ເຢເຣມີຢາ 52:1-34
52 ເຊເດກີຢາ+ເປັນກະສັດຕອນອາຍຸ 21 ປີ ແລະລາວປົກຄອງຢູ່ເມືອງເຢຣູຊາເລັມ 11 ປີ. ແມ່ຂອງລາວຊື່ຮາມຸຕານ+ເປັນລູກສາວຂອງເຢເຣມີຢາຄົນເມືອງລິບນາ.
2 ລາວເຮັດສິ່ງທີ່ພະເຢໂຫວາເບິ່ງວ່າຊົ່ວຄືກັບເຢໂຮຢາກີມໄດ້ເຮັດ.+
3 ສິ່ງເຫຼົ່ານີ້ເກີດຂຶ້ນໃນເຢຣູຊາເລັມແລະໃນຢູດາກໍຍ້ອນວ່າພະເຢໂຫວາໃຈຮ້າຍຫຼາຍ. ໃນທີ່ສຸດ ເພິ່ນກໍກຳຈັດເຂົາເຈົ້າອອກໄປຈາກຕໍ່ໜ້າເພິ່ນ.+ ຕໍ່ມາ ເຊເດກີຢາໄດ້ກະບົດຕໍ່ກະສັດບາບີໂລນ.+
4 ໃນວັນທີ 10 ເດືອນທີ 10 ຂອງປີທີ 9 ທີ່ເຊເດກີຢາປົກຄອງ ເນບູກາດເນັດຊາ*ກະສັດຂອງບາບີໂລນໄດ້ຍົກກອງທັບມາຕໍ່ສູ້ເມືອງເຢຣູຊາເລັມ. ເຂົາເຈົ້າໄດ້ຕັ້ງຄ້າຍແລະເຮັດກຳແພງອ້ອມເມືອງນັ້ນໄວ້.+
5 ເຂົາເຈົ້າລ້ອມເມືອງຈົນຮອດປີທີ 11 ທີ່ເຊເດກີຢາປົກຄອງ.
6 ຕອນນັ້ນມີຄວາມອຶດຢາກໜັກຫຼາຍໃນເມືອງເຢຣູຊາເລັມແລະຄົນໃນເມືອງບໍ່ມີຂອງກິນເລີຍ.+ ແລ້ວໃນວັນທີ 9 ເດືອນທີ 4 ຂອງປີນັ້ນ+
7 ກຳແພງເມືອງກໍພັງລົງມາ. ພວກທະຫານທຸກຄົນຂອງກະສັດເຊເດກີຢາໄດ້ໜີອອກຈາກເມືອງໄປໃນຄືນນັ້ນທາງປະຕູຂອງກຳແພງ 2 ຊັ້ນທີ່ຢູ່ໃກ້ສວນຂອງກະສັດ. ຕອນນັ້ນ ພວກການເດອາກຳລັງລ້ອມເມືອງໄວ້ ແຕ່ເຂົາເຈົ້າກໍໜີໄປທາງອາຣາບາ.+
8 ພວກທະຫານການເດອາໄດ້ໄລ່ນຳກະສັດເຊເດກີຢາແລະນຳລາວທັນ+ຢູ່ບ່ອນກັນດານເຢຣິໂກ. ເມື່ອເຫັນແບບນັ້ນ ພວກທະຫານຂອງລາວກໍພາກັນໜີໄປຄົນລະທາງ.
9 ເຂົາເຈົ້າຈັບລາວໄດ້ແລະພາໄປຫາກະສັດບາບີໂລນຢູ່ເມືອງຣິບລາໃນແຜ່ນດິນຮາມັດ ແລ້ວກະສັດບາບີໂລນກໍຕັດສິນລາວ.
10 ກະສັດບາບີໂລນໄດ້ຂ້າພວກລູກຊາຍຂອງເຊເດກີຢາຕໍ່ໜ້າລາວແລະໄດ້ຂ້າພວກເຈົ້ານາຍທັງໝົດຂອງຢູດາຢູ່ເມືອງຣິບລາ.
11 ຈາກນັ້ນ ກະສັດບາບີໂລນກໍເຮັດໃຫ້ກະສັດເຊເດກີຢາຕາບອດ+ ເອົາໂສ້ທອງແດງລ່າມລາວໄວ້ ແລະພາລາວໄປບາບີໂລນ ແລ້ວຂັງລາວໄວ້ໃນຄຸກຈົນຮອດມື້ຕາຍ.
12 ໃນວັນທີ 10 ເດືອນທີ 5 ຂອງປີທີ 19 ທີ່ເນບູກາດເນັດຊາເປັນກະສັດປົກຄອງບາບີໂລນ ເນບູຊາຣາດານຫົວໜ້າທະຫານປ້ອງກັນໂຕກະສັດບາບີໂລນໄດ້ມາເມືອງເຢຣູຊາເລັມ.+
13 ລາວໄດ້ຈູດວິຫານຂອງພະເຢໂຫວາ+ ວັງຂອງກະສັດ ເຮືອນທຸກຫຼັງໃນເມືອງເຢຣູຊາເລັມ ແລະເຮືອນຫຼັງໃຫຍ່ໆທຸກຫຼັງ.
14 ພວກທະຫານການເດອາທີ່ມານຳຫົວໜ້າທະຫານປ້ອງກັນໂຕກະສັດໄດ້ທຳລາຍກຳແພງເມືອງເຢຣູຊາເລັມ.+
15 ເນບູຊາຣາດານທີ່ເປັນຫົວໜ້າທະຫານປ້ອງກັນໂຕກະສັດໄດ້ຈັບຄົນທຸກຍາກບາງຄົນແລະຄົນທີ່ຍັງເຫຼືອຢູ່ໃນເມືອງໄປເປັນຊະເລີຍ. ລາວຍັງໄດ້ຈັບປະຊາຊົນແລະພວກທີ່ໄປຢູ່ຝ່າຍກະສັດບາບີໂລນນຳ ລວມທັງພວກຊ່າງທີ່ມີສີມືທີ່ຍັງເຫຼືອຢູ່.+
16 ແຕ່ເນບູຊາຣາດານຈົ່ງຄົນທີ່ທຸກທີ່ສຸດໄວ້ເພື່ອໃຫ້ເຮັດສວນໝາກລະແຊັງແລະເຮັດໄຮ່ເຮັດນາ.+
17 ພວກການເດອາມ້າງເສົາທອງແດງ 2 ຕົ້ນ+ທີ່ຢູ່ວິຫານຂອງພະເຢໂຫວາ ແລະມ້າງລໍ້+ກັບອ່າງທະເລທອງແດງ+ທີ່ຢູ່ວິຫານຂອງພະເຢໂຫວາ ແລ້ວກໍຂົນທອງແດງທັງໝົດໄປບາບີໂລນ.+
18 ເຂົາເຈົ້າຍັງໄດ້ເອົາຖັງໃສ່ຂີ້ເທົ່າ* ຊວ້ານ ມີດຕັດສຳລັບຕັດໄສ້ຕະກຽງ ຖ້ວຍ+ ຈອກ+ ແລະເຄື່ອງໃຊ້ທຸກຢ່າງທີ່ເປັນທອງແດງທີ່ຢູ່ໃນວິຫານໄປນຳ.
19 ຫົວໜ້າທະຫານປ້ອງກັນໂຕກະສັດໄດ້ເອົາອ່າງ+ ຖາດສຳລັບໃສ່ຖ່ານທີ່ຮ້ອນໆ ຖ້ວຍ ຖັງໃສ່ຂີ້ເທົ່າ ຂາຕະກຽງ+ ຈອກ ແລະຖ້ວຍທີ່ເປັນເງິນແທ້ແລະຄຳແທ້ໄປຄືກັນ.+
20 ຈຳນວນທອງແດງທີ່ໃຊ້ເຮັດເສົາ 2 ຕົ້ນ ອ່າງທະເລທອງແດງ ຮູບປັ້ນງົວທອງແດງ 12 ໂຕ+ທີ່ຢູ່ກ້ອງອ່າງທະເລທອງແດງ ແລະລໍ້ທີ່ກະສັດໂຊໂລໂມນໄດ້ເຮັດສຳລັບວິຫານຂອງພະເຢໂຫວາມີຫຼາຍແທ້ຫຼາຍວ່າຈົນຊັ່ງນ້ຳໜັກບໍ່ໄດ້.
21 ເສົາ 2 ຕົ້ນນັ້ນສູງ 18 ສອກ*ແລະອ້ອມຮອບເສົາແທກໄດ້ 12 ສອກ.*+ ເສົາແຕ່ລະຕົ້ນເປັນໂກນທາງໃນແລະເຮັດຈາກທອງແດງໜາ 4 ນິ້ວ.*
22 ບົວຫົວເສົາທີ່ເປັນທອງແດງທີ່ຢູ່ເທິງເສົາສູງ 5 ສອກ*+ ແລະຕານ່າງທີ່ຢູ່ກັບໝາກພິລາທີ່ຢູ່ອ້ອມບົວເປັນທອງແດງທັງໝົດ. ເສົາທັງສອງຕົ້ນເຮັດແບບດຽວກັນແລະມີໝາກພິລາຄືກັນ.
23 ໝາກພິລາທີ່ຢູ່ທາງຂ້າງຂອງບົວຫົວເສົາມີ 96 ໜ່ວຍ ແລະມີໝາກພິລາທັງໝົດ 100 ໜ່ວຍທີ່ຕິດຢູ່ກັບຕານ່າງແຕ່ລະອັນ.+
24 ຫົວໜ້າທະຫານປ້ອງກັນໂຕກະສັດໄດ້ຈັບເສຣາຢາ+ທີ່ເປັນປະໂລຫິດໃຫຍ່ ເຊຟານີຢາ+ທີ່ເປັນຜູ້ຊ່ວຍປະໂລຫິດໃຫຍ່ ແລະຄົນຍາມປະຕູ 3 ຄົນໄປນຳ.+
25 ນອກຈາກນັ້ນ ລາວຍັງໄດ້ຈັບຂ້າລາຊະການຄົນໜຶ່ງທີ່ເປັນຜູ້ບັນຊາການທະຫານ ທີ່ປຶກສາ 7 ຄົນຂອງກະສັດທີ່ຍັງຢູ່ໃນເມືອງເຢຣູຊາເລັມ ເລຂາຂອງຫົວໜ້າກອງທັບທີ່ຮັບຜິດຊອບເກນຄົນເຂົ້າມາເປັນທະຫານ ແລະປະຊາຊົນ 60 ຄົນທີ່ຍັງຢູ່ໃນເມືອງ.
26 ເນບູຊາຣາດານທີ່ເປັນຫົວໜ້າທະຫານປ້ອງກັນໂຕກະສັດຈັບຄົນເຫຼົ່ານີ້ໄປໃຫ້ກະສັດບາບີໂລນຢູ່ເມືອງຣິບລາ.
27 ກະສັດບາບີໂລນໄດ້ຂ້າເຂົາເຈົ້າຢູ່ເມືອງຣິບລາ+ໃນເຂດຮາມັດ. ພວກຢູດາຈຶ່ງຖືກໄລ່ອອກຈາກແຜ່ນດິນຂອງໂຕເອງແລະຖືກຈັບໄປເປັນຊະເລີຍ.+
28 ໃນປີທີ 7 ທີ່ເນບູກາດເນັດຊາປົກຄອງ ຄົນຢູດາຖືກຈັບໄປເປັນຊະເລີຍ 3.023 ຄົນ.+
29 ໃນປີທີ 18 ທີ່ເນບູກາດເນັດຊາປົກຄອງ+ ຄົນເຢຣູຊາເລັມຖືກຈັບໄປເປັນຊະເລີຍ 832 ຄົນ.
30 ໃນປີທີ 23 ທີ່ເນບູກາດເນັດຊາປົກຄອງ ເນບູຊາຣາດານຫົວໜ້າທະຫານປ້ອງກັນໂຕກະສັດຈັບຄົນຢູດາໄປເປັນຊະເລີຍ 745 ຄົນ.+
ຄົນທີ່ຖືກຈັບໄປເປັນຊະເລີຍລວມທັງໝົດມີ 4.600 ຄົນ.
31 ໃນປີທີ 37 ທີ່ເຢໂຮຢາກິນກະສັດ+ຂອງຢູດາຖືກຈັບມາເປັນຊະເລີຍ ເອວິນເມໂຣດັກກໍເລີ່ມເປັນກະສັດປົກຄອງບາບີໂລນ. ໃນວັນທີ 25 ເດືອນທີ 12 ຂອງປີນັ້ນ ເອວິນເມໂຣດັກໄດ້ປ່ອຍເຢໂຮຢາກິນກະສັດຂອງຢູດາອອກຈາກຄຸກ.+
32 ເອວິນເມໂຣດັກໄດ້ເຮັດດີກັບເຢໂຮຢາກິນແລະໃຫ້ກຽດລາວຫຼາຍກວ່າກະສັດອົງອື່ນໆ*ທີ່ຖືກຈັບມາເປັນຊະເລີຍຢູ່ບາບີໂລນ.
33 ເຢໂຮຢາກິນບໍ່ຕ້ອງນຸ່ງເຄື່ອງນັກໂທດ ແລະລາວໄດ້ນັ່ງກິນເຂົ້າກັບກະສັດຈົນຮອດມື້ຕາຍ.
34 ກະສັດບາບີໂລນໃຫ້ເຢໂຮຢາກິນມີຂອງກິນທຸກມື້ຕະຫຼອດຊີວິດຂອງເຢໂຮຢາກິນຈົນຮອດມື້ຕາຍ.
ຂໍ
^ ແປຕາມໂຕວ່າ “ເນບູກາດເຣັດຊາ” ເຊິ່ງເປັນການສະກົດອີກແບບໜຶ່ງ
^ ໝາຍເຖິງຂີ້ເທົ່າທີ່ປົນກັບນ້ຳມັນສັດທີ່ເຜົາເປັນເຄື່ອງບູຊາ
^ 8 ແມັດ. ເບິ່ງພາກຜະໜວກ ຂ14.
^ 5,3 ແມັດ
^ 7,4 ຊັງຕີແມັດ. ເບິ່ງພາກຜະໜວກ ຂ14.
^ 2,2 ແມັດ
^ ແປຕາມໂຕວ່າ “ເອວິນເມໂຣດັກໃຫ້ບັນລັງຂອງເຢໂຮຢາກິນຢູ່ສູງກວ່າບັນລັງຂອງກະສັດອົງອື່ນໆ
