ເອຊາຢາ 49:1-26
49 ເກາະຕ່າງໆ ໃຫ້ຟັງຂ້ອຍ.ຊາດຕ່າງໆທີ່ຢູ່ໄກໆ ໃຫ້ຟັງເດີ້.+
ຕັ້ງແຕ່ຂ້ອຍຍັງບໍ່ໄດ້ເກີດ ພະເຢໂຫວາໄດ້ເອີ້ນຂ້ອຍ.+
ຕັ້ງແຕ່ຂ້ອຍຍັງຢູ່ໃນທ້ອງແມ່ ເພິ່ນໄດ້ເວົ້າເຖິງຊື່ຂ້ອຍ.
2 ເພິ່ນເຮັດໃຫ້ລີ້ນ*ຂ້ອຍຄົມຄືດາບ.ເພິ່ນເອົາມືປົກປ້ອງຂ້ອຍໄວ້.+
ເພິ່ນເຮັດໃຫ້ຂ້ອຍເປັນຄືກັບລູກທະນູທີ່ຝົນແລ້ວແລະເພິ່ນເອົາຂ້ອຍໄວ້ໃນບັ້ງລູກທະນູຂອງເພິ່ນ.
3 ເພິ່ນເວົ້າກັບຂ້ອຍວ່າ: “ອິດສະຣາເອນ ເຈົ້າເປັນຜູ້ຮັບໃຊ້ຂອງເຮົາ.+ຄົນຈະເຫັນຄວາມສະຫງ່າງາມຂອງເຮົາໂດຍທາງເຈົ້າ.”+
4 ແຕ່ຂ້ອຍເວົ້າວ່າ: “ຂ້ອຍເຮັດວຽກເມື່ອຍລ້າໆ.
ຂ້ອຍເສຍແຮງໄປລ້າໆແລະບໍ່ໄດ້ປະໂຫຍດຫຍັງ.
ແຕ່ທີ່ຈິງແລ້ວ ພະເຢໂຫວາເປັນຜູ້ຕັດສິນຂ້ອຍ*ແລະເພິ່ນເປັນຜູ້ໃຫ້ລາງວັນຂ້ອຍ.”+
5 ຕອນນີ້ ພະເຢໂຫວາຜູ້ທີ່ໃຫ້ຂ້ອຍເປັນຜູ້ຮັບໃຊ້ຂອງເພິ່ນຕັ້ງແຕ່ຍັງຢູ່ໃນທ້ອງແມ່ໄດ້ບອກຂ້ອຍໃຫ້ພາຢາໂຄບກັບມາຫາເພິ່ນເພື່ອອິດສະຣາເອນຈະຖືກລວບລວມໃຫ້ມາຢູ່ນຳເພິ່ນ.+
ພະເຢໂຫວາຈະເບິ່ງວ່າຂ້ອຍເປັນຄົນມີກຽດແລະເພິ່ນຈະເປັນກຳລັງຂອງຂ້ອຍ.
6 ເພິ່ນເວົ້າກັບຂ້ອຍວ່າ: “ເຮົາໃຫ້ເຈົ້າເປັນຜູ້ຮັບໃຊ້ຂອງເຮົາເປັນຜູ້ຟື້ນຟູຕະກູນຕ່າງໆຂອງຢາໂຄບຂຶ້ນໃໝ່ແລະເປັນຜູ້ພາອິດສະຣາເອນທີ່ຍັງເຫຼືອຢູ່ໃຫ້ກັບຄືນມາ.
ແຕ່ເທົ່ານີ້ຍັງບໍ່ພໍ ເຮົາຈະໃຫ້ເຈົ້າເປັນແສງສະຫວ່າງຂອງຊາດຕ່າງໆນຳອີກ+ເພື່ອການຊ່ວຍໃຫ້ລອດຂອງເຮົາຈະໄປຮອດສຸດຂອບໂລກ.”+
7 ພະເຢໂຫວາຜູ້ທີ່ໄຖ່ອິດສະຣາເອນຄືນມາ ພະເຈົ້າອົງບໍລິສຸດຂອງອິດສະຣາເອນ+ເວົ້າກັບຜູ້ໜຶ່ງທີ່ຖືກດູຖູກ+ ທີ່ຖືກຊາດໜຶ່ງລັງກຽດ ແລະເປັນຄົນຮັບໃຊ້ຂອງພວກຜູ້ປົກຄອງວ່າ:
“ພວກກະສັດຈະລຸກຂຶ້ນຍ້ອນສິ່ງທີ່ເຂົາເຈົ້າເຫັນແລະພວກເຈົ້ານາຍກໍຈະກົ້ມລົງສະແດງຄວາມນັບຖືຍ້ອນເຂົາເຈົ້ານັບຖືພະເຢໂຫວາຜູ້ທີ່ສັດຊື່.+ເພິ່ນເປັນພະເຈົ້າອົງບໍລິສຸດຂອງອິດສະຣາເອນແລະເປັນຜູ້ທີ່ໄດ້ເລືອກເຈົ້າ.”+
8 ພະເຢໂຫວາເວົ້າວ່າ:
“ໃນຕອນທີ່ເຮົາພໍໃຈເຈົ້າ ເຮົາໄດ້ຟັງແລະຕອບເຈົ້າ.+ໃນມື້ທີ່ຊ່ວຍໃຫ້ລອດ ເຮົາໄດ້ຊ່ວຍເຈົ້າ.+ເຮົາໄດ້ປົກປ້ອງເຈົ້າຕະຫຼອດເພື່ອເຈົ້າຈະເປັນແນວຄ້ຳປະກັນ*ລະຫວ່າງເຮົາກັບທຸກຄົນ+ເພື່ອໃຫ້ເຈົ້າຟື້ນຟູແຜ່ນດິນເພື່ອໃຫ້ເຈົ້າຊ່ວຍປະຊາຊົນໃຫ້ໄດ້ຮັບມູນມໍລະດົກທີ່ຖືກປະຖິ້ມໄວ້+
9 ເພື່ອເວົ້າກັບພວກນັກໂທດທີ່ຢູ່ໃນຄຸກວ່າ ‘ອອກມາໂລດ!’+
ແລະເພື່ອເວົ້າກັບຄົນທີ່ຢູ່ບ່ອນມືດໆ+ວ່າ ‘ອອກມາໃຫ້ຄົນອື່ນເຫັນແມ້!’
ເຂົາເຈົ້າຈະເປັນຄືກັບແກະທີ່ກິນຫຍ້າຢູ່ຕາມຫົນທາງ.ຫົນທາງທີ່ມີຄົນທຽວໄປທຽວມາ*ຈະເປັນຄືກັບທົ່ງຫຍ້າສຳລັບເຂົາເຈົ້າ.
10 ເຂົາເຈົ້າຈະບໍ່ຫິວເຂົ້າບໍ່ຫິວນ້ຳ.+ຄວາມຮ້ອນແລະແສງແດດຈະບໍ່ໄໝ້ເຂົາເຈົ້າ.+
ຍ້ອນພະເຈົ້າຜູ້ທີ່ອີ່ຕົນເຂົາເຈົ້າຈະນຳໜ້າເຂົາເຈົ້າ+ແລະເພິ່ນຈະພາເຂົາເຈົ້າໄປບ່ອນທີ່ມີນ້ຳອອກບໍ່.+
11 ເຮົາຈະເຮັດໃຫ້ພູທັງໝົດຂອງເຮົາເປັນຫົນທາງ.ເຮົາຈະເຮັດໃຫ້ເສັ້ນທາງຫຼັກຂອງເຮົາພຽງແລະຍົກມັນໃຫ້ສູງຂຶ້ນ.+
12 ເບິ່ງແມ້! ມີຄົນກຳລັງມາຈາກບ່ອນທີ່ໄກໆ.+ບາງຄົນມາຈາກທິດເໜືອ ບາງຄົນມາຈາກທິດຕາເວັນຕົກແລະຄົນອື່ນໆກໍມາຈາກແຜ່ນດິນສີນີມ.”+
13 ໃຫ້ທ້ອງຟ້າຮ້ອງດ້ວຍຄວາມດີໃຈ ແລະໃຫ້ແຜ່ນດິນເບີກບານມ່ວນຊື່ນ.+
ໃຫ້ພູຕ່າງໆຮ້ອງຢ່າງມີຄວາມສຸກ.+
ຍ້ອນພະເຢໂຫວາໄດ້ປອບໂຍນປະຊາຊົນຂອງເພິ່ນແລ້ວ+ແລະເພິ່ນໄດ້ອີ່ຕົນປະຊາຊົນຂອງເພິ່ນທີ່ທຸກຍາກລຳບາກຫຼາຍ.+
14 ແຕ່ຊີໂອນເວົ້າຕະຫຼອດວ່າ:
“ພະເຢໂຫວາປະຖິ້ມຂ້ອຍແລ້ວ.+ ພະເຢໂຫວາລືມຂ້ອຍແລ້ວ.”+
15 ແມ່ຈະລືມລູກທີ່ຍັງກິນນົມຢູ່ບໍແລະຈະບໍ່ອີ່ຕົນລູກທີ່ລາວເກີດອອກມາບໍ?
ເຖິງວ່າແມ່ຈະລືມລູກໄດ້ ແຕ່ເຮົາຈະບໍ່ມີທາງລືມເຈົ້າ.+
16 ເບິ່ງແມ້! ເຮົາໄດ້ຂຽນຊື່ຂອງເຈົ້າໄວ້ຢູ່ຝາມືຂອງເຮົາ.
ກຳແພງເມືອງຂອງເຈົ້າຢູ່ຕໍ່ໜ້າເຮົາສະເໝີ.
17 ພວກລູກຊາຍຂອງເຈົ້າໄດ້ພາກັນກັບມາໄວໆ
ແລະຄົນທີ່ທຳລາຍເຈົ້າກໍຈະໜີໄປຈາກເຈົ້າ.
18 ໃຫ້ເງີຍໜ້າຂຶ້ນແລະແນມເບິ່ງອ້ອມຂ້າງເຈົ້າແມ້.
ເຂົາເຈົ້າທັງໝົດມາລວມກັນແລ້ວ+
ແລະກຳລັງມາຫາເຈົ້າ.
ພະເຢໂຫວາບອກວ່າ: “ຕາບໃດທີ່ເຮົາຍັງມີຊີວິດຢູ່ເຈົ້າຈະເອົາເຂົາເຈົ້າມາໃສ່ເປັນເຄື່ອງປະດັບແລະເຈົ້າຈະໃສ່ເຂົາເຈົ້າຄືກັບເຈົ້າສາວໃສ່ສາຍຄໍ.
19 ເຖິງວ່າບ່ອນຢູ່ຂອງເຈົ້າຖືກທຳລາຍແລະຖືກປະຖິ້ມໄວ້ໃຫ້ຮ້າງເປົ່າ ແລະແຜ່ນດິນຂອງເຈົ້າເຫຼືອແຕ່ຊາກຫັກພັງ+ແຕ່ຕອນນີ້ ມັນຈະແຄບໂພດສຳລັບຄົນທີ່ຢູ່ຫັ້ນ+ແລະພວກທີ່ທຳລາຍເຈົ້າ+ກໍຈະຢູ່ໄກໆ.+
20 ຫຼັງຈາກທີ່ລູກເຈົ້າຕາຍແລ້ວ ພວກລູກທີ່ເກີດມານຳຫຼັງຈະເວົ້າວ່າ‘ບ່ອນນີ້ແຄບໂພດສຳລັບພວກລູກ.
ຈັດບ່ອນຢູ່ກວ້າງໆໃຫ້ພວກລູກແດ່.’+
21 ເຈົ້າຈະຄິດໃນໃຈວ່າ‘ເອົາລູກໃຜມາໃຫ້ຂ້ອຍ?ລູກຂ້ອຍກໍຕາຍແລ້ວ ແລະຂ້ອຍກໍມີລູກບໍ່ໄດ້ອີກແລ້ວ.ຂ້ອຍຖືກຈັບໄປເປັນຊະເລີຍແລະກໍເປັນນັກໂທດ.
ໃຜລ້ຽງເດັກນ້ອຍເຫຼົ່ານີ້?+
ຂ້ອຍຖືກຖິ້ມໃຫ້ຢູ່ຜູ້ດຽວຕົ໋ວ.+ຄັນຊັ້ນ ເດັກນ້ອຍເຫຼົ່ານີ້ມາແຕ່ໃສ?’”+
22 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ:
“ເຮົາຈະຍົກມືຂຶ້ນໃຫ້ຊາດຕ່າງໆເຫັນແລະຈະຍົກທຸງ*ໃຫ້ເຂົາເຈົ້າເຫັນຄືກັນ.+
ເຂົາເຈົ້າຈະອູ້ມພວກລູກຊາຍຂອງເຈົ້າມາແລະຈະໃຫ້ພວກລູກສາວຂອງເຈົ້າຂີ່ຄໍມາ.+
23 ພວກກະສັດຈະຮັບໃຊ້ເຈົ້າ+ແລະພວກລູກສາວຂອງເຂົາເຈົ້າຈະເບິ່ງແຍງເຈົ້າ.
ເຂົາເຈົ້າຈະໝູບໜ້າລົງພື້ນເພື່ອສະແດງຄວາມນັບຖືເຈົ້າ+ແລະຈະຍອມຢູ່ໃຕ້ອຳນາດຂອງເຈົ້າ.*+ເຈົ້າຈະຮູ້ວ່າເຮົາແມ່ນເຢໂຫວາ.ຜູ້ທີ່ເພິ່ງເຮົາຈະບໍ່ອັບອາຍ.”+
24 ຄົນທີ່ຖືກຄົນມີອຳນາດຈັບໄປຈະໜີໄດ້ບໍ?ຫຼືຊະເລີຍທີ່ຖືກຈັບໂຕໄປຈະໄດ້ຮັບການຊ່ວຍໃຫ້ລອດບໍ?
25 ແຕ່ພະເຢໂຫວາເວົ້າວ່າ:
“ຜູ້ທີ່ຖືກຄົນມີອຳນາດຈັບໄປຈະໜີໄປໄດ້+ແລະຜູ້ທີ່ຖືກຈັບໄປເປັນຊະເລີຍກໍຈະໄດ້ຮັບການຊ່ວຍໃຫ້ລອດ.+
ເຮົາຈະຕໍ່ຕ້ານຜູ້ທີ່ຕໍ່ຕ້ານເຈົ້າ+ແລະເຮົາຈະຊ່ວຍພວກລູກຊາຍຂອງເຈົ້າໃຫ້ລອດ.
26 ເຮົາຈະເຮັດໃຫ້ຜູ້ທີ່ຂົ່ມເຫງເຈົ້າກິນຊີ້ນຂອງໂຕເອງ.ເຂົາເຈົ້າຈະເມົາເລືອດຂອງໂຕເອງຄືກັບເມົາເຫຼົ້າແວງທີ່ຫວານໆ.
ທຸກຄົນຈະຕ້ອງຮູ້ວ່າເຮົາແມ່ນເຢໂຫວາ.+ເຮົາເປັນຜູ້ຊ່ວຍເຈົ້າໃຫ້ລອດ+ ເປັນຜູ້ໄຖ່ເຈົ້າຄືນມາ+ແລະເປັນພະເຈົ້າຜູ້ມີລິດເດດຂອງຢາໂຄບ.”+
ຂໍ
^ ແປຕາມໂຕວ່າ “ປາກ”
^ ຫຼື “ພະເຢໂຫວາຈະໃຫ້ຄວາມຍຸຕິທຳກັບຂ້ອຍ”
^ ແປຕາມໂຕວ່າ “ສັນຍາ”
^ ຫຼືອາດແປວ່າ “ໂນນພູຫົວໂລ້ນ”
^ ຫຼື “ເສົາໃຫ້ສັນຍານ”
^ ແປຕາມໂຕວ່າ “ເລຍຂີ້ຝຸ່ນຢູ່ຕີນເຈົ້າ”
