ເຢເຣມີຢາ 40:1-16
40 ພະເຢໂຫວາກໍຍັງມາເວົ້າກັບເຢເຣມີຢາຢູ່ເລື້ອຍໆຫຼັງຈາກເນບູຊາຣາດານ+ທີ່ເປັນຫົວໜ້າທະຫານປ້ອງກັນໂຕກະສັດປ່ອຍລາວໃຫ້ເປັນອິດສະຫຼະຢູ່ເມືອງຣາມາ.+ ເນບູຊາຣາດານເອົາໂສ້ລ່າມມືເຢເຣມີຢາ ແລະພາລາວໄປພ້ອມກັບຄົນໃນເມືອງເຢຣູຊາເລັມແລະຄົນຢູດາທີ່ຖືກພາໄປເປັນຊະເລີຍຢູ່ບາບີໂລນ.
2 ແລ້ວຫົວໜ້າທະຫານປ້ອງກັນໂຕກະສັດກໍເອີ້ນເຢເຣມີຢາໄປລົມນຳແລະເວົ້າກັບລາວວ່າ: “ພະເຢໂຫວາພະເຈົ້າຂອງເຈົ້າບອກລ່ວງໜ້າກ່ຽວກັບຄວາມຈິບຫາຍຂອງເມືອງນີ້
3 ແລະພະເຢໂຫວາກໍເຮັດໃຫ້ມັນເກີດຂຶ້ນຄືກັບທີ່ເພິ່ນເຄີຍບອກໄວ້. ຍ້ອນພວກເຈົ້າເຮັດຜິດຕໍ່ພະເຢໂຫວາແລະບໍ່ເຊື່ອຟັງເພິ່ນ ຄວາມຈິບຫາຍນີ້ຈຶ່ງເກີດຂຶ້ນກັບພວກເຈົ້າ.+
4 ມື້ນີ້ຂ້ອຍຈະແກ້ໂສ້ຢູ່ມືຂອງເຈົ້າແລະປ່ອຍເຈົ້າໄປ. ຖ້າເຈົ້າຄິດວ່າດີທີ່ຈະໄປບາບີໂລນນຳຂ້ອຍ ກໍໄປເດີ້. ຂ້ອຍຈະເບິ່ງແຍງເຈົ້າເອງ. ແຕ່ຖ້າເຈົ້າບໍ່ຢາກໄປບາບີໂລນນຳຂ້ອຍ ກໍບໍ່ເປັນຫຍັງ. ແຜ່ນດິນທັງໝົດນີ້ຢູ່ຕໍ່ໜ້າເຈົ້າແລ້ວ ເຈົ້າຢາກໄປບ່ອນໃດເຈົ້າກໍເລືອກເອົາໂລດ.”+
5 ຕອນທີ່ເຢເຣມີຢາກຳລັງຄິດຢູ່ວ່າຈະໄປຫຼືຈະກັບດີ ເນບູຊາຣາດານກໍບອກລາວວ່າ: “ໃຫ້ເຈົ້າກັບໄປຫາເກດາລີຢາ+ລູກຊາຍຂອງອາຮີກາມ+ຫຼານຊາຍຂອງຊາຟານ+ທີ່ກະສັດບາບີໂລນໄດ້ແຕ່ງຕັ້ງລາວໃຫ້ເບິ່ງແຍງເມືອງຕ່າງໆຂອງຢູດາ. ໃຫ້ເຈົ້າໄປຢູ່ນຳລາວກັບຄົນຂອງລາວ ຫຼືຄັນບໍ່ຊັ້ນກໍໃຫ້ເຈົ້າໄປບ່ອນທີ່ເຈົ້າຢາກໄປ.”
ແລ້ວຫົວໜ້າທະຫານປ້ອງກັນໂຕກະສັດກໍເອົາອາຫານກັບຂອງຂວັນໃຫ້ເຢເຣມີຢາແລະປ່ອຍລາວໄປ.
6 ເຢເຣມີຢາຈຶ່ງກັບໄປຫາເກດາລີຢາລູກຊາຍຂອງອາຮີກາມຢູ່ເມືອງມິດຊະປາ+ແລະຢູ່ນຳລາວກັບຄົນອື່ນໆໃນແຜ່ນດິນນັ້ນ.
7 ຕໍ່ມາ ພວກຫົວໜ້າກອງທັບທີ່ຢູ່ກັບທະຫານຂອງເຂົາເຈົ້າໃນບ່ອນຕ່າງໆທົ່ວແຜ່ນດິນກໍໄດ້ຍິນວ່າກະສັດບາບີໂລນໄດ້ແຕ່ງຕັ້ງເກດາລີຢາລູກຊາຍຂອງອາຮີກາມໃຫ້ເບິ່ງແຍງແຜ່ນດິນ ແລະເບິ່ງແຍງພວກຄົນທຸກກັບລູກຂອງເຂົາເຈົ້າທີ່ບໍ່ໄດ້ຖືກພາໄປບາບີໂລນ.+
8 ເຂົາເຈົ້າຈຶ່ງພາກັນມາຫາເກດາລີຢາຢູ່ເມືອງມິດຊະປາ+ພ້ອມກັບທະຫານຂອງເຂົາເຈົ້າ. ຄົນເຫຼົ່ານັ້ນມີ: ອິດຊະມາເອນ+ລູກຊາຍຂອງເນທານີອາ ໂຢຮານານ+ກັບໂຢນາທານລູກຊາຍຂອງກາເຣອາ ເສຣາຢາລູກຊາຍຂອງຕັນຮູເມັດ ພວກລູກຊາຍຂອງເອຟາຍຄົນເນໂຕຟາ ແລະເຢຊານີຢາ+ລູກຊາຍຂອງຄົນມາອາກາ.
9 ເກດາລີຢາລູກຊາຍຂອງອາຮີກາມຫຼານຊາຍຂອງຊາຟານສາບານກັບພວກຫົວໜ້າກອງທັບແລະພວກທະຫານຂອງເຂົາເຈົ້າ ແລະບອກວ່າ: “ບໍ່ຕ້ອງຢ້ານທີ່ຈະຮັບໃຊ້ພວກການເດອາ. ໃຫ້ຢູ່ແຜ່ນດິນນີ້ແລະຮັບໃຊ້ກະສັດບາບີໂລນ ແລ້ວພວກເຈົ້າຈະມີຊີວິດທີ່ດີ.+
10 ສ່ວນຂ້ອຍ ຂ້ອຍຈະຢູ່ເມືອງມິດຊະປາເພື່ອເປັນຕົວແທນໃຫ້ພວກເຈົ້າຕອນທີ່ພວກການເດອາມາຫາພວກເຮົາ. ແຕ່ພວກເຈົ້າຕ້ອງລວບລວມໝາກໄມ້ລະດູຮ້ອນ ເຫຼົ້າແວງ ແລະນ້ຳມັນໄວ້ໃນໄຫ ແລະໃຫ້ພວກເຈົ້າຢູ່ຕາມເມືອງຕ່າງໆທີ່ພວກເຈົ້າຍຶດໄດ້ນັ້ນ.”+
11 ຄົນຢິວຄົນອື່ນໆທີ່ຢູ່ໃນໂມອາບ ອຳໂມນ ເອໂດມ ແລະຢູ່ແຜ່ນດິນອື່ນໆກໍໄດ້ຍິນຄືກັນວ່າກະສັດບາບີໂລນໄດ້ໃຫ້ບາງຄົນຢູ່ໃນຢູດາຕໍ່ ແລະໄດ້ຍິນວ່າກະສັດໄດ້ແຕ່ງຕັ້ງເກດາລີຢາລູກຊາຍຂອງອາຮີກາມຫຼານຊາຍຂອງຊາຟານໃຫ້ເບິ່ງແຍງເຂົາເຈົ້າ.
12 ຄົນຢິວທັງໝົດນັ້ນກໍເລີ່ມພາກັນມາຈາກບ່ອນທີ່ເຂົາເຈົ້າກະຈັດກະຈາຍກັນໄປຢູ່ ແລະມາແຜ່ນດິນຢູດາເພື່ອມາຫາເກດາລີຢາຢູ່ເມືອງມິດຊະປາ. ເຂົາເຈົ້າລວບລວມໝາກໄມ້ລະດູຮ້ອນແລະເຫຼົ້າແວງໄວ້ຫຼາຍແທ້ຫຼາຍວ່າ.
13 ໂຢຮານານລູກຊາຍຂອງກາເຣອາແລະຫົວໜ້າກອງທັບທຸກຄົນທົ່ວແຜ່ນດິນໄດ້ພາກັນມາຫາເກດາລີຢາຢູ່ເມືອງມິດຊະປາ.
14 ເຂົາເຈົ້າບອກລາວວ່າ: “ເຈົ້າບໍ່ຮູ້ບໍວ່າບາອາລິດກະສັດຂອງພວກອຳໂມນ+ໄດ້ສົ່ງອິດຊະມາເອນລູກຊາຍຂອງເນທານີອາມາຂ້າເຈົ້າ?”+ ແຕ່ເກດາລີຢາລູກຊາຍຂອງອາຮີກາມບໍ່ເຊື່ອເຂົາເຈົ້າ.
15 ໂຢຮານານລູກຊາຍຂອງກາເຣອາໄດ້ລັກມາບອກເກດາລີຢາຢູ່ເມືອງມິດຊະປາວ່າ: “ຂ້ອຍຈະໄປຂ້າອິດຊະມາເອນລູກຊາຍຂອງເນທານີອາໂດຍບໍ່ໃຫ້ໃຜຮູ້. ຄັນບໍ່ຊັ້ນ ລາວຈະມາຂ້າເຈົ້າແລະປະຊາຊົນຂອງຢູດາຈະກະຈັດກະຈາຍໄປ ແລະຄົນທີ່ເຫຼືອຢູ່ຢູດາກໍຈະຕາຍ.”
16 ແຕ່ເກດາລີຢາ+ລູກຊາຍຂອງອາຮີກາມເວົ້າກັບໂຢຮານານລູກຊາຍຂອງກາເຣອາວ່າ: “ເຈົ້າບໍ່ຕ້ອງເຮັດແນວນັ້ນ ຍ້ອນເລື່ອງທີ່ເຈົ້າເວົ້າກ່ຽວກັບອິດຊະມາເອນບໍ່ແມ່ນຄວາມຈິງ.”
