ເອຊາຢາ 54:1-17
54 ພະເຢໂຫວາເວົ້າວ່າ: “ເຈົ້າເຊິ່ງເປັນຜູ້ຍິງທີ່ເປັນໝັນແລະບໍ່ເຄີຍເກີດລູກ+ ໃຫ້ຮ້ອງດ້ວຍຄວາມຍິນດີ.
ເຈົ້າທີ່ບໍ່ເຄີຍເຈັບທ້ອງເກີດລູກ+ ໃຫ້ເບີກບານມ່ວນຊື່ນແລະຮ້ອງດ້ວຍຄວາມດີໃຈ+ເພາະວ່າຜູ້ຍິງທີ່ຖືກຜົວຖິ້ມກໍມີລູກຫຼາຍກວ່າຜູ້ຍິງທີ່ຢູ່ນຳຜົວ.*+
2 ໃຫ້ເຮັດເຕັ້ນຂອງເຈົ້າໃຫ້ໃຫຍ່ຂຶ້ນ+
ແລະພືຜ້າເຕັ້ນຂອງເຈົ້າໃຫ້ກວ້າງອອກ.
ຕໍ່ເຊືອກຄຶງເຕັ້ນໃຫ້ຍາວໆໂລດ ຍາວສ່ຳໃດກໍໄດ້ແລະຕອກຫຼິ້ມ*ຍຶດເຕັ້ນໃຫ້ແໜ້ນໆ.+
3 ເຈົ້າຈະຂະຫຍາຍອອກໄປທາງເບື້ອງຂວາແລະເບື້ອງຊ້າຍ.
ລູກຫຼານຂອງເຈົ້າຈະປົກຄອງຊາດຕ່າງໆແລະເຂົາເຈົ້າຈະໄປຢູ່ໃນເມືອງຕ່າງໆທີ່ຮ້າງ.+
4 ບໍ່ຕ້ອງຢ້ານ+ ຍ້ອນວ່າຈະບໍ່ມີໃຜເຍາະເຍີ້ຍເຈົ້າ.+ບໍ່ຕ້ອງຮູ້ສຶກອັບອາຍ ຍ້ອນວ່າສິ່ງທີ່ເຈົ້າຫວັງໄວ້ຈະເປັນຈິງ.
ເຈົ້າຈະລືມຄວາມອັບອາຍຕອນທີ່ເປັນສາວແລະຈະບໍ່ຈື່ຄວາມອັບອາຍຕອນທີ່ເປັນແມ່ໝ້າຍ.
5 ຜູ້ສ້າງທີ່ຍິ່ງໃຫຍ່+ເປັນຄືກັບຜົວຂອງເຈົ້າ.+ພະເຢໂຫວາຜູ້ບັນຊາການກອງທັບແມ່ນຊື່ຂອງເພິ່ນແລະເພິ່ນເປັນພະເຈົ້າອົງບໍລິສຸດຂອງອິດສະຣາເອນທີ່ໄຖ່ເຈົ້າຄືນມາ.+
ເພິ່ນຈະຖືກເອີ້ນວ່າພະເຈົ້າຂອງຄົນທົ່ວໂລກ.+
6 ຕອນທີ່ພະເຢໂຫວາເອີ້ນເຈົ້າ ເຈົ້າເປັນຄືກັບຜູ້ຍິງທີ່ຖືກຖິ້ມແລະເສຍໃຈຫຼາຍ.+ເຈົ້າເປັນຄືກັບຜູ້ຍິງທີ່ແຕ່ງດອງຕັ້ງແຕ່ຕອນເປັນສາວແລ້ວກໍຖືກຖິ້ມ.” ພະເຈົ້າເວົ້າຈັ່ງຊີ້.
7 “ເຮົາຖິ້ມເຈົ້າໄດ້ບຶດດຽວແຕ່ຍ້ອນເຮົາອີ່ຕົນເຈົ້າຫຼາຍ ເຮົາຈຶ່ງພາເຈົ້າກັບຄືນມາ.+
8 ເຮົາໃຈຮ້າຍໃຫ້ເຈົ້າຫຼາຍ ເຮົາຈຶ່ງປິ່ນໜ້າໜີຈາກເຈົ້າໄລຍະໜຶ່ງ.+ແຕ່ຍ້ອນເຮົາມີຄວາມຮັກທີ່ໝັ້ນຄົງຕະຫຼອດໄປ ເຮົາຈຶ່ງອີ່ຕົນເຈົ້າ.”+ພະເຢໂຫວາຜູ້ໄຖ່ເຈົ້າຄືນມາເວົ້າຈັ່ງຊີ້.+
9 “ມັນຈະເປັນຄືກັບສະໄໝຂອງໂນອາ.+
ຕອນນັ້ນ ເຮົາໄດ້ສັນຍາວ່າຈະບໍ່ໃຫ້ມີນ້ຳຖ້ວມໂລກອີກ+ແລະຕອນນີ້ ເຮົາກໍຈະສັນຍາຄືກັນວ່າເຮົາຈະບໍ່ໃຈຮ້າຍຫຼືລົງໂທດເຈົ້າອີກ.+
10 ເຖິງວ່າພູຈະສູນຫາຍໄປແລະໂນນພູຈະຖືກທຳລາຍ.ແຕ່ເຮົາຈະມີຄວາມຮັກທີ່ໝັ້ນຄົງຕໍ່ເຈົ້າຕະຫຼອດໄປ+ແລະຄຳສັນຍາທີ່ວ່າເຮົາຈະຊ່ວຍເຈົ້າໃຫ້ມີຄວາມສະຫງົບສຸກນັ້ນຈະໝັ້ນຄົງ.”+ ພະເຢໂຫວາຜູ້ທີ່ອີ່ຕົນເຈົ້າເວົ້າແບບນີ້.+
11 “ຜູ້ຍິງທີ່ທຸກໃຈ+ທີ່ຖືກພາຍຸຊັດໃສ່ແລະບໍ່ມີໃຜປອບໂຍນ+ເຮົາຈະເອົາຫີນກັບປູນມາກໍ່ເປັນກຳແພງໃຫ້ເຈົ້າແລະເຮົາຈະເອົາແກ້ວໄພລິນມາສ້າງເປັນຮາກຖານໃຫ້ເຈົ້າ.+
12 ເຮົາຈະເອົາແກ້ວພິລາມາສ້າງປ້ອມທີ່ຢູ່ກຳແພງເມືອງໃຫ້ເຈົ້າເອົາແກ້ວທີ່ມີຄ່າມາເຮັດປະຕູເມືອງແລະຈະເອົາເພັດນິນຈິນດາມາເຮັດເຂດແດນໃຫ້ເຈົ້າ.
13 ພວກລູກຂອງເຈົ້າຈະໄດ້ຮັບການສອນຈາກພະເຢໂຫວາ+ແລະຊີວິດຂອງເຂົາເຈົ້າຈະມີແຕ່ຄວາມສະຫງົບສຸກ.+
14 ເຈົ້າຈະຕັ້ງຢູ່ຢ່າງໝັ້ນຄົງຍ້ອນເຈົ້າເຮັດສິ່ງທີ່ຖືກຕ້ອງ.+
ເຈົ້າຈະບໍ່ຖືກຂົ່ມເຫງ.+ເຈົ້າຈະບໍ່ຢ້ານຫຍັງແລະຈະບໍ່ມີສິ່ງໃດເຮັດໃຫ້ເຈົ້າຢ້ານ.ສິ່ງທີ່ເປັນຕາຢ້ານຈະບໍ່ມາໃກ້ເຈົ້າເລີຍ.+
15 ຖ້າມີຄົນມາໂຈມຕີເຈົ້າເຮົາບໍ່ໄດ້ເປັນຜູ້ສົ່ງລາວມາ.
ຜູ້ໃດກໍຕາມທີ່ມາໂຈມຕີເຈົ້າຈະບໍ່ຊະນະ.+
16 ເຮົານິແຫຼະເປັນຜູ້ສ້າງຊ່າງຕີເຫຼັກທີ່ເປົ່າຖ່ານມີໄຟໃຫ້ລຸກແລະທີ່ເຮັດອາວຸດ.
ເຮົານິແຫຼະເປັນຜູ້ສ້າງຄົນທີ່ມັກໃຊ້ອາວຸດນັ້ນເພື່ອທຳລາຍ.+
17 ອາວຸດໃດກໍຕາມທີ່ສ້າງຂຶ້ນມາເພື່ອທຳຮ້າຍເຈົ້າຈະເຮັດຫຍັງເຈົ້າບໍ່ໄດ້+ຄຳເວົ້າໃດກໍຕາມທີ່ເວົ້າໃສ່ຮ້າຍເຈົ້າ ເຈົ້າຈະພິສູດໃຫ້ເຫັນວ່າຄຳເວົ້ານັ້ນບໍ່ແມ່ນຄວາມຈິງ.
ການປົກປ້ອງແບບນີ້ເປັນມໍລະດົກທີ່ເຮົາເຢໂຫວາເອົາໃຫ້ຜູ້ຮັບໃຊ້ຂອງເຮົາແລະເຮົາຖືວ່າເຂົາເຈົ້າເປັນຄົນດີສຳລັບເຮົາ.” ພະເຢໂຫວາເວົ້າຈັ່ງຊີ້.+
