ເອັດຊະຣາ 3:1-13
3 ຫຼັງຈາກພວກອິດສະຣາເອນກັບໄປຢູ່ເມືອງຂອງໂຕເອງແລ້ວ ໃນເດືອນທີ 7+ ເຂົາເຈົ້າກໍມາລວມກັນຢູ່ເມືອງເຢຣູຊາເລັມ.
2 ເຢຊູອາ+ລູກຊາຍຂອງເຢໂຮຊາດັກກັບພວກປະໂລຫິດຄົນອື່ນໆ ແລະເຊຣູບາເບນ+ລູກຊາຍຂອງເຊອານຕີເອນ+ກັບພວກພີ່ນ້ອງຂອງລາວໄດ້ສ້າງແທ່ນບູຊາໃຫ້ພະເຈົ້າຂອງອິດສະຣາເອນ ເພື່ອເຜົາເຄື່ອງບູຊາໃຫ້ເພິ່ນຢູ່ຫັ້ນຕາມທີ່ຂຽນໄວ້ໃນກົດໝາຍຂອງໂມເຊ+ຜູ້ຮັບໃຊ້ຂອງພະເຈົ້າທ່ຽງແທ້.
3 ເຖິງຈະຢ້ານຊາດຕ່າງໆທີ່ຢູ່ອ້ອມຂ້າງ+ ແຕ່ເຂົາເຈົ້າກໍສ້າງແທ່ນບູຊາໄວ້ບ່ອນເກົ່າ. ແລ້ວເຂົາເຈົ້າໄດ້ເລີ່ມເຜົາເຄື່ອງບູຊາໃຫ້ພະເຢໂຫວາຢູ່ແທ່ນນັ້ນທຸກໆມື້ທັງຕອນເຊົ້າແລະຕອນແລງ.+
4 ເຂົາເຈົ້າສະຫຼອງເທດສະການປຸກຕູບ* ແລະໃນແຕ່ລະມື້+ເຂົາເຈົ້າເຜົາເຄື່ອງບູຊາຕາມຈຳນວນທີ່ກົດໝາຍກຳນົດໄວ້.+
5 ນັບຕັ້ງແຕ່ມື້ນັ້ນເປັນຕົ້ນມາ ເຂົາເຈົ້າກໍເຜົາເຄື່ອງບູຊາເຜົາ+ທຸກໆມື້. ເຂົາເຈົ້າເຜົາເຄື່ອງບູຊາສຳລັບມື້ເດືອນອອກໃໝ່+ ເຄື່ອງບູຊາສຳລັບເທດສະການຕ່າງໆ+ຂອງພະເຢໂຫວາ ແລະເຄື່ອງບູຊາທີ່ປະຊາຊົນເອົາມາໃຫ້ພະເຢໂຫວາດ້ວຍຄວາມສະໝັກໃຈ.+
6 ນັບຕັ້ງແຕ່ວັນທີ 1 ຂອງເດືອນທີ 7+ ເຂົາເຈົ້າໄດ້ເລີ່ມເຜົາເຄື່ອງບູຊາໃຫ້ພະເຢໂຫວາເຖິງວ່າເຂົາເຈົ້າຍັງບໍ່ໄດ້ວາງຮາກຖານວິຫານຂອງພະເຢໂຫວາເທື່ອ.
7 ເຂົາເຈົ້າເອົາເງິນໃຫ້ຊ່າງຕັດຫີນ+ກັບຊ່າງໄມ້+ ແລະເອົາຂອງກິນ ເຫຼົ້າແວງກັບນ້ຳມັນໝາກກອກໄປໃຫ້ພວກຊີໂດນແລະພວກຕີເຣ ເພື່ອໃຫ້ເຂົາເຈົ້າມັດໄມ້ຊີດ້າ*ໃສ່ກັນເປັນແພແລ້ວລ່ອງລົງມາໃຫ້ທາງທະເລຈາກເລບານອນຈົນຮອດເມືອງຢົບປາ+ຕາມທີ່ໄຊຣັດກະສັດຂອງເປີເຊຍ+ອະນຸຍາດ.
8 ໃນເດືອນທີ 2 ຂອງປີທີ 2 ຫຼັງຈາກເຂົາເຈົ້າກັບມາວິຫານຂອງພະເຈົ້າທ່ຽງແທ້ທີ່ຢູ່ເມືອງເຢຣູຊາເລັມ ເຊຣູບາເບນລູກຊາຍຂອງເຊອານຕີເອນ ເຢຊູອາລູກຊາຍຂອງເຢໂຮຊາດັກແລະພວກພີ່ນ້ອງຂອງເຂົາເຈົ້າທີ່ເປັນປະໂລຫິດກັບຄົນເລວີ ລວມທັງປະຊາຊົນທຸກຄົນທີ່ກັບມາເມືອງເຢຣູຊາເລັມ+ກໍເລີ່ມສ້າງວິຫານຄືນໃໝ່. ເຂົາເຈົ້າໄດ້ແຕ່ງຕັ້ງຄົນເລວີທີ່ມີອາຍຸ 20 ປີຂຶ້ນໄປໃຫ້ເບິ່ງແຍງວຽກສ້າງວິຫານຂອງພະເຢໂຫວາ.
9 ເຢຊູອາກັບພວກລູກຊາຍແລະພວກພີ່ນ້ອງຂອງລາວ ແລະກັດມີເອນກັບພວກລູກຊາຍຂອງລາວ ເຊິ່ງເປັນລູກຫຼານຂອງຢູດາ*ໄດ້ຊ່ວຍກັນເບິ່ງແຍງຄົນທີ່ເຮັດວຽກສ້າງວິຫານຂອງພະເຈົ້າທ່ຽງແທ້. ລູກຫຼານຂອງເຮນາດາດ+ທີ່ເປັນຄົນເລວີກໍໄດ້ຊ່ວຍເຂົາເຈົ້າເບິ່ງແຍງຄົນເຮັດວຽກຄືກັນ.
10 ເມື່ອພວກຊ່າງກໍ່ສ້າງວາງຮາກຖານວິຫານຂອງພະເຢໂຫວາແລ້ວໆ+ ພວກປະໂລຫິດທີ່ໃສ່ຊຸດປະຈຳຕຳແໜ່ງເຊິ່ງຖືແກ+ ແລະພວກເລວີທີ່ເປັນລູກຫຼານຂອງອາສັບເຊິ່ງຖືແສ່ງກໍມາລວມກັນຮ້ອງເພງສັນລະເສີນພະເຢໂຫວາຄືກັບທີ່ດາວິດກະສັດຂອງອິດສະຣາເອນໄດ້ສັ່ງໄວ້.+
11 ເຂົາເຈົ້າສະຫຼັບກັນຮ້ອງເພງ+ເພື່ອສັນລະເສີນແລະຂອບໃຈພະເຢໂຫວາວ່າ: “ພະອົງດີແທ້ໆ ພະອົງມີຄວາມຮັກທີ່ໝັ້ນຄົງຕະຫຼອດໄປ+ຕໍ່ພວກອິດສະຣາເອນ.” ຈາກນັ້ນ ປະຊາຊົນທຸກຄົນກໍຮ້ອງເພງສັນລະເສີນພະເຢໂຫວາ ຍ້ອນເຂົາເຈົ້າໄດ້ວາງຮາກຖານວິຫານຂອງພະເຢໂຫວາແລ້ວໆ.
12 ເມື່ອເຫັນຮາກຖານຂອງວິຫານ ບາງຄົນທີ່ເປັນປະໂລຫິດ ຄົນເລວີ ແລະຫົວໜ້າໃນຈຸ້ມເຈື້ອຕ່າງໆທີ່ເຖົ້າຫຼາຍແລ້ວເຊິ່ງເຄີຍເຫັນວິຫານຫຼັງເກົ່າ+ໄດ້ພາກັນຮ້ອງໄຫ້ສຽງດັງ. ສ່ວນຄົນອື່ນໆກໍຮ້ອງສຽງດັງດ້ວຍຄວາມດີໃຈ.+
13 ສຽງເຂົາເຈົ້າດັງຫຼາຍ ຂະໜາດຢູ່ບັກໄກໆກໍຍັງໄດ້ຍິນຈົນແຍກບໍ່ອອກວ່າສຽງໃດເປັນສຽງດີໃຈຫຼືສຽງໃດເປັນສຽງຮ້ອງໄຫ້.
