ເນເຮມີຢາ 6:1-19
6 ເມື່ອສັນບັນລັດ ໂຕເບຍ+ ເກເຊມຄົນອາຣັບ+ ແລະພວກສັດຕູຄົນອື່ນໆຮູ້ວ່າຂ້ອຍແປງກຳແພງ+ຈົນບໍ່ມີບ່ອນໃດເພແລ້ວ (ຕອນນັ້ນຂ້ອຍຍັງບໍ່ໄດ້ໃສ່ປະຕູເທື່ອ)+
2 ສັນບັນລັດແລະເກເຊມກໍຟ້າວໃຫ້ຄົນມາບອກຂ້ອຍວ່າ: “ໃຫ້ເຮົານັດເຈິກັນຢູ່ບ້ານໜຶ່ງໃນທົ່ງພຽງໂອໂນ.”+ ເຂົາເຈົ້າວາງແຜນແບບນັ້ນຍ້ອນຢາກທຳຮ້າຍຂ້ອຍ.
3 ຂ້ອຍຈຶ່ງໃຫ້ຄົນໄປບອກເຂົາເຈົ້າວ່າ: “ຂ້ອຍມີວຽກສຳຄັນທີ່ຕ້ອງເຮັດ ຂ້ອຍໄປບໍ່ໄດ້ດອກ. ເປັນຫຍັງຂ້ອຍຕ້ອງປະວຽກນີ້ແລ້ວໄປຫາພວກເຈົ້າ?”
4 ເຂົາເຈົ້າໃຫ້ຄົນມາບອກຂ້ອຍແບບນີ້ 4 ເທື່ອ ແລະແຕ່ລະເທື່ອຂ້ອຍກໍຕອບຄືເກົ່າ.
5 ໃນເທື່ອທີ 5 ສັນບັນລັດໄດ້ໃຫ້ຄົນເອົາຈົດໝາຍມາໃຫ້ຂ້ອຍ. ຈົດໝາຍນັ້ນບໍ່ໄດ້ຈ້ຳກາປິດໄວ້.
6 ເນື້ອໃນຈົດໝາຍຂຽນວ່າ: “ຊາດຕ່າງໆໄດ້ຊ່າລືກັນແລະເກເຊມ+ກໍໄດ້ເວົ້າຄືກັນວ່າ ເຈົ້າກັບພວກຢິວກຳລັງວາງແຜນຈະກະບົດ+ກໍເລີຍພາກັນແປງກຳແພງ ແລະເຂົາເຈົ້າຍັງເວົ້າອີກວ່າເຈົ້າຈະຕັ້ງໂຕເອງເປັນກະສັດຂອງພວກຢິວ.
7 ເຈົ້າຍັງໄດ້ໃຫ້ພວກຜູ້ພະຍາກອນໄປປະກາດທົ່ວເມືອງເຢຣູຊາເລັມວ່າ ‘ຕອນນີ້ໃນຢູດາມີກະສັດແລ້ວ!’ ກ່ອນທີ່ກະສັດຈະຮູ້ ໃຫ້ພວກເຮົາມາລົມກັນເພື່ອຊ່ວຍກັນແກ້ໄຂບັນຫານີ້.”
8 ແຕ່ຂ້ອຍຕອບລາວວ່າ: “ທຸກສິ່ງທີ່ເຈົ້າເວົ້າບໍ່ແມ່ນຄວາມຈິງ ເຈົ້າແຕ່ງເລື່ອງຂຶ້ນມາເອງ.”
9 ເຂົາເຈົ້າພະຍາຍາມຂູ່ພວກເຮົາໃຫ້ຢ້ານໂດຍເວົ້າວ່າ: “ຈັກໜ້ອຍພວກມັນກະໝົດແຮງ ຈ້າງພວກມັນກະເຮັດບໍ່ແລ້ວ.”+ ຂ້ອຍຈຶ່ງອະທິດຖານຂໍກຳລັງຈາກພະເຈົ້າ.+
10 ຈາກນັ້ນ ຂ້ອຍກໍໄປເຮືອນຂອງເຊມາຢາລູກຊາຍຂອງເດລາຢາຫຼານຂອງເມເຮຕາເບນ. ຕອນນັ້ນລາວຢູ່ແຕ່ໃນເຮືອນບໍ່ອອກໄປໃສ. ລາວເວົ້າກັບຂ້ອຍວ່າ: “ໃຫ້ພວກເຮົານັດເຈິກັນຢູ່ວິຫານຂອງພະເຈົ້າທ່ຽງແທ້ ແລ້ວເຂົ້າໄປທາງໃນວິຫານແລະປິດປະຕູວິຫານໄວ້. ຄັນບໍ່ຊັ້ນ ພວກນັ້ນຈະຂ້າເຈົ້າໄດ້. ພວກນັ້ນຊິມາຂ້າເຈົ້າຕອນກາງຄືນ.”
11 ແຕ່ຂ້ອຍບອກລາວວ່າ: “ຂ້ອຍບໍ່ແມ່ນຄົນຂີ້ຢ້ານ ຊິໃຫ້ຂ້ອຍໜີຫວະ. ຄັນຂ້ອຍເຂົ້າໄປໃນວິຫານ ຂ້ອຍກໍຊິຖືກລົງໂທດເຖິງຕາຍຄືກັນ.+ ຂ້ອຍບໍ່ເຂົ້າໄປດອກ!”
12 ໃນຕອນນັ້ນ ຂ້ອຍກໍຮູ້ເລີຍວ່າພະເຈົ້າບໍ່ໄດ້ສົ່ງຜູ້ພະຍາກອນຄົນນີ້ມາຫາຂ້ອຍ ແຕ່ສັນບັນລັດກັບໂຕເບຍ+ຈ້າງລາວມາຕົວະຂ້ອຍ.
13 ເຂົາເຈົ້າຈ້າງລາວມາຂູ່ຂ້ອຍໃຫ້ຢ້ານແລະຫວັງວ່າຂ້ອຍຈະເຮັດຜິດເພື່ອເຂົາເຈົ້າຈະມີແນວເວົ້າໃຫ້ຂ້ອຍແລະທຳລາຍຊື່ສຽງຂອງຂ້ອຍ.
14 ຂ້ອຍຈຶ່ງອະທິດຖານວ່າ: “ພະເຈົ້າເອີ້ຍ ຂໍພະອົງຈື່ສິ່ງທີ່ໂຕເບຍ+ແລະສັນບັນລັດໄດ້ເຮັດ ແລະຂໍໃຫ້ພະອົງຈື່ວ່າໂນອາດີຢາທີ່ເປັນຜູ້ພະຍາກອນຍິງກັບພວກຜູ້ພະຍາກອນຄົນອື່ນໆໄດ້ພະຍາຍາມເຮັດໃຫ້ຂ້ອຍຢ້ານຕະຫຼອດ.”
15 ໃນທີ່ສຸດ ພວກເຮົາກໍແປງກຳແພງແລ້ວໃນວັນທີ 25 ເດືອນເອລູນ.* ພວກເຮົາໃຊ້ເວລາທັງໝົດ 52 ມື້.
16 ເມື່ອພວກສັດຕູຮູ້ວ່າພວກເຮົາແປງກຳແພງແລ້ວໆແລະຊາດຕ່າງໆກໍເຫັນ ພວກສັດຕູຈຶ່ງຮູ້ສຶກອາຍຫຼາຍ.+ ເຂົາເຈົ້າໄດ້ເຫັນວ່າພວກເຮົາເຮັດວຽກນີ້ແລ້ວກໍຍ້ອນພະເຈົ້າຊ່ວຍ.
17 ໃນສະໄໝນັ້ນ ພວກຜູ້ນຳ+ຂອງຢູດາມັກຂຽນຈົດໝາຍໄປຫາໂຕເບຍຕະຫຼອດແລະໂຕເບຍກໍຕອບຈົດໝາຍຂອງເຂົາເຈົ້າ.
18 ຫຼາຍຄົນໃນຢູດາໄດ້ສັນຍາກັບໂຕເບຍວ່າຈະສະໜັບສະໜູນລາວ ຍ້ອນວ່າໂຕເບຍເປັນລູກເຂີຍຂອງເຊການີອາທີ່ເປັນລູກຊາຍຂອງອາຣາກ+ ແລະເຢໂຮຮານັນລູກຊາຍຂອງໂຕເບຍໄດ້ແຕ່ງດອງກັບລູກສາວຂອງເມຊຸນລຳ+ທີ່ເປັນລູກຊາຍຂອງເບເຣກີຢາ.
19 ເຂົາເຈົ້າມັກເວົ້າແຕ່ເລື່ອງດີໆຂອງໂຕເບຍໃຫ້ຂ້ອຍຟັງ ແລ້ວກໍເອົາສິ່ງທີ່ຂ້ອຍເວົ້າໄປບອກໂຕເບຍ. ຈາກນັ້ນ ໂຕເບຍກໍສົ່ງຈົດໝາຍມາຂູ່ຂ້ອຍຕະຫຼອດເພື່ອໃຫ້ຂ້ອຍຢ້ານ.+
ຂໍ
^ ເບິ່ງພາກຜະໜວກ ຂ15
