ອາໂມດ 7:1-17
7 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດໃຫ້ຂ້ອຍເຫັນນິມິດດັ່ງນີ້. ເພິ່ນໃຫ້ຝູງຕັກກະແຕນມາກິນຜົນລະປູກທີ່ຫາກໍປົ່ງຂຶ້ນໃໝ່ໃນລະດູໜາວ.* ເຫດການນີ້ເກີດຂຶ້ນຫຼັງຈາກທົ່ງຫຍ້າຂອງກະສັດອິດສະຣາເອນຖືກກ່ຽວແລ້ວໆ.
2 ເມື່ອຝູງຕັກກະແຕນກິນຜົນລະປູກໃນແຜ່ນດິນໝົດແລ້ວ ຂ້ອຍເລີຍເວົ້າກັບເພິ່ນວ່າ: “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເອີ້ຍ ຂໍພະອົງຍົກໂທດໃຫ້ຄົນຂອງພະອົງແດ່.+ ລູກຫຼານຂອງຢາໂຄບຈະລອດ*ໄດ້ແນວໃດ? ເຂົາເຈົ້າບໍ່ມີເຫື່ອບໍ່ມີແຮງເລີຍ!”+
3 ດັ່ງນັ້ນ ພະເຢໂຫວາຈຶ່ງປ່ຽນໃຈ.*+ ພະເຢໂຫວາເວົ້າວ່າ: “ສິ່ງທີ່ເຈົ້າໄດ້ເຫັນນີ້ຈະບໍ່ເກີດຂຶ້ນ.”
4 ແລ້ວພະເຢໂຫວາພະເຈົ້າຜູ້ຍິ່ງໃຫຍ່ສູງສຸດກໍໃຫ້ຂ້ອຍເຫັນນິມິດດັ່ງນີ້. ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດໄດ້ໃຊ້ໄຟລົງມາເພື່ອລົງໂທດ. ໄຟນັ້ນເຮັດໃຫ້ນ້ຳໃນທະເລແຫ້ງໝົດແລະໄໝ້ແຜ່ນດິນໄປບາງສ່ວນ.
5 ຂ້ອຍຈຶ່ງເວົ້າກັບເພິ່ນວ່າ: “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເອີ້ຍ ຂໍພະອົງຢ່າເຮັດແນວນັ້ນເລີຍ.+ ລູກຫຼານຂອງຢາໂຄບຈະລອດໄດ້ແນວໃດ? ເຂົາເຈົ້າບໍ່ມີເຫື່ອບໍ່ມີແຮງເລີຍ!”+
6 ດັ່ງນັ້ນ ພະເຢໂຫວາຈຶ່ງປ່ຽນໃຈ.+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ: “ສິ່ງທີ່ເຈົ້າໄດ້ເຫັນນີ້ຈະບໍ່ເກີດຂຶ້ນຄືກັນ.”
7 ແລ້ວເພິ່ນກໍໃຫ້ຂ້ອຍເຫັນນິມິດດັ່ງນີ້. ພະເຢໂຫວາຢືນຢູ່ເທິງກຳແພງທີ່ມີລູກດິ່ງເນັ່ງຢູ່ ແລະລູກດິ່ງກໍຢູ່ມືເພິ່ນ.
8 ພະເຢໂຫວາຖາມຂ້ອຍວ່າ: “ອາໂມດເຈົ້າເຫັນອີ່ຫຍັງ?” ຂ້ອຍຕອບວ່າ: “ເຫັນລູກດິ່ງ.” ພະເຢໂຫວາເວົ້າຕໍ່ໄປວ່າ: “ເຮົາກຳລັງຈະເອົາລູກດິ່ງແທກພວກອິດສະຣາເອນຄົນຂອງເຮົາ. ເຮົາຈະບໍ່ຍົກໂທດໃຫ້ເຂົາເຈົ້າອີກຕໍ່ໄປ.+
9 ບ່ອນນະມັດສະການຂອງອີຊາກ+ຈະຖືກເຮັດໃຫ້ຮ້າງເປົ່າ ແລະບ່ອນບໍລິສຸດຂອງອິດສະຣາເອນຈະຖືກທຳລາຍ.+ ເຮົາຈະໃຊ້ດາບຂ້າຄອບຄົວຂອງເຢໂຣໂບອາມ.”+
10 ປະໂລຫິດອາມາຊີຢາທີ່ຢູ່ເມືອງເບເທນ+ໄດ້ສົ່ງຂ່າວໄປໃຫ້ເຢໂຣໂບອາມ+ກະສັດຂອງອິດສະຣາເອນວ່າ: “ອາໂມດກຳລັງຍົວະຄົນອື່ນໃຫ້ຕໍ່ຕ້ານທ່ານໃຫ້ລູກຫຼານອິດສະຣາເອນໄດ້ຍິນ.+ ປະຊາຊົນໃນແຜ່ນດິນກໍຮັບບໍ່ໄດ້ກັບຄຳເວົ້າຂອງລາວ+
11 ເພາະອາໂມດເວົ້າວ່າ ‘ເຢໂຣໂບອາມຈະຖືກຂ້າດ້ວຍດາບ ແລະພວກອິດສະຣາເອນຈະຕ້ອງໄປເປັນຊະເລີຍຢູ່ປະເທດອື່ນແນ່ນອນ.’”+
12 ອາມາຊີຢາເວົ້າໃຫ້ອາໂມດວ່າ: “ນັກນິມິດໃຫຍ່ເອີ້ຍ ໜີຈາກນີ້ໄປຢູ່ຢູດາສະ. ໄປທຳມາຫາກິນ*ແລະພະຍາກອນຢູ່ພຸ້ນ.+
13 ເຈົ້າຢ່າມາພະຍາກອນຢູ່ເບເທນອີກຕໍ່ໄປ+ ເພາະຢູ່ນີ້ກໍມີບ່ອນໃຫ້ກະສັດນະມັດສະການ+ແລະມີວິຫານຂອງຊາດຢູ່ແລ້ວ.”
14 ອາໂມດຕອບອາມາຊີຢາວ່າ: “ຂ້ອຍບໍ່ແມ່ນຜູ້ພະຍາກອນ ທັງບໍ່ແມ່ນລູກຊາຍຂອງຜູ້ພະຍາກອນ. ແຕ່ກີ້ຂ້ອຍເປັນແຕ່ຄົນລ້ຽງແກະ+ແລະເປັນຄົນເບິ່ງແຍງຕົ້ນໝາກເດື່ອ.*
15 ແຕ່ພະເຢໂຫວາໃຫ້ຂ້ອຍປະວຽກລ້ຽງແກະ ແລະພະເຢໂຫວາບອກຂ້ອຍວ່າ ‘ໄປພະຍາກອນໃຫ້ພວກອິດສະຣາເອນຄົນຂອງເຮົາຟັງ.’+
16 ຟັງດີໆເດີ້ ພະເຢໂຫວາເວົ້າແນວນີ້ ‘ເຈົ້າໄດ້ເວົ້າວ່າ “ຢ່າພະຍາກອນຕໍ່ສູ້ອິດສະຣາເອນ+ ແລະຢ່າປະກາດ+ຄຳຕັດສິນຕໍ່ລູກຫຼານຂອງອີຊາກ.”
17 ດັ່ງນັ້ນ ພະເຢໂຫວາເວົ້າວ່າ “ເມຍຂອງເຈົ້າຈະເປັນໂສເພນີຢູ່ໃນເມືອງ. ລູກຊາຍແລະລູກສາວຂອງເຈົ້າຈະຖືກຂ້າດ້ວຍດາບ. ດິນຂອງເຈົ້າຈະຖືກແທກແລະແບ່ງໃຫ້ຄົນອື່ນ. ສ່ວນເຈົ້າເອງຈະຕາຍຢູ່ແຜ່ນດິນຂອງຄົນຕ່າງຊາດ ແລະພວກອິດສະຣາເອນຈະຕ້ອງໄປເປັນຊະເລີຍຢູ່ປະເທດອື່ນແນ່ນອນ.”’”+
ຂໍ ຄວາມ ໄຂ ເງື່ອນ
^ ໝາຍເຖິງລະຫວ່າງເດືອນມັງກອນແລະເດືອນກຸມພາ
^ ແປຕາມໂຕວ່າ “ລຸກຂຶ້ນ”
^ ຫຼື “ຮູ້ສຶກເສຍໃຈ”
^ ແປຕາມໂຕວ່າ “ກິນເຂົ້າຈີ່”
^ ຫຼື “ຄົນກີດໝາກເດື່ອ.” ໝາຍເຖິງໝາກເດື່ອຊະນິດໜຶ່ງໃນອິດສະຣາເອນທີ່ຊື່ຊີກາມົນ.