ເຢເຣມີຢາ 28:1-17
-
ເຢເຣມີຢາກັບຜູ້ພະຍາກອນປອມຮານານີຢາ (1-17)
28 ໃນປີດຽວກັນນັ້ນເຊິ່ງເປັນຊ່ວງທຳອິດທີ່ເຊເດກີຢາ+ເປັນກະສັດປົກຄອງຢູດາໃນເດືອນທີ 5 ຂອງປີທີ 4 ຜູ້ພະຍາກອນຮານານີຢາລູກຊາຍຂອງອັດຊູເຣຈາກເມືອງກິເບໂອນ+ໄດ້ເວົ້າກັບເຢເຣມີຢາໃນວິຫານຂອງພະເຢໂຫວາຕໍ່ໜ້າພວກປະໂລຫິດແລະປະຊາຊົນວ່າ:
2 “ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນບອກວ່າ ‘ເຮົາຈະຫັກແອກຂອງກະສັດບາບີໂລນ.+
3 ພາຍໃນ 2 ປີ ເຮົາຈະເອົາເຄື່ອງໃຊ້ທັງໝົດໃນວິຫານຂອງພະເຢໂຫວາທີ່ເນບູກາດເນັດຊາກະສັດຂອງບາບີໂລນໄດ້ເອົາໄປບາບີໂລນກັບມາບ່ອນນີ້.’+
4 ພະເຢໂຫວາບອກວ່າ ‘ເຮົາຈະພາເຢໂກນີຢາ+ລູກຊາຍຂອງເຢໂຮຢາກີມ+ກະສັດຂອງຢູດາແລະຄົນຢູດາທຸກຄົນທີ່ຖືກຈັບໄປເປັນຊະເລີຍຢູ່ບາບີໂລນ+ກັບມາບ່ອນນີ້ນຳ ຍ້ອນເຮົາຈະຫັກແອກຂອງກະສັດບາບີໂລນ.’”
5 ຈາກນັ້ນ ຜູ້ພະຍາກອນເຢເຣມີຢາກໍເວົ້າກັບຜູ້ພະຍາກອນຮານານີຢາຕໍ່ໜ້າພວກປະໂລຫິດແລະປະຊາຊົນທຸກຄົນທີ່ຢືນຢູ່ໃນວິຫານຂອງພະເຢໂຫວາ.
6 ຜູ້ພະຍາກອນເຢເຣມີຢາເວົ້າວ່າ: “ອາແມນ!* ຂໍໃຫ້ພະເຢໂຫວາເຮັດແບບນັ້ນ! ຂໍໃຫ້ພະເຢໂຫວາເຮັດໃຫ້ຄຳພະຍາກອນຂອງເຈົ້າເກີດຂຶ້ນແທ້ໂດຍເອົາເຄື່ອງໃຊ້ທີ່ຢູ່ໃນວິຫານຂອງພະເຢໂຫວາແລະປະຊາຊົນທັງໝົດທີ່ຖືກຈັບໄປເປັນຊະເລີຍຢູ່ບາບີໂລນກັບມາບ່ອນນີ້!
7 ແນວໃດກໍຕາມ ຂໍໃຫ້ຟັງສິ່ງທີ່ຂ້ອຍຈະເວົ້າກັບເຈົ້າແລະປະຊາຊົນທັງໝົດ.
8 ດົນນານມາແລ້ວ ພວກຜູ້ພະຍາກອນທີ່ຢູ່ກ່ອນເຈົ້າແລະຂ້ອຍເຄີຍພະຍາກອນວ່າແຜ່ນດິນແລະປະເທດທີ່ຍິ່ງໃຫຍ່ຕ່າງໆຈະຕ້ອງເຈິກັບສົງຄາມ ໄພພິບັດ ແລະໂລກລະບາດ.*
9 ແຕ່ຖ້າຜູ້ພະຍາກອນຄົນໃດພະຍາກອນວ່າຈະມີສັນຕິສຸກແລ້ວກໍມີສັນຕິສຸກເກີດຂຶ້ນແທ້ຕາມທີ່ລາວເວົ້າ ຄົນອື່ນກໍຈະຮູ້ວ່າຜູ້ພະຍາກອນຄົນນັ້ນເປັນຜູ້ທີ່ພະເຢໂຫວາສົ່ງມາແທ້ໆ.”
10 ແລ້ວຜູ້ພະຍາກອນຮານານີຢາກໍເອົາແອກທີ່ຢູ່ຄໍຂອງຜູ້ພະຍາກອນເຢເຣມີຢາມາຫັກຖິ້ມ.+
11 ຈາກນັ້ນ ຜູ້ພະຍາກອນຮານານີຢາກໍເວົ້າຕໍ່ໜ້າປະຊາຊົນທຸກຄົນວ່າ: “ພະເຢໂຫວາບອກວ່າ ‘ພາຍໃນ 2 ປີ ເຮົາຈະຫັກແອກຂອງເນບູກາດເນັດຊາກະສັດຂອງບາບີໂລນຈາກຄໍຂອງຊາດທັງໝົດແນວນີ້ແຫຼະ.’”+ ແລ້ວຜູ້ພະຍາກອນເຢເຣມີຢາກໍໄປຈາກບ່ອນນັ້ນ.
12 ຫຼັງຈາກຜູ້ພະຍາກອນຮານານີຢາເອົາແອກຢູ່ຄໍຂອງຜູ້ພະຍາກອນເຢເຣມີຢາມາຫັກຖິ້ມແລ້ວ ພະເຢໂຫວາກໍເວົ້າກັບເຢເຣມີຢາວ່າ:
13 “ໃຫ້ເຈົ້າໄປບອກຮານານີຢາແນວນີ້ ‘ພະເຢໂຫວາບອກວ່າ “ເຈົ້າໄດ້ຫັກແອກທີ່ເປັນໄມ້ຖິ້ມແລ້ວ+ ແຕ່ເຈົ້າຈະຕ້ອງເຮັດແອກທີ່ເປັນເຫຼັກມາແທນແອກນັ້ນ.”
14 ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນບອກວ່າ “ເຮົາຈະເອົາແອກເຫຼັກໃສ່ຄໍຂອງຊາດເຫຼົ່ານີ້ທັງໝົດ. ເຂົາເຈົ້າຈະຕ້ອງຮັບໃຊ້ເນບູກາດເນັດຊາກະສັດຂອງບາບີໂລນ+ແລະເຮົາຍັງຈະໃຫ້ກະສັດບາບີໂລນມີອຳນາດເໜືອສັດປ່າໃນທົ່ງຫຍ້ານຳອີກ.”’”+
15 ຜູ້ພະຍາກອນເຢເຣມີຢາຈຶ່ງເວົ້າກັບຜູ້ພະຍາກອນຮານານີຢາ+ວ່າ: “ຮານານີຢາເອີ້ຍ ໃຫ້ເຈົ້າຟັງເດີ້! ພະເຢໂຫວາບໍ່ໄດ້ສົ່ງເຈົ້າມາ ແຕ່ເຈົ້າເຮັດໃຫ້ຄົນຊາດນີ້ເຊື່ອຄຳຕົວະຂອງເຈົ້າ.+
16 ດັ່ງນັ້ນ ພະເຢໂຫວາຈຶ່ງບອກວ່າ ‘ເຮົາຈະກຳຈັດເຈົ້າອອກຈາກແຜ່ນດິນ. ປີນີ້ເຈົ້າຈະຕ້ອງຕາຍຍ້ອນເຈົ້າໄດ້ກະຕຸ້ນປະຊາຊົນໃຫ້ກະບົດຕໍ່ພະເຢໂຫວາ.’”+
17 ແລ້ວຜູ້ພະຍາກອນຮານານີຢາກໍຕາຍໃນເດືອນທີ 7 ຂອງປີນັ້ນ.
