ອາໂມດ 1:1-15
1 ຕໍ່ໄປນີ້ແມ່ນຄຳເວົ້າຂອງອາໂມດ*ທີ່ເປັນຄົນລ້ຽງແກະຈາກເມືອງເຕໂກອາ.+ ສອງປີກ່ອນເກີດແຜ່ນດິນໄຫວ+ ຕອນທີ່ກະສັດອຸດຊີຢາ+ປົກຄອງຢູດາ ແລະກະສັດເຢໂຣໂບອາມ+ລູກຊາຍຂອງໂຢອາດປົກຄອງອິດສະຣາເອນ+ ພະເຈົ້າໄດ້ໃຫ້ອາໂມດເຫັນນິມິດກ່ຽວກັບອິດສະຣາເອນ.
2 ລາວເວົ້າວ່າ:
“ພະເຢໂຫວາຈະແຜດສຽງອອກຈາກຊີໂອນຄືກັບໂຕສິງແລະເພິ່ນຈະຮ້ອງດັງໆຈາກເມືອງເຢຣູຊາເລັມ.
ທົ່ງຫຍ້າຂອງຜູ້ລ້ຽງແກະຈະແຫ້ງແລ້ງແລະພືດຜັກຢູ່ຈອມພູກາເມນຈະຫ່ຽວແຫ້ງໄປ.+
3 ພະເຢໂຫວາເວົ້າວ່າ‘ເຮົາຈະເຮັດຕາມທີ່ໄດ້ຕັດສິນໃຈໄວ້ແລ້ວ ຍ້ອນເມືອງດາມາເຊກະບົດເທື່ອແລ້ວເທື່ອອີກ.*ເຂົາເຈົ້າທັບກິລຽດດ້ວຍແຜ່ນເຫຼັກ.*+
4 ດັ່ງນັ້ນ ເຮົາຈະທຳລາຍເຮືອນຂອງຮາຊາເອນຄືກັບສົ່ງໄຟມາຈູດ+ແລະໄຟນັ້ນຈະທຳລາຍປ້ອມສູງຕ່າງໆຂອງເບັນຮາດັດ.+
5 ເຮົາຈະຫັກກອນປະຕູເມືອງຂອງດາມາເຊ.+ເຮົາຈະທຳລາຍຄົນທີ່ຢູ່ໃນເມືອງບີເກັດອາເວນກັບຜູ້ທີ່ປົກຄອງ*ເມືອງເບັດເອເດັນແລະຄົນທີ່ຢູ່ຊີເຣຍຈະຕ້ອງໄປເປັນຊະເລີຍຢູ່ກີເຣ.’+ ພະເຢໂຫວາເວົ້າໄວ້ແນວນີ້.
6 ພະເຢໂຫວາເວົ້າວ່າ‘ເຮົາຈະເຮັດຕາມທີ່ໄດ້ຕັດສິນໃຈໄວ້ແລ້ວ ຍ້ອນເມືອງຄາຊາກະບົດເທື່ອແລ້ວເທື່ອອີກ.+ເຂົາເຈົ້າຈັບທຸກຄົນໄປເປັນຊະເລີຍ+ແລະສົ່ງຄົນເຫຼົ່ານັ້ນໃຫ້ພວກເອໂດມ.
7 ດັ່ງນັ້ນ ເຮົາຈະທຳລາຍກຳແພງເມືອງຄາຊາຄືກັບສົ່ງໄຟມາຈູດ+ແລະໄຟນັ້ນຈະທຳລາຍປ້ອມສູງຕ່າງໆຂອງເມືອງນັ້ນ.
8 ເຮົາຈະທຳລາຍຄົນທີ່ຢູ່ໃນເມືອງອາຊະໂດດ+ກັບຜູ້ທີ່ປົກຄອງເມືອງອາຊະກາໂລນ.+ເຮົາຈະລົງໂທດເມືອງເອັກໂຣນ+ແລະຄົນຟີລິດສະຕີນທີ່ຍັງເຫຼືອຢູ່ຈະຕາຍໝົດ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າໄວ້ແນວນີ້.
9 ພະເຢໂຫວາເວົ້າວ່າ‘ເຮົາຈະເຮັດຕາມທີ່ໄດ້ຕັດສິນໃຈໄວ້ແລ້ວ ຍ້ອນເມືອງຕີເຣກະບົດເທື່ອແລ້ວເທື່ອອີກ.+ເຂົາເຈົ້າສົ່ງຊະເລີຍທັງໝົດໄປໃຫ້ພວກເອໂດມແລະລືມສັນຍາທີ່ເຄີຍເຮັດກັບພວກອ້າຍນ້ອງຂອງເຂົາເຈົ້າ.+
10 ດັ່ງນັ້ນ ເຮົາຈະທຳລາຍກຳແພງເມືອງຕີເຣຄືກັບສົ່ງໄຟມາຈູດແລະໄຟນັ້ນຈະທຳລາຍປ້ອມສູງຕ່າງໆຂອງເມືອງນັ້ນ.’+
11 ພະເຢໂຫວາເວົ້າວ່າ‘ເຮົາຈະເຮັດຕາມທີ່ໄດ້ຕັດສິນໃຈໄວ້ແລ້ວ ຍ້ອນເອໂດມກະບົດເທື່ອແລ້ວເທື່ອອີກ.+ລາວຈັບດາບໄລ່ຟັນອ້າຍນ້ອງຂອງໂຕເອງ+ແລະລາວບໍ່ມີຄວາມເມດຕາ.ລາວຈີກເຂົາເຈົ້າບໍ່ຢຸດບໍ່ເຊົາດ້ວຍຄວາມໃຈຮ້າຍແລະລາວໃຈຮ້າຍໃຫ້ເຂົາເຈົ້າຕະຫຼອດ.+
12 ດັ່ງນັ້ນ ເຮົາຈະທຳລາຍເຕມານຄືກັບສົ່ງໄຟມາຈູດ+ແລະໄຟນັ້ນຈະທຳລາຍປ້ອມສູງຕ່າງໆຂອງເມືອງໂບຊະຣາ.’+
13 ພະເຢໂຫວາເວົ້າວ່າ‘ເຮົາຈະເຮັດຕາມທີ່ໄດ້ຕັດສິນໃຈໄວ້ແລ້ວ ຍ້ອນຄົນອຳໂມນກະບົດເທື່ອແລ້ວເທື່ອອີກ.+ເຂົາເຈົ້າປາດທ້ອງຂອງພວກຜູ້ຍິງຖືພາທີ່ຢູ່ກິລຽດ ເພື່ອຂະຫຍາຍເຂດແດນຂອງເຂົາເຈົ້າໃຫ້ກວ້າງອອກ.+
14 ດັ່ງນັ້ນ ເຮົາຈະທຳລາຍກຳແພງເມືອງຣັບບາຄືກັບສົ່ງໄຟມາຈູດ+ແລະໄຟນັ້ນຈະທຳລາຍປ້ອມສູງຕ່າງໆຂອງເມືອງນັ້ນ.ຕອນທີ່ສັດຕູໂຈມຕີເມືອງຈະມີສຽງຮ້ອງດັງໆຂອງພວກທະຫານແລະໃນມື້ນັ້ນຈະມີລົມພາຍຸພັດແຮງຫຼາຍ.
15 ແລ້ວກະສັດຂອງເຂົາເຈົ້າກັບພວກເຈົ້າໜ້າທີ່ລະດັບສູງ*ຈະຖືກຈັບໄປເປັນຊະເລີຍ.’+ ພະເຢໂຫວາເວົ້າໄວ້ແນວນີ້.”
ຂໍ
^ ແປວ່າ “ເປັນພາລະ; ແບກພາລະ”
^ ແປຕາມໂຕວ່າ “ສຳລັບການກະບົດ 3 ເທື່ອແລະ 4 ເທື່ອ”
^ ແຜ່ນເຫຼັກທີ່ໃຊ້ງົວລາກເພື່ອໃຫ້ເມັດເຂົ້າຫຼົ່ນອອກຈາກຮວງ ເຊິ່ງປົກກະຕິແລ້ວເຮັດຈາກໄມ້
^ ແປຕາມໂຕວ່າ “ຜູ້ທີ່ຖືຄ້ອນຂອງກະສັດ”
^ ຫຼືອາດແປວ່າ “ພວກລູກຊາຍຂອງກະສັດ”
