ເຢເຣມີຢາ 23:1-40
23 ພະເຢໂຫວາເວົ້າວ່າ: “ພວກຜູ້ລ້ຽງແກະທີ່ທຳລາຍແກະແລະເຮັດໃຫ້ຝູງແກະໃນທົ່ງຫຍ້າຂອງເຮົາກະຈັດກະຈາຍໄປຈະຕ້ອງຈິບຫາຍ!”+
2 ດັ່ງນັ້ນ ພະເຢໂຫວາພະເຈົ້າຂອງອິດສະຣາເອນຈຶ່ງເວົ້າໃຫ້ພວກຜູ້ລ້ຽງແກະທີ່ເບິ່ງແຍງປະຊາຊົນຂອງເພິ່ນວ່າ: “ພວກເຈົ້າໄດ້ເຮັດໃຫ້ຝູງແກະຂອງເຮົາກະຈັດກະຈາຍໄປແລະເຮັດແບບນີ້ຢູ່ເລື້ອຍໆ. ພວກເຈົ້າບໍ່ໄດ້ເບິ່ງແຍງເຂົາເຈົ້າເລີຍ.+
ຄັນຊັ້ນ ເຮົາກໍຈະບໍ່ເບິ່ງແຍງພວກເຈົ້າຄືກັນ ຍ້ອນພວກເຈົ້າເຮັດຊົ່ວ.” ພະເຢໂຫວາເວົ້າໄວ້ແນວນີ້.
3 “ເຮົາຈະລວບລວມແກະທີ່ຍັງເຫຼືອຂອງເຮົາຈາກແຜ່ນດິນຕ່າງໆທີ່ເຮົາໄດ້ເຮັດໃຫ້ເຂົາເຈົ້າກະຈັດກະຈາຍໄປ+ແລະເຮົາຈະພາເຂົາເຈົ້າກັບມາທົ່ງຫຍ້າຂອງເຂົາເຈົ້າ.+ ເຂົາເຈົ້າຈະມີລູກມີຫຼານແລະເພີ່ມຈຳນວນຫຼາຍຂຶ້ນ.+
4 ເຮົາຈະແຕ່ງຕັ້ງພວກຜູ້ລ້ຽງແກະທີ່ຈະເບິ່ງແຍງເຂົາເຈົ້າແທ້ໆ.+ ເຂົາເຈົ້າຈະບໍ່ຕ້ອງຢ້ານອີກຕໍ່ໄປແລະຈະບໍ່ມີໃຜຫາຍໄປ.” ພະເຢໂຫວາເວົ້າໄວ້ແນວນີ້.
5 ພະເຢໂຫວາບອກວ່າ: “ອີກຈັກໜ້ອຍ ເຮົາຈະໃຫ້ມີກະສັດທີ່ຍຸຕິທຳຜູ້ໜຶ່ງທີ່ເປັນເຊື້ອສາຍ*ຂອງດາວິດນັ່ງເທິງບັນລັງ.+ ລາວຈະປົກຄອງ+ດ້ວຍຄວາມເຂົ້າໃຈ ຕັດສິນຢ່າງຍຸຕິທຳ ແລະເຮັດສິ່ງທີ່ຖືກຕ້ອງໃນແຜ່ນດິນນີ້.+
6 ຕອນທີ່ລາວປົກຄອງ ຢູດາຈະໄດ້ຮັບຄວາມລອດ+ແລະອິດສະຣາເອນຈະໄດ້ຢູ່ຢ່າງປອດໄພ.+ ລາວຈະຖືກເອີ້ນວ່າພະເຢໂຫວາແມ່ນຄວາມຖືກຕ້ອງຂອງພວກເຮົາ.”+
7 ພະເຢໂຫວາບອກວ່າ: “ແຕ່ຈະມີມື້ໜຶ່ງທີ່ເຂົາເຈົ້າຈະບໍ່ເວົ້າວ່າ ‘ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ ຜູ້ທີ່ພາພວກອິດສະຣາເອນອອກມາຈາກແຜ່ນດິນເອຢິບ!’+
8 ແຕ່ຈະເວົ້າວ່າ ‘ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ ຜູ້ທີ່ພາລູກຫຼານຂອງອິດສະຣາເອນອອກມາຈາກແຜ່ນດິນທາງເໜືອແລະແຜ່ນດິນທັງໝົດທີ່ເພິ່ນເຮັດໃຫ້ເຂົາເຈົ້າກະຈັດກະຈາຍໄປຢູ່ແລະພາກັບມາຢູ່ແຜ່ນດິນຂອງໂຕເອງ.’ ຕອນນັ້ນ ເຂົາເຈົ້າຈະໄດ້ຢູ່ໃນແຜ່ນດິນຂອງໂຕເອງ.”+
9 ຂ້ອຍເວົ້າກັບພວກຜູ້ພະຍາກອນວ່າ
ຫົວໃຈຂອງຂ້ອຍແຕກສະຫຼາຍ
ແລະກະດູກທັງໝົດຂອງຂ້ອຍກໍສັ່ນ.
ເມື່ອຂ້ອຍໄດ້ຍິນຄຳເວົ້າທີ່ບໍລິສຸດຂອງພະເຢໂຫວາຂ້ອຍກໍເປັນຄືກັບຄົນເມົາແລະເປັນຄືກັບຄົນທີ່ກິນເຫຼົ້າແວງຫຼາຍໂພດ.
10 ແຜ່ນດິນນີ້ເຕັມແຕ່ຄົນຫຼິ້ນຊູ້.*+ແຜ່ນດິນຮ້ອງໄຫ້ໄວ້ທຸກຍ້ອນຖືກສາບແຊ່ງ+ແລະທົ່ງຫຍ້າຢູ່ບ່ອນກັນດານກໍແຫ້ງແລ້ງ.+
ພວກຜູ້ພະຍາກອນເຮັດຊົ່ວແລະເຂົາເຈົ້າໃຊ້ອຳນາດໃນທາງທີ່ຜິດ.
11 ພະເຢໂຫວາເວົ້າວ່າ: “ທັງພວກຜູ້ພະຍາກອນແລະພວກປະໂລຫິດໄດ້ທໍລະຍົດເຮົາ.+
ແມ່ນແຕ່ໃນວິຫານຂອງເຮົາ ເຂົາເຈົ້າກໍຍັງເຮັດຊົ່ວ.”+
12 ພະເຢໂຫວາເວົ້າວ່າ: “ດັ່ງນັ້ນ ທາງຂອງເຂົາເຈົ້າຈະມື່ນແລະມືດ.+ເຂົາເຈົ້າຈະຖືກຍູ້ໃຫ້ລົ້ມລົງ.
ເຮົາຈະເຮັດໃຫ້ເຂົາເຈົ້າຈິບຫາຍໃນປີທີ່ເຮົາຈະລົງໂທດເຂົາເຈົ້າ.
13 ເຮົາເຫັນພວກຜູ້ພະຍາກອນຂອງຊາມາເຣຍ+ເຮັດສິ່ງທີ່ເປັນຕາຂີ້ດຽດ.
ເຂົາເຈົ້າພະຍາກອນໂດຍໃຊ້ຊື່ຂອງພະບາອານແລ້ວເຂົາເຈົ້າກໍພາພວກອິດສະຣາເອນປະຊາຊົນຂອງເຮົາໄປຜິດທາງ.
14 ເຮົາເຫັນພວກຜູ້ພະຍາກອນໃນເມືອງເຢຣູຊາເລັມເຮັດສິ່ງທີ່ໜ້າລັງກຽດ.
ເຂົາເຈົ້າຫຼິ້ນຊູ້+ແລະເວົ້າຕົວະ.+ເຂົາເຈົ້າສະໜັບສະໜູນຄົນຊົ່ວແລະເຂົາເຈົ້າກໍບໍ່ເຊົາເຮັດຊົ່ວ.
ສຳລັບເຮົາ ເຂົາເຈົ້າເປັນຄືກັບເມືອງໂຊໂດມ+ແລະຄົນທີ່ຢູ່ໃນເມືອງກໍເປັນຄືກັບເມືອງໂກໂມຣາ.”+
15 ຍ້ອນແນວນີ້ ພະເຢໂຫວາຜູ້ບັນຊາການກອງທັບຈຶ່ງເວົ້າເຖິງພວກຜູ້ພະຍາກອນວ່າ:
“ເຮົາຈະໃຫ້ເຂົາເຈົ້າກິນຕົ້ນໄມ້ຂົມແລະກິນນ້ຳທີ່ມີພິດ+
ຍ້ອນພວກຜູ້ພະຍາກອນໃນເມືອງເຢຣູຊາເລັມເຮັດໃຫ້ການທໍລະຍົດພະເຈົ້າແພ່ໄປທົ່ວແຜ່ນດິນ.”
16 ພະເຢໂຫວາຜູ້ບັນຊາການກອງທັບເວົ້າວ່າ:
“ຢ່າຟັງຄຳພະຍາກອນຂອງພວກຜູ້ພະຍາກອນເຫຼົ່ານັ້ນ.
ເຂົາເຈົ້າກຳລັງຫຼອກລວງເຈົ້າ.+
ນິມິດທີ່ເຂົາເຈົ້າເວົ້າມາຈາກຄວາມຄິດຂອງເຂົາເຈົ້າເອງ+ບໍ່ແມ່ນມາຈາກພະເຢໂຫວາ.+
17 ເຂົາເຈົ້າບອກຄົນທີ່ບໍ່ຍອມຮັບເຮົາເທື່ອແລ້ວເທື່ອອີກວ່າ‘ພະເຢໂຫວາເວົ້າວ່າ “ພວກເຈົ້າຈະມີສັນຕິສຸກ.”’+
ແລ້ວບອກທຸກຄົນທີ່ເຮັດຕາມໃຈດື້ດ້ານຂອງໂຕເອງວ່າ‘ພວກເຈົ້າຈະບໍ່ເຈິຄວາມຈິບຫາຍດອກ.’+
18 ໃຜຢູ່ໃນກຸ່ມຄົນທີ່ສະໜິດກັບພະເຢໂຫວາເພື່ອຈະໄດ້ເຫັນແລະໄດ້ຍິນຄຳເວົ້າຂອງເພິ່ນ?
ໃຜແດ່ທີ່ສົນໃຈແລະຟັງຄຳເວົ້າຂອງເພິ່ນ?
19 ຄວາມໃຈຮ້າຍຂອງພະເຢໂຫວາຈະພັດມາຄືກັບລົມພາຍຸ.ມັນຈະພັດໃສ່ຫົວຂອງຄົນຊົ່ວຄືກັບລົມພາຍຸໝູນ.+
20 ພະເຢໂຫວາຈະບໍ່ເຊົາໃຈຮ້າຍຈົນກວ່າເພິ່ນຈະໄດ້ເຮັດຕາມທີ່ໄດ້ຕັ້ງໃຈໄວ້.
ໃນສະໄໝສຸດທ້າຍ ພວກເຈົ້າຈະເຂົ້າໃຈເລື່ອງນີ້ຢ່າງຈະແຈ້ງ.
21 ເຮົາບໍ່ໄດ້ສົ່ງພວກຜູ້ພະຍາກອນເຫຼົ່ານັ້ນມາ ແຕ່ເຂົາເຈົ້າມາເອງ.
ເຮົາບໍ່ໄດ້ເວົ້ານຳເຂົາເຈົ້າ ແຕ່ເຂົາເຈົ້າພະຍາກອນເອງ.+
22 ຖ້າເຂົາເຈົ້າຢູ່ໃນກຸ່ມຄົນທີ່ສະໜິດກັບເຮົາເຂົາເຈົ້າຈະຊ່ວຍປະຊາຊົນຂອງເຮົາໃຫ້ໄດ້ຟັງຄຳເວົ້າຂອງເຮົາແລະຈະເຮັດໃຫ້ປະຊາຊົນຂອງເຮົາກັບໃຈແລະເຊົາເຮັດຊົ່ວ.”+
23 ພະເຢໂຫວາເວົ້າວ່າ: “ເຮົາເຫັນທັງສິ່ງທີ່ເກີດຂຶ້ນຢູ່ໃກ້ໆແລະສິ່ງທີ່ເກີດຂຶ້ນຢູ່ໄກໆບໍ່ແມ່ນບໍ?”
24 ພະເຢໂຫວາເວົ້າວ່າ: “ມີໃຜແດ່ທີ່ໄປລີ້ ແລ້ວເຮົາຊິບໍ່ເຫັນ?”+
ພະເຢໂຫວາເວົ້າວ່າ: “ເຮົາເຫັນທຸກສິ່ງທຸກຢ່າງທີ່ຢູ່ໃນສະຫວັນແລະແຜ່ນດິນໂລກບໍ່ແມ່ນບໍ?+
25 ເຮົາໄດ້ຍິນພວກຜູ້ພະຍາກອນທີ່ພະຍາກອນຕົວະໂດຍໃຊ້ຊື່ຂອງເຮົາເວົ້າວ່າ ‘ຂ້ອຍຝັນ! ຂ້ອຍຝັນເຫັນບາງຢ່າງ!’+
26 ຜູ້ພະຍາກອນພວກນີ້ຈະເວົ້າຕົວະໄປອີກດົນປານໃດ? ເຂົາເຈົ້າເປັນຜູ້ພະຍາກອນທີ່ເວົ້າຫຼອກລວງຕາມທີ່ເຂົາເຈົ້າຄິດຂຶ້ນມາເອງ.+
27 ເຂົາເຈົ້າເລົ່າຄວາມຝັນໃຫ້ກັນຟັງເພື່ອຈະເຮັດໃຫ້ປະຊາຊົນຂອງເຮົາລືມຊື່ຂອງເຮົາຄືກັບທີ່ປູ່ຍ່າຕານາຍຂອງເຂົາເຈົ້າລືມຊື່ຂອງເຮົາຍ້ອນພະບາອານ.+
28 ໃຫ້ຜູ້ພະຍາກອນພວກນັ້ນເລົ່າຄວາມຝັນຂອງໂຕເອງໂລດ. ແຕ່ຄົນໃດທີ່ເຮົາໄດ້ເວົ້ານຳກໍຕ້ອງເວົ້າຕາມນັ້ນຢ່າງສັດຊື່.
ຊິເອົາເຟືອງມາທຽບກັບເຂົ້າໄດ້ຈັ່ງໃດ?” ພະເຢໂຫວາເວົ້າໄວ້ແນວນີ້.
29 ພະເຢໂຫວາເວົ້າວ່າ: “ຄຳເວົ້າຂອງເຮົາເປັນຄືກັບໄຟ+ແລະເປັນຄືກັບຄ້ອນຕີທີ່ທຸບຫີນຈົນແຕກບໍ່ແມ່ນບໍ?”+
30 ພະເຢໂຫວາເວົ້າວ່າ: “ຍ້ອນແນວນີ້ ເຮົາຈະລົງໂທດພວກຜູ້ພະຍາກອນທີ່ເອົາຄຳເວົ້າຂອງເຮົາຈາກຜູ້ພະຍາກອນຄົນອື່ນໄປເວົ້າແນວໃໝ່!”+
31 ພະເຢໂຫວາເວົ້າວ່າ: “ເຮົາຈະລົງໂທດພວກຜູ້ພະຍາກອນທີ່ເວົ້າວ່າ ‘ນີ້ແມ່ນຄຳເວົ້າຂອງພະເຈົ້າ!’”+
32 ພະເຢໂຫວາເວົ້າວ່າ: “ເຮົາຈະລົງໂທດພວກຜູ້ພະຍາກອນທີ່ເລົ່າຄວາມຝັນຕົວະ ແລະພາປະຊາຊົນຂອງເຮົາໄປຜິດທາງດ້ວຍຄຳຕົວະແລະຄຳໂອ້ອວດຂອງເຂົາເຈົ້າ.”+
ພະເຢໂຫວາເວົ້າອີກວ່າ: “ເຮົາບໍ່ໄດ້ສັ່ງແລະບໍ່ໄດ້ສົ່ງເຂົາເຈົ້າໄປ. ດັ່ງນັ້ນ ເຂົາເຈົ້າຈຶ່ງບໍ່ໄດ້ຊ່ວຍຫຍັງປະຊາຊົນຂອງເຮົາຈັກໜ້ອຍເລີຍ.+
33 ຖ້າມີປະຊາຊົນ ຜູ້ພະຍາກອນ ຫຼືປະໂລຫິດຄົນໃດຖາມເຈົ້າວ່າ ‘ຂ່າວສານທີ່ເປັນພາລະໜັກ*ຈາກພະເຢໂຫວາແມ່ນຫຍັງເທື່ອນິ?’ ເຈົ້າຕ້ອງຕອບເຂົາເຈົ້າວ່າ ‘ພະເຢໂຫວາເວົ້າວ່າ “ກໍແມ່ນພວກເຈົ້າຫັ້ນແຫຼະ! ພວກເຈົ້າເປັນຄືກັບພາລະໜັກແລະເຮົາຈະໂຍນພວກເຈົ້າຖິ້ມ.”’+
34 ຖ້າມີຜູ້ພະຍາກອນ ປະໂລຫິດ ຫຼືປະຊາຊົນຄົນໃດເວົ້າວ່າ ‘ຂ່າວສານຈາກພະເຢໂຫວາເປັນພາລະໜັກ!’ ເຮົາກໍຈະລົງໂທດເຂົາເຈົ້າແລະຄົນໃນເຮືອນຂອງເຂົາເຈົ້າທັງໝົດ.
35 ພວກເຈົ້າແຕ່ລະຄົນຖາມໝູ່ແລະອ້າຍນ້ອງຂອງໂຕເອງຢູ່ເລື້ອຍໆວ່າ ‘ພະເຢໂຫວາຕອບວ່າຫຍັງ? ພະເຢໂຫວາເວົ້າແນວໃດ?’
36 ແຕ່ພວກເຈົ້າຕ້ອງເຊົາເວົ້າວ່າຂ່າວສານຂອງພະເຢໂຫວາເປັນພາລະໜັກ ຍ້ອນພວກເຈົ້າເອົາຄຳເວົ້າຂອງພະເຢໂຫວາຜູ້ບັນຊາການກອງທັບພະເຈົ້າຜູ້ມີຊີວິດຢູ່ໄປເວົ້າແນວໃໝ່ແລະຕີຄວາມໝາຍເອົາເອງ ມັນຈຶ່ງກາຍເປັນພາລະໜັກສຳລັບພວກເຈົ້າ.
37 ໃຫ້ເຈົ້າຖາມຜູ້ພະຍາກອນຄົນນັ້ນວ່າ ‘ພະເຢໂຫວາຕອບເຈົ້າວ່າແນວໃດ? ພະເຢໂຫວາເວົ້າຫຍັງແດ່?
38 ຖ້າພວກເຈົ້າຍັງເວົ້າອີກວ່າ “ຂ່າວສານຂອງພະເຢໂຫວາເປັນພາລະໜັກ!” ພະເຢໂຫວາບອກວ່າ “ພວກເຈົ້າມີແຕ່ເວົ້າວ່າ ‘ຂ່າວສານຂອງພະເຢໂຫວາເປັນພາລະໜັກ’ ທັງໆທີ່ເຮົາບອກພວກເຈົ້າແລ້ວວ່າ ‘ພວກເຈົ້າຕ້ອງເຊົາເວົ້າວ່າ “ຂ່າວສານຂອງພະເຢໂຫວາເປັນພາລະໜັກ!”’
39 ດັ່ງນັ້ນ ເຮົາຈະຈັບພວກເຈົ້າໂຍນຖິ້ມພ້ອມກັບເມືອງທີ່ເຮົາເອົາໃຫ້ພວກເຈົ້າແລະປູ່ຍ່າຕານາຍຂອງພວກເຈົ້າ.
40 ເຮົາຈະເຮັດໃຫ້ພວກເຈົ້າຂາຍໜ້າຕະຫຼອດໄປແລະຈະບໍ່ມີໃຜລືມຄວາມອັບອາຍຂອງພວກເຈົ້າເລີຍ.”’”+
ຂໍ
^ ແປຕາມໂຕວ່າ “ໜໍ່ທີ່ຍຸຕິທຳ”
^ ຫຼື “ຄົນທີ່ບໍ່ສັດຊື່ຕໍ່ພະເຈົ້າ”
^ ໃນພາສາເຮັບເຣີຄຳວ່າ “ພາລະໜັກ” ມີ 2 ຄວາມໝາຍຄື: “ຂ່າວສານທີ່ເຮັດໃຫ້ໜັກໃຈ” ຫຼື “ພາລະໜັກທີ່ປະຊາຊົນສ້າງໃຫ້ພະເຈົ້າ.” ດັ່ງນັ້ນ ເຢເຣມີຢາໃຊ້ຄຳນີ້ເພື່ອຫຼິ້ນຄຳ.
