ເຢເຣມີຢາ 42:1-22
42 ແລ້ວພວກຫົວໜ້າກອງທັບທຸກຄົນ ໂຢຮານານ+ລູກຊາຍຂອງກາເຣອາ ເຢຊານີຢາລູກຊາຍຂອງໂຮຊາອີຢາ ແລະຄົນທີ່ເຫຼືອທັງໝົດຕັ້ງແຕ່ຜູ້ນ້ອຍຈົນຮອດຜູ້ໃຫຍ່ກໍໄປຫາ
2 ຜູ້ພະຍາກອນເຢເຣມີຢາແລະເວົ້າກັບລາວວ່າ: “ຂໍເຈົ້າຟັງຄຳຮ້ອງຂໍຂອງພວກເຮົາແລະອະທິດຖານຫາພະເຢໂຫວາພະເຈົ້າຂອງເຈົ້າເພື່ອພວກເຮົາ ເພື່ອຄົນທີ່ເຫຼືອທັງໝົດນີ້ ຍ້ອນເຈົ້າກໍເຫັນວ່າພວກເຮົາເຫຼືອບໍ່ເທົ່າໃດຄົນແລ້ວ.+
3 ຂໍພະເຢໂຫວາພະເຈົ້າຂອງເຈົ້າບອກພວກເຮົາວ່າຄວນເຮັດແນວໃດ.”
4 ຜູ້ພະຍາກອນເຢເຣມີຢາຕອບເຂົາເຈົ້າວ່າ: “ໄດ້ ຂ້ອຍຈະອະທິດຖານຫາພະເຢໂຫວາພະເຈົ້າຂອງພວກເຈົ້າຕາມທີ່ພວກເຈົ້າຮ້ອງຂໍ ແລະຂ້ອຍຈະບອກທຸກຄຳທີ່ພະເຢໂຫວາບອກ. ຂ້ອຍຈະບໍ່ປິດບັງພວກເຈົ້າເລີຍ.”
5 ເຂົາເຈົ້າບອກເຢເຣມີຢາວ່າ: “ຂໍໃຫ້ພະເຢໂຫວາເປັນພະຍານທີ່ເຊື່ອຖືໄດ້ ແລະຂໍໃຫ້ເພິ່ນລົງໂທດພວກເຮົາ ຖ້າພວກເຮົາບໍ່ໄດ້ເຮັດຕາມທີ່ພະເຢໂຫວາພະເຈົ້າຂອງເຈົ້າບອກພວກເຮົາຜ່ານທາງເຈົ້າ.
6 ບໍ່ວ່າສິ່ງທີ່ເພິ່ນເວົ້າຈະດີຫຼືຮ້າຍສຳລັບພວກເຮົາ ພວກເຮົາກໍຈະເຊື່ອຟັງພະເຢໂຫວາພະເຈົ້າຂອງພວກເຮົາເຊິ່ງເປັນຜູ້ທີ່ພວກເຮົາໄດ້ຂໍໃຫ້ເຈົ້າໄປຖາມ ເພື່ອພວກເຮົາຈະມີຊີວິດທີ່ດີຍ້ອນເຊື່ອຟັງພະເຢໂຫວາພະເຈົ້າຂອງພວກເຮົາ.”
7 ແລ້ວ 10 ມື້ຕໍ່ມາພະເຢໂຫວາກໍມາເວົ້າກັບເຢເຣມີຢາ.
8 ເຢເຣມີຢາຈຶ່ງເອີ້ນໂຢຮານານລູກຊາຍຂອງກາເຣອາ ພວກຫົວໜ້າກອງທັບທຸກຄົນທີ່ຢູ່ນຳລາວ ແລະປະຊາຊົນທຸກຄົນຕັ້ງແຕ່ເດັກນ້ອຍຈົນຮອດຜູ້ເຖົ້າໃຫ້ມາຫາ.+
9 ລາວເວົ້າກັບເຂົາເຈົ້າວ່າ: “ພະເຢໂຫວາພະເຈົ້າຂອງອິດສະຣາເອນຜູ້ທີ່ພວກເຈົ້າສົ່ງຂ້ອຍໃຫ້ໄປຖາມໄດ້ບອກວ່າ
10 ‘ຖ້າພວກເຈົ້າຈະຢູ່ໃນແຜ່ນດິນນີ້ຕໍ່ໄປ ເຮົາຈະສ້າງພວກເຈົ້າແລະຈະບໍ່ມ້າງຖິ້ມ. ເຮົາຈະປູກພວກເຈົ້າແລະຈະບໍ່ຫຼົກຖິ້ມ. ເຮົາຈະປ່ຽນໃຈແລະບໍ່ເຮັດໃຫ້ພວກເຈົ້າເຈິຄວາມຈິບຫາຍຄືກັບທີ່ເຮົາໄດ້ເຮັດ.*+
11 ພວກເຈົ້າບໍ່ຕ້ອງຢ້ານກະສັດບາບີໂລນເດີ້.’+
ພະເຢໂຫວາບອກວ່າ ‘ບໍ່ຕ້ອງຢ້ານລາວ ຍ້ອນເຮົາຈະຢູ່ກັບພວກເຈົ້າເພື່ອຊ່ວຍພວກເຈົ້າໃຫ້ລອດຈາກມືຂອງລາວ.
12 ເຮົາຈະອີ່ຕົນພວກເຈົ້າ+ແລະກະສັດບາບີໂລນກໍຈະອີ່ຕົນພວກເຈົ້າຄືກັນ. ລາວຈະຍອມໃຫ້ພວກເຈົ້າກັບໄປແຜ່ນດິນຂອງໂຕເອງ.
13 ແຕ່ສົມມຸດພວກເຈົ້າເວົ້າວ່າ “ບໍ່ ພວກເຮົາຈະບໍ່ຢູ່ແຜ່ນດິນນີ້” ແລະພວກເຈົ້າບໍ່ເຊື່ອຟັງພະເຢໂຫວາພະເຈົ້າຂອງພວກເຈົ້າ
14 ໂດຍເວົ້າວ່າ “ບໍ່ ພວກເຮົາຈະໄປເອຢິບ.+ ພວກເຮົາຈະໄປຢູ່ຫັ້ນເພື່ອພວກເຮົາຈະບໍ່ເຫັນສົງຄາມ ບໍ່ໄດ້ຍິນສຽງແກ ແລະບໍ່ຕ້ອງເຈິກັບຄວາມອຶດຢາກ.”
15 ພວກຄົນທີ່ເຫຼືອຂອງຢູດາເອີ້ຍ ຖ້າພວກເຈົ້າເຮັດແນວນັ້ນ ກໍຂໍໃຫ້ຟັງຄຳເວົ້າຂອງພະເຢໂຫວາໃຫ້ດີໆເດີ້. ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນເວົ້າວ່າ “ຖ້າພວກເຈົ້າຕັ້ງໃຈແທ້ໆທີ່ຈະໄປເອຢິບແລະອາໄສຢູ່ຫັ້ນ*
16 ດາບທີ່ພວກເຈົ້າຢ້ານຫຼາຍກໍຈະນຳພວກເຈົ້າທັນຢູ່ແຜ່ນດິນເອຢິບແລະຄວາມອຶດຢາກທີ່ພວກເຈົ້າຢ້ານກໍຈະນຳພວກເຈົ້າໄປຄືກັນ ແລ້ວພວກເຈົ້າຈະຕາຍຢູ່ຫັ້ນ.+
17 ທຸກຄົນທີ່ຕັ້ງໃຈຈະໄປຢູ່ເອຢິບຈະຕ້ອງຖືກຂ້າດ້ວຍດາບ ຕາຍດ້ວຍຄວາມອຶດຢາກ ແລະຕາຍດ້ວຍໂລກລະບາດ.* ຈະບໍ່ມີຈັກຄົນລອດຊີວິດຈາກຄວາມຈິບຫາຍທີ່ເຮົາຈະເຮັດໃຫ້ເກີດຂຶ້ນກັບເຂົາເຈົ້າ.”’
18 ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນບອກວ່າ ‘ຄືກັບທີ່ເຮົາໃຈຮ້າຍຫຼາຍໃຫ້ຄົນໃນເມືອງເຢຣູຊາເລັມ+ ຖ້າພວກເຈົ້າໄປເອຢິບ ເຮົາກໍຈະໃຈຮ້າຍຫຼາຍໃຫ້ພວກເຈົ້າຄືກັນ. ພວກເຈົ້າຈະຖືກສາບແຊ່ງ ຖືກເຮັດໃຫ້ເສຍກຽດ ແລະຖືກຕຳໜິ.+ ຊາດຕ່າງໆທີ່ເຫັນພວກເຈົ້າຈະຕົກໃຈແລະຢ້ານຫຼາຍ ແລະພວກເຈົ້າຈະບໍ່ໄດ້ເຫັນແຜ່ນດິນນີ້ອີກເລີຍ.’
19 ພວກຄົນທີ່ເຫຼືອຂອງຢູດາເອີ້ຍ ພະເຢໂຫວາໄດ້ບອກພວກເຈົ້າແລ້ວວ່າຢ່າໄປເອຢິບ. ຢ່າລືມວ່າຂ້ອຍໄດ້ເຕືອນພວກເຈົ້າໃນມື້ນີ້ແລ້ວວ່າ
20 ຖ້າພວກເຈົ້າເຮັດຜິດ ພວກເຈົ້າຈະຕາຍ. ພວກເຈົ້າຂໍໃຫ້ຂ້ອຍໄປຖາມພະເຢໂຫວາພະເຈົ້າຂອງພວກເຈົ້າໂດຍບອກວ່າ ‘ຂໍໃຫ້ເຈົ້າອະທິດຖານຫາພະເຢໂຫວາພະເຈົ້າແທນພວກເຮົາ ແລະບອກທຸກສິ່ງທີ່ພະເຢໂຫວາພະເຈົ້າຂອງພວກເຮົາໄດ້ເວົ້າ ແລ້ວພວກເຮົາຈະເຮັດຕາມ.’+
21 ມື້ນີ້ຂ້ອຍໄດ້ບອກພວກເຈົ້າແລ້ວວ່າພະເຢໂຫວາພະເຈົ້າຂອງພວກເຈົ້າໄດ້ເວົ້າຫຍັງ ແຕ່ຂ້ອຍຮູ້ວ່າພວກເຈົ້າຈະບໍ່ເຊື່ອຟັງເພິ່ນດອກ ແລະຈະບໍ່ຍອມເຮັດຕາມທີ່ເພິ່ນບອກພວກເຈົ້າຜ່ານທາງຂ້ອຍ.+
22 ຄັນຊັ້ນກໍຂໍໃຫ້ພວກເຈົ້າຮູ້ໄວ້ເລີຍວ່າພວກເຈົ້າຈະຖືກຂ້າດ້ວຍດາບ ຕາຍດ້ວຍຄວາມອຶດຢາກ ແລະຕາຍດ້ວຍໂລກລະບາດ. ພວກເຈົ້າຈະຕ້ອງຕາຍຢູ່ແຜ່ນດິນທີ່ພວກເຈົ້າຢາກໄປຢູ່ນັ້ນ.”+
ຂໍ ຄວາມ ໄຂ ເງື່ອນ
^ ຫຼື “ຮູ້ສຶກເສຍໃຈທີ່ເຮົາໄດ້ເຮັດໃຫ້ພວກເຈົ້າເຈິຄວາມຈິບຫາຍ”
^ ຫຼື “ໄປອາໄສຢູ່ຫັ້ນໄລຍະໜຶ່ງ”
^ ຫຼື “ພະຍາດ”