ເຢເຣມີຢາ 4:1-31
4 ພະເຢໂຫວາເວົ້າວ່າ: “ອິດສະຣາເອນເອີ້ຍ ໃຫ້ເຈົ້າກັບມາ.ຖ້າເຈົ້າກັບມາຫາເຮົາແລະກຳຈັດຮູບບູຊາທີ່ເປັນຕາຂີ້ດຽດຂອງເຈົ້າໃຫ້ໝົດໄປເຈົ້າກໍຈະບໍ່ຕ້ອງຫຼົບໜີໄປເລື້ອຍໆ.+
2 ຖ້າເຈົ້າສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ດ້ວຍຄວາມຈິງ ດ້ວຍຄວາມຍຸຕິທຳ ແລະດ້ວຍຄວາມຖືກຕ້ອງຊາດຕ່າງໆກໍຈະໄດ້ຮັບພອນຈາກເພິ່ນແລະເຂົາເຈົ້າຈະບອກຄົນອື່ນກ່ຽວກັບເລື່ອງຂອງເພິ່ນດ້ວຍຄວາມພູມໃຈ.”+
3 ພະເຢໂຫວາເວົ້າກັບຄົນຢູດາແລະຄົນທີ່ຢູ່ໃນເມືອງເຢຣູຊາເລັມວ່າ:
“ໃຫ້ເຈົ້າໄປບ່ອນທີ່ປູກຫຍັງກໍບໍ່ຂຶ້ນແລະໄຖດິນໃໝ່ແລະເຊົາຫວ່ານແນວປູກໃນບ່ອນທີ່ມີຕົ້ນໜາມຫຼາຍໆ.+
4 ຄົນຢູດາແລະຄົນທີ່ຢູ່ໃນເມືອງເຢຣູຊາເລັມເອີ້ຍໃຫ້ເຈົ້າເຮັດໃຫ້ໂຕເອງສະອາດ*ເພື່ອພະເຢໂຫວາແລະເຮັດໃຫ້ຫົວໃຈຂອງເຈົ້າສະອາດ*+ເພື່ອຄວາມໃຈຮ້າຍຂອງເຮົາຈະບໍ່ລຸກໄໝ້ຄືກັບໄຟທີ່ບໍ່ມີຜູ້ໃດມອດໄດ້ຍ້ອນຄວາມຊົ່ວທີ່ເຈົ້າໄດ້ເຮັດ.”+
5 ໃຫ້ເຈົ້າປະກາດໃນຢູດາແລະໃນເຢຣູຊາເລັມ.
ໃຫ້ຮ້ອງດັງໆແລະເປົ່າແກເຂົາສັດໄປທົ່ວແຜ່ນດິນ.+
ໃຫ້ຮ້ອງບອກຄົນດັງໆວ່າ: “ໃຫ້ພວກເຮົາມາລວມໂຕກັນແລະໜີໄປເມືອງຕ່າງໆທີ່ມີກຳແພງອ້ອມ.+
6 ໃຫ້ຍົກເສົາໃຫ້ສັນຍານ*ຂຶ້ນເພື່ອບອກທາງໄປຊີໂອນ.
ໃຫ້ຊອກຫາບ່ອນລີ້ແລະຢ່າຢືນຢູ່ຊື່ໆ”
ຍ້ອນເຮົາກຳລັງເອົາຄວາມຈິບຫາຍຄັ້ງໃຫຍ່ຈາກທາງເໜືອມາ.+
7 ຜູ້ທີ່ທຳລາຍຊາດຕ່າງໆໄດ້ອອກມາແລ້ວ+ຄືກັບໂຕສິງທີ່ອອກມາຈາກປ່າ.+
ລາວອອກມາຈາກບ່ອນຂອງລາວເພື່ອຈະເຮັດໃຫ້ແຜ່ນດິນຂອງເຈົ້າຮ້າງເປົ່າ.
ເມືອງຕ່າງໆຂອງເຈົ້າຈະຖືກທຳລາຍຈົນກາຍເປັນຊາກຫັກພັງແລະບໍ່ມີຄົນອາໄສຢູ່.+
8 ດັ່ງນັ້ນ ໃຫ້ເຈົ້ານຸ່ງຜ້າເນື້ອຫຍາບ+ໃຫ້ຮ້ອງໄຫ້ເສຍໃຈແລະໄວ້ທຸກຍ້ອນພະເຢໂຫວາຍັງໃຈຮ້າຍແຮງໃຫ້ພວກເຮົາຢູ່.
9 ພະເຢໂຫວາເວົ້າວ່າ: “ໃນມື້ນັ້ນ ກະສັດຈະຮູ້ສຶກຢ້ານຫຼາຍ.+ພວກເຈົ້ານາຍກໍຈະຮູ້ສຶກຢ້ານຈົນໂຕສັ່ນ.ພວກປະໂລຫິດແລະພວກຜູ້ພະຍາກອນກໍຈະຢ້ານຫຼາຍຄືກັນ.”+
10 ຂ້ອຍຈຶ່ງເວົ້າວ່າ: “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເອີ້ຍ ພະອົງຫຼອກລວງຄົນຢູດາ+ແລະຄົນໃນເມືອງເຢຣູຊາເລັມໂດຍເວົ້າວ່າ ‘ເຈົ້າຈະມີຄວາມສະຫງົບສຸກ+ ແຕ່ແທ້ໆແລ້ວດາບພັດຈີ້ຄໍຂອງພວກເຮົາຢູ່.’”
11 ໃນຕອນນັ້ນ ຄົນຢູດາແລະຄົນໃນເມືອງເຢຣູຊາເລັມຈະໄດ້ຍິນວ່າ:
“ລົມຮ້ອນໆຈາກໂນນພູຕ່າງໆທີ່ແຫ້ງແລ້ງໃນທະເລຊາຍຈະພັດມາໃສ່ປະຊາຊົນຂອງເຮົາ.*ລົມນີ້ບໍ່ໄດ້ພັດມາເພື່ອຝັດເຂົ້າຫຼືເຮັດໃຫ້ເຂົ້າສະອາດ.
12 ລົມແຮງໆນີ້ພັດມາຈາກບ່ອນຕ່າງໆຕາມຄຳສັ່ງຂອງເຮົາ.
ບັດນີ້ ເຮົາຈະປະກາດຄຳຕັດສິນຕໍ່ເຂົາເຈົ້າ.
13 ກອງທັບຂອງສັດຕູຈະມາຄືກັບຂີ້ເຝື້ອທີ່ຕຶບໜາ.ລົດຮົບຂອງລາວເປັນຄືກັບລົມພາຍຸ.+
ມ້າຂອງລາວກໍໄວກວ່ານົກອິນຊີ.+
‘ຕາຍຄັກໆບາດນິ! ພວກເຮົາບໍ່ລອດແທ້.’
14 ເຢຣູຊາເລັມເອີ້ຍ ຖ້າເຈົ້າຢາກລອດ ເຈົ້າຕ້ອງເຮັດໃຫ້ຫົວໃຈຂອງເຈົ້າສະອາດແລະບໍ່ມີຄວາມຊົ່ວ.+
ເຈົ້າຈະຄິດແຕ່ແນວຊົ່ວໆອີກດົນປານໃດ?
15 ມີການປະກາດຂ່າວນີ້ຢູ່ດານ+ແລະມີການປະກາດຄວາມຈິບຫາຍຢູ່ພູຕ່າງໆໃນເອຟຣາຢິມ.
16 ໃຫ້ເຈົ້າບອກເລື່ອງນີ້ກັບຊາດຕ່າງໆແລະປະກາດເລື່ອງນີ້ໃຫ້ເຢຣູຊາເລັມຮູ້.”
“ພວກຜູ້ເຝົ້າເບິ່ງ*ກຳລັງມາຈາກແຜ່ນດິນທີ່ຢູ່ຫ່າງໄກແລະເຂົາເຈົ້າຈະຮ້ອງສຽງດັງຕອນອອກໄປສູ້ຮົບກັບເມືອງຕ່າງໆຂອງຢູດາ.
17 ເຂົາເຈົ້າມາລ້ອມເຢຣູຊາເລັມໄວ້ທຸກດ້ານຄືກັບຊາວນາທີ່ເຝົ້າທົ່ງນາ+ຍ້ອນລາວກະບົດຕໍ່ເຮົາ.”+ ພະເຢໂຫວາເວົ້າໄວ້ແນວນີ້.
18 “ເຈົ້າຈະໄດ້ຮັບຜົນຈາກການກະທຳຂອງໂຕເອງ.+
ການລົງໂທດນີ້ຈະເຮັດໃຫ້ເຈົ້າເຈັບປວດຫຼາຍ.ມັນເຂົ້າໄປຮອດຫົວໃຈຂອງເຈົ້າ.”
19 ຂ້ອຍທຸກໃຈຫຼາຍ! ຂ້ອຍທຸກໃຈຫຼາຍ!
ຂ້ອຍເຈັບປວດໃຈຫຼາຍແທ້ໆ.
ຫົວໃຈຂອງຂ້ອຍເຕັ້ນບັກແຮງໆ.
ຂ້ອຍມິດຢູ່ຊື່ໆບໍ່ໄດ້ແລ້ວຍ້ອນຂ້ອຍໄດ້ຍິນສຽງແກເຂົາສັດເຊິ່ງເປັນສັນຍານຂອງການສູ້ຮົບ.*+
20 ມີຂ່າວກ່ຽວກັບຄວາມຈິບຫາຍເທື່ອແລ້ວເທື່ອອີກຍ້ອນແຜ່ນດິນທັງໝົດຖືກທຳລາຍ.
ຢູ່ບໍ່ຢູ່ເຕັ້ນຂອງຂ້ອຍກໍພັງລົງມາ.ຜ້າເຕັ້ນຂອງຂ້ອຍກໍຖືກທຳລາຍບາດດຽວ.+
21 ຂ້ອຍຈະຕ້ອງເຫັນເສົາໃຫ້ສັນຍານແລະໄດ້ຍິນສຽງແກເຂົາສັດອີກດົນປານໃດ?+
22 “ປະຊາຊົນຂອງເຮົາເປັນຄົນໂງ່.+ເຂົາເຈົ້າບໍ່ໄດ້ສົນໃຈເຮົາເລີຍ.
ເຂົາເຈົ້າເປັນລູກທີ່ໂງ່ແລະບໍ່ມີຄວາມເຂົ້າໃຈຫຍັງ.
ເຂົາເຈົ້າສະຫຼາດແຕ່ແນວຊົ່ວໆແຕ່ບໍ່ຮູ້ຈັກເຮັດດີ.”
23 ຂ້ອຍເຫັນແຜ່ນດິນຂອງເຂົາເຈົ້າຮ້າງເປົ່າແລະບໍ່ມີຫຍັງເລີຍ.+
ຂ້ອຍແນມເບິ່ງທ້ອງຟ້າ ແຕ່ກໍບໍ່ມີແສງສະຫວ່າງເລີຍ.+
24 ຂ້ອຍເຫັນພູຕ່າງໆກຳລັງສັ່ນສະເທືອນແລະໂນນພູຕ່າງໆກໍກຳລັງສັ່ນສະເທືອນຄືກັນ.+
25 ຂ້ອຍແນມເບິ່ງແລະເຫັນວ່າບໍ່ມີໃຜເລີຍແລະນົກຢູ່ເທິງຟ້າກໍບິນໜີໄປໝົດແລ້ວ.+
26 ຂ້ອຍແນມເບິ່ງແລະເຫັນວ່າສວນໝາກໄມ້ກາຍເປັນບ່ອນກັນດານແລະເມືອງຕ່າງໆກໍຖືກທຳລາຍໝົດແລ້ວ.+
ທັງໝົດນີ້ເປັນຍ້ອນພະເຢໂຫວາຍ້ອນເພິ່ນໃຈຮ້າຍຫຼາຍ.
27 ພະເຢໂຫວາເວົ້າວ່າ: “ແຜ່ນດິນທັງໝົດນີ້ຈະຮ້າງເປົ່າ+ແຕ່ເຮົາຈະບໍ່ທຳລາຍຈົນໝົດ.
28 ຍ້ອນແນວນີ້ ແຜ່ນດິນຈະໂສກເສົ້າ+ແລະທ້ອງຟ້າຈະມືດໄປ+
ກໍຍ້ອນວ່າເຮົາໄດ້ເວົ້າໄວ້ແລ້ວ ເຮົາຕັດສິນໃຈແລ້ວແລະເຮົາຈະບໍ່ປ່ຽນໃຈ.* ເຮົາຈະບໍ່ປີ້ນຄວາມ.+
29 ເມື່ອໄດ້ຍິນສຽງຂອງພວກທະຫານມ້າແລະພວກທະຫານຍິງທະນູຄົນໝົດເມືອງກໍແລ່ນໜີ.+
ເຂົາເຈົ້າແລ່ນເຂົ້າໄປໃນປ່າແລະພາກັນປີນພູປີນຜາ.+
ເມືອງທຸກເມືອງຖືກປະຖິ້ມແລະບໍ່ມີຄົນອາໄສຢູ່ໃນເມືອງເຫຼົ່ານັ້ນເລີຍ.”
30 ເຈົ້າຖືກໂຈມຕີຢ່າງໜັກແລ້ວ ເຈົ້າຈະເຮັດແນວໃດບາດນິ?
ເຈົ້າເຄີຍນຸ່ງເຄື່ອງສີແດງສົດເຄີຍໃສ່ເຄື່ອງປະດັບທີ່ເປັນຄຳແລະເອົາສີດຳ*ມາທາຕາເພື່ອໃຫ້ງາມຂຶ້ນ.
ແຕ່ເຖິງເຈົ້າຈະແຕ່ງໂຕງາມສ່ຳໃດ ມັນກໍບໍ່ມີປະໂຫຍດດອກ+ຍ້ອນຄົນທີ່ຢາກໄດ້ໂຕເຈົ້າບໍ່ຢາກໄດ້ເຈົ້າແລ້ວ.ຕອນນີ້ ເຂົາເຈົ້າຢາກຂ້າເຈົ້າແທນ.+
31 ຂ້ອຍໄດ້ຍິນສຽງຄືກັບສຽງຂອງຜູ້ຍິງທີ່ບໍ່ສະບາຍໄດ້ຍິນສຽງຮ້ອງດ້ວຍຄວາມເຈັບປວດຄືກັບສຽງຂອງຜູ້ຍິງທີ່ເຈັບທ້ອງເກີດລູກຜູ້ທຳອິດແລະໄດ້ຍິນສຽງລູກສາວທີ່ກຳລັງຈະຂາດໃຈເຊິ່ງກໍຄືຊີໂອນ.
ລາວເດ່ມືອອກໄປແລະເວົ້າວ່າ:+
“ຂ້ອຍຕ້ອງຕາຍແທ້ໆ ຂ້ອຍເມື່ອຍຫຼາຍຍ້ອນຄົນທີ່ຢາກຂ້າຂ້ອຍ.”
ຂໍ ຄວາມ ໄຂ ເງື່ອນ
^ ແປຕາມໂຕວ່າ “ຮັບສິນຕັດ”
^ ແປຕາມໂຕວ່າ “ຕັດໜັງຫຸ້ມປາຍ”
^ ຫຼື “ທຸງ”
^ ແປຕາມໂຕວ່າ “ລູກສາວຂອງປະຊາຊົນຂອງເຮົາ.” ນີ້ແມ່ນການສົມທຽບໃນບົດກອນເຊິ່ງອາດໝາຍເຖິງການສະແດງຄວາມອີ່ຕົນຫຼືເຫັນອົກເຫັນໃຈ.
^ ໝາຍເຖິງຜູ້ທີ່ເຝົ້າເບິ່ງເມືອງເພື່ອຈະຮູ້ວ່າຄວນຈະໂຈມຕີເມືອງຕອນໃດ
^ ຫຼືອາດແປວ່າ “ສຽງໂຫ່ຮ້ອງຂອງທະຫານຕອນອອກໄປສູ້ຮົບ”
^ ຫຼື “ຮູ້ສຶກເສຍໃຈ”
^ ຫຼື “ສີທາຕາ”