ລະບຽບພວກເລວີ 9:1-24
-
ອາໂຣນເອົາເຄື່ອງບູຊາຕ່າງໆໃຫ້ (1-24)
9 ໃນມື້ທີ 8+ ໂມເຊໄດ້ເອີ້ນອາໂຣນກັບພວກລູກຊາຍ ແລະພວກຜູ້ນຳຂອງອິດສະຣາເອນມາ.
2 ລາວບອກອາໂຣນວ່າ: “ໃຫ້ເອົາງົວນ້ອຍໂຕໜຶ່ງມາເປັນເຄື່ອງບູຊາໄຖ່ບາບ+ ແລະເອົາແກະໂຕຜູ້ໂຕໜຶ່ງມາເປັນເຄື່ອງບູຊາເຜົາ. ທັງ 2 ໂຕຕ້ອງຕຸ້ຍພີດີງາມ ແລະໃຫ້ເອົາມາຢູ່ຕໍ່ໜ້າພະເຢໂຫວາ.
3 ແລ້ວໃຫ້ເຈົ້າບອກພວກອິດສະຣາເອນວ່າ ‘ໃຫ້ເອົາແບ້ໂຕຜູ້ໂຕໜຶ່ງມາເປັນເຄື່ອງບູຊາໄຖ່ບາບ ແລະໃຫ້ເອົາງົວນ້ອຍອາຍຸ 1 ປີໂຕໜຶ່ງ ກັບແກະໂຕຜູ້ອາຍຸ 1 ປີໂຕໜຶ່ງມາເປັນເຄື່ອງບູຊາເຜົາ. ແຕ່ລະໂຕຕ້ອງຕຸ້ຍພີດີງາມ.
4 ໃຫ້ພວກເຈົ້າເອົາງົວໂຕຜູ້ໂຕໜຶ່ງ ກັບແກະໂຕຜູ້ໂຕໜຶ່ງມາເປັນເຄື່ອງບູຊາສ້າງຄວາມສະຫງົບສຸກ+ ແລະໃຫ້ເອົາເຄື່ອງບູຊາທີ່ເຮັດຈາກເມັດເຂົ້າ+ທີ່ປະສົມນ້ຳມັນມານຳ. ພວກເຈົ້າຕ້ອງເອົາສິ່ງເຫຼົ່ານີ້ມາເປັນເຄື່ອງບູຊາໃຫ້ພະເຢໂຫວາ ເພາະພະເຢໂຫວາຈະມາຫາພວກເຈົ້າມື້ນີ້.’”+
5 ເຂົາເຈົ້າເອົາທຸກຢ່າງມາໄວ້ຢູ່ຕໍ່ໜ້າເຕັ້ນສັກສິດ*ຕາມທີ່ໂມເຊສັ່ງ. ຈາກນັ້ນ ເຂົາເຈົ້າກໍຫຍັບອອກມາທາງໜ້າ ແລະຢືນຢູ່ຕໍ່ໜ້າພະເຢໂຫວາ.
6 ແລ້ວໂມເຊກໍເວົ້າວ່າ: “ພະເຢໂຫວາສັ່ງໃຫ້ພວກເຈົ້າເຮັດແນວນີ້ ເພື່ອພວກເຈົ້າຊິໄດ້ເຫັນລິດເດດຂອງພະເຢໂຫວາ.”+
7 ໂມເຊເວົ້າກັບອາໂຣນວ່າ: “ໃຫ້ເຈົ້າເອົາເຄື່ອງບູຊາໄຖ່ບາບຂອງເຈົ້າ+ ກັບເຄື່ອງບູຊາເຜົາຂອງເຈົ້າໄປທີ່ແທ່ນບູຊາ ແລະໄຖ່ຄວາມຜິດໃຫ້ໂຕເຈົ້າເອງ+ກັບຄອບຄົວ*ຂອງເຈົ້າ. ຫຼັງຈາກນັ້ນ ໃຫ້ເຜົາເຄື່ອງບູຊາຂອງປະຊາຊົນ+ ແລະໄຖ່ຄວາມຜິດໃຫ້ເຂົາເຈົ້າ+ຕາມທີ່ພະເຢໂຫວາສັ່ງໄວ້.”
8 ອາໂຣນຈຶ່ງໄປທີ່ແທ່ນບູຊາທັນທີ ແລະຂ້າງົວນ້ອຍທີ່ຈະໃຊ້ເປັນເຄື່ອງບູຊາໄຖ່ບາບຂອງລາວ.+
9 ແລ້ວພວກລູກຊາຍຂອງອາໂຣນກໍເອົາເລືອດ+ຂອງງົວໂຕນັ້ນມາໃຫ້ລາວ. ລາວເອົານິ້ວມືຈຸ່ມເລືອດ ແລ້ວກໍເອົາໄປຕ້ວຍໃສ່ເຂົາທີ່ຢູ່ແທ່ນບູຊາ ແລະເອົາເລືອດສ່ວນທີ່ເຫຼືອໄປເທໃສ່ທາງລຸ່ມຂອງແທ່ນ.+
10 ລາວເອົານ້ຳມັນກັບໝາກໄຂ່ຫຼັງ 2 ໜ່ວຍ ແລະນ້ຳມັນທີ່ຕິດຢູ່ຕັບຂອງສັດທີ່ໃຊ້ເປັນເຄື່ອງບູຊາໄຖ່ບາບໄປເຜົາຢູ່ເທິງແທ່ນ ຕາມທີ່ພະເຢໂຫວາໄດ້ສັ່ງໂມເຊ.+
11 ແລ້ວລາວເອົາຊີ້ນກັບໜັງຂອງມັນໄປຈູດຢູ່ນອກຄ້າຍພັກ.+
12 ຈາກນັ້ນ ລາວກໍຂ້າສັດທີ່ໃຊ້ເປັນເຄື່ອງບູຊາເຜົາ. ພວກລູກຊາຍຂອງລາວໄດ້ເອົາເລືອດມາໃຫ້ ແລ້ວລາວກໍເອົາເລືອດນັ້ນຊິດໃສ່ແຕ່ລະຂ້າງຂອງແທ່ນບູຊາ.+
13 ພວກລູກຊາຍຂອງອາໂຣນເອົາຊີ້ນທີ່ຕັດເປັນຕ່ອນໆ ກັບຫົວຂອງສັດທີ່ໃຊ້ເປັນເຄື່ອງບູຊາເຜົານັ້ນມາໃຫ້ລາວ ແລ້ວລາວກໍເອົາສ່ວນຕ່າງໆນັ້ນເຜົາເທິງແທ່ນ.
14 ອາໂຣນລ້າງໄສ້ກັບຂາ*ຂອງມັນ ແລະເອົາໄປເຜົາຢູ່ເທິງເຄື່ອງບູຊາເຜົາທີ່ຢູ່ເທິງແທ່ນຄືກັນ.
15 ຫຼັງຈາກນັ້ນ ລາວເຜົາເຄື່ອງບູຊາທີ່ປະຊາຊົນເອົາມາ. ທຳອິດ ລາວຂ້າແບ້ໂຕໜຶ່ງ ແລະເຮັດເປັນເຄື່ອງບູຊາໄຖ່ບາບຂອງປະຊາຊົນ. ລາວເຮັດຂັ້ນຕອນຕ່າງໆກັບແບ້ຄືກັບທີ່ໄດ້ເຮັດກັບງົວນ້ອຍ.
16 ອາໂຣນເຜົາເຄື່ອງບູຊາເຜົານັ້ນ ແລະເຮັດຕາມຂັ້ນຕອນຕ່າງໆທີ່ຄວນເຮັດ.+
17 ນອກຈາກເຄື່ອງບູຊາເຜົາທີ່ໄດ້ເຜົາຕອນເຊົ້າ+ແລ້ວ ລາວກໍເອົາເຄື່ອງບູຊາທີ່ເຮັດຈາກເມັດເຂົ້າ+ມາ ແລະເອົາເຄື່ອງບູຊານັ້ນ 1 ກຳມືໄປເຜົາຢູ່ເທິງແທ່ນບູຊາ.
18 ຈາກນັ້ນ ອາໂຣນໄດ້ຂ້າງົວໂຕຜູ້ກັບແກະໂຕຜູ້ ເຊິ່ງເປັນເຄື່ອງບູຊາສ້າງຄວາມສະຫງົບສຸກທີ່ໃຊ້ສຳລັບປະຊາຊົນ. ພວກລູກຊາຍຂອງລາວເອົາເລືອດມາໃຫ້ ແລ້ວລາວກໍເອົາເລືອດນັ້ນຊິດໃສ່ແຕ່ລະຂ້າງຂອງແທ່ນ.+
19 ສ່ວນນ້ຳມັນທັງໝົດຂອງງົວໂຕຜູ້+ ຫາງທີ່ມີນ້ຳມັນ*ຂອງແກະໂຕຜູ້ ນ້ຳມັນທີ່ປົກເຄື່ອງໃນ ໝາກໄຂ່ຫຼັງ 2 ໜ່ວຍ ແລະນ້ຳມັນທີ່ຕິດຢູ່ຕັບ+
20 ພວກລູກຊາຍຂອງອາໂຣນກໍເອົາໄປວາງຢູ່ເທິງຊີ້ນສ່ວນເອິກ. ຫຼັງຈາກນັ້ນ ອາໂຣນກໍເອົານ້ຳມັນທັງໝົດນີ້ໄປເຜົາເທິງແທ່ນບູຊາ.+
21 ແຕ່ຊີ້ນສ່ວນເອິກກັບຂາຫຼັງເບື້ອງຂວາ ອາໂຣນເອົາຊູໄປຊູມາເປັນເຄື່ອງບູຊາຊູໄປມາຕໍ່ໜ້າພະເຢໂຫວາຕາມທີ່ໂມເຊໄດ້ສັ່ງ.+
22 ແລ້ວອາໂຣນກໍເດ່ມືໄປທາງປະຊາຊົນ ແລະອວຍພອນໃຫ້ເຂົາເຈົ້າ.+ ຫຼັງຈາກເຜົາເຄື່ອງບູຊາໄຖ່ບາບ ເຄື່ອງບູຊາເຜົາ ແລະເຄື່ອງບູຊາສ້າງຄວາມສະຫງົບສຸກແລ້ວໆ ລາວກໍຍ່າງອອກ*ຈາກແທ່ນ.
23 ສຸດທ້າຍ ໂມເຊກັບອາໂຣນເຂົ້າໄປໃນເຕັ້ນສັກສິດ ແລະຫຼັງຈາກອອກມາ ເຂົາເຈົ້າກໍອວຍພອນປະຊາຊົນ.+
ແລ້ວປະຊາຊົນກໍໄດ້ເຫັນລິດເດດຂອງພະເຢໂຫວາ.+
24 ຈາກນັ້ນ ພະເຢໂຫວາໄດ້ສົ່ງໄຟລົງມາ+ເຜົາເຄື່ອງບູຊາເຜົາກັບນ້ຳມັນສ່ວນຕ່າງໆທີ່ຢູ່ເທິງແທ່ນບູຊາ. ປະຊາຊົນກໍພາກັນໂຫ່ຮ້ອງດ້ວຍຄວາມງຶດງໍ້ ແລະໝູບໜ້າລົງພື້ນ.+
ຂໍ
^ ຫຼື “ເຕັ້ນຂໍການຊີ້ນຳ.” ເບິ່ງສ່ວນອະທິບາຍຄຳສັບ.
^ ຫຼື “ຕະກູນ”
^ ໝາຍເຖິງຕັ້ງແຕ່ຫົວເຂົ່າໄປຈົນຮອດຂໍ້ຕີນ
^ ແກະໃນສະໄໝນັ້ນມີຫາງທີ່ມີນ້ຳມັນຫຼາຍ ປົກກະຕິແລ້ວຈະໜັກບໍ່ຕ່ຳກວ່າ 5 ກິໂລກຣາມ
^ ແປຕາມໂຕວ່າ “ລາວກໍລົງມາ”
