ເພງສັນລະເສີນ 50:1-23
ເພງຂອງອາສັບ.+
50 ພະເຢໂຫວາພະເຈົ້າທີ່ເໜືອກວ່າພະເຈົ້າອື່ນໆ*+ໄດ້ເວົ້າໄວ້.ເພິ່ນເອີ້ນທຸກຄົນທີ່ຢູ່ໃນໂລກຕັ້ງແຕ່ທິດຕາເວັນອອກຈົນຮອດທິດຕາເວັນຕົກໃຫ້ມາຫາເພິ່ນ.
2 ພະເຈົ້າສົ່ງແສງສະຫວ່າງອອກຈາກຊີໂອນ ເມືອງທີ່ງາມແລະສົມບູນແບບ.+
3 ພະເຈົ້າຂອງພວກເຮົາຈະມາແລະເພິ່ນຈະເຮັດບາງຢ່າງແນ່ນອນ.+
ຢູ່ທາງໜ້າຂອງເພິ່ນມີໄຟລຸກບັກແຮງໆ+ແລະຢູ່ອ້ອມໂຕເພິ່ນກໍມີລົມພາຍຸໃຫຍ່ພັດແຮງແທ້ແຮງວ່າ.+
4 ເພິ່ນເອີ້ນຜູ້ທີ່ຢູ່ໃນສະຫວັນແລະຜູ້ທີ່ຢູ່ໃນໂລກມາ+ເພື່ອເພິ່ນຈະຕັດສິນປະຊາຊົນຂອງເພິ່ນ.+
5 ເພິ່ນເວົ້າວ່າ: “ໃຫ້ພາຄົນສັດຊື່ມາຫາເຮົາເຊິ່ງແມ່ນຜູ້ທີ່ເອົາເຄື່ອງບູຊາມາເຮັດສັນຍາກັບເຮົາ.”+
6 ສະຫວັນປະກາດຄວາມຍຸຕິທຳຂອງພະເຈົ້າຍ້ອນພະເຈົ້າເປັນຜູ້ຕັດສິນ.+ (ເຊລາ)*
7 ເພິ່ນເວົ້າວ່າ: “ປະຊາຊົນຂອງເຮົາເອີ້ຍ ໃຫ້ຕັ້ງໃຈຟັງສິ່ງທີ່ເຮົາຈະເວົ້າເດີ້!ພວກອິດສະຣາເອນເອີ້ຍ ເຮົາຈະສະເໜີຫຼັກຖານວ່າພວກເຈົ້າມີຄວາມຜິດຫຍັງແດ່.+
ເຮົາແມ່ນພະເຈົ້າ ພະເຈົ້າຂອງພວກເຈົ້າ.+
8 ເຮົາບໍ່ໄດ້ຮ້າຍພວກເຈົ້າຍ້ອນເຄື່ອງບູຊາທີ່ພວກເຈົ້າເອົາມາໃຫ້ເຮົາຫຼືຍ້ອນເຄື່ອງບູຊາທີ່ພວກເຈົ້າເຜົາໃຫ້ເຮົາເປັນປະຈຳ.+
9 ເຮົາບໍ່ຈຳເປັນຕ້ອງເອົາງົວໂຕຜູ້ຈາກເຮືອນຂອງພວກເຈົ້າແລະບໍ່ຈຳເປັນຕ້ອງເອົາແບ້ໂຕຜູ້ຈາກຄອກຂອງພວກເຈົ້າ+
10 ຍ້ອນສັດປ່າທຸກໂຕເປັນຂອງເຮົາຢູ່ແລ້ວ.+ແມ່ນແຕ່ສັດຮ້າຍທີ່ຢູ່ເທິງພູເປັນພັນໆໜ່ວຍກໍເປັນຂອງເຮົາຄືກັນ.
11 ເຮົາຮູ້ຈັກນົກທຸກໂຕທີ່ຢູ່ເທິງພູເປັນຢ່າງດີ+ແລະສັດຢູ່ທົ່ງຫຍ້າທີ່ນັບບໍ່ຫຼ້ອນກໍເປັນຂອງເຮົາທັງໝົດ.
12 ເຖິງວ່າເຮົາຫິວ ເຮົາກໍຈະບໍ່ບອກເຈົ້າດອກຍ້ອນວ່າໂລກກັບທຸກສິ່ງທີ່ຢູ່ໃນໂລກກໍເປັນຂອງເຮົາ.+
13 ເຮົາຈະຕ້ອງກິນຊີ້ນຂອງງົວໂຕຜູ້ບໍ?ຫຼືຈະຕ້ອງກິນເລືອດຂອງແບ້ຊັ້ນເບາະ?+
14 ໃຫ້ເອົາຄວາມຮູ້ສຶກຂອບໃຈມາເປັນເຄື່ອງບູຊາໃຫ້ພະເຈົ້າ+ແລະເຮັດຕາມທີ່ສາບານກັບພະເຈົ້າສູງສຸດ.+
15 ໃຫ້ຮ້ອງຫາເຮົາໃນຍາມທີ່ພວກເຈົ້າທຸກໃຈ.+
ເຮົາຈະຊ່ວຍພວກເຈົ້າແລະພວກເຈົ້າຈະສັນລະເສີນເຮົາ.”+
16 ແຕ່ພະເຈົ້າຈະເວົ້າກັບຄົນຊົ່ວວ່າ:
“ພວກເຈົ້າມີສິດຫຍັງທີ່ເອົາຂໍ້ກຳນົດຂອງເຮົາມາອ້າງ+ຫຼືເວົ້າເລື່ອງຄຳສັນຍາຂອງເຮົາ?+
17 ພວກເຈົ້າຊັງຄຳສັ່ງສອນຂອງເຮົາແລະບໍ່ຍອມເຮັດຕາມສິ່ງທີ່ເຮົາບອກ.+
18 ເມື່ອພວກເຈົ້າເຫັນຂີ້ລັກ ພວກເຈົ້າກໍມັກລາວ*+ແລະພວກເຈົ້າກໍໄປເປັນໝູ່ກັບຄົນຫຼິ້ນຊູ້.
19 ພວກເຈົ້າມັກເວົ້າແນວບໍ່ດີໃຫ້ຄົນນັ້ນຄົນນີ້ຟັງແລະພວກເຈົ້າກໍມັກເວົ້າຕົວະຕະຫຼອດ.+
20 ພວກເຈົ້າມັກເລົ່າເລື່ອງທີ່ບໍ່ດີກ່ຽວກັບອ້າຍນ້ອງຂອງໂຕເອງໃຫ້ຄົນອື່ນຟັງ+ແລະມັກປະຈານຄວາມຜິດ*ອ້າຍນ້ອງຂອງໂຕເອງ.
21 ຕອນທີ່ພວກເຈົ້າເຮັດສິ່ງເຫຼົ່ານີ້ ເຮົາກໍບໍ່ໄດ້ເວົ້າຫຍັງພວກເຈົ້າຈຶ່ງຄິດວ່າເຮົາຄືຊິເປັນຄືກັບພວກເຈົ້າ.
ແຕ່ຕອນນີ້ ເຮົາຈະຕັກເຕືອນພວກເຈົ້າແລະຈະບອກໃຫ້ຮູ້ວ່າພວກເຈົ້າເຮັດຜິດແນວໃດ.+
22 ພວກເຈົ້າທີ່ລືມພະເຈົ້າ+ ຂໍໃຫ້ຄິດເຖິງເລື່ອງນີ້ເພື່ອເຮົາຈະບໍ່ຈີກພວກເຈົ້າເປັນຕ່ອນໆຈົນບໍ່ມີຜູ້ໃດຊ່ວຍໄດ້.
23 ຜູ້ໃດເອົາຄວາມຮູ້ສຶກຂອບໃຈມາເປັນເຄື່ອງບູຊາໃຫ້ເຮົາກໍສັນລະເສີນເຮົາ+ແລະຖ້າຜູ້ໃດເຮັດສິ່ງທີ່ຖືກຕ້ອງຕະຫຼອດລາວກໍຈະໄດ້ເຫັນວ່າເຮົາຈະຊ່ວຍລາວໃຫ້ລອດແນວໃດ.”+
ຂໍ
^ ຫຼື “ພະເຢໂຫວາພະເຈົ້າຜູ້ມີລິດເດດສູງສຸດ”
^ ເບິ່ງສ່ວນອະທິບາຍຄຳສັບ
^ ຫຼືອາດແປວ່າ “ພວກເຈົ້າກໍໄປນຳລາວ”
^ ຫຼື “ໃສ່ຮ້າຍ”
