ເອັດຊະຣາ 5:1-17
5 ຕໍ່ມາ ຜູ້ພະຍາກອນຮັກກາຍ+ແລະເຊຄາຣີຢາ+ຫຼານຊາຍຂອງອິດໂດ+ໄດ້ເວົ້າກັບພວກຢິວທີ່ຢູ່ຢູດາແລະຢູ່ເຢຣູຊາເລັມໃນນາມພະເຈົ້າຂອງອິດສະຣາເອນຜູ້ທີ່ຢູ່ນຳເຂົາເຈົ້າ.
2 ຈາກນັ້ນ ເຊຣູບາເບນ+ລູກຊາຍຂອງເຊອານຕີເອນກັບເຢຊູອາ+ລູກຊາຍຂອງເຢໂຮຊາດັກໄດ້ສ້າງວິຫານຂອງພະເຈົ້າຢູ່ເມືອງເຢຣູຊາເລັມຕໍ່. ພວກຜູ້ພະຍາກອນຂອງພະເຈົ້າໄດ້ຢູ່ນຳແລະຊ່ວຍເຂົາເຈົ້າ.+
3 ຕອນນັ້ນ ຕັດເຕນາຍທີ່ເປັນເຈົ້າແຂວງຢູ່ເຂດທາງທິດຕາເວັນຕົກຂອງແມ່ນ້ຳເອິຟາຣາດກັບເຊທາໂບເຊນາຍແລະພວກໝູ່ທີ່ເຮັດວຽກນຳເຂົາເຈົ້າໄດ້ໄປຫາພວກຢິວແລະຖາມວ່າ: “ໃຜອະນຸຍາດໃຫ້ພວກເຈົ້າສ້າງວິຫານຫຼັງນີ້ຕໍ່ໃຫ້ມັນແລ້ວ?”*
4 ເຂົາເຈົ້າຖາມຕໍ່ວ່າ: “ພວກທີ່ເຮັດວຽກຢູ່ນີ້ຊື່ຫຍັງແດ່?”
5 ພະເຈົ້າໄດ້ປົກປ້ອງເບິ່ງແຍງພວກຜູ້ນຳຄົນຢິວ.+ ຕັດເຕນາຍກັບພວກທີ່ຢູ່ຝ່າຍລາວປ່ອຍໃຫ້ພວກຢິວສ້າງຕໍ່ໄປເພື່ອເຂົາເຈົ້າຈະໄດ້ຂຽນຟ້ອງດາຣິອຸດແລະໃຫ້ດາຣິອຸດຂຽນຈົດໝາຍຕອບກັບມາກ່ຽວກັບເລື່ອງນີ້.
6 ນີ້ແມ່ນຈົດໝາຍທີ່ຕັດເຕນາຍເຈົ້າແຂວງຢູ່ເຂດທາງທິດຕາເວັນຕົກຂອງແມ່ນ້ຳເອິຟາຣາດກັບເຊທາໂບເຊນາຍແລະພວກໝູ່ທີ່ເປັນຮອງເຈົ້າແຂວງທີ່ເຮັດວຽກນຳເຂົາເຈົ້າສົ່ງໄປຫາກະສັດດາຣິອຸດ.
7 ເນື້ອໃນຈົດໝາຍຂຽນວ່າ:
“ເຖິງກະສັດດາຣິອຸດ
ຂໍໃຫ້ທ່ານມີຄວາມສຸກ.
8 ພວກເຮົາຢາກບອກໃຫ້ທ່ານຮູ້ວ່າພວກເຮົາໄດ້ໄປແຂວງຢູດາແລະເຫັນວິຫານຂອງພະເຈົ້າອົງຍິ່ງໃຫຍ່. ເຂົາເຈົ້າເອົາຫີນກ້ອນໃຫຍ່ໆສ້າງວິຫານແລະເອົາໄມ້ໃສ່ກຳແພງ. ຄົນທີ່ຢູ່ຫັ້ນເຮັດວຽກເອົາແທ້ເອົາວ່າແລະຫຼາຍສ່ວນກໍແລ້ວໆ.
9 ພວກເຮົາໄດ້ຖາມພວກຜູ້ນຳຄົນຢິວວ່າ ‘ໃຜອະນຸຍາດໃຫ້ພວກເຈົ້າສ້າງວິຫານຫຼັງນີ້ຕໍ່ໃຫ້ມັນແລ້ວ?’+
10 ພວກເຮົາຍັງໄດ້ຖາມຊື່ຂອງເຂົາເຈົ້ານຳເພື່ອຈະຂຽນບອກທ່ານໃຫ້ຮູ້ວ່າພວກຜູ້ນຳມີໃຜແດ່.
11 ເຂົາເຈົ້າຕອບວ່າ ‘ພວກເຮົາເປັນຜູ້ຮັບໃຊ້ຂອງພະເຈົ້າທີ່ປົກຄອງສະຫວັນແລະໂລກນີ້. ພວກເຮົາກຳລັງສ້າງວິຫານທີ່ກະສັດອົງໜຶ່ງທີ່ຍິ່ງໃຫຍ່ຂອງອິດສະຣາເອນເຄີຍສ້າງແຕ່ດົນແລ້ວ.+
12 ແຕ່ຍ້ອນປູ່ຍ່າຕານາຍຂອງພວກເຮົາເຮັດໃຫ້ພະເຈົ້າທີ່ປົກຄອງສະຫວັນໃຈຮ້າຍ+ ເພິ່ນຈຶ່ງໃຫ້ເນບູກາດເນັດຊາ+ກະສັດຂອງບາບີໂລນທຳລາຍວິຫານນີ້+ແລະຈັບປະຊາຊົນໄປເປັນຊະເລີຍຢູ່ບາບີໂລນ.+
13 ໃນປີທຳອິດທີ່ກະສັດໄຊຣັດປົກຄອງບາບີໂລນ ລາວໄດ້ສັ່ງໃຫ້ສ້າງວິຫານຂອງພະເຈົ້າຄືນໃໝ່.+
14 ນອກຈາກນັ້ນ ກະສັດໄຊຣັດໄດ້ເອົາເຄື່ອງໃຊ້ທີ່ເປັນເງິນເປັນຄຳອອກມາຈາກວິຫານຢູ່ບາບີໂລນ ເຊິ່ງເປັນເຄື່ອງໃຊ້ທີ່ເນບູກາດເນັດຊາໄດ້ເອົາມາຈາກວິຫານຂອງພະເຈົ້າຢູ່ເມືອງເຢຣູຊາເລັມແລະເອົາໄປໄວ້ຢູ່ວິຫານໃນບາບີໂລນ.+ ກະສັດໄຊຣັດເອົາເຄື່ອງໃຊ້ເຫຼົ່ານີ້ໄປໃຫ້ເຊັດບັດຊາ*+ທີ່ລາວແຕ່ງຕັ້ງໃຫ້ເປັນເຈົ້າແຂວງ.+
15 ກະສັດໄຊຣັດບອກລາວວ່າ “ໃຫ້ເຈົ້າເອົາເຄື່ອງໃຊ້ທັງໝົດນີ້ກັບໄປໄວ້ຢູ່ວິຫານໃນເມືອງເຢຣູຊາເລັມ ແລະໃຫ້ສ້າງວິຫານຂອງພະເຈົ້າຄືນໃໝ່ໃນບ່ອນທີ່ເຄີຍຢູ່.”+
16 ເມື່ອເຊັດບັດຊາມາຮອດ ລາວກໍວາງຮາກຖານວິຫານຂອງພະເຈົ້າ+ໃນເມືອງເຢຣູຊາເລັມ. ພວກເຮົາສ້າງວິຫານຕັ້ງແຕ່ຕອນນັ້ນ ແຕ່ຍັງບໍ່ທັນແລ້ວເທື່ອ.’+
17 ຖ້າກະສັດເຫັນດີ ຂໍໃຫ້ທ່ານສົ່ງຄົນໄປຄົ້ນເບິ່ງບັນທຶກທີ່ຢູ່ຄັງຊັບສິນໃນວັງຂອງກະສັດຢູ່ບາບີໂລນ ເພື່ອທ່ານຈະຮູ້ວ່າກະສັດໄຊຣັດໄດ້ອອກຄຳສັ່ງໃຫ້ສ້າງວິຫານຂອງພະເຈົ້າຢູ່ເມືອງເຢຣູຊາເລັມຄືນໃໝ່ແທ້ໆບໍ່.+ ເມື່ອທ່ານຕັດສິນໃຈແລ້ວ ຂໍໃຫ້ບອກພວກເຮົາແດ່.”
ຂໍ ຄວາມ ໄຂ ເງື່ອນ
^ ຫຼື “ໃຜອະນຸຍາດໃຫ້ພວກເຈົ້າເຮັດຮ່າງຂອງວິຫານຫຼັງນີ້?”