ເອຊາຢາ 5:1-30
5 ຂ້ອຍຈະຮ້ອງເພງໃຫ້ຄົນທີ່ຂ້ອຍຮັກຟັງ.ເພງນີ້ກ່ຽວກັບຜູ້ທີ່ຂ້ອຍຮັກແລະສວນໝາກລະແຊັງຂອງລາວ.+
ລາວມີສວນໝາກລະແຊັງຢູ່ໂນນພູທີ່ເປັນດິນດີດິນງາມ.
2 ລາວຊ່າວດິນແລະເກັບກ້ອນຫີນຖິ້ມ.
ລາວປູກໝາກລະແຊັງສີແດງພັນທີ່ດີໆໃສ່.ລາວສ້າງຫໍຄອຍໄວ້ກາງສວນແລະເອົາຫີນມາເຮັດອ່າງຢຽບໝາກລະແຊັງຢູ່ໃນສວນນັ້ນ.+
ລາວຫວັງຕະຫຼອດວ່າມັນຈະເກີດໝາກລະແຊັງພັນທີ່ດີໆແຕ່ມັນພັດເກີດເປັນພັນທີ່ບໍ່ດີຄືກັບໝາກລະແຊັງປ່າ.+
3 ລາວຈຶ່ງເວົ້າວ່າ: “ຄົນໃນຢູດາແລະຄົນໃນເຢຣູຊາເລັມເອີ້ຍ!ຂໍໃຫ້ພວກເຈົ້າຕັດສິນເລື່ອງລະຫວ່າງເຮົາກັບສວນໝາກລະແຊັງຂອງເຮົາໃຫ້ແດ່.+
4 ເຮົາເຮັດທຸກຢ່າງແລ້ວກັບສວນໝາກລະແຊັງຂອງເຮົາມີຫຍັງອີກບໍທີ່ເຮົາຍັງບໍ່ໄດ້ເຮັດ?+
ເປັນຫຍັງສວນນີ້ຈຶ່ງບໍ່ເກີດໝາກລະແຊັງທີ່ດີ?ມັນຄືເກີດເປັນໝາກລະແຊັງປ່າ?
5 ເຮົາຈະບອກພວກເຈົ້າໃຫ້ຮູ້ວ່າເຮົາຈະເຮັດຫຍັງກັບສວນນີ້.
ເຮົາຈະຫຼົກຮົ້ວທີ່ເປັນຕົ້ນໄມ້ອອກແລະຈູດສວນນີ້ຖິ້ມ.+
ເຮົາຈະທຸບກຳແພງຫີນທີ່ອ້ອມສວນນີ້ແລະຢຽບມັນໃຫ້ມຸ່ນ.
6 ເຮົາຈະເຮັດໃຫ້ສວນນີ້ຮ້າງເປົ່າ+ຈະບໍ່ມີໃຜພູນດິນແລະຕັດກິ່ງໃຫ້ມັນ
ຈະມີຫຍ້າກັບຕົ້ນໜາມຂຶ້ນເຕັມ+ແລະເຮົາຈະສັ່ງຂີ້ເຝື້ອວ່າ ຢ່າໃຫ້ຝົນຕົກໃສ່ສວນນີ້.+
7 ພວກອິດສະຣາເອນເປັນສວນໝາກລະແຊັງຂອງພະເຢໂຫວາຜູ້ບັນຊາການກອງທັບ.+ພວກຢູດາເປັນຕົ້ນໝາກລະແຊັງທີ່ເພິ່ນເຄີຍມັກຫຼາຍ.*
ເພິ່ນຫວັງຕະຫຼອດວ່າເຂົາເຈົ້າຈະເປັນຄົນຍຸຕິທຳ+ແຕ່ເຂົາເຈົ້າພັດເຮັດສິ່ງທີ່ບໍ່ຍຸຕິທຳ.ເພິ່ນຫວັງຕະຫຼອດວ່າເຂົາເຈົ້າຈະເຮັດສິ່ງທີ່ຖືກຕ້ອງແຕ່ເພິ່ນພັດໄດ້ຍິນສຽງຮ້ອງຂອງຄົນທີ່ຖືກເຂົາເຈົ້າຂົ່ມເຫງ.”+
8 ຜູ້ໃດທີ່ຊື້ເຮືອນຫຼາຍໆຫຼັງ+ແລະຊື້ນາຫຼາຍໆທົ່ງ ຈົນບໍ່ມີຫຍັງເຫຼືອໃຫ້ຜູ້ອື່ນ+ຜູ້ນັ້ນຈະຕ້ອງຈິບຫາຍແລະລາວຈະຕ້ອງຢູ່ໃນແຜ່ນດິນນັ້ນຜູ້ດຽວ.
9 ເຮົາໄດ້ຍິນພະເຢໂຫວາຜູ້ບັນຊາການກອງທັບເວົ້າວ່າເຖິງວ່າເຮືອນເຫຼົ່ານັ້ນຈະໃຫຍ່ແລະງາມແຕ່ກໍຈະບໍ່ມີໃຜຢູ່.ມັນຈະເປັນເຮືອນຮ້າງແລະເປັນຕາຢ້ານ.+
10 ສວນໝາກລະແຊັງທີ່ໃຫຍ່ໆ*ຈະໄດ້ເຫຼົ້າແວງແຕ່ 1 ບັດ*ແລະເຂົ້າວີດ*ທີ່ຫວ່ານ 1 ໂຮເມີ*ຈະໄດ້ຜົນຜະລິດແຕ່ 1 ເອຟາ.*+
11 ຜູ້ທີ່ຕື່ນແຕ່ເຊົ້າໆມາກິນເຫຼົ້າຈະຕ້ອງຈິບຫາຍ.+ເຂົາເຈົ້າບໍ່ເຮັດຫຍັງ ມີແຕ່ນັ່ງກິນເຫຼົ້າແວງຈົນຮອດຄ່ຳ.
12 ເຂົາເຈົ້າໄດ້ກຽມພິນ ເຄື່ອງດົນຕີທີ່ມີສາຍກອງແທມບູຣິນ* ຂຸ່ຍ ແລະເຫຼົ້າແວງຢູ່ງານລ້ຽງຂອງເຂົາເຈົ້າ.ແຕ່ເຂົາເຈົ້າບໍ່ຄິດເຖິງສິ່ງທີ່ພະເຢໂຫວາໄດ້ເຮັດແລະບໍ່ສົນໃຈຜົນງານຂອງເພິ່ນ.
13 ປະຊາຊົນຂອງເຮົາຈະຖືກຈັບໄປເປັນຊະເລີຍຍ້ອນເຂົາເຈົ້າບໍ່ຮູ້ຈັກເຮົາ.+ຄົນທີ່ມີຕຳແໜ່ງສູງຈະອຶດຢາກ+ແລະທຸກຄົນຈະຫິວນ້ຳແຮງ.
14 ບ່ອນຝັງສົບ*ຈະໃຫຍ່ຂຶ້ນແລະມັນຈະອ້າປາກກວ້າງແທ້ກວ້າງວ່າ.+ພວກເຈົ້ານາຍໃນເມືອງເຢຣູຊາເລັມແລະພວກປະຊາຊົນທີ່ມັກຊຸມແຊວຈະຕ້ອງລົງໄປໃນບ່ອນຝັງສົບນັ້ນແນ່ນອນ.
15 ມະນຸດຈະໝູບໜ້າລົງ.ເຂົາເຈົ້າຈະຖືກກົດໃຫ້ຕ່ຳລົງແລະຄົນທີ່ຍິ່ງຈອງຫອງກໍຈະຖືກກົດໃຫ້ຕ່ຳລົງຄືກັນ.
16 ພະເຢໂຫວາຜູ້ບັນຊາການກອງທັບຈະຖືກຍົກໃຫ້ສູງຂຶ້ນຍ້ອນຄວາມຍຸຕິທຳຂອງເພິ່ນ.ພະເຈົ້າທ່ຽງແທ້ຈະເຮັດສິ່ງທີ່ຖືກຕ້ອງ+ເພື່ອສະແດງວ່າເພິ່ນບໍລິສຸດ.+
17 ແກະນ້ອຍຈະໄປກິນຫຍ້າຢູ່ເມືອງທີ່ຮ້າງເປົ່ານັ້ນຄືກັບກິນຢູ່ທົ່ງຫຍ້າຂອງມັນ.ຄົນຕ່າງຊາດຈະກິນຜົນລະປູກທີ່ເກີດໃນບ່ອນທີ່ເຄີຍລ້ຽງສັດທີ່ຕຸ້ຍພີດີງາມ.
18 ຄົນຂີ້ຕົວະຈະຈິບຫາຍ. ເຂົາເຈົ້າຖືກມັດຕິດກັບຄວາມຜິດຂອງໂຕເອງຄືກັບສັດທີ່ຖືກມັດໃສ່ກວຽນ.ເຂົາເຈົ້າໄປທາງໃດກໍຈະແກ່ຄວາມຜິດນັ້ນໄປນຳ.
19 ຄົນເຫຼົ່ານີ້ເວົ້າວ່າ: “ປານໃດເພິ່ນຊິເຮັດວຽກຂອງເພິ່ນໃຫ້ແລ້ວ?ພວກເຮົາຢາກເຫັນໃຈຊິຂາດລະນິ.
ຄວາມຕ້ອງການຂອງພະເຈົ້າອົງບໍລິສຸດຂອງອິດສະຣາເອນຍັງບໍ່ເກີດຂຶ້ນເທື່ອຫວະ!ກະຟ້າວເຮັດໄວໆທະແມ້ ພວກເຮົາຈຶ່ງຊິຮູ້!”+
20 ຜູ້ທີ່ເວົ້າວ່າດີເປັນຊົ່ວ ແລະເວົ້າວ່າຊົ່ວເປັນດີຈະຈິບຫາຍ.+ຜູ້ທີ່ເວົ້າວ່າແຈ້ງເປັນມືດ ແລະເວົ້າວ່າມືດເປັນແຈ້ງກໍຈະຈິບຫາຍແລະຜູ້ທີ່ເວົ້າວ່າຫວານເປັນຂົມ ແລະເວົ້າວ່າຂົມເປັນຫວານກໍຈະຈິບຫາຍຄືກັນ.
21 ຜູ້ທີ່ຄິດວ່າໂຕເອງສະຫຼາດແລະຜູ້ທີ່ຄິດວ່າໂຕເອງສຸຂຸມຮອບຄອບຈະຈິບຫາຍ.+
22 ພວກຄໍທອງແດງແລະພວກທີ່ປະສົມເຫຼົ້າເກັ່ງໆຈະຈິບຫາຍ.+
23 ຜູ້ທີ່ຮັບສິນບົນເພື່ອປ່ອຍຄົນຊົ່ວ+ແລະຜູ້ທີ່ບໍ່ໃຫ້ຄວາມຍຸຕິທຳຕໍ່ຄົນທີ່ເຮັດດີກໍຈະຈິບຫາຍຄືກັນ.+
24 ເຂົາເຈົ້າຈະຖືກທຳລາຍຄືກັບຕໍເຟືອງແລະຫຍ້າແຫ້ງທີ່ຖືກໄຟໄໝ້.ຮາກຂອງເຂົາເຈົ້າຈະເນົ່າແລະດອກຂອງເຂົາເຈົ້າຈະແຕກຊະອອກຄືກັບຂີ້ຝຸ່ນຍ້ອນເຂົາເຈົ້າບໍ່ເຮັດຕາມກົດໝາຍ*ຂອງພະເຢໂຫວາຜູ້ບັນຊາການກອງທັບແລະບໍ່ນັບຖືຄຳສອນຂອງພະເຈົ້າອົງບໍລິສຸດຂອງອິດສະຣາເອນ.+
25 ຍ້ອນແນວນີ້ ພະເຢໂຫວາຈຶ່ງໃຈຮ້າຍໃຫ້ປະຊາຊົນຂອງເພິ່ນແລະເພິ່ນຈະເດ່ມືອອກເພື່ອລົງໂທດເຂົາເຈົ້າ.+
ພູຈະສັ່ນສະເທືອນແລະສົບຄົນຕາຍຈະເປັນຄືກັບຂີ້ເຫຍື້ອຢູ່ຫົນທາງ+
ແຕ່ເພິ່ນກໍຈະບໍ່ເຊົາໃຈຮ້າຍ.ເພິ່ນຈະເດ່ມືອອກເພື່ອລົງໂທດເຂົາເຈົ້າອີກ.
26 ເພິ່ນປັກທຸງ*ເພື່ອໃຫ້ຊາດໜຶ່ງທີ່ຢູ່ໄກໆມາ.+ເພິ່ນຈະຜິວປາກເພື່ອເອີ້ນເຂົາເຈົ້າຈາກບ່ອນທີ່ຢູ່ໄກທີ່ສຸດໃນໂລກ.+ເບິ່ງແມ້! ເຂົາເຈົ້າກຳລັງມາບັກໄວໆ.+
27 ເຂົາເຈົ້າບໍ່ເມື່ອຍແລະບໍ່ສະດຸດຫຍັງ.
ເຂົາເຈົ້າບໍ່ເຫງົານອນ.
ສາຍແອວຂອງເຂົາເຈົ້າກໍຮັດແໜ້ນໆແລະສາຍມັດເກີບຂອງເຂົາເຈົ້າກໍບໍ່ຂາດ.
28 ລູກທະນູຂອງເຂົາເຈົ້າແຫຼມທຸກລູກ.ຄັນທະນູຂອງເຂົາເຈົ້າທຸກຄັນກໍກົ່ງແລະພ້ອມທີ່ຈະຍິງ.
ກີບຕີນມ້າຂອງເຂົາເຈົ້າແຂງຄືກັບຫີນ.*ຕີນລົດຮົບຂອງເຂົາເຈົ້າໝູນໄວຄືກັບພາຍຸ.+
29 ສຽງຮ້ອງຂອງເຂົາເຈົ້າຄືກັບສຽງແຜດຂອງໂຕສິງ.ເຂົາເຈົ້າແຜດສຽງຄືກັບໂຕສິງ.+
ເຂົາເຈົ້າຍິ່ງແຂ້ວ ແລ້ວຄຸບເອົາເຫຍື່ອ.ເຂົາເຈົ້າຄາບເຫຍື່ອນັ້ນໄປ ແລະບໍ່ມີໃຜຊ່ວຍເຫຍື່ອນັ້ນໄດ້.
30 ຫຼັງຈາກທີ່ຄຸບເຫຍື່ອໄດ້ແລ້ວ ເຂົາເຈົ້າຈະຍິ່ງແຂ້ວໃສ່ເຫຍື່ອອີກ.ສຽງຕອນທີ່ຍິ່ງແຂ້ວເປັນຄືກັບສຽງຄື້ນໃນທະເລ.+
ຜູ້ທີ່ແນມເບິ່ງແຜ່ນດິນນັ້ນຈະເຫັນແຕ່ຄວາມມືດແມ່ນແຕ່ຕາເວັນກໍບໍ່ມີແສງ ຍ້ອນມີຂີ້ເຝື້ອມາບັງ.+
ຂໍ ຄວາມ ໄຂ ເງື່ອນ
^ ຫຼື “ປູກ”
^ 4 ເຮັກຕ້າ ຫຼື 25,3 ໄລ່
^ 22 ລິດ. ເບິ່ງພາກຜະໜວກ ຂ14.
^ ເຂົ້າຊະນິດໜຶ່ງທີ່ໃຊ້ເຮັດເຂົ້າຈີ່ໄດ້
^ 220 ລິດ. ເບິ່ງພາກຜະໜວກ ຂ14.
^ 22 ລິດ. ເບິ່ງພາກຜະໜວກ ຂ14.
^ ກອງນ້ອຍທີ່ມີແສ່ງຕິດນຳ
^ ເບິ່ງສ່ວນອະທິບາຍຄຳສັບ
^ ຫຼື “ຄຳສອນ”
^ ຫຼື “ເສົາໃຫ້ສັນຍານ”
^ ຫີນຊະນິດນີ້ແຂງກວ່າເຫຼັກ. ຖ້າເອົາ 2 ກ້ອນມາຂີດໃສ່ກັນມັນຈະເກີດເປັນປະກາຍໄຟແລະໃຊ້ດັງໄຟໄດ້.