ເຢເຣມີຢາ 9:1-26
9 ຂ້ອຍຢາກໃຫ້ຫົວຂອງຂ້ອຍເປັນຄືນ້ຳອອກບໍ່ແລະຢາກໃຫ້ຕາຂອງຂ້ອຍເປັນຄືນ້ຳພຸ+
ເພື່ອຂ້ອຍຈະໄດ້ຮ້ອງໄຫ້ໝົດມື້ໝົດຄືນໃຫ້ຄົນຊາດດຽວກັນກັບຂ້ອຍທີ່ຖືກຂ້າ.
2 ຂ້ອຍຢາກຮູ້ວ່າຈະຊອກຫາບ່ອນພັກໄດ້ຢູ່ໃສໃນບ່ອນກັນດານ
ເພື່ອຂ້ອຍຈະຖິ້ມຄົນຊາດດຽວກັນກັບຂ້ອຍແລະໜີໄປຢູ່ຫັ້ນຍ້ອນເຂົາເຈົ້າທຸກຄົນເປັນຄົນຫຼິ້ນຊູ້+ແລະເປັນຄົນທໍລະຍົດ.
3 ເຂົາເຈົ້າພ້ອມຈະຕົວະຄືກັບຄັນທະນູທີ່ກົ່ງໄວ້ພ້ອມຈະຍິງ.ແຜ່ນດິນກໍມີແຕ່ການຫຼອກລວງແລະບໍ່ມີຄວາມສັດຊື່ເລີຍ.+
ພະເຢໂຫວາບອກວ່າ: “ເຂົາເຈົ້າເຮັດຊົ່ວແລ້ວເຮັດຊົ່ວອີກແລະບໍ່ສົນໃຈເຮົາເລີຍ.+
4 ພວກເຈົ້າທຸກຄົນ ໃຫ້ລະວັງເພື່ອນບ້ານຂອງພວກເຈົ້າແລະຢ່າໄວ້ໃຈແມ່ນແຕ່ອ້າຍນ້ອງຂອງໂຕເອງ
ຍ້ອນອ້າຍນ້ອງທຸກຄົນຂອງພວກເຈົ້າເປັນຄົນທໍລະຍົດ+ແລະເພື່ອນບ້ານທຸກຄົນຂອງພວກເຈົ້າເປັນຄົນມັກໃສ່ຮ້າຍ.+
5 ແຕ່ລະຄົນໂກງເພື່ອນບ້ານຂອງໂຕເອງແລະບໍ່ມີໃຜເວົ້າຄວາມຈິງເລີຍ.
ເຂົາເຈົ້າຝຶກລີ້ນຂອງໂຕເອງໃຫ້ເວົ້າຕົວະ+
ແລະເຮັດຜິດຫຼາຍຈົນເມື່ອຍ.
6 ເຈົ້າຢູ່ກັບການເວົ້າຕົວະ.
ເຂົາເຈົ້າຫຼອກລວງແລະບໍ່ຢາກຮູ້ຈັກເຮົາ.” ພະເຢໂຫວາເວົ້າໄວ້ແນວນີ້.
7 ພະເຢໂຫວາຜູ້ບັນຊາການກອງທັບຈຶ່ງບອກວ່າ:
“ເຮົາຈະຫຼອມເຂົາເຈົ້າແລະທົດສອບເຂົາເຈົ້າ.+ເຮົາຈະເຮັດຫຍັງໄດ້ອີກເພື່ອປະຊາຊົນຂອງເຮົາ?*
8 ລີ້ນຂອງເຂົາເຈົ້າເວົ້າຫຼອກລວງແລະເປັນຄືກັບລູກທະນູທີ່ເຮັດໃຫ້ເຖິງຕາຍ.
ເຂົາເຈົ້າເວົ້າດີກັບເພື່ອນບ້ານແຕ່ໃນໃຈພັດຄິດຈະທຳຮ້າຍ.”
9 ພະເຢໂຫວາເວົ້າວ່າ: “ເຮົາຄວນຈະໃຫ້ເຂົາເຈົ້າຮັບຜິດຊອບກັບສິ່ງເຫຼົ່ານີ້ບໍ່ແມ່ນບໍ?
ເຮົາຄວນຈະແກ້ແຄ້ນຄົນໃນຊາດນີ້ບໍ່ແມ່ນບໍ?+
10 ເຮົາຈະຮ້ອງໄຫ້ແລະໄວ້ທຸກໃຫ້ພູຕ່າງໆແລະຮ້ອງເພງໄວ້ອາໄລໃຫ້ທົ່ງຫຍ້າໃນບ່ອນກັນດານຍ້ອນພວກມັນຖືກຈູດໝົດແລ້ວຈົນບໍ່ມີໃຜຜ່ານໄປຜ່ານມາແມ່ນແຕ່ສຽງຂອງສັດກໍບໍ່ມີ.
ນົກແລະສັດປ່າຕ່າງໆກໍພາກັນໜີໝົດ.+
11 ເຮົາຈະເຮັດໃຫ້ເຢຣູຊາເລັມກາຍເປັນກອງຫີນ+ແລະເປັນບ່ອນຢູ່ຂອງໝາໄນ.+ເຮົາຈະເຮັດໃຫ້ເມືອງຕ່າງໆຂອງຢູດາຮ້າງເປົ່າແລະບໍ່ມີໃຜອາໄສຢູ່.+
12 ແມ່ນໃຜສະຫຼາດພໍທີ່ຈະເຂົ້າໃຈເລື່ອງນີ້?
ພະເຢໂຫວາໄດ້ເວົ້າກັບໃຜເພື່ອລາວຈະປະກາດເລື່ອງນີ້ໄດ້?
ເປັນຫຍັງແຜ່ນດິນຈຶ່ງຖືກທຳລາຍ?
ຍ້ອນຫຍັງມັນຈຶ່ງຖືກຈູດຄືກັບບ່ອນກັນດານແລະບໍ່ມີໃຜຜ່ານໄປຜ່ານມາ?”
13 ພະເຢໂຫວາຕອບວ່າ: “ຍ້ອນເຂົາເຈົ້າບໍ່ຍອມຮັບກົດໝາຍ*ທີ່ເຮົາໃຫ້ເຂົາເຈົ້າ ເຂົາເຈົ້າບໍ່ເຮັດຕາມແລະບໍ່ເຊື່ອຟັງເຮົາ
14 ເຂົາເຈົ້າເປັນຄົນຫົວແຂງແລະເຮັດຕາມໃຈໂຕເອງ+ ເຂົາເຈົ້າໄປນະມັດສະການພະບາອານຄືກັບທີ່ປູ່ຍ່າຕານາຍຂອງເຂົາເຈົ້າໄດ້ສອນໄວ້.+
15 ຍ້ອນແນວນີ້ ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນຈຶ່ງເວົ້າວ່າ ‘ເຮົາຈະໃຫ້ຄົນຊາດນີ້ກິນຕົ້ນໄມ້ຂົມແລະກິນນ້ຳທີ່ມີພິດ.+
16 ເຮົາຈະໃຫ້ເຂົາເຈົ້າກະຈັດກະຈາຍໄປຢູ່ນຳຊາດຕ່າງໆທີ່ເຂົາເຈົ້າແລະປູ່ຍ່າຕານາຍຂອງເຂົາເຈົ້າບໍ່ຮູ້ຈັກ.+ ເຮົາຈະໃຫ້ສັດຕູຈັບດາບໄລ່ນຳເຂົາເຈົ້າຈົນກວ່າເຮົາຈະກຳຈັດເຂົາເຈົ້າຈົນໝົດ.’+
17 ພະເຢໂຫວາຜູ້ບັນຊາການກອງທັບເວົ້າວ່າ‘ໃຫ້ຄິດຄັກໆກ່ຽວກັບສິ່ງທີ່ກຳລັງເກີດຂຶ້ນ
ໃຫ້ເອີ້ນພວກຜູ້ຍິງທີ່ຮ້ອງເພງໄວ້ທຸກມາ+ແລະໃຫ້ສົ່ງຄົນໄປພາພວກຜູ້ຍິງທີ່ຮ້ອງໄຫ້ເກັ່ງໆມາ
18 ເພື່ອທີ່ເຂົາເຈົ້າຈະຟ້າວມາຮ້ອງໄຫ້ໄວ້ທຸກໃຫ້ພວກເຮົາເພື່ອທີ່ພວກເຮົາຈະມີນ້ຳຕາໄຫຼອອກມາຄືກັບສາຍນ້ຳແລະເພື່ອທີ່ນ້ຳຈະໄຫຼອອກມາຈາກຕາຂອງພວກເຮົາ.+
19 ມີສຽງຮ້ອງໄຫ້ໄວ້ທຸກດັງມາຈາກຊີໂອນວ່າ+
“ພວກເຮົາຖືກທຳລາຍແລ້ວ!
ພວກເຮົາອັບອາຍຂາຍໜ້າຫຼາຍ!
ພວກເຮົາຖືກບັງຄັບໃຫ້ອອກຈາກແຜ່ນດິນແລະເຂົາເຈົ້າໄດ້ທຳລາຍເຮືອນຂອງພວກເຮົາແລ້ວ.”+
20 ພວກຜູ້ຍິງເອີ້ຍ ໃຫ້ຟັງສຽງຂອງພະເຢໂຫວາ.
ຂໍໃຫ້ພວກເຈົ້າຟັງສິ່ງທີ່ເພິ່ນເວົ້າ.
ໃຫ້ສອນເພງໄວ້ອາໄລນີ້ໃຫ້ລູກສາວຂອງພວກເຈົ້າແລະໃຫ້ສອນເພງໄວ້ທຸກນີ້ໃຫ້ກັນແລະກັນ+
21 ຍ້ອນຄວາມຕາຍປີນເຂົ້າມາທາງປ່ອງຢ້ຽມຂອງພວກເຮົາ.ມັນໄດ້ເຂົ້າມາໃນປ້ອມສູງຕ່າງໆຂອງພວກເຮົາເພື່ອຈັບພວກເດັກນ້ອຍໄປຈາກຫົນທາງແລະຈັບພວກຊາຍໜຸ່ມໄປຈາກເດີ່ນຂອງເມືອງ.’+
22 ໃຜເວົ້າວ່າ ‘ພະເຢໂຫວາບອກວ່າ
“ຊາກສົບຂອງຄົນຈະເປັນຄືກັບຂີ້ສັດຢູ່ຕາມທົ່ງຫຍ້າແລະເປັນຄືກັບເຂົ້າທີ່ຫາກໍກ່ຽວເຊິ່ງບໍ່ມີໃຜມາລວບລວມແລະເອົາໄປ.”’”+
23 ພະເຢໂຫວາບອກວ່າ:
“ຢ່າໃຫ້ຄົນສະຫຼາດອວດວ່າລາວມີສະຕິປັນຍາ+ຢ່າໃຫ້ຄົນທີ່ແຂງແຮງອວດວ່າລາວມີກຳລັງແລະຢ່າໃຫ້ຄົນລວຍອວດວ່າລາວມີຊັບສົມບັດ.+
24 ແຕ່ໃຫ້ຄົນທີ່ຢາກອວດ ອວດດ້ວຍຄວາມພູມໃຈວ່າ
ລາວມີຄວາມຮູ້ຄວາມເຂົ້າໃຈກ່ຽວກັບເຮົາ.+ໃຫ້ອວດວ່າເຮົາແມ່ນເຢໂຫວາຜູ້ທີ່ສະແດງຄວາມຮັກທີ່ໝັ້ນຄົງ ຄວາມຍຸຕິທຳ ແລະຄວາມຖືກຕ້ອງໃນໂລກນີ້+ຍ້ອນເຮົາພໍໃຈກັບສິ່ງເຫຼົ່ານີ້.”+ ພະເຢໂຫວາເວົ້າໄວ້ແນວນີ້.
25 ພະເຢໂຫວາບອກວ່າ: “ອີກຈັກໜ້ອຍ ເຮົາຈະລົງໂທດທຸກຄົນ ທັງຄົນທີ່ຮັບສິນຕັດແລະຄົນທີ່ຍັງບໍ່ໄດ້ຮັບສິນຕັດ+
26 ເຊິ່ງກໍຄືຄົນເອຢິບ+ ຄົນຢູດາ+ ຄົນເອໂດມ+ ຄົນອຳໂມນ+ ຄົນໂມອາບ+ ແລະທຸກຄົນທີ່ຢູ່ບ່ອນກັນດານເຊິ່ງໄດ້ແຖຜົມຂ້າງຫູອອກ+ ຍ້ອນທຸກຊາດເປັນຄົນຫົວແຂງ*ແລະຄົນອິດສະຣາເອນທຸກຄົນບໍ່ເຊື່ອຟັງ.”*+
ຂໍ
^ ແປຕາມໂຕວ່າ “ລູກສາວຂອງປະຊາຊົນຂອງເຮົາ”
^ ຫຼື “ຄຳສອນ”
^ ແປຕາມໂຕວ່າ “ບໍ່ໄດ້ຮັບສິນຕັດ”
^ ແປຕາມໂຕວ່າ “ບໍ່ໄດ້ຮັບສິນຕັດຢູ່ຫົວໃຈ”
