາແຕ່ງຕັ້ງ+ ແລະເຄື່ອງບູຊາສ້າງຄວາມສະຫງົບສຸກ+
38 ຕາມທີ່ພະເຢໂຫວາບອກໂມເຊຢູ່ພູຊີນາຍ+ ໃນມື້ທີ່ພະເຢໂຫວາສັ່ງພວກອິດສະຣາເອນໃຫ້ເອົາເຄື່ອງບູຊາມາໃຫ້ເພິ່ນຢູ່ບ່ອນກັນດານຊີນາຍ.+
ຂໍ
^ ແກະໃນສະໄໝນັ້ນມີຫາງທີ່ມີນ້ຳມັນຫຼາຍ ປົກກະຕິແລ້ວຈະໜັກບໍ່ຕ່ຳກວ່າ 5 ກິໂລກຣາມ
^ ເຂົ້າຈີ່ຮູບວົງມົນທີ່ມີຮູທາງກາງ
^ ແປຕາມໂຕວ່າ “ເຄື່ອງບູຊາແຕ່ລະຢ່າງ”
