ສຸພາສິດ 25:1-28
25 ນີ້ແມ່ນສຸພາສິດຂອງໂຊໂລໂມນ+ທີ່ຄົນຂອງເຮເຊກີຢາ+ກະສັດຂອງຢູດາໄດ້ລວບລວມແລະຄັດລອກໄວ້.
2 ພະເຈົ້າໄດ້ຮັບກຽດເມື່ອເພິ່ນເກັບເລື່ອງຕ່າງໆໄວ້ເປັນຄວາມລັບ+ແລະກະສັດກໍໄດ້ຮັບກຽດເມື່ອເຂົາເຈົ້າພະຍາຍາມຊອກຫາຄວາມຮູ້ທີ່ເຊື່ອຖືໄດ້.
3 ຄືກັບທີ່ພວກເຮົາບໍ່ເຂົ້າໃຈສະຫວັນທີ່ສູງໆແລະທະເລທີ່ເລິກໆພວກເຮົາກໍບໍ່ສາມາດເຂົ້າໃຈຄວາມຄິດ*ທັງໝົດຂອງກະສັດໄດ້.
4 ໃຫ້ຫຼອມເອົາຂີ້ແຮ່ອອກຈາກເງິນແລ້ວກໍຈະໄດ້ເງິນຢ່າງດີ.+
5 ໃຫ້ກຳຈັດຄົນຊົ່ວອອກໄປຈາກຕໍ່ໜ້າກະສັດແລ້ວບັນລັງຂອງກະສັດຈະໝັ້ນຄົງແລະລາວຈະປົກຄອງດ້ວຍຄວາມຍຸຕິທຳຕໍ່ໄປ.+
6 ຢ່າຍົກຍ້ອງໂຕເອງຕໍ່ໜ້າກະສັດ+ແລະຢ່າໄປຢູ່ໃນກຸ່ມຂອງຄົນສຳຄັນ+
7 ຍ້ອນມັນດີກວ່າທີ່ໃຫ້ກະສັດເວົ້າກັບລູກວ່າ: “ຂຶ້ນມານີ້ແມ້”
ແທນທີ່ຈະເຮັດໃຫ້ໂຕເອງອັບອາຍຕໍ່ໜ້າພວກເຈົ້ານາຍ.+
8 ຢ່າຟ້າວໄປຟ້ອງຮ້ອງກັນຢູ່ສານຍ້ອນວ່າຖ້າມີຄົນພິສູດໄດ້ວ່າເຈົ້າຜິດ ເຈົ້າຈະເຮັດແນວໃດ?+
9 ໃຫ້ເຈົ້າໄປລົມກັບຄູ່ກໍລະນີຂອງເຈົ້າກ່ອນ+ແຕ່ຢ່າເປີດເຜີຍຄວາມລັບຂອງລາວ+
10 ເພາະຖ້າເຈົ້າເປີດເຜີຍ ຄົນທີ່ໄດ້ຍິນເລື່ອງນັ້ນຈະເຮັດໃຫ້ເຈົ້າອັບອາຍແລະສິ່ງຊົ່ວ*ທີ່ເຈົ້າແພ່ອອກໄປກໍຈະເອົາກັບຄືນມາບໍ່ໄດ້.
11 ຄຳເວົ້າທີ່ເວົ້າອອກມາຖືກຈັງຫວະເປັນຄືກັບໝາກແອັບເປິ້ນຄຳທີ່ຢູ່ໃນກະຕ່າເງິນ.+
12 ຄຳຕັກເຕືອນຈາກຄົນສະຫຼາດເປັນຄືກັບຕຸ້ມຫູຄຳແລະເຄື່ອງປະດັບທີ່ເປັນຄຳຢ່າງດີສຳລັບຄົນທີ່ຍອມຟັງ.+
13 ຄືກັບຫິມະເຢັນໆໃນລະດູເກັບກ່ຽວທີ່ເຮັດໃຫ້ສົດຊື່ນຄົນສົ່ງຂ່າວທີ່ສັດຊື່ກໍເຮັດໃຫ້ເຈົ້ານາຍທີ່ສົ່ງລາວໄປສົດຊື່ນ.+
14 ຄົນທີ່ຂີ້ໂມ້ວ່າຈະໃຫ້ຂອງຂວັນແຕ່ກໍບໍ່ເຄີຍໃຫ້ຈັກເທື່ອກໍເປັນຄືກັບລົມແລະຂີ້ເຝື້ອທີ່ບໍ່ມີຝົນ.+
15 ຄວາມອົດທົນຊ່ວຍໃຫ້ຊະນະໃຈຫົວໜ້າກອງທັບໄດ້ແລະຄຳເວົ້າທີ່ອ່ອນໂຍນຊ່ວຍໃຫ້ຊະນະການຕໍ່ຕ້ານທີ່ຮຸນແຮງໄດ້.*+
16 ຖ້າເຈົ້າເຈິນ້ຳເຜີ້ງກໍໃຫ້ກິນແບບພໍດີພໍງາມເພາະຖ້າເຈົ້າກິນຫຼາຍໂພດ ເຈົ້າອາດຈະຮາກອອກມາ.+
17 ຢ່າໄປເຮືອນເພື່ອນບ້ານຫຼາຍໂພດລາວຈະໄດ້ບໍ່ເບື່ອແລະຊັງເຈົ້າ.
18 ຄົນທີ່ເປັນພະຍານຕົວະໃສ່ຮ້າຍເພື່ອນບ້ານກໍເປັນຄືກັບໄມ້ຄ້ອນ* ດາບ ແລະລູກທະນູທີ່ແຫຼມໆ.+
19 ການໄວ້ໃຈຄົນທີ່ເຊື່ອຖືບໍ່ໄດ້*ຕອນທີ່ມີບັນຫາກໍເປັນຄືກັບການຫຍ້ຳໂດຍໃຊ້ແຂ້ວທີ່ຫັກແລ້ວແລະການຍ່າງໂດຍໃຊ້ຕີນທີ່ພິການ.
20 ຄົນທີ່ຮ້ອງເພງໃສ່ຄົນທີ່ໂສກເສົ້າ+ກໍເປັນຄືກັບຄົນທີ່ແກ້ເຄື່ອງນຸ່ງໃນມື້ທີ່ໜາວໆແລະເປັນຄືກັບນ້ຳສົ້ມສາຍຊູທີ່ຖືກເທໃສ່ຜົງໂຊດາ.*
21 ຖ້າສັດຕູຂອງເຈົ້າຫິວກໍເອົາເຂົ້າໃຫ້ລາວກິນແລະຖ້າລາວຫິວນ້ຳກໍເອົານ້ຳໃຫ້ລາວກິນ.+
22 ຖ້າເຈົ້າເຮັດແນວນັ້ນກໍຈະເປັນຄືກັບການກອງຖ່ານໄຟຮ້ອນໆຢູ່ເທິງຫົວຂອງລາວ*+ແລະພະເຢໂຫວາຈະໃຫ້ລາງວັນເຈົ້າ.
23 ລົມຈາກທິດເໜືອເຮັດໃຫ້ຝົນຕົກແຮງແລະຄົນທີ່ມັກເວົ້າຂວັນເຮັດໃຫ້ຄົນອື່ນຊັງໜ້າລາວ.+
24 ຢູ່ເທິງແຈດາດຟ້າຄົນດຽວກໍດີກວ່າຢູ່ເຮືອນດຽວກັນກັບເມຍທີ່ມັກຫາເລື່ອງຜິດຖຽງກັນ.*+
25 ຂ່າວດີຈາກບ່ອນທີ່ຫ່າງໄກເປັນຄືກັບນ້ຳເຢັນໆສຳລັບຄົນທີ່ເມື່ອຍຫຼາຍ.+
26 ຄົນທີ່ເຮັດສິ່ງທີ່ຖືກຕ້ອງທີ່ຍອມແພ້*ຄົນຊົ່ວເປັນຄືກັບນ້ຳອອກບໍ່ທີ່ມີແຕ່ຂີ້ຕົມແລະນ້ຳສ້າງທີ່ເປື້ອນໆ.
27 ການກິນນ້ຳເຜີ້ງຫຼາຍໂພດບໍ່ດີ+ແລະການຊອກຫາກຽດໃຫ້ໂຕເອງກໍບໍ່ດີຄືກັນ.+
28 ຄົນທີ່ຄວບຄຸມອາລົມຂອງໂຕເອງບໍ່ໄດ້ກໍເປັນຄືກັບເມືອງທີ່ກຳແພງຖືກທຳລາຍແລ້ວ.+
ຂໍ
^ ແປຕາມໂຕວ່າ “ຫົວໃຈ”
^ ຫຼື “ຂ່າວລືທີ່ມີເຈຕະນາຊົ່ວ”
^ ແປຕາມໂຕວ່າ “ເຮັດໃຫ້ກະດູກຫັກໄດ້”
^ ອາດໝາຍເຖິງໄມ້ຄ້ອນທີ່ມີປາຍແຫຼມເຊິ່ງໃຊ້ເປັນອາວຸດ
^ ຫຼືອາດແປວ່າ “ຄົນທໍລະຍົດ”
^ ສານເຄມີຊະນິດໜຶ່ງທີ່ເປັນດ່າງ
^ ເພື່ອເຮັດໃຫ້ຄວາມແຂງກະດ້າງຂອງລາວອ່ອນລົງ
^ ຫຼື “ມັກຈັບຜິດ; ມັກຈົ່ມ”
^ ຫຼື “ຍອມໃຫ້”
